Ekuma á ɓateki 24 - Ɔngana á Kɛ̌kɛ

Ɓayúda ɓántɔngi Pɔ́lɔ

¹ Mbusa á ɓ'esa ɓɔku, ngbɛga á ɓatoɓeigi-phɛ́a Ananía, áoga na Kaisalía kimoci na ɓagbɛga ɓuangbo á ɓakpa na n'yɔngɛi moci ina akɛ Tɛɛtúlɔ. Ɓáomama mosá á mɔkɔta Phelíki ka nyɔngɔ á tɔnga á Pɔ́lɔ.

² Ɓáɔmɔphana Pɔ́lɔ, Tɛɛtúlɔ áokpanga tɔnga akɛ ɓe: «Mɔkɔta, ka nyɔngɔ akɔ aunge ɓena ɓujɛjɛ ángbó ndee. Ka bɛɗanaga akɔ na kɔɓɔɔngɛ aunge moangɔ á nji aotamba ánjá ka ɓaniki á nji.

³ Mɔkɔta Phelíki, ɓekophi ɓosegi phɛɛ ka kema bui nde ɓɛɔtɔa ɔma bui.

⁴ Cɔ, kékondi nyɛ́nyisia akɔ mbenɔ ásii, neoɗengemisigi te, ɔ́sɔɔ́ka phɔ́ ka mbenɔ ábɔa.

⁵ Nga, ɓɛmɔni nkpa nde, ande nto á oyombɔ phɛɛ. Aǒyombokisa Ɓayúda ka mokonda bui. Yɛ, ande mɔkɔta á ekombo á Ɓanajalɛ́ti.

⁶ Ɗákengisi phɔtɔ jɔɔkisa éndu á Mokonga, ɓesu ɓéondunga. [Ɗéɓekondi tena á nyɔngɔ nɛkɛ ka ɓeana na ɛɔphi nɛsu,

⁷ mɔkɔta Lusía â gǎkɛ ongama, áɔnkpɔa ka njaga asu.

⁸ Mbusa í, áǒsosea ɓakpa nde ɓántɔngi ɓábikɛ mɔtɛ-akɔ.] Kaɓɛ n'omúsigi mogáa nde, oɓɛ sasakɔ ooúba koɗoni á kema bui nde ɓɛntɔngɛi.»

⁹ Ɓayúda ɓâ phɔtɔ osoea nyɔngɔ nɛkɛ gea: «Ande ɗoni.»

Pɔ́lɔ aɔyɔnga mosá á mɔkɔta Phelíki

¹⁰ Mbusa, mɔkɔta Phelíki áonsosea Pɔ́lɔ na njaga ka gea áyɔngɛ, áonsikisia te: «Neoúba gea, onde nteni-nyɔngɔ á k'ékuna nde ka ɓasaga ɓásii. Kaɓondɔ, nena maseye ka měma ka ngoɗea akɔ nyɔngɔ á ka phɔa ani.

¹¹ Cɔ, oɓɛ sasakɔ ɔtɔkande engekisa í nga, kányɛ́nyimbɛ ɓ'esa nkama moci na ɓaɓɛ (12) ɓî ɗéjú ka Yɛusalɛ́ma k'aphe á beba á Mokonga.

¹² Ɓakpa nde ɓákámɔɔni tanda na neopúa na nkpa, kaɓɛ n'ande suɓi éndu á Mokonga, kaɓɛ k'éndu á madondanɔ ndea Ɓayúda ka nyɔngɔ á Mokonga na ka ntanga-nji. Ɓákámɔɔni phɔtɔ na neǒyombokisa usɛsɛ á ɓakpa.

¹³ Ɓákáɔtɔka na ɓákophangisi koɗoni á nyɔngɔ nde ɓámɔtɔngi kau kɛ̌kɛnde.

¹⁴ Nyɔngɔ nde neɓeeki gǎkɛ mosá akɔ a ɓe: Nɛɔmbɛɗanɛaga Mokonga ndea ɓatatasu na ɓeá aphe nde ɓági ande á odemayɔ. Neɓeeki gǎkɛ nyɔngɔ bui nde ɓáɗundu suɓi á ɓuku ɛ́ɔphi ndea Mósa, na suɓi á ɓuku ndea ɓaɔtu-nyɔngɔ ndea Mokonga.

¹⁵ Nena nseɓeɔ ka Mokonga, ɓíndɔ ɓakpa ndɔ ɓá ně gea, ɓakpa ɓ'ánjá na ɓakpa ɓ'ájeɗe ɓɔbu ɓájujukande ka kukuwa.

¹⁶ Kaɓondɔ unge, neogea ɓukpɛkpɛ ani esa bui, néɓɛ kángá kisɛki ka měma mosá á Mokonga na mosá á ɓakpa.

¹⁷ Cɔ, ɓî ɗékétú ka Yɛusalɛ́ma ka ɓasaga ɓásii, ɗébiki goto ka nyɔngɔ á gaba á imɔna ka ɓato-ékuna nɛmɔ, na phúia ɔ́phɛ́ɔ.

¹⁸ Ɗáɓámodondi wa, mbenɔ nde ɗétú osokosea měma ani suɓi éndu á Mokonga. Cɔ, usɛsɛ, n'oyombɔ á ɓakpa ɗákátú gǎkɛ ɓei.

¹⁹ Ka Ɓayúda á ka nji á ka Asía ɓáunge ɗáɓátú wa. Ɓɔ, ɓáunge ɓátókeni tɔnga ani mosá akɔ kaɓɛ na ɗáɓátú na nyɔngɔ ka phɔa ani.

²⁰ Ɓakpa nde ɓá wani, ɓá yɔngɛ phɔ́ ɓojeɗe sina nde ɗáɓáɔni k'eme, mbenɔ nde ɗétú mosá á ntua ángbó á ɓɔphɛi,

²¹ na nna tɔ nyɔngɔ nde ɗéyɔngi na nemamege mosá aɓɔ n'ɛsɔ akpɛ gea te: ‹Ka nyɔngɔ á jujúka á ɓasí ka kukuwa aunge ɓáotena nyɔngɔ nɛmɔ kesande!›»

²² Cɔ, ɓî Phelíki ɗáengekisi ánjá nyɔngɔ á aphe ndea Mɔkɔta, áososea gea ɓátenɛ nyɔngɔ ndɔ esa nɛngbo, áogea te: «Netenande nyɔngɔ nɛnu mbenɔ nde mɔkɔta á ɓato émani Lusía ajuande.»

²³ Mpɔ, áonsosea mɔkɔta á ɓato émani gea, ánambɛ Pɔ́lɔ ka mekakɔ, ánɗeketeɛ phɔtɔ mbenɔ, kaɓɛmbɛ gǎkɛ na nkpa nde aǒimisia ɓadakɛ ka enga akɛ.

Pɔ́lɔ aɔyɔnga mosá á Phelíki na nkakɛ Duusíla

²⁴ Mbusa á esa ábɔa, Phelíki áombika na nkakɛ Duusíla, mmbé ɗátú Moyúda. Áogea ɓámɔphanɛ kakɛ Pɔ́lɔ, ka gea áɔ́kɛ nyɔngɔ nde aɔyɔnga ka phɔa á ɓeekea á Kiísito Yéso.

²⁵ Ɓî Pɔ́lɔ ɗátú ɔyɔnga nyɔngɔ á koɗoni, ɛngɛpha na tena á nyɔngɔ akpɛ nde abikaeka, Phelíki áoɓá na kɔɓɔɓɔkɔ. Áongea Pɔ́lɔ te: «Ka kɛ̌kɛnde, gǎ phɔ́! Nɛkɔɔphanande goto mbenɔ nɛngbo.»

²⁶ Ɗá phɔtɔ oseɓea gea, Pɔ́lɔ amophande imɔna. Kaɓondɔ unge, ɗáɔmɔphanaga Pɔ́lɔ ka yɔngaga na yɛ.

²⁷ Mbusa á ɓasaga ɓaɓɛ, Pɔɔkíɔ Phɛ́sitɔ áɔmpɛna Phelíki. Phelíki ɗákondi ékondisaga na Ɓayúda, ka ɓɔndɔ áonɗeketa Pɔ́lɔ ka mekakɔ.