Ekuma á ɓateki 21 - Ɔngana á Kɛ̌kɛ

Pɔ́lɔ age na Yɛusalɛ́ma

¹ Mbusa á katana asu na ɓɔ, ɓéokambea ka koko, ɓɛ́ɔnyɛ́nya mpongo na Kɔ́si. Mama í, ɓéojua ka Lɔ́dɔ. Tóka á wa, ɓéojua ka Patáa.

² Wa, ɓéodonda koko moci nnde ɗáokáia na Phɔiníki, ɓê phɔtɔ okambea kau, ɓéoga.

³ Ka bîmisia asu Kipúɔ, ɓéoɗeketa ú njaga á nkei, ɓɛ́ɔgɛndɛa nkɛkɛɔ á Sulía, ɓéokia ka Tílɔ. Nga, kó unge ɗáɓáokisa nkumba á suɓi á koko.

⁴ Wa, ɓéǒdonda ɓagoigi, ɓéoika na ɓɔ pɔsɔ moci. Ka ɓukpɛkpɛ á Měma á kanga ɓojeɗe, ɓáongoɗea Pɔ́lɔ te, kagɛ mɔnɔ na Yɛusalɛ́ma.

⁵ Ɓî ɓegɔɓi ye pɔsɔ ndɔ, ɓê gǎkɛ ɔmɛa. Ɓaɓeeki ɓɔbu kimoci na ɓake aɓɔ na ɓánaɓɔ, ɓáoga ɔsɔ́ɔkɔwa ka ngba á ntanga-nji. Ɓesu ɓɔbu, ɓéogbúka muanku asu k'ɔ́ɓɛɛ á oɓenge, ɓɛ́ɔmɛma Mokonga.

⁶ Mbusa á ɔkɔwanaga na ɓɔ, ɓéokambea ka koko. Ɓɔ, ɓâ gǎkɛ oja mɔtɛ-aɓɔ.

⁷ Cɔ, ɗɛ́ɓɛgɔɓi tamba nɛsu á ka iɓo ka toka na Tílɔ, na gǎ jua na Tɔlɛmái. Wa, ɗéɓěsesi ɓadasu ɓaɓêki, ɓéoɗá na ɓɔ esa moci.

⁸ Mama í gǎkɛ, ɓɛ́ɔmɛɛa, ɓéojua na Kaisalía, ɓéongia k'éndu ndea ntɔmigi-Mbino-Ánjá Philípɔ, ɓéoika mɔtɛ-akɛ. Ɗátú ka ɓabɛɗanigi ngianjaga iɓɛ (7) ɓundɔ ɗáɓɛ̌sɔmbu na Yɛusalɛ́ma.

⁹ Philípɔ ɗátú gǎkɛ na ɓaseka nɛkɛ gena, ɓake ɓundɔ ɗáɓátú ɓaɔtu-nyɔngɔ ndea Mokonga.

¹⁰ Ɓî ɗéɓeiki wa esa ásii, Agábɔ mɔtu-nyɔngɔ ndea Mokonga áojua ka toka akɛ na Yudɛ́a,

¹¹ áosóbikia. Áɔbɛɗa angeɗe ndea Pɔ́lɔ, áǒɓóaga ně k'écinji na ka njaga, áogea: «Měma á kanga ɓojeɗe agi ɓe: Ɓende unge Ɓayúda á ka Yɛusalɛ́ma ɓámɓóagande mɛna-angeɗe ndee, ɓáombisa ka njaga á ɓakpa nde ɓáná Ɓayúda.»

¹² Cɔ, ɓî ɓɛɔ́ki nyɔngɔ ndɔ, ɓesu na ɓato á ka Kaisalía ɓéonɗengemisaga Pɔ́lɔ gea, kagɛ mɔnɔ na Yɛusalɛ́ma.

¹³ Pɔ́lɔ â gǎkɛ ososikisia te: «Eke nde ɓoogámea na dɔɓɔkisa á měma ani ně ɓende? Kéɓeeki tɔ ɓóaga ani, neɓeeki phɔtɔ gǎ kuwa na Yɛusalɛ́ma ka nyɔngɔ á Mɔkɔta Yéso.»

¹⁴ Ɓî kásɔɔ́ki ye, ɓéodakana, ɓeogea ambe mɔphɛ á Mɔkɔta átɔtɔkɛanɛ.

¹⁵ Cɔ, mbusa ésa ndɔ, ɓéoɓóaga nkumba nɛsu, ɓéoga na Yɛusalɛ́ma.

¹⁶ Ɓéotamba na ɓagoigi ndea Kaisalía kimoci, ɓáosóga ně k'éndu ndea Munasɔ́ni nto á ka Kipúɔ, mmbé ɗátú ngoigi kala. Nga, wa unge ɗéɓetú oika.

Pɔ́lɔ antambei Yakɔ́ɓɔ

¹⁷ Ka jua asu na Yɛusalɛ́ma, ɓadasu ɓaɓêki ɓáosósesea na maseye.

¹⁸ Mama í, ɓéoga na Pɔ́lɔ mɔtɛ á Yakɔ́ɓɔ, ɔma nde ɓagbɛga á kanisa ɓɔbu ɗáɓádondanigi.

¹⁹ Pɔ́lɔ áǒsesea, áɔ̌tɔmiaga nyɔngɔ á kema moci-moci nde Mokonga ɗági ka ɓato á k'ékuna nɛngbo k'ékuma nɛkɛ.

²⁰ Ɓî ɓáɔ́ki ye nyɔngɔ ndea Pɔ́lɔ, ɓáombeba Mokonga na ngoɗea Pɔ́lɔ te: «Moko, ɔɔna ɓî Ɓayúda ɓásii phɛɛ ɓámɓeeki Mokonga na ɓî ɓɔbu ɓásui amba ɛɔphi.

²¹ Cɔ, ɓɔ ɓáɔ́ki gǎkɛ ka phɔakɔ te, ǒgoisaga Ɓayúda ɓɔbu ɓunde ɓáiki sɔsɔɓɛ á ɓato á k'ékuna nɛngbo gea, ɓáɗeketɛ amba ɛ́ɔphi ndea Mósa, ɓákěgusɛmbɛ ye ɓaniki nɛɓɔ ganja, phɔtɔ ɓákáɓeɛmbɛ asii ndea Ɓayúda.

²² A tɔ ɗoni gea ɓáɔ́kande nyɔngɔ á kiɗia akɔ. Cɔ, ɓegeande ɓo?

²³ Ɓî a ɓó, tɔtɔkisa tɔ kema nde ɓeokongoɗea. Ɓe na ɓakpa gena wani ɓundɔ ɓánu esomba á otaɔ mosá á Mokonga.

²⁴ Gǎ kimoci na ɓɔ k'aphe ésokosea, óphendeɛ phɔtɔ nyɔngɔ á kangaɗusa mɔ̌ aɓɔ. Kaɓondɔ, ɓakpa ɓɔbu ɓáúbande gea, nyɔngɔ ndɔ ɓáengoɗima ka phɔa akɔ ande mbɛa. Ɓáɔnande gea oɓɛ o tɔ oamba ɛɔphi ndea Mósa ka tambea akɔ.

²⁵ Cɔ, ka phɔa á ɓato á ekuna nɛngbo ɓunde ɓáɓeeki, ɓe ye éɗundui ɓíndɔ ɗɛ́ɓɛɔ́kani gea, ɓákáeɛ mɔnɔ nyama ɔ́phɛ́ɔ á koketi, ɓákáeɛ magia, ɓákáeɛ phɔtɔ nyama n'aku ǐti, ɓákágɛ mɔnɔ k'aphe á otungɔ.»

²⁶ Cɔ, mama í, Pɔ́lɔ áoga kimoci na ɓakpa gena ndɔɔ, ka mɔangɔ á sokosea aɓɔ ɓɔbu. Mbusa í, áoga suɓi éndu á Mokonga, áɔtɔmia esa á sungiaga á mɔangɔ kau na mbenɔ á phúia á phɛ́a ka nkpa moci-moci.

Ɓándungi Pɔ́lɔ suɓi éndu ndea Mokonga

²⁷ Cɔ, bíbí á sia á ɓ'esa ngianjaga iɓɛ (7) ndɔ, Ɓayúda ɓundɔ ɗáɓátóki ka ntanga-nji á ka Asía, ɓáɔmɔna Pɔ́lɔ suɓi éndu á Mokonga, ɓáoyombokisa usɛsɛ bui á ɓakpa na dunga akɛ.

²⁸ Ɓáokoga gea: «Ɓǒko á ka Isilaɛ́li, ósoengani ee! Nkpa nde, yɛ aámbé aǒgoisaga ɓakpa ɓɔbu ɔma bui, nyɔngɔ nde atingani n'índe á Ɓayúda n'ɛɔphi ndea Mósa n'índe á k'ɔma ndee. Goto, aǒngisa ɓakpa nde ɓáná Ɓayúda suɓi éndu á Mokonga na jɔɔkisa ɔma á kanga ɓojeɗe ndee.»

²⁹ Ɗáɓági ɓondɔ nga, ɗáɓámɔni phɔ́ Tɔɔphímɔ nto á ka Ɛphɛ́sɔ n'akimoci na Pɔ́lɔ ka ntanga-nji. Ɓáokanisia gea, Pɔ́lɔ ɗángisi suɓi éndu á Mokonga.

³⁰ Kaɓondɔ, ntanga-nji bui áoyomboka. Ɓáokamisaga dondana. Ɓáondunga Pɔ́lɔ, ɓáomɓota ka nsɛngɛ éndu á Mokonga, kɛ̌kɛndɔ, ɓáophatia kǐo.

³¹ Ɓî ɗáɓáokáɓa mowa á Pɔ́lɔ, ɓáoga ongoɗea mɔkɔta á ɓato émani ndea Lɔ́ma gea: «Nji á Yɛusalɛ́ma bui ayomboki.»

³² Kɛ̌kɛndɔ, mɔkɔta áɔ̌bɛɗa ɓato émani na ɓakɔta nɛɓɔ, ɓáoga mbangɔ ɔma nde ɗáɓándungi Pɔ́lɔ. Ɓî ɓakpa ndɔ ɓáɛɓɔni ɓato émani na ɓakɔta nɛɓɔ, ɓáoɗeketa ɓinda á Pɔ́lɔ.

³³ Mɔkɔta á ɓato émani ndɔ, áombîmisia Pɔ́lɔ, áondunga, áososea gea, ɓámɓóɛgɛ na ngoi-ngoi á ngɔa iɓɛ, mpɔ áǒɓúsia ɓakpa ndɔ: «Ɓaya, animámbe? Agi eke?»

³⁴ Mpɔ, usɛsɛ á ɓakpa ɓáoógoma, ɓáɔyɔnga nyɔngɔ ɗanga-ɗanga. Mɔkɔta á ɓato émani kaúbɛ koɗoni á ɓakpa ndɔ ka nyɔngɔ á eongo ndɔɔ. Áǒsosea gea, ɓángisɛ Pɔ́lɔ suɓi á ɓogaɔ á ɓato émani.

³⁵ Ɓî ɓájú k'ɔ́ma á ɗapha suɓi á ɓogaɔ, áokena na kumba akɛ, ka nyɔngɔ á kokae á ɓakpa.

³⁶ Ɓakpa ɓásii ndɔ ɓáomɓea, na ɓáokoga gea: «Mowani!»

Pɔ́lɔ aɔ̌yɔngɛa sisakɛ mosá á Ɓayúda

³⁷ Ɓî ɗáɓásôongisa suɓi á ɓogaɔ á ɓato á emani, Pɔ́lɔ áomúsia mɔkɔta á ɓato émani te: «Nɛɔtɔka na nekongoɗi nyɔngɔ?» Mɔkɔta á ɓato émani áonsikisia te: «Ooúba yɔnga á Kigiíki?

³⁸ Kó phɔ́ nto á ka Mísii, mmbé atókima ka yombokisa nji kɛ̌kɛnde na gǎ na ɓato á kaiso ɛlɛphu gena (4.000) ka nkanda?»

³⁹ Pɔ́lɔ áonsikisia te: «Ɓɛɛndɔ! Nende Moyúda mmbé aɓɔkɔtɛani ka Táasɔ, ka ntanga-nji á ka Kilikía. Nende nto á ka ntanga-nji nde aombi phɛɛ. Nekondi ómososeɛ nɛ́yɔngɛgɛ na ɓakpa.»

⁴⁰ Mɔkɔta áoɓeekea. Pɔ́lɔ áoma k'ɔ́ma á ɗapha, áomesia njaga akɛ ka dakanisa á ɓakpa, ɓáɔphɔnga. Aokpanga yɔnga na ɓɔ ka Kiɛbulanía.