Ekuma á ɓateki 2 - Ɔngana á Kɛ̌kɛ

Měma á kanga ɓojeɗe adidí gǔ á ɓaɓêki ndea Yéso

¹ K'ésa á jaí á Pɛntɛkɔ́tɛ, ɓaɓêki ndea Yéso ɓɔbu ɓáodondanaga k'ɔ́ma ímoci.

² Mɔngɔ moci, eongo áotóka na koba, ɓea sumbu akpɛ phɛɛ unge aɔɓɛta. Eongo ndɔ áotúma k'éndu bui nde ɓaɓêki ɗáɓáiki kau.

³ Mpɔ ɓáɔɔna kema ɓea ɛɛmbɛ á nsa n'ɛ̌sɛnɛkɛi. Ɛɛmbɛ ndɔ áokatanaga, áoika gǔ aɓɔ moci-moci.

⁴ Mpɔ, ɓɔbu ɓáotúma na Měma á kanga ɓojeɗe, ɓáokpanga yɔnga ka ɛyɔngi nɛngbo ɓíndɔ Měma aéteki gea, ɓáyɔngɛ.

⁵ Cɔ, Ɓayúda ɓunde ɗáɓáomɓánga Mokonga, ɗáɓátóki ka nji ɗanga-ɗanga á ka mokonda, ɓáoɓá ka Yɛusalɛ́ma.

⁶ Ɓî eongo ndɔ áɔ́kɛkani, usɛsɛ á ɓakpa ɓáodondanaga, ɓáotangaaga nga, nkpa moci-moci ɗáɔɓɔ́ka ɓaɓêki na ɓáɔyɔnga ka ɛyɔngi nɛkɛ á ɓɔkɔtɛana.

⁷ Ɓáotangaaga, ɓáoyayama. Ɓáogea: «Ɓakpa nde ɓáɔyɔnga, ɓɔbu ɓáká phɔ́ ɓato á ka Galiláya?

⁸ Cɔ, nkpa moci-moci sɔsɔɓɛ asu aɔ̌ɓɔka na ɓáɔyɔnga ka ɛyɔngi nɛkɛ á ɓɔkɔtɛana ka ɓo?

⁹ Ɓakpa ɓuangbo ɓá sɔsɔɓɛ asu, ɓato á ka Páati, Ɓamɛ́di na Ɓaɛlámu, ɓundɔ ɓáiki ka Mɛsɔpɔtamía, Yudɛ́a na Kapadɔkía, Pɔntɔ na Asía,

¹⁰ ɓuangbo ɓátóki phɔtɔ na Phuigía, Pamphilía, Mísii na phaeka á kenombe á Libía, bíbí á Kuɛ́nɛ. Ɓuangbo ɓátóki phɔtɔ na Lɔ́ma,

¹¹ ɓundɔ Ɓayúda, na ɓundɔ ɓáɓeeki esomba ndea Ɓayúda, na ɓato á ka Kɛɛ́tɛ na ɓato á ka Alabía. Cɔ, ɓɛɔɓɔ́ka na ɓáɔyɔnga ketangaɔ ndea Mokonga ka ɛyɔngi ndeasu ɗanga-ɗanga ka ɓo!»

¹² Ɓî ɓɔbu ɓátangaigi na yayama, ɓáɔyɔngaga sɔsɔɓɛ aɓɔ gea: «Kantíti á nyɔngɔ nde a ɓo?»

¹³ Ɓuangbo ɓâ gǎkɛ ɔ̌tɛbɛaga ɓaɓêki gea: «Makana ɛ̌bɛɗi phɛɛ.»

Pɛ́tɛɛ aɔphɛa ka nkíndí á ɓakpa

¹⁴ Mpɔ Pɛ́tɛɛ áǒmesia kimoci na ɓateki nkama na moci (11), áokpanga yɔnga k'ɛ́sɔ akpɛ gea: «Cɔ, ɓenu Ɓayúda na ɓenu ɓato á ka Yɛusalɛ́ma ɓɔbu, phéngani phɔ́ kecue anu, ɓɔ́ɔ́kɛ nyɔngɔ nde neonongoɗea.

¹⁵ Makana káɛbɛɗi ɓakpa nde ɓíndɔ ɓookanisia nga, ɓî esa ásɛ, a phɔ́tɔ ka nji asasi.

¹⁶ Cɔ, nnde ande gǎkɛ tɔtɔkɛana á nyɔngɔ nde Yɔɛ́li mɔtu-nyɔngɔ ndea Mokonga ɗáyɔngi.

¹⁷ Mokonga ayɔngi ɓe: ‹Ka matú á sungiaga á mokonda, nɛɛmbisande Měma ani ka ɓakpa ɓɔbu, Ɓaniki ɓǒko na ɓaseka nɛnu ɓáɔtɔande nyɔngɔ, Ɓaganda nɛnu, ɓáɔnande mphaniɔ. Ɓagbɛga nɛnu ɓáɗande na njeki.

¹⁸ Eya, k'ésa ndɔ aɓande phɔtɔ ɓó ka ɓabɛɗanigi nɛmɔ ɓǒko na ɓake. Nɛɛmbisande Měma ani ka ɓɔ, ɓáɔtɔande nyɔngɔ.

¹⁹ Negeande ketangaɔ na koba k'égo, nê phɔtɔ ogea mphangiɔ kusi á maní. Magia, nsa n'eɓundu á maki aɓande ɓei.

²⁰ Maní agaikanande, áoínda, Songe anjɛnjɛmanande ɓea magia, mosá á esa á kiɗia á Mɔkɔta. Esa ndɔ, aɓande esa ángbó, esa á ɓoombia.

²¹ Nkpa buakɛ mmbé, aɔphaneande ina á Mɔkɔta, aamande ka měma.›

²² Cɔ, Ɓaisilaɛ́li ɓaya, ɔ́kani phɔ́ nyɔngɔ nde: Yéso ɓa Najalɛ́ti, ande nkpa nde Mokonga ɗánsɔmbu ka úbisa anu base gea, ana ɓukpɛkpɛ á tɔtɔkisa á ketangaɔ ɗanga-ɗanga na mphangiɔ sɔsɔɓɛ anu ɓíndɔ ɓooúba sasanu.

²³ Mokonga ɗámbisi Yéso ka njaga anu ɓíndɔ ɗáúbikani na anga í kala. Ɓômbisa ka njaga á ɓakpa nde ɓákáomúba Mokonga. Ɓakpa ndɔ, ɓáommowa ka kɔkɛaga akɛ ka moyangɔ.

²⁴ Mokonga â gǎkɛ onjujukisa ka kukuwa, áonkoɗaga ka kokae á kukuwa. Nga, kukuwa ɗákátú na ɓukpɛkpɛ á tɔka akɛ.

²⁵ Nga, moamɛ Daúdi ɗáengekisi nyɔngɔ nɛkɛ gea: ‹Ɗɛ́ɔmɔna Mɔkɔta Mokonga mosá ani mbenɔ bubui, ka nyɔngɔ nde, aka njaga ani á mǔku, ka gea kéemanɛgɛ.

²⁶ Ka nyɔngɔ índɔ unge měma ani ana maseye, nɛɔyɔnga na maseye, goto nena nseɓeɔ gea, nyama ani aúmbiande.

²⁷ Ka nyɔngɔ nde, oɓɛ Mɔkɔta Mokonga, kómoɗeketɛku eme ka nji á ɓasí, phɔtɔ, kómoɗeketɛku eme nto á kanga ɓojeɗe nɛkɔ néphoɛ.

²⁸ Ɗómophangi aphe á enda, omotúmisande na maseye ɓî nɛɔnande keongi akɔ.›

²⁹ Cɔ, ɓaya, ómoɗeketani phɔ́ nenoúbisɛ base nyɔngɔ ndea tatasu, Moamɛ Daúdi. Yɛ, ɗáku phɔtɔ, ɓáomúmba. Na ka kesande, bóta akɛ a phɔ́tɔ sɔsɔɓɛ asu.

³⁰ Yɛ, ɗátú gǎkɛ mɔtu-nyɔngɔ ndea Mokonga, ɗáúbi gea, Mokonga ɗámɔku, ka nɔɛa akɛ esomba gea, ka ɓato á k'ékombo nɛkɛ moci, aɓande moamɛ ka mpɛnɛ akɛ.

³¹ Daúdi ɗáɔni phɔ́ mosá nyɔngɔ á jujúka á Kiísito ka kukuwa. Ɗáɗundu gǎkɛ ɓe: ‹Ɗákánsagi, áikɛ ka nji á ɓasí. Nyama akɛ ɗákáphoe.›

³² Yéso ndɔ tɔ aámbé Mokonga ɗánjujúkisi ka kukuwa. Ɓesu ɓɔbu ɓende ɓaɗigimisi á nyɔngɔ ndɔɔ.

³³ Ɓî Mokonga antáisi na bisa akɛ ka njaga akɛ á mǔku, áoɓá na Měma á kanga ɓojeɗe nnde yɛ abakɛ ɗámɔku. Yéso aámbé aɛmbisi kema nde ɓɔɔ́ka na nnde ɓɔɔna ka ɓesu.

³⁴ Nga, nna Daúdi aámbé ɗátái na koba. Ɗáyɔngi ndiu sasakɛ gea: ‹Mɔkɔta Mokonga ɗángoɗi Mɔkɔta nɛmɔ gea, ika nkɛkɛɔ á njaga ani á mǔku,

³⁵ na ka ɓî něbisande ɓaɓiɓia akɔ kusi á ecinji akɔ.›

³⁶ Eya, ambe ɓenu Ɓaisilaɛ́li ɓɔbu, ɓóúbɛ base gea, Yéso mmbɔ ɗóɓɔnkɔkɛigi gǔ á moyangɔ, yɛ aámbé Mokonga ambisi, Mɔkɔta na Kiísito.»

³⁷ Ɓî ɓakpa ɗáɓáɔ́ki nyɔngɔ ndɔ, áǒsumba ka měma. Ɓáomúsia Pɛ́tɛɛ na ɓateki ɓuangbo te: «Ɓaya, ɓegeande ɓo?»

³⁸ Mpɔ, Pɛ́tɛɛ áǒsikisia te: «Kětiani tambea anu ájeɗe, ɓánoɓatisɛ moci-moci ka ina á Yéso Kiísito gea te, Mokonga áímɛ ɓojeɗe nɛnu, mpɔ ɓoɓande na ɓokambia á Měma á kanga ɓojeɗe.

³⁹ Nga, mɔkɔ ndea Mokonga a ka ɓenu, ɓaniki nɛnu na ɓɔbu ɓunde ɓá ɗanga na ɓɔbu ɓunde Mɔkɔta nɛsu Mokonga aɛɓɔphanande.»

⁴⁰ Pɛ́tɛɛ â goto otútuisa ɓoabi nɛngbo ásii, áɔ̌phɛa na gbagisaga aɓɔ ka měma ɓe: «Óamisani n'ɛɓɔkɔti ájeɗe ndee.»

⁴¹ Cɔ, ɓakpa nde ɗáɓáɓeeki nyɔngɔ ndea Pɛ́tɛɛ, ɓáǒɓatisa. K'ésa ndɔ tɔ, ɓakpa ɓea ɛlɛphu isaɔ (3.000), ɓáǒyamea ka nkíndí á ɓaɓêki.

Tambea á ɓateki á k'ama mosá-mosá

⁴² Ɓaɓêki ndɔ ɗáɓátú na moíngi ka ɔ́ka ɓɔphɛi ndea ɓateki, ɓáoika ka komunamema, ɓáoeaga kimoci, na mɛma á Mokonga phɔtɔ kimoci.

⁴³ Cɔ, ɓaɓêki ɓɔbu ɗáɓáomɓánga Mokonga, ka nyɔngɔ nde, ɗáɔtɔtɔkisa ketangaɔ na mphangiɔ ɗanga-ɗanga ka njaga á ɓateki.

⁴⁴ Ɓaɓêki ɓɔbu ɗáɓátú tɔ kimoci, ɓáogabeanaga nkumba nɛɓɔ bui ngǔngu aɓɔ.

⁴⁵ Nga, ɗáɓáosombisaga nkumba ɗanga-ɗanga, na osaa nɛɓɔ, ɓáokatisanaga imɔna í sɔsɔɓɛ aɓɔ ka tɔtɔkisa siki nde nkpa na nkpa ɗátú ně.

⁴⁶ Esa bui ɗáɓáodondanaga k'éndu á Mokonga na měma mo. Báoeaga kimoci k'éndu ɗanga-ɗanga. Ɗáɓáoeaga kimoci na maseye na měma édidisa.

⁴⁷ Ɓaɓêki ɗáɓáombeba Mokonga, ɓakpa ɓɔbu ɓáǒkonda. Mɔkɔta Mokonga áoyamea ɓunde aéamisi ka měma ka nkíndí á ɓaɓêki.