Ekuma á ɓateki 26 - Ɔngana á Kɛ̌kɛ

Pɔ́lɔ aɔ̌yɔngɛa mosá á Agiípa

¹ Agiípa áongoɗea Pɔ́lɔ te: «Ɓeososi ye tɔ ɔ́yɔngɛ nyɔngɔ nɛkɔ.» Mpɔ, Pɔ́lɔ áomesa njaga akɛ, áokpanga ɛ́yɔngɛa ɓe:

² «Moamɛ Agiípa, nena maseye kesande káɛ́yɔngɛani mosá akɔ gǔ á nyɔngɔ bui nde Ɓayúda ɓámɔtɔngi kau.

³ Nga, oɓɛ sasakɔ ooúba asii bui ndea Ɓayúda ánjá na nyɔngɔ bui nde ɓáopúaga kau. Kaɓondɔ unge, neoɗengemisigi gea ɔ́mɔɔ́ka phɔ́ na měma á phiphiani.»

⁴ «Ɓayúda ɓɔbu ɓáoúba enda ani, kpanga koganda ani. Ɓáoúba phɔtɔ ɓî ɗékpangi tambea sɔsɔɓɛ á ɓato á ka nji nɛmɔ na ka Yɛusalɛ́ma.

⁵ Ɗáɓáomúba kpanga á kala. Aoɓá na ɓákondi, ɓáɔtɔka na ɓáɗigimisi nyɔngɔ nɛmɔ gea nende ka ɓato á esomba nɛsu á Ɓaphaisáyɔ, ɓundɔ ɓáoamba phɛɛ ɛɔphi ndea Ɓayúda.

⁶ Cɔ, kɛ̌kɛnde nemame wani ka ntua á tena á nyɔngɔ nga, nena nseɓeɔ ka mɔkɔ nde Mokonga ɗɛ́ɔku ɓatatasu.

⁷ Ɓato á k'ékuna nɛsu nkama na iɓɛ (12), ɓáseɓei ɔna á tɔtɔkɛana á mɔkɔ kau. Kaɓondɔ unge, ɓáɔmɛma Mokonga na moíngí keiphe n'esa. Moamɛ Agiípa, nyɔngɔ ndɔ ungɔ Ɓayúda ɓámɔtɔngi kau!

⁸ Ka nyɔngɔ sina nde ɓenu Ɓayúda ɓɔɔni gea te, nna tanda ɔtɔtɔkɛana ka Mokonga jujúkisa á ɓasí ka kukuwa?

⁹ Ɗoni, eme sasani ɗékanisi phɔtɔ manisa á ina á Yéso ɓa Najalɛ́ti ka kema bui.

¹⁰ Ɗégi nndɔ ka Yɛusalɛ́ma. Eme sisani ɗéengisisi ɓaɓêki ɓásii ka mekakɔ na kɔkɔta nde ɗétɔí ka ɓagbɛga á ɓatobeigi-phɛ́a. Cɔ, ɓî ɗáɓáotena nyɔngɔ á kukuwa aɓɔ, eme ɗéɓeeki.

¹¹ Mɔngɔ ásii, suɓi éndu bui á madondanɔ ndea Ɓayúda ka nyɔngɔ á Mokonga, ɗéǒtambisaga ɓaɓêki na sosea aɓɔ gea ɓánganɛ ɓeekea nɛɓɔ. Ɗɛ́ɔ̌ɓɛɛa phɛɛ na ka ɓî ɗé phɔtɔ oga ǒtambisaga ka ntanga-nji á ɓakɛni.»

Pɔ́lɔ aɔtɔmiaga mbino á ɓoamia akɛ ka měma

¹² «Cɔ, ɗétú oga na Damasíki ka bɛɗanaga ekuma na kɔkɔta nde ɓagbɛga á ɓatoɓeigi-phɛ́a ɗáɓámopi.

¹³ Moamɛ Agiípa, na ne phɔ́tɔ k'aphe, ka kantende, ɗɛ́ɔni owanga ángbó n'atóki na koba. Owanga ndɔ ɗányɛ́nyi nnde á maní, jegia í áomotimba kimoci na ɓunde ɗétambi na ɓɔ.

¹⁴ Ɓesu ɓɔbu ɓéogua ka oɗo, nɛ́ɔɔ́ka ɛsɔ n'aomongoɗea ka Kiɛbulanía te: ‹Saúlɔ, Saúlɔ, ekende ona mɔ̌ akpɛ ɓea ngɔmbɛ nde nnaotea gbutu á nambi akɛ?›

¹⁵ Eme néongea: ‹Mɔkɔta, onde ani?› Mɔkɔta áomosikisia te: ‹Eme, nende Yéso mmbɔ oɓɛ oontambisaga.

¹⁶ Cɔ, ómesia gǎkɛ, ómamɛgɛ dɛ! Neokiɗianei ka gea, óɓɛ mbɛɗanigi nɛmɔ, óɓɛ phɔtɔ nɗigimisi nɛmɔ ka tɔ̌mia á ɓakpa nengbo kema nde otóki ka ɔna í kesande, na kema nde nekophangiande mbusa.

¹⁷ Nekoamisande ka njaga á ɓakpa nde neoteki mɔtɛ-aɓɔ, Ɓayúda na ɓunde ɓáná Ɓayúda.

¹⁸ Neoteki ka gea ókoɗɛ iso aɓɔ, ka tokisa aɓɔ ka keiphe, ka gea ɓáephaiɛ nci á owanga, phɔtɔ ɓátokɛ kusi á kɔkɔta ndea Sɛtáni, ɓáɓɛ ndiu ɓato á Mokonga. Ka nyɔngɔ nde ɓámoɓeeki, mpɔ Mokonga aímande ɓojeɗe nɛɓɔ, ɓátɔande ɓotukɔ nde Mokonga abisi ka ɓakpa nɛkɛ.›»

Pɔ́lɔ aɔtɔmiaga mbino á ekuma nɛkɛ

¹⁹ «Moamɛ Agiípa, ka nyɔngɔ índɔ unge kɛ́ɓɛnjigi mphaniɔ nde ɗátóki na koba.

²⁰ Cɔ, ɗɛ́phɛí phɔ́ gǎkɛ ɓato á ka Damasíki, mpɔ ɓato á ka Yɛusalɛ́ma, na ɓato á ka nji á Yudɛ́a ɓɔbu, na ɓakpa nde ɓáná Ɓayúda. Ɓɔphɛi ndɔ ɗátú ka gea, ɓákětiɛ tambea aɓɔ ájeɗe, ɓéphaiɛ ka Mokonga, mpɔ ɓáúbisɛ gea, ɓá ye ěkěti.

²¹ Ka phɔa nyɔngɔ ndɔ unge Ɓayúda ɗáɓámodungi na ne suɓi éndu á Mokonga, ɓáogea ɓámomowɛ.

²² Na ka kesande, nemame wani nga, Mokonga ɗámoambi ka gea te, néɓɛ nɗigimisi á nyɔngɔ nɛkɛ mosá á ɓundɔ ɓána ɓoombia, na ɓundɔ ɓáná na ɓoombia. Kɛ́ɔyɔnga nyɔngɔ nde atingani n'índe á ɓaɔtu-nyɔngɔ ndea Mokonga na Mósa ɗáɓáɔtu gea,

²³ atókeni Kiísito átambɛgɛ, áɓɛ nto á k'ama mosá-mosá á jujúka ka kukuwa sɔsɔɓɛ á ɓasí. Yɛ, aɛtɔmiande Ɓayúda na ɓunde ɓáná Ɓayúda nyɔngɔ á ɓoamia ka gea ɓáendɛ suɓi á owanga.»

Pɔ́lɔ aokáɓa Agiípa ámɓeekeɛ Yéso

²⁴ Mbenɔ nde Pɔ́lɔ ɗáɔ̌yɔngea ɓó, Phɛ́sitɔ áonkogea te: «Pɔ́lɔ ca! Ona ganja ee? Goaga akɔ ásii aunge aoyaísi?»

²⁵ Pɔ́lɔ â gǎkɛ onsikisia te: «Mɔkɔta Phɛ́sitɔ, kéna ganja. Nyɔngɔ nde nɛɔyɔnga a ndiu á ɗoni na á kɔɓɔɔngɛ.

²⁶ Moamɛ Agiípa a tɔ oúba nyɔngɔ ndɔ, ka ɓondɔ unge, nɛɔyɔnga kángá á kɔɓɔɓɔkɔ mosá akɛ. Neoúba ɗoni gea, nna na kema nde aoɓosa nga, ka kema kátɔtɔkɛani ka ɓɔsɔmɛa.

²⁷ Cɔ, Moamɛ Agiípa, oɓeeki nyɔngɔ nde ɓaɔtu-nyɔngɔ ndea Mokonga ɗáɓáyɔngi? Neoúba gea, oɓeeki ú.»

²⁸ Mpɔ Agiípa áonsikisia Pɔ́lɔ te: «Ooúba te, ɔɔtɔka n'ɔmɔɓɔngi ka mbenɔ ábɔa néoɓá mokiísito?»

²⁹ Pɔ́lɔ áonsikisia te: «Aoɓá ka mbenɔ ábɔa, kaɓɛ ka mbenɔ ásii, nɛɔmɛma Mokonga. Ɛmɛmi ndɔ nna tɔ ka phɔa akɔ sasakɔ, a ndiu phɔtɔ ka phɔa ɓakpa ɓɔbu ɓunde ɓáɔmɔɔ́ka kesande, ɓáɓɛ ɓea eme. Ɓákanómakeɛmbɛ ndiu ka mekakɔ ɓea eme.»

³⁰ Mpɔ Moamɛ Agiípa, mɔkɔta Phɛ́sitɔ na Bɛɛníkɛ na ɓakpa ɓuangbo ɓunde ɗáɓáiki wa, ɓɔbu ɓáomá.

³¹ Ɓájuani ye, ɓáɔyɔngaga sɔsɔɓɛ aɓɔ te: «Nkpa nde kági ɓojeɗe moci nnde akeni ákuiɛ ú, kaɓɛ makea akɛ ka mekakɔ.»

³² Agiípa áongoɗea Phɛ́sitɔ te: «Atúoɓá nkpa nde na kámɛmi gea Moamɛ á Ɓalɔ́ma aámbé átenɛ tɔ nyɔngɔ nɛkɛ, ámbé atokeni ɓánkoɗɛ.»