Ekuma á ɓateki 23 - Ɔngana á Kɛ̌kɛ

¹ Pɔ́lɔ áǒtúmia ɓato á ka ntua ángbó á ɓɔphɛi n'íso, áǒgea te: «Ɓaya, ka enda ani bui, měma ani na tambea ani aánjá mosá á Mokonga.»

² Cɔ, ngbɛga á ɓatoɓeigi-phɛ́a Ananía áǒsosea ɓakpa nde ɗáɓátú bíbí á Pɔ́lɔ gea, ɓámɓɛtɛgɛ Pɔ́lɔ k'aphenɔkɔ.

³ Mpɔ Pɔ́lɔ áongea Ananía te: «Mokonga aámbé akɔɓɛtande oɓɛ nto á mbɛa! Nga, oikíí tena á nyɔngɔ nɛmɔ n'ogbau ɛɔphi gea, ɓámɔɓɛtɛgɛ!»

⁴ Ɓundɔ ɗáɓátú bíbí á Pɔ́lɔ, ɓáogea: «Ca! Ngbɛga á ɓatoɓeigi-phɛ́a aámbɔ oombóma!»

⁵ Pɔ́lɔ áǒsikisia te: «Ɓaya, kétóoúba gea ande ngbɛga á ɓatoɓeigi-phɛ́a nga, ɓáɗundu suɓi á Ɓuku á Mokonga gea: ‹Kɔn'yɔngɛɛ mɔnɔ mɔkɔta á ɓakpa nɛkɔ ájeɗe.›»

⁶ Ɓî Pɔ́lɔ ɗáúbi gea ka ɓato á ka ntua ndɔ ɗáɓátú Ɓaphaisáyɔ, ɓuangbo gǎkɛ Ɓasadukáyɔ, mpɔ áɔyɔnga k'ɛ́sɔ akpɛ ka ntua ndɔ gea: «Ɓaya, nende Mophaisáyɔ, muna Ɓaphaisáyɔ. Ɓáotena nyɔgɔ nɛmɔ akpɛ ka nyɔngɔ nde, ɓena nseɓeɔ ka nyɔngɔ á jujúka á ɓasí ka kukuwa.»

⁷ Ɓî ayɔngi ye ɓó, sani áokpanga sɔsɔɓɛ á Ɓaphaisáyɔ na Ɓasadukáyɔ, ɓato á ka ntua ndɔ ɓáokatanaga.

⁸ Nga, Ɓasadukáyɔ ɓáɔyɔnga nɛɓɔ gea: «Nkpa aokuwa, kajujúkɛ ka kukuwa. Ɓamalaéka ɓáná ɓei, ɓaketi ɓáná phɔtɔ ɓei.» Ɓaphaisáyɔ ɓáɓeeki gǎkɛ nyɔngɔ ndɔ bubui.

⁹ Kaɓondɔ, eongo áoɓá phɛɛ, mpɔ, ɓaɗundu-ɛɔphi ɓunɛngbo ɓundɔ ɓá ka ketoto á Ɓaphaisáyɔ, ɓáoma, ɓáoyá na měma moci gea: «Ɓɛ́kɛ́ɔɔna ɓojeɗe ka nkpa ndee. Kaɓɛ n'ande nketi aámbé áɔyɔnga, kaɓɛ malaéka, ɓékéoúba.»

¹⁰ Ɓî eongo ɗátú ye akpɛ, mɔkɔta á ɓato émani áoɓánga gea, ɓakpa ndɔ ɓáncoagande Pɔ́lɔ. Kaɓondɔ, áǒsosea ɓato émani gea, ɓágɛmbɛɗɛ Pɔ́lɔ sɔsɔɓɛ aɓɔ, ɓángɛ ně ka ɓogaɔ á ɓato émani.

¹¹ Kǐpha ndɔ, Mɔkɔta áonkiɗianea, áongea te: «Pɔ́lɔ, bisa měma akɔ! A tɔ ɓíndɔ oɗigimisi nyɔngɔ nɛmɔ ka Yɛusalɛ́ma, aunge akeni phɔtɔ óɗigimisɛ ú ka Lɔ́ma.»

Ɓayúda ɓáoca nyɔngɔ á mowa á Pɔ́lɔ

¹² Cɔ, mama í kamɓimba, Ɓayúda ɓuangbo ɓáɔɔ́kana sasaɓɔ ka noa esomba gea, ɓákáeɛgɛku na noa, na ɓákámowembɛ Pɔ́lɔ.

¹³ Ɓakpa nde ɗáɓánce Pɔ́lɔ, ɗáɓányɛ́nyi nkama gena (40).

¹⁴ Ɓɔ, ɓáoga mɔtɛ á ɓagbɛga á ɓatobeigi-phɛ́a na ɓagbɛga, ɓáǒngoɗea te: «Ɓesu, ɓɛɔ́kani ka noa esomba gea, ɓékéɛgɛku na ɓékémowembɛ Pɔ́lɔ.

¹⁵ Cɔ, kɛ̌kɛnde, ɓenu kimoci na ɓagbɛga á ka ntua ángbó á ɓɔphɛi, ɔ́kanani ka mɛma á mɔkɔta á emani gea, ámbikɛ na Pɔ́lɔ, ka nyɔngɔ nde ɓoogea ɓóengekisɛ nyɔngɔ nɛkɛ. Ka ɓesu gǎkɛ ɓe ye ɓɔngisigi mowa akɛ mosá á kiɗia akɛ wani.»

¹⁶ Cɔ, mɔyɛnakɛ na Pɔ́lɔ â gǎkɛ ɔɔ́ka maca ndɔ, áoga ka ɓɔgaɔ á ɓato á emani, áongia, áɔntɔmia Pɔ́lɔ mbino ndɔɔ.

¹⁷ Mpɔ, Pɔ́lɔ áɔmɔphana mɔkɔta á ɓato émani moci, áongea te: «Ngǎ na moganda nde mɔtɛ á mɔkɔta nɛnu nga, ana nyɔngɔ á ngoɗea akɛ.»

¹⁸ Mɔkɔta á ɓato émani ndɔ áonga ně mɔtɛ á mɔkɔta nɛɓɔ áongoɗea te: «Nto á mekakɔ Pɔ́lɔ, atɔ́mɔɔphani, áomongoɗea gea, némbikɛ na moganda nde mɔtɛ-akɔ nga, ana nyɔngɔ á ngoɗea akɔ.»

¹⁹ Mɔkɔta á ɓato émani áondunga moganda ndɔ ka njaga, áonga ně ka mpɛphɛ, áomúsia te: «Cɔ, nyɔngɔ sina oně ka ngoɗea ani?»

²⁰ Moganda áonsikisia te: «Ɓayúda ɓáɔ́kani ka mɛma akɔ Pɔ́lɔ mama gea, ágɛ ka ntua ángbó á tena á nyɔngɔ. Ɓɔ́ ɓáogea ɓea ɓakpa nde ɓáokáɓa engekisa á nyɔngɔ nɛkɛ.

²¹ Kóɓeekeɛmbɛ gǎkɛ nyɔngɔ nɛɓɔ nga, ɓuangbo ɓɛ́sɔmɛani k'aphe, ɓányɛ́nyi nkama gena (40). Ɓánu esomba gea, ɓákáeɛgɛku na noa na ɓákámowembɛ Pɔ́lɔ. Cɔ, kɛ̌kɛnde ɓá ye ěɓɔngisigi ka kema bui, ɓáɓondi ye tɔ moangɔ nɛkɔ.»

²² Mɔkɔta á ɓato émani áongoɗea moganda ndɔ gea: «Kɔ́ntɔ̌miɛgɛ mɔnɔ nkpa gea, omongoɗi nyɔngɔ ndee.» Áonjisa.

Ɓánge na Pɔ́lɔ mɔtɛ á Phelíki

²³ Mpɔ, mɔkɔta á ɓato émani áɔ̌ɔphana ɓakɔta á ɓato émani ɓaɓɛ, áǒngoɗea gea: «Ódondanisani ɓato émani mia iɓɛ (200) na ɓunde ɓákambeande gǔ á ɓanyama nkama ngianjaga iɓɛ (70), na ɓato á ekonga mia iɓɛ (200). Ɔ́ɓɔngisiagani nga, ɓo ka tamba ka gǎ na Kaisalía. Ɓɔmɛande ka mbenɔ á ko isaɔ á kǐpha.

²⁴ Óbisani phɔtɔ ɓanyama á kumba á ɓakpa. Ɓónkambisɛ Pɔ́lɔ gǔ á nyama na ɓóngɛ ně mɔtɛ á mɔkɔta á nji, ina akɛ Phelíki. Cɔ, ɓóúbambɛ onamba ánjá phɛɛ ka gea, nkpa kankambɛmbɛ na kema k'aphe.»

²⁵ Mpɔ, áoɗundua ɓaoɓa ɓe:

²⁶ «Eme Kɔɔdíɔ Lusía, nekosesi oɓɛ mɔkɔta Phelíki, mɛna-ɓoombia phɛɛ, samba.

²⁷ Cɔ, Ɓayúda ɗáɓándungi nkpa nde, ɓáogea ɓámowɛ. Ɓî ɗɛ́ɔ́ki gea, ande nto á ka Lɔ́ma, eme na ɓato émani ɓéoga onamisa.

²⁸ Kaɓondɔ, ɗékondi úba á nyɔngɔ nde Ɓayúda ɗáɓántɔngɛi. Néonga ně mosá á ntua nɛɓɔ ángbó á ɓɔphɛi.

²⁹ Ɗɛ́ɔni gea, ɗáɓántɔngi ka nyɔngɔ ɛ́ɔphi nɛɓɔ tɔndɔ. Ɗákági gǎkɛ ɓojeɗe nde ɗákeni kuia í, kaɓɛ makea akɛ ka mekakɔ.

³⁰ Ɓî ɗɛ́ɔ́ki gea, Ɓayúda ɓáonca ka mowa akɛ, néokamisaga teka akɛ mɔtɛ-akɔ. Néǒsosea gǎkɛ ɓatɔngi akɛ gea, ɓágɛ yɔngɛ nyɔngɔ nɛɓɔ mosá akɔ.»

³¹ Mbusa, ɓato émani ɓáogea ɓíndɔ mɔkɔta ɗáesosi, ɓáɔmbɛɗa Pɔ́lɔ, ɓáonga ně kǐpha ndɔ na Antipatíi.

³² Mama í, ɓato émani ɓundɔ ɓátambi n'ecinji, ɓáoja suɓi á ɓogaɔ nɛɓɔ. Ɓatambi gǔ á ɓanyama ɓáotútuisa tamba kimoci na Pɔ́lɔ.

³³ Ɓî ɓájú ka Kaisalía, ɓatambi gǔ á ɓanyama ɓáomopha mɔkɔta ɓaoɓa, ɓâ phɔtɔ ombisa Pɔ́lɔ ka njaga akɛ.

³⁴ Ɓî mɔkɔta atangi ye ɓaoɓa ndɔ, áomúsiaga Pɔ́lɔ ina á nji nɛkɛ, áoúba gea, ande nto á ka Kilikía.

³⁵ Áongea te: «Nekoúsiagande mbenɔ nde ɓatɔngi nɛkɔ ɓákiɗiande.» Mpɔ áososea gea ɓánambɛ Pɔ́lɔ k'éndu ndea Moamɛ Ɛlɔ́dɛ.