Ekuma á ɓateki 22 - Ɔngana á Kɛ̌kɛ

¹ «Cɔ, ɓadani na ɓabɛ, ɔ́kani phɔ́ ɓoabi nɛmɔ ka phɔani.»

² Ɓî ɓáɔ́ki n'aɔyɔnga na ɓɔ ka Kiɛbulanía, ɓáodakana phio! Mpɔ, Pɔ́lɔ áɔyɔnga gea:

³ «Eme, nende Moyúda, nɛɓɔkɔtɛani ka Táasɔ, ntanga-nji moci á ka Kilikía. Nɛmɔti gǎkɛ ka ntanga-nji á ka Yɛusalɛ́ma. Ka njaga á Gamaliɛ́li aunge negoigi ámbá ɛ́ɔphi ndea ɓatatasu bîbíbí, néoɓá nto á moíngí ka Mokonga ɓea ɓenu ɓɔbu kesande.

⁴ Ɗéǒtambisaga ɓundɔ ɗáɓáoɓea aphe ndea Yéso na ɓî ɗáɓáokuwa. Ɗéǒdunga ɓǒko, phɔtɔ na ɓake, néǒɓóaga na makea á ɓɔ ka mekakɔ.

⁵ Ngbɛga á ɓatoɓeigi-phɛ́a na ɓagbɛga ɓɔbu á ka ntua, ɓákeni phɔtɔ ɗigimisa gea, nɛɔyɔnga ɗoni. Nga, ɓɔ ɓáunge ɗáɓámopi ɓaoɓa ndea ɓadasu Ɓayúda ɓundɔ á ka Damasíki gea, néedungɛ ɓaɓêki ndɔ, nébikɛ na ɓɔ ka Yɛusalɛ́ma k'aphe á ɓinda aɓɔ.

Pɔ́lɔ aɔtɔmiaga aphe nde ɗámɓeeki ně Yéso

⁶ Na ne phɔ́tɔ k'aphe, néobîmisia Damasíki. Ka kantende, mɔngɔ moci, owanga ángbó ɗátóki na koba, jegia í áomotimba.

⁷ Néogua ka oɗo, nɛ́ɔɔ́ka ɛsɔ n'aomogea te: ‹Saúlɔ, Saúlɔ! Nyɔngɔ sina nde oomotambisaga kau?›

⁸ Néomúsia te: ‹Mɔkɔta, onde ani?› Áomosikisia te: ‹Nende Yéso ɓa Najalɛ́ti mmbɔ oontambisaga.›

⁹ Cɔ, ɓakpa nde ɗétú na ɓɔ ɗáɓáɔni owanga ndɔ, ɓákáɔ́kɛ ndiu ɛsɔ á nkpa nde ɗáɔyɔnga n'eme.

¹⁰ Mpɔ néoúsia gea te: ‹Mɔkɔta, négeɛ ɓo?› Mɔkɔta áomosikisia te: ‹Má, ógɛ na Damasíki. Kó unge ɓákongoɗeagande kema bui nde akeni ógeɛ ú.›

¹¹ Cɔ, ɓî ɗékétúkɔɔnapha ka nyɔngɔ á bɛnya á owanga ndɔ, ɓadani ɓáomodunga ka njaga, ɓáomoga ně na Damasíki.

¹² Cɔ, nkpa moci ɗátú kó, ina akɛ Ananía. Yɛ, ɗátú mɓángi-Mokonga na ɗátúoamba ɛɔphi ndea Mósa phɛɛ. Ɓayúda ɓɔbu ɓunde ɗáɓáiki ka Damasíki ɗáɓáombeba phɛɛ.

¹³ Áomobikia, áoika ka mpɛphɛ ani, áomongoɗea te: ‹Moko Saúlɔ, ɔnapha goto.› Kɛ̌kɛndɔ tɔ, nê goto ɔɔnapha na ɔna akɛ.

¹⁴ Yɛ áomongoɗea te: ‹Mokonga ndea ɓatatasu ɗákɔsɔmbu gea, óubɛ kema nde akondi na ɔna á Nto á ɗoni, na ɔ́ɔ́kɛ ɛsɔ akɛ sasakɛ.

¹⁵ Nga, oɓande nɗigimisi nɛkɛ mosá á ɓakpa ɓɔbu, ka tɔ̌mia á kema nde ɔɔni, n'índe ɔɔ́ki.

¹⁶ Cɔ, kɛ̌kɛnde, kema sina nde ooɓondea? Má, ɓáoɓatisɛ, ɔ́mɛmɛ Mokonga ka gea te, áímɛ ɓojeɗe nɛkɔ.›

Pɔ́lɔ aɔtɔmiaga ɓî Mokonga ɗánteki ka ɓakpa nde ɓáná Ɓayúda

¹⁷ Esa moci mbusa á ja ani na Yɛusalɛ́ma, ɗɛ́ɔmɛma Mokonga suɓi éndu á Mokonga. Wa, nɛ́ɔɔna mphaniɔ.

¹⁸ Ka mphaniɔ ndɔ, Nɛ́ɔmɔna Mɔkɔta, áomongoɗea ɓe: ‹Cɔ, Kamisaga! Tóka ka Yɛusalɛ́ma kɛ̌kɛnde nga, ɓato á ka nji nde ɓákáɓeekeɛku nyɔngɔ nɛkɔ nnde ɔyɔngande wani ka phɔa ani.›

¹⁹ Nê gǎkɛ ɔyɔnga te: ‹Mɔkɔta, ɓáoúba gea, ɗéogaga k'éndu moci-moci á madondanɔ ndea Ɓayúda ka nyɔngɔ á Mokonga, ka makisa á ɓaɓêki nɛkɔ ka mekakɔ na ɓindisa á ɓɔ.

²⁰ Mbenɔ nde ɗáɓámowe Sɛtɛphánɔ mmbé ɗátú nɗigimisi nɛkɔ, eme ɗétú ɓei. Ɗéɓeeki kukuwa akɛ, néoamba bɔngɔ ndea ɓundɔ ɗáɓáommowa.›

²¹ Mpɔ Mɔkɔta áomogea: ‹Gǎ tɔ nga, eme, nekotekande ɗanga ka ɓakpa nde ɓáná Ɓayúda.›»

Pɔ́lɔ aɔyɔngaga na mɔkɔta á ɓato émani á Ɓalɔ́ma

²² Ɓakpa ɓáɔɔ́ka nyɔngɔ nde Pɔ́lɔ ɗáɔyɔnga na ka ɓî ɗáge ɔyɔnga nyɔngɔ á ɓato á k'ékuna nɛngbo, mpɔ ɓáokoga n'ɛsɔ akpɛ gea: «Nímani mogáa ndɔɔ, kákeni áendɛ ka mokonda ndee.»

²³ Ɓáokoga akpɛ phɛɛ, ɓáomakaga bɔngɔ nɛɓɔ, ɓáophanjaga kemungɛ ka mpɛna.

²⁴ Mɔkɔta á ɓato émani áososea gea, ɓángisɛ Pɔ́lɔ suɓi á ɓogaɔ á ɓato émani, ɓámɓindɛ, ka gea Pɔ́lɔ áúbisɛ base cina á kema nde ɓakpa ɓáonkogea kau.

²⁵ Cɔ, ɓî ɗáɓáomɓóaga na ngoi, Pɔ́lɔ â gǎkɛ ongoɗea mɔkɔta á ɓato émani mmbɔ ɗátú wa gea: «Aoɓá nkpa n'ande Mɔlɔ́ma, ona kɔkɔta á ɓinda akɛ na ɓákátenimbɛ nyɔngɔ nɛkɛ?»

²⁶ Ɓî mɔkɔta á ɓato émani ndɔ aɔ́ki ye ɓó, áoga ɔntɔmia mɔkɔta nɛkɛ, áongea te: «Nkpa nde ande Mɔlɔ́ma! Cɔ, oogea ógeɛ ɓo?»

²⁷ Mɔkɔta áɔnsɛkɛɗɛa Pɔ́lɔ, áomúsia te: «Ómongoɗea phɔ́, onde Mɔlɔ́ma?» Áonsikisia te: «Eya!»

²⁸ Mɔkɔta áongea te: «Eme ɗéphendi imɔna ásii phɛɛ gea, néɓɛ Mɔlɔ́ma.» Pɔ́lɔ áonsikisia te: «Eme nende nɛmɔ Mɔlɔ́ma á ɓɔkɔtɛana.»

²⁹ Kɛ̌kɛndɔ, ɓunde ɗáɓátú ogea ɓámɓindɛ Pɔ́lɔ ɓáǒjujia. Mɔkɔta â phɔtɔ oɓánga nga, ɗásosi ɓámɓóegɛ Pɔ́lɔ n'ande Mɔlɔ́ma.

Pɔ́lɔ a mosá á ntua ángbó á ɓɔphɛi ndea Ɓayúda

³⁰ Mama í, mɔkɔta á ɓato émani ndea Lɔ́ma ɗákondi engekisa á nyɔngɔ sina nde Ɓayúda ɓántɔngɛi Pɔ́lɔ. Kaɓondɔ, áonkóɗisisa Pɔ́lɔ ngoi, áǒsosea ɓagbɛga á ɓatoɓeigi-phɛ́a na ɓateni-nyɔngɔ ɓɔbu ndea Ɓayúda gea, ɓádondanɛ. Mpɔ, áombika na Pɔ́lɔ, áombisa mosá aɓɔ.