Ekuma á ɓateki 25 - Ɔngana á Kɛ̌kɛ

Pɔ́lɔ akondi ɓátenɛ nyɔngɔ nɛkɛ mɔtɛ á moamɛ ndea Ɓalɔ́ma

¹ Esa isaɔ mbusa á Phɛ́sitɔ ɓá mɔkɔta á kenombe, áɔmɛa ka Kaisalía, áoga na Yɛusalɛ́ma.

² Kó, ɓagbɛga á ɓatobeigi-phɛ́a na ɓagbɛga ndea Ɓayúda, ɓáoga ɔntɔnga Pɔ́lɔ mosá á Phɛ́sitɔ

³ gea, ɓáɔni ánjá ɓámbikisɛ ka ɓɔ Pɔ́lɔ na Yɛusalɛ́ma. Nga, ɗáɓáɔ́kani na bisa á ɓakpa k'aphe ka gea, ɓámmowɛ Pɔ́lɔ.

⁴ Mpɔ, Phɛ́sitɔ áǒsikisia te: «Ɓáonamba Pɔ́lɔ na Kaisalía. Eme gǎkɛ, neoga kó sasani kɛ̌kɛnde.

⁵ Cɔ, négɛ na ka ɓagbɛga nɛnu ɓuangbo na Kaisalía. Ɓántɔngɛ kó, aoɓá mogáa ndɔ n'agi ájeɗe.»

⁶ Cɔ, Phɛ́sitɔ ɗáoika kó ɓ'esa ngianjaga isaɔ (8), kaɓɛ nkama (10), áoja na Kaisalía. Ajú ye na Kaisalía, mama í, áoika ka ntua á tena á nyɔngɔ. Áososea gea, ɓámbikɛ na Pɔ́lɔ.

⁷ Ɓî Pɔ́lɔ ajú, Ɓayúda ɓunde ɓátóki na Yɛusalɛ́ma, ɓáontimba, ɓáɔntɔnga akpɛ phɛɛ. Ɓákatɔkɛ gǎkɛ engekisa á koɗoni á ɓojeɗe nde ɓántɔngi kau.

⁸ Mpɔ, Pɔ́lɔ áǒnganea mosá aɓɔ sasakɛ gea: «Kéɓuni tanda ɛɔphi moci ndea Ɓayúda. Kébómi gǎkɛ endu á Mokonga. Kémbómi gǎkɛ Moamɛ á Ɓalɔ́ma.»

⁹ Phɛ́sitɔ, ɓî ɗákondi ékondisaga na Ɓayúda, áomúsia Pɔ́lɔ te: «Okondi gǎ na Yɛusalɛ́ma, nétenɛ nyɔngɔ nɛkɔ bui kó?»

¹⁰ Pɔ́lɔ áonsikisia te: «Negi te, ɓî ne wani ka ntua á tena á nyɔngɔ ndea Moamɛ á Ɓalɔ́ma, atókeni ɓátenɛ nyɔngɔ nɛmɔ wani. Kéegǐí Ɓayúda ɓojeɗe ɓíndɔ oɓɛ sasakɔ ooúba ánjá.

¹¹ Aoɓá na negi ájeɗe, na negi kema nde akeni nékuiɛ ú, kéotea kukuwa. A gǎkɛ oɓá ɓakpa ndɔ na ɓámɔtɔngi kángá koɗoni, nkpa nnaɔtɔka n'amomaki ka njaga aɓɔ. Nɛɔni ánjá Moamɛ á Ɓalɔ́ma aámbé átenɛ nyɔngɔ nɛmɔ.»

¹² Ɓî Phɛ́sitɔ ayɔngigi ye na ɓato á ka ntua nɛkɛ, áonsikisia Pɔ́lɔ te: «Cɔ, ɓî okumi ina á Moamɛ á Ɓalɔ́ma, ogande mosá akɛ.»

Phɛ́sitɔ na Agiípa ɓáoaba ka phɔa Pɔ́lɔ

¹³ Mbusa á esa ábɔa, Moamɛ Agiípa n'áwákɛ Bɛɛníkɛ, ɓáojua ka Kaisalía, k'aphe á sesea á Phɛ́sitɔ.

¹⁴ Ɓî ɗáɓáɗe kó esa ásii, Phɛ́sitɔ áongoɗeaga Moamɛ Agiípa nyɔngɔ gǔ á Pɔ́lɔ te: «Nkpa moci a wani, Phelíki ɗánɗeketi ka mekakɔ.

¹⁵ Mbenɔ nde ɗége na Yɛusalɛ́ma, ɓagbɛga á ɓatoɓeigi-phɛ́a ndea Ɓayúda na ɓagbɛga nɛɓɔ, ɗáɓántɔgi ka gea nétenɛ nyɔngɔ nɛkɛ akpɛ.

¹⁶ Néǒsikisia te: Ɓalɔ́ma ɓákáotenaga nyɔngɔ á nkpa akpɛ na nkpa ndɔ kádondanimbɛ phɔ́ na ɓatɔngi nɛkɛ na áɛyɔngɛɛ sasakɛ ka ntua nɛsu á tena nyɔngɔ ka nyɔngɔ nde ɓántɔngi kau.

¹⁷ Cɔ, ɓî ɗéɓebiki na ɓɔ wani kimoci, kángá iphia, mama í tɔ néoika ka ntua á tena nyɔngɔ. Mpɔ, néososea gea, ɓámbikɛ na mogáa ndɔɔ.

¹⁸ Mbenɔ nde ɓatɔngi nɛkɛ ɓákiɗi, ɓáɔntɔnga, kaɓɛ gǎkɛ na ka nyɔngɔ ájeɗe suɓi í ɓíndɔ ɗéokanisia.

¹⁹ Ɗáɓátú tɔndɔ opúa na yɛ ka nyɔngɔ á esomba nɛɓɔ sasaɓɔ, na ka nyɔngɔ á nkpa moci ina akɛ Yéso, mmbé ɗáku. Pɔ́lɔ ɗági gǎkɛ te, a phɔ́tɔ koenda.

²⁰ Ka nyɔngɔ nde, ɗékéoúba nétenɛ nyɔngɔ kau ɓo. Néomúsia Pɔ́lɔ, aoɓá n'akondi gǎ na Yɛusalɛ́ma ka yɔngisa á nyɔngɔ nɛkɛ kó.

²¹ Wandɔ gǎkɛ, Pɔ́lɔ áokumia ina á Moamɛ á Ɓalɔ́ma gea, yɛ aámbé áyɔngisɛ nyɔngɔ nɛkɛ. Nê gǎkɛ ososea ɓánambɛ na ka ɓî nentekande mɔtɛ-akɛ.»

²² Agiípa áongoɗea Phɛ́sitɔ gea: «Nɛ́ɔ́kɛ phɔ́ mosá ɓoabi á nkpa nde eme sasani.» Mpɔ Phɛ́sitɔ áonsikisia te: «Ɔɔ́kande k'ɛ́sɔ akɛ mama.»

Agiípa aɔɔ́ka nyɔngɔ ndea Pɔ́lɔ

²³ Cɔ, mama í gǎkɛ, Agiípa na Bɛɛníkɛ, ɓáobika, ɓáongia na ɓoombia phɛɛ k'éndu á madondanɔ kimoci na ɓato á emani, na ɓagbɛga á ka ntanga-nji. Phɛ́sitɔ áǒsosea ɓato émani gea, ɓámbikɛ na Pɔ́lɔ.

²⁴ Phɛ́sitɔ áɔyɔnga te: «Moamɛ Agiípa na ɓenu ɓɔbu ɓunde ɓo wani, mɔnani nkpa ndee. Nyɔngɔ nɛkɛ unge Ɓayúda ɓɔbu á ka Yɛusalɛ́ma na wani, ɓádondanigi ka tɔnga akɛ mɔtɛ-amɔ. Ɓáokoga gea kaendɛmbɛ.

²⁵ Eme gǎkɛ, nɛɔni gea, nna na kema nde akeni ákuiɛ. Yɛ, akumi gǎkɛ ina á Moamɛ Kaisáa. Ka nyɔngɔ índɔ unge ɗésuí teka akɛ kó.

²⁶ Ké gǎkɛ na nyɔngɔ aɗoko á ɗunduia Moamɛ Kaisáa ka phɔa akɛ. Kaɓondɔ unge, nembiki ně mosá anu, phɛɛ mosá akɔ oɓɛ moamɛ Agiípa. Ɓî ɓomúsiagande, ambe néɓɛ na nyɔngɔ á ɗundua gǔ akɛ.

²⁷ Nga, nna na kantíti á teka á nto á ka mekakɔ mosá á moamɛ Kaisáa kángá ɗundua á nyɔngɔ á kitɔngi nɛkɛ base.»