Ekuma á ɓateki 19 - Ɔngana á Kɛ̌kɛ

Ekuma ndea Pɔ́lɔ ka Ɛphɛ́sɔ

¹ Ɓî Apɔ́lɔ ɗátú ka Kɔlítɔ, Pɔ́lɔ áophoɗa ka nji á mamba-mamba, áodida ka Ɛphɛ́sɔ. Kó, áǒdonda ɓagoigi ɓuangbo,

² áǒúsia te: «Ɓɔtɔ́tɔí Měma á kanga ɓojeɗe mbenɔ nde ɗóɓoɓeeki?» Ɓáonsikisia te: «Ɓɛ́kɛ́ɔ́kimbɛ mɔnɔ na ɓáɔyɔnga nyɔngɔ á Měma á kanga ɓojeɗe.»

³ Pɔ́lɔ áǒúsia te: «Cɔ, oɓatisɔ nɛnu ɗátú na kantíti sina?» Ɓáonsikisia te: «Ɗáɓásóɓatisi ɓíndɔ Yoáni ɗáphɛí.»

⁴ Pɔ́lɔ áǒngoɗea te: «Yoáni ɗéɓatisi ɓundɔ ɗáɓákěti tambea aɓɔ ájeɗe, na ngoɗea á ɓakpa gea, ɓámɓeekeɛ mmbé abikande mbusa akɛ, ande gea Yéso.»

⁵ Ka ɔ́ka á ɓɔ nyɔngɔ ndɔ, ɓáǒɓatisa k'ína á Mɔkɔta Yéso.

⁶ Mpɔ, Pɔ́lɔ áobisa njaga gǔ á ɓɔ, Měma á kanga ɓojeɗe áodida gǔ á ɓɔ, ɓáokpanga yɔnga k'ɛyɔngi ɗanga-ɗanga na ɔtɔa á nyɔngɔ.

⁷ Ɓakpa ndɔ ɗáɓátú ka ɓɔbu ɓea ɓakpa nkama na ɓaɓɛ (12).

⁸ Cɔ, Pɔ́lɔ ɗáongiaga k'éndu á madondanɔ ndea Ɓayúda ka nyɔngɔ á Mokonga. Ka ɓasonge ɓasaɔ ɗáɔphɛa na ɓukpɛkpɛ nyɔngɔ á koɓoamɛ ndea Mokonga. Yɛ, ɗá gǎkɛ opúa na ɓɔ, áokonda gea ɓakpa ɓáɓeekeɛ ú.

⁹ Ɓuangbo ɓâ gǎkɛ oɗaka kecue, ɓáoyá ɓeekea, ɓáɔɓɛnjiaga aphe á Mɔkɔta Yéso mosá á ɓakpa. Kaɓondɔ, Pɔ́lɔ áokatana na ɓɔ, â tɔ oga na ɓagoigi k'éndu á goaga nde á ka Tiánɔ. Wa, ɗáogoisaga esa bui

¹⁰ ka ɓasaga ɓaɓɛ. Kaɓondɔ unge, Ɓayúda na Ɓagiíki ɓɔbu ɓundɔ ɗáɓáiki ka nji á ka Asía, ɗáɓáɔ́ki nyɔngɔ á Mɔkɔta.

Ɓana Sikɛ́wa ɗáɓápúi na ɓansombo

¹¹ Cɔ, Mokonga áogea ketangaɔ ángbó phɛɛ ka njaga á Pɔ́lɔ.

¹² Ɓakpa ɓâ phɔtɔ ɔbɛɗa bɔngɔ nde ɗábǒú nyama akɛ ně, ɓáoga ně ka ɓasambi, ɓáoama, ɓansombo ɓâ gǎkɛ otóka.

¹³ Cɔ, Ɓayúda ɓuangbo ɓundɔ ɗáɓáogaga ɔma ɗanga-ɗanga k'aphe á juanisa ɓansombo, ɓáokengea kumia á ina á Mɔkɔta Yéso, ka juanisa ɓansombo suɓi á ɓakpa. Ɓáǒgea ɓansombo te: «K'ína á Yéso mmbé Pɔ́lɔ aɔphɛa k'ína akɛ nenososi, júanani!»

¹⁴ Ka ɓundɔ ɗáɓági ɓó, ɗáɓátú ɓaganda ngianjaga iɓɛ (7). Ɗáɓátú ɓana Sikɛ́wa, ka ɓagbɛga á ɓatoɓeigi-phɛ́a ndea Ɓayúda.

¹⁵ Ɓansombo ɓáǒsikisia te: «Ɓeomúba Yéso, ɓê phɔtɔ omúba Pɔ́lɔ. Cɔ, ɓenu gǎkɛ, ɓonde ɓaani?»

¹⁶ Nkpa ndɔ ɓansombo ɗáɓátú suɓi akɛ áǒbutukia, áɔ̌nyɛ́nya ɓɔbu ka ɓukpɛkpɛ, áǒgea ájeɗe phɛɛ na ka ɓî ɗáɓáti k'éndu ndɔ ndúmbú na ɓáotege.

¹⁷ Ɓakpa ɓɔbu ɓunde ɗáɓátú ka Ɛphɛ́sɔ, Ɓayúda na ɓunde ɓáná Ɓayúda, ɓáɔɔ́ka nyɔngɔ ndɔ, ɓáoɓá na kɔɓɔɓɔkɔ phɛɛ. Kaɓondɔ, ina á Mɔkɔta Yéso áoɓá n'obebɔ.

¹⁸ Ɓakpa ɓásii, ɓunde ɗáɓámɓeeki Mɔkɔta Yéso, ɓáobika ɔɓɔngisiaga nyɔngɔ nɛɓɔ na yɔnga í mosá á ɓakpa.

¹⁹ Ɓakúme ɓásii ɗáɓábiki na ɓuku nɛɓɔ á kokúme, ɓáotoɓoa mosá á ɓakpa. Ɗáɓátangi esombi í áoɓá imɔna ɓea ɛlɛphu nkama ɓɔku (50.000).

²⁰ Kaɓondɔ unge, nyɔngɔ ndea Mɔkɔta ɗándandi na ɓá na ɓukpɛkpɛ.

Ɓato á ka Ɛphɛ́sɔ ɓáyomboki

²¹ Mbusa índɔ, Pɔ́lɔ áosuia ka měma akɛ tenisia ka Makɛdɔnía na Akáya ka gea, ájuɛ na Yɛusalɛ́ma. Áɔyɔnga te: «Mbusa á gǎ kó, akeni phɔtɔ négɛ na Lɔ́ma.»

²² Kaɓondɔ, áǒteka ɓadakɛ ɓaɓɛ na Makɛdɔnía. Ɓadakɛ kau ɗáɓátú: Timɔtɛ́ɔ na Ɛástɔ. Pɔ́lɔ â gǎkɛ ojiga ka Asía k'ésa ábɔa.

²³ Ka matú ndɔ unge, ɓakpa ɗáɓáyomboki phɛɛ ka phɔa á aphe ndea Mɔkɔta.

²⁴ Cɔ, nkpa moci ina akɛ Dɛmɛtíɔ, ɗáotóa etombe á ngɔa ka iii éndu ndea ɓamokonga á mbɛa, nke Aatɛ́mi. Etombe ndɔ ɗáɔ̌tɔisisa ɓatombe phɛɛ.

²⁵ Dɛmɛtíɔ â gǎkɛ ǒdondanisa ɓadakɛ ɓatombe ɓɔbu, áǒngoɗea te: «Ɓaya, ɓooúba gea, ɓɛɔtɔa ásii phɛɛ k'ékuma nde ɓɛɔbɛɗanaga.

²⁶ Cɔ, ɓɔɔ́ki na ɔna gǎkɛ ɓî Pɔ́lɔ aǒɓotea ɓakpa ɓásii ka kětia á měma aɓɔ, nna tɔ ka Ɛphɛ́sɔ, phɔtɔ ka Asía bubui, ka yɔnga akɛ te: ‹Iii á ɓamokonga á mbɛa, nnde ɓakpa ɓáɓɔngisigi, ɓáká tanda ɓakɔta.›

²⁷ Cɔ, ka nyɔngɔ ndɔ, ɓojeɗe í a ɓe: Ɓakpa ɓákáɓɛnjiɛgɛku tɔ ekuma nɛsu, phɔtɔ endu ndea mokonga á mbɛa ímbe nke, Aatɛ́mi aɓande k'íso á ɓakpa kema jǎi-jǎi. Ɓoombia ndea moamɛ nɛsu nke mmbé ɓáombeba ka Asía na mokonda bui asiande.»

²⁸ Ɓî ɓáɔ́ki ye nyɔngɔ ndɔ, ɓáɔtúma na esúia, ɓáokpanga koga gea te: «Obebɔ ka Aatɛ́mi á ka Ɛphɛ́sɔ!»

²⁹ Kɛ̌kɛndɔ, oyombo áɔɛmba ka ntanga-nji bui. Ɓáǒdunga Gáyɔ na Aisitákɔ ɓato á ka Makɛdɔnía ɓunde ɗáɓáotamba na Pɔ́lɔ. Ɓáokamisaga ngia ɓɔbu ka ntanga á njoko.

³⁰ Cɔ, Pɔ́lɔ áokonda ngia suɓi á usɛsɛ á ɓakpa, ɓagoigi ɓâ gǎkɛ onimisia.

³¹ Ka ɓakɔta á ka Asía, ɓundɔ ɗáɓánkondigi Pɔ́lɔ, ɓáontekisia mbino ka ɗengemisaga akɛ gea kangiɛmɔnɔ ka ntanga á njoko ndɔɔ.

³² Ka mbenɔ ndɔ, usɛsɛ á ɓakpa n'ayomboki ye. Ɓakpa ɓundɔ ɗáɓádondanigi ka ntanga á njoko ndɔ, ɓuangbo ɓáɔyɔnga nyɔngɔ moci, ɓuangbo nyɔngɔ nɛngbo, ɓákáúbɛ gǎkɛ cina á dondanaga aɓɔ.

³³ Wa, Ɓayúda ɓunɛngbo, ɓáɔntɔmiaga Alɛsandúɔ nyɔngɔ nde ɗágeani. Ɓáommesa mosá á ɓakpa, yɛ áosamboa njaga ka gea te áyɔngɛ mosá á usɛsɛ á ɓakpa.

³⁴ Ɓî ɓakpa ɓáúbi ye gǎkɛ gea, ande Moyúda, ɓɔbu ɓáɔyɔnga akpɛ ka mbenɔ iɓɛ gea: «Obebɔ ka Aatɛ́mi á ka Ɛphɛ́sɔ!»

³⁵ Ka sungiaga, nɗundu á ntanga-nji áǒdakanisa ɓakpa, áogea te: «Ɓaɛphɛ́sɔ ɓaya, ani mmbé aoɓosa gea, ntanga-nji á Ɛphɛ́sɔ ande ɔma á ɓondeaga endu á Aatɛ́mi angbóngbó na iii akɛ nnde agú ka toka na koba?

³⁶ Kaɓondɔ, nna na nkpa nde ayande. Ɓî a ɓó, dakanani tɔ phio! Ɓókógeɛmɔnɔ kema ka mbangɔ-mbangɔ.

³⁷ Ɓǒbiki na ɓakpa nde wani, na ɓákáúɓi nkumba á k'éndu ndea Mokonga. Ɓákámbómi phɔtɔ mokonga á mbɛa nɛsu ímbe nke.

³⁸ Cɔ, aoɓá Dɛmɛtíɔ na ɓadakɛ ɓatombe, na ɓá na nyɔngɔ á tɔnga á ɓakpa, ɓágɛ ka ntua á tena á nyɔngɔ, mosá á ɓateni-nyɔngɔ. Kó unge akeni ɓántɔngɛ.

³⁹ Aoɓá na ɓo phɔ́tɔ na nyɔngɔ nɛngbo, bisani phɔ́ mosá á madondanɔ nde aúbikani na ɓaɓɔngisigi ɛɔphi.

⁴⁰ Nga, ɓeoɓanga tɔnga asu mosá á Ɓalɔ́ma k'eongo ɓ'índe. Madondanɔ nɛsu ndea kesande, nna na kantíti nga, ɓéké na kema nde ɓɛyɔngande ka phɔa í.»

⁴¹ Agɔɓi ye ɓoabi, áǒphanja ɓakpa.