Ekuma á ɓateki 20 - Ɔngana á Kɛ̌kɛ

Pɔ́lɔ age ka Makɛdɔnía na ka Ugiíki

¹ Mbusa á sia á eongo bubui, Pɔ́lɔ áɔ̌ɓɔphana ɓagoigi, áǒgbagisaga ka měma. Mpɔ, áɔɔkɔwana na ɓɔ, áoga na Makɛdɔnía.

² Ɓî ɗátúɔtɔmba nji ndɔ, ɗáɔ̌phɛa ɓagoigi nyɔngɔ ásii á gbagisaga á ɓɔ měma. Mbusa índɔ, áoga ka nji á Ɓagiíki,

³ áoika kó ka ɓasonge ɓasaɔ. Na asôkambea ka koko ka gǎ na Sulía, áɔɔ́ka gea Ɓayúda ɓáonca. Kaɓondɔ, áosuia sikianaga k'aphe á Makɛdɔnía.

⁴ Ɓadakɛ ɓundɔ ɗátambi na ɓɔ ɗáɓátú: Sɔpatɛ́i muna Píɔ, nto á ka Bɛlɔ́ya, Aisitákɔ na Sɛkúndɔ ɓato á ka Tɛsalɔníka, Gáyɔ nto á ka Dɛ́ɛbɛ, Timɔtɛ́ɔ na ɓato á ka Asía ɓaɓɛ, Tikíkɔ na Tɔɔphímɔ.

⁵ Ɓakpa ndɔ ɓáoga mosá, ɓáosóɓondea na Tɔ́a.

⁶ Ɓesu gǎkɛ ɓéokambea ka koko ka Philípi, mbusa á maseye á mokati kángá á cacu. Mbusa á ɓ'esa ɓɔku, ɓéobika odondana na ɓɔ ka Tɔ́a, ɓéoika kó pɔsɔ moci.

Pɔ́lɔ anjujúkisi Ɛutíkɔ ka kukuwa

⁷ Esa á pɔsɔ ɔgɔgɔ, ɓéodondana ka eaga kimoci. Wa, ɓî ɗákondi mɛa á mama í, Pɔ́lɔ áoɓota ɓɔphɛi nɛkɛ na ka ɓî esa ɗágabekani.

⁸ Ɔbɛa ásii ɗáoola k'éndu á gǔ ɔma nde ɗéɓedondanigi.

⁹ Kó, moganda moci ina akɛ Ɛutíkɔ ɗáiki ka ɓoenga. Pɔ́lɔ áɔphɛa éndǎ, tɔ̌ áɔmbɛɗa Ɛutíkɔ phɛɛ. Ɓî tɔ̌ ndɔ amɓotei áosoɗokana ka ɓoenga á k'éndu á ko isaɔ á gǔ. Ɓáonsamboa n'a ye ku.

¹⁰ Mpɔ, Pɔ́lɔ áodida, áǒnanowa gǔ á mǒnda akɛ, áonkotoa, áogea: «Ɓókóagatanɛmbɛ, a phɔ́tɔ koenda.»

¹¹ Mbusa, Pɔ́lɔ â goto oɗápha, áoeaga. Áotútuisa ɓoabi na ka ɓî ɗágeojua ka mɔkɛsuɛ, mpɔ áoga.

¹² Ɓâ gǎkɛ onjisa moganda ndɔ mɔtɛ-akɛ n'aoenda. Ɓakpa ɓɔbu ɓáoɓá na maseye phɛɛ.

Pɔ́lɔ atóki na Tɔ́a ka gǎ na Milɛ́tɔ

¹³ Ɓesu gǎkɛ, ɗéɓege mosá, ɓéokambea ka koko ka gǎ asu na Asɔ́si. Kó, ɗátókeni ɓémbɛɗɛ Pɔ́lɔ ka nyɔngɔ nde ɗásui gǎ n'ecinji.

¹⁴ Ɓejú ye na Asɔ́si, ɓéodondana na Pɔ́lɔ, mpɔ áokambea ka koko, ɓéoga na ɓɔ na Mitilɛ́nɛ.

¹⁵ Wa, ɓéoga ka koko, mama í ɓéokiɗia ka Kíɔ. Mama í goto, ɓéokáia ka Samɔ́si na mama í, ɓéokiɗia ka Milɛ́tɔ.

¹⁶ Wa, Pɔ́lɔ áosuia phoɗa á Ɛphɛ́sɔ kángá á mama nga, ɗákákondi iphia ka Asía, â ndiu okamisaga gea, kaɓɛ n'atɔki, ákiɗiɛ na Yɛusalɛ́ma k'ésa á Pantɛkɔ́tɛ.

Pɔ́lɔ aɔɔkɔwana na ɓagbɛga á kanisa á ka Ɛphɛ́sɔ

¹⁷ Cɔ, ka Milɛ́tɔ, Pɔ́lɔ áotekisa mbino ka ɔphana á ɓagbɛga á kanisa á ka Ɛphɛ́sɔ.

¹⁸ Ɓî ɗáɓájú ye bíbí akɛ, áǒngoɗea ɓe: «Ɓooúba tambea ani ka mbenɔ bui nde ɗétú ka ɔlɔ anu, kpanga á ɓî ɗéjú ka Asía.

¹⁹ Ɗɛ́ɔmbɛɗaneaga Mɔkɔta k'edidisa bui, na iɓo á ngamɔ, suɓi á tambaga nde Ɓayúda ɗáɓáomotambisaga ka nyɔngɔ á maca nɛɓɔ.

²⁰ Ɓooúba gea, kɛ́nɔsɔmɛi tanda nyɔngɔ moci, nnde anókeni. Ɗɛ́nɔphɛí na goisaga ka ntanga, phɔtɔ suɓi éndu nɛnu.

²¹ Nɛ̌phɛí Ɓayúda na ɓunde ɓáná Ɓayúda base gea, ɓákětiɛ tambea aɓɔ mosá á Mokonga na ɓámɓeekeɛ Mɔkɔta nɛsu Yéso.

²² Cɔ, kɛ̌kɛnde, Měma á kanga ɓojeɗe amososi gea négɛ na Yɛusalɛ́ma. Kéoúba kema nde amogeande kó.

²³ Měma á kanga ɓojeɗe amoengekisi ndiu gea, ka ntanga-nji bui mekakɔ na tambisaga aomoɓondea.

²⁴ Enda ani nna gǎkɛ na kantíti. Kema nde ana kantíti k'éme ande gea, négɔɓɛɛ ánjá tamba na tɔtɔkisa ekuma nde Mɔkɔta Yéso ɗámopi gea, nɛ́phɛɛ base Mbino-Ánjá á ɓonjánja-ékondi ndea Mokonga.

²⁵ Ɗétú ɔphɛa nyɔngɔ á koɓoamɛ ndea Mokonga ka ɔlɔ anu ɓenu ɓɔbu. Kɛ̌kɛnde gǎkɛ, neoúba te ɓɔ́kɔ́mɔɔnɛku ye.

²⁶ Kaɓondɔ, nenóngoɗi ɗoni gea, kaɓɛ ká ɓenu n'aɓúngigi, nna ye nyɔngɔ nɛmɔ.

²⁷ Nga, ɗɛ́nɔphɛí base mɔphɛ á Mokonga kángá sɔmɛanu ú.

²⁸ Cɔ, engani tambea anu sasanu n'índe á ɓaɓêki ɓɔbu ɓundɔ Měma á kanga ɓojeɗe anophi ka amba aɓɔ. Ambani kanisa ndea Mokonga nnde ɗásombi na magia akɛ sasakɛ.

²⁹ Nga, neoúba gea, mbusa á gǎ ani, ɓakpa ɓakae ɓea ɓamabianga ɓáengisande ka ɔlɔ anu, ɓákáekuiɛku ɓaɓêki ngomi.

³⁰ Sɔsɔɓɛ anu phɔtɔ, ɓademigi ɓákiɗianande ɓáɔyɔnga mbɛa na ɓootea á ɓaɓêki k'aphe nɛɓɔ.

³¹ Cɔ, ɛngɛphani na ɓókoɓoseɛmbɛ gea ka ɓasaga ɓasaɔ keiphe n'esa ɗékéɗeketi phɛá ka nkpa ka ɔlɔ anu na iɓo á ngamɔ.

³² Kɛ̌kɛnde, nenóbisi ka njaga á Mokonga na mbino á ɓonjánja-ékondi nɛkɛ. Mokonga aámbé ana ɓukpɛkpɛ á gbagisaga anu ka měma na opha ɓotukɔ nde abisi ka ɓakpa nɛkɛ.

³³ Eme gǎkɛ, ɗékénɔmɛmigi tanda imɔna, láté, kaɓɛ bɔngɔ ndea nkpa.

³⁴ Ɓo ndiu oúba gea, eme sasani ɗɛ́túɔbɛɗanaga ka tɔá á kema nde ɗámokeni, phɔtɔ na ka ɓadani.

³⁵ Ka kema bui nenóphangi gea ɓɔ́bɛɗanɛgɛ tɔ ɓó ka enga á ɓaúki, ɓíndɔ Mɔkɔta Yéso yɛ sasakɛ asóngoɗi gea: ‹Maseye ásii a ka ɓagabi kɔnyɛ́nya ɓatɔi.›»

³⁶ Ɓî Pɔ́lɔ agɔɓi ye yɔnga, ɓáogbúka muanku aɓɔ ɓɔbu, ɓáɔmɛma Mokonga.

³⁷ Ɓɔbu ɓáogáma, ɓáonkotoa Pɔ́lɔ, ɓáɔɔkɔwana na ɓɔ.

³⁸ Ɓáoɓá na ngomi ka měma aɓɔ phɛɛ nga, ɗáyɔngi, ɓɔ́kɔ́mɔɔnɛ ku ye k'eme. Mbusa, ɓáoga ɔmɔkɔwa ka ikɔ.