Ekuma á ɓateki 27 - Ɔngana á Kɛ̌kɛ

Ɓánteki Pɔ́lɔ na Lɔ́ma

¹ Ɓî ɗáɓáphángí gea ɓeoga ka koko na Italía, ɓáombisa Pɔ́lɔ na ɓato á mekakɔ ɓunɛngbo ka njaga á ká ɓakɔta moci á Ɓalɔ́ma, ina akɛ Yulío mmbé ɗátú mɔkɔta á ekombo á ɓato émani nde ɓáɔɔphana «Ekombo á ɓato émani ndea moamɛ á Ɓalɔ́ma.»

² Wa, ɓéokambea ka koko nde ɗátóki na Adaamíti, n'aoga ka ikɔ ɗanga-ɗanga á nji á ka Asía. Mpɔ, ɓéoga. Aisitákɔ nto á ka ntanga-nji á ka Makɛdɔnía, ka nji á Tɛsalɔníka, ɗátú phɔtɔ kimoci na ɓesu.

³ Mama í, ɓéojua ka Sidɔ́na. Wa, Yulíɔ áongea Pɔ́lɔ ánjá. Áonsosea gea, ágɛ ɛ́sɔnɛ ɓadakɛ, ka gea ɓámophɛ kema nde ana siki í.

⁴ Ka mɛa asu wa, ɓéokpangbaga ka kesanga á Kipúɔ ka ɓánga sumbu nde ɗáosinda mosá asu.

⁵ Ɓéokáia oɓenge nkɛkɛɔ á Kilikía na Pamphilía, ɓéojua ka Míla á ka nji Likía.

⁶ Wa, mɔkɔta á ɓato émani ndɔ áodonda koko n'aotóka na Alɛsanduía, n'aoga na Italía, áosokambisa kau.

⁷ Ɗéɓegi esa ásii ɓî koko ɗáotamba ɓokɛ-ɓokɛ, ɓéojua ka ntanga-nji á ka Kinídɔ k'akpɛ phɛɛ. Ɓî sumbu ɗákáosopha aphe ka tútuisa tamba nci ndɔ, ɓɛ́ɔnyɛ́nyɛa ka Salmɔ́nɛ nci á kusi á kesanga á Kɛɛ́tɛ, ɔma nde sumbu ɗákáosinda akpɛ.

⁸ Ɓéokpangbaga ka ɔɓɛɛ k'akpɛ phɛɛ, ɓéojúa ɔma ndɔ ɓáɔɔphana Ikɔ-Ánjá bíbí á ntanga-nji á Lasɛ́a.

⁹ Mbusa á esa ásii, tamba ka koko áoɓá na kɔɓɔɓɔkɔ á kukuwa nga, mbenɔ á ika kángá á eaga ka nyɔngɔ á mɛma á Mokonga ɗányɛ́nyi ye. Kaɓondɔ unge Pɔ́lɔ áɔ̌phɛa ɓatambisigi-koko te,

¹⁰ «Ɓaya, nɛɔni gea tamba nde aɓande ájeɗe, ɓesu ɓeólokande gǎkɛ ka kukuwa, koko na nkumba nde asuɓi í aujukanande phɛɛ.»

¹¹ Cɔ, mɔkɔta á ɓato émani â gǎkɛ ɔmɔ́ka ntambisi-koko na mɛna-koko, kángá ɔ́ka nyɔngɔ nde Pɔ́lɔ ɗáyɔngi.

¹² Cɔ, ɓî ikɔ ndɔ ɗákátú ánjá ka ika á ɓei ka matú á phiɔ, ɓakpa ɓásii á suɓi á koko ɓáoɓeekeana tóka á kó ka gea, kaɓɛ n'atɔtɔkɛani ɓákiɗiɛ na Phɔiníkɛ, ka ɓondeaga á sia á matú á phiɔ kó. Phɔiníkɛ ande ikɔ moci ka kesanga á ka Kɛɛ́tɛ, ɗátú kɔɔnjia nkɛkɛɔ á kusi á oyonga na gǔ á oyonga.

Sumbu aosinda gǔ á oɓenge

¹³ Cɔ, ɓî maphopho ɗáosinda ka toka á kusi, ɓáokanisia te, moangɔ nɛɓɔ atɔtɔkɛanande. Kaɓondɔ, ɓáophúia etae á kigisa á koko, ɓáokpangbaga ka mpɛphɛ á Kɛɛ́tɛ.

¹⁴ Mbusa ábɔa, sumbu akpɛ nnde ɓáɔɔphana «Sumbu á gǔ á okomo» â gǎkɛ osinda, n'aodida ka toka ka mamba-mamba á kesanga.

¹⁵ Sumbu áoɓotea koko. Ɓékétɔkɛ ye unia á koko na sumbu. Kaɓondɔ, ɓéoɗeketa sumbu ásógɛ ně.

¹⁶ Ɓɛ́ɔnyɛ́nya kusi á kesanga ábɔa nnde ɓáɔɔphana Kaúda, ɔma ndɔ sumbu ɗáphɔngi ábɔa. Wa, ɓéounia k'akpɛ miki á koko á amisa.

¹⁷ Ɓî ɓatambisigi-koko ɓákambisi ye miki á koko ndɔ gǔ á koko ángbó mpɔ, ɓáoɓóaga koko ángbó na ngoi ka ɓangisa í na sumbu. Ɓáomaka gbútuka á me nde aophoɓa ka ɔnisa ɓɔ kuɓî ɓáoga. Ka nyɔngɔ nde, ɗáɓáoɓánga kiga gǔ á mbume á ka Libía. Cɔ, ɓáoɗeketa sumbu unge átambisɛ koko.

¹⁸ Sumbu â goto osósuga akpɛ phɛɛ, na ka ɓî ɓatambisigi-koko ɗáɓámakigi ka nkumba k'óɓenge, mama í.

¹⁹ Esa á ko isaɔ, ɓatambisigi-koko ɓáomaka ɓɔ sasaɓɔ nkumba á tambisa á koko.

²⁰ Ɓɛ́kɛɔnɛ ye maní na ɓasɛɛngɔa k'ésa ásii. Ɓî sumbu ɗákádendemani, ɓékéɓɛ ye na mosenda á ama.

²¹ Ɓakpa nde ɗáɓátú suɓi á koko, ɗáɓákáigi ka mbenɔ ásii. Cɔ, Pɔ́lɔ áoma sɔsɔɓɛ aɓɔ, áǒngoɗea te: «Ɓaya, ɗóɓokeni ɔ́ka ani gea, ɓékétokɛmbɛ ka Kɛɛ́tɛ. Ɗátúoɓá n'a ɓó, ámbé nkumba ka kɔndɔkani na ngia anu ka ɓuyɛnɛ ndee.

²² Cɔ, kɛ̌kɛnde, bisani měma anu nga, ka ɓenu moci kákuwɛku. Koko unge abomokande ndiu tɔ.

²³ Kǐpha á kesande, malaéka ndea Mokonga mmbé nende nkpa nɛkɛ phɔtɔ nɛɔmbɛɗaneaga, amokiɗianei,

²⁴ áomongoɗea te: ‹Pɔ́lɔ, koɓɛmbɛ na kɔɓɔɓɔkɔ! Akeni ɓágɛ yɔngisɛ nyɔngɔ nɛkɔ mosá á moamɛ á Ɓalɔ́ma. Ɓî Mokonga akondi gama akɔ, yɛ ěamisande ɓakpa ɓɔbu ɓunde otambí na ɓɔ.›

²⁵ Cɔ, ɓaya, bisani měma anu! Nenseɓei Mokonga, atɔtɔkɛanande ɓíndɔ malaéka ɗámongoɗi.

²⁶ Cɔ, ɓetugbanagande gǎkɛ ka ɔɓɛɛ á ka kesanga moci.»

²⁷ Cɔ, ɗájú ye esa á ko nkama moci na gena (14) kǐpha, na sumbu n'a phɔ́tɔ ɔsɔkɔɓisa k'óɓenge Adiía. Ka gabekana ésa, ɓatambisigi-koko ɓáokanisia te, ɓábîmisi ɔɓɛɛ.

²⁸ Ɓáomaka ngoi á úba á dǔmana á iɓo, ɓáoúba gea dǔmana á iɓo a ɓea mɛ́tɛɛ nkama isaɔ na ngianjaga iɓɛ (37). Ɓáɔsɛkɛɗa mosá ábɔa, ɓáomaka goto, ɓáɔɔna gea dǔmana í a ɓea mɛ́tɛɛ nkama iɓɛ na ngianjaga isaɔ (28).

²⁹ Kaɓondɔ, ɓáomaka ɓ'etae gena á kigisa á koko ka ɓɔɓa, ka ɓánga gea, koko kagbondoɛmbɛ mɛphɛ. Ɓáoɓondeaga gea, somambi esa n'akoɗokani.

³⁰ Ɓatambisigi-koko ɓâ gǎkɛ okaɓa tea suɓi á miki á koko á amisa ka toka suɓi á koko ángbó. Ɓáodidisa miki á koko ndɔ k'óɓenge, ɓáodema gea, ɓáomakea etae á kigisa koko mosá á koko.

³¹ Pɔ́lɔ â gǎkɛ ongoɗea mɔkɔta á ɓato émani na ɓato émani te: «Aoɓá ɓagáa nde na ɓákáiki suɓi á koko, ɓókóamɛku.»

³² Mpɔ, ɓato émani ɓáotena ngoi nde asukíí miki á koko, miki á koko ndɔ áoyoka.

³³ Ka koɗokanaga á esa, Pɔ́lɔ áǒɗengemisaga ɓakpa ɓɔbu gea, ɓáeɛgɛ. Áǒgea te: «Kesande ande esa á nkama na gena (14) nnde ɓoiki kángá á ea ká kema.

³⁴ Cɔ, nenóɗengemisigi, eagani ka gea, ɓókókuwɛmbɛ. Nna tanda na ka ɓenu moci mmbé agɔtɔkanande.»

³⁵ Mbusa á yɔnga á Pɔ́lɔ ɓó, áɔbɛɗa mokati, áombeba Mokonga mosá á ɓakpa ɓɔbu. Mpɔ, áoɓunaga ú, áokpanga eaga.

³⁶ Ɓakpa ɓɔbu ɓáǒkpagisaga ka měma, ɓâ phɔtɔ okpanga eaga.

³⁷ Suɓi á koko, ɗéɓetú ka ɓesu ɓɔbu, ɓakpa mia iɓɛ nkama ngianjaga iɓɛ na ngianjaga (276).

³⁸ Ɓî ɓákuti ye, ɓáomakaga nganɔ ka iɓo, ka phǒmisa á koko.

Koko aíni

³⁹ Esa asé ye, ɓátambisigi-koko ɓákáúbɛ gea ɓá bíbí á ɔɓɛɛ. Ɓî gǎkɛ ɓáɔni isɛ́gɛ, ɓáɔbɛɗa moangɔ á gǎ kengea á dunduisa á koko wa, kaɓɛ n'atɔtɔkɛanande.

⁴⁰ Ɓáokóɗaga ngoi á etae á kigisa á koko, ɓáosaga ú ándiɛ ka iɓo, ɓâ phɔtɔ okoɗa nkái á kětia á koko ka tambisa á koko ánjá. Ɓáɔɓɔɛa gbútuka me á phoɓa nnde aotambisa koko ka me á mosá k'égo. Ɓáokáɓa dunduisa á koko.

⁴¹ Mpɔ, ɓâ gǎkɛ ogbondoa mamba á mbume suɓi á iɓo, ɓɔɓa á koko nci á mosá áɔkpatekana. Nnde á nci á mbusa áokpanga ɓúnuka ka nyɔngɔ á kɛtɛmbɔ akpɛ.

⁴² Ɓato émani ɗáɓáogea, ɓáemowɛ ɓato á mekakɔ ka nyɔngɔ nde, ɗáɓákákondi gea, ka ɓɔ moci kateɛmbɛ n'aɔɔ́ga.

⁴³ Ɓî mɔkɔta á ɓato émani ndea Ɓalɔ́ma ɗákondi ndiu amisa á Pɔ́lɔ, ka ɓondɔ, áoimisia moangɔ nɛɓɔ. Mbusa, áǒsosea ɓundɔ ɓáoúba ɔgá gea, ɓáguiɛ phɔ́ ka iɓo, ɓájabɛ.

⁴⁴ Ɓuangbo ɓáokambea ka phaeka á koko ndɔ aɓúnuki, na ka kema nɛngbo a ka koko ka ɓeá ɓadaɓɔ. Mpɔ, ɓáojaba ɓɔbu ka ɓujɛjɛ.