Ekuma á ɓateki 18 - Ɔngana á Kɛ̌kɛ

Pɔ́lɔ aɔbɛɗanaga ka Kɔlítɔ

¹ Mbusa índɔ, Pɔ́lɔ áotóka ka Atɛ́nɛ, áoga na Kɔlítɔ.

² Kó, áondonda Moyúda moci inakɛ Akíla, mmbé nji á ɓɔkɔtɛana nɛkɛ ande Pɔntɔ. Yɛ na nkakɛ Piisíla ɗáɓákiɗi tɔ kɛ̌kɛ ka toka á ɓɔ na Italía. Ɗáɓátóki kó ka nyɔngɔ nde, Kɔɔdíɔ moamɛ ndea Lɔ́ma, ɗáesosi Ɓayúda ɓɔbu gea ɓátokɛ ka Lɔ́ma. Ka Kɔlítɔ unge Pɔ́lɔ ɗájúkani na ɓɔ.

³ Áoika mɔtɛ-aɓɔ n'aɔbɛɗanaga nga, ekuma nɛɓɔ ɗátú á etéte moci, n'ande á ɓɔngisiaga á ɛma.

⁴ Cɔ, esa á saɓáto bui, Pɔ́lɔ ɗáoabaga na Ɓayúda na Ɓagiíki suɓi éndu á madondanɔ ndea Ɓayúda ka nyɔngɔ á Mokonga ka gea te, ɓáɓeekeɛ.

⁵ Mbenɔ nde Síla na Timɔtɛ́ɔ ɓájú ka toka na Makɛdɔnía, Pɔ́lɔ â gǎkɛ ǒyamea buakɛ ka phɛá nyɔngɔ á Mokonga. Áǒengekisia Ɓayúda gea, Yéso ande Kiísito.

⁶ Ɓayúda ɓâ ndiu oya nyɔngɔ ndea Pɔ́lɔ na bóma akɛ. Kaɓondɔ, Pɔ́lɔ áǒciciia bɔngɔ nɛkɛ, áǒngoɗea te: «Magia anu, áɓɛ ye tɔ ka mɔ̌ anu sasanu. Nna yé nyɔngɔ nɛmɔ. Kɛ̌kɛnde negande k'ékuna nɛngbo.»

⁷ Pɔ́lɔ áotóka wa, áoga mɔtɛ á nkpa moci ina akɛ Títɔ Yúsitɔ. Yɛ, ɗátúomɓánga Mokonga. Endu nɛkɛ ɗátú bíbí éndu á madondanɔ ndea Ɓayúda ka nyɔngɔ á Mokonga.

⁸ Kiísipɔ, moamɛ á endu á madondanɔ ndea Ɓayúda ka nyɔngɔ á Mokonga ndɔ, â gǎkɛ omɓeekea Mɔkɔta, n'ekombo nɛkɛ bui. Ɓato á ka Kɔlítɔ ɓásii, ɓunde ɗáɓáɔ́ki ɓɔphɛi ndea Pɔ́lɔ, ɓáomɓeekea Mɔkɔta, ɓáǒɓatisa.

⁹ Kǐpha moci, Pɔ́lɔ áɔɔna mphaniɔ, Mɔkɔta Yéso n'aongoɗea te: «Koɓángɛ mɔnɔ, kodakanɛ mɔnɔ, tútuisa ndiu ɓɔphɛi

¹⁰ ka nyɔngɔ nde eme, ne kimoci n'oɓɛ. Ka ɓakpa kákodungeku na gea akɔ ájeɗe nga, nena ɓakpa nɛmɔ ɓásii ka ntanga-nji ndee.»

¹¹ Kaɓondɔ, Pɔ́lɔ áoika kó saga moci na gbútuka. Aɔ̌phɛa ɓakpa nyɔngɔ á Mokonga.

¹² Cɔ, ka matú nde Galíɔ ɗátú mɔkɔta ndea Ɓalɔ́ma ka Akáya, Ɓayúda ɗáɓájúkani gǎkɛ ka maca á Pɔ́lɔ, ɓáombika ně ka ntua á tena á nyɔngɔ.

¹³ Ɓáɔyɔnga te: «Mogáa nde aokáɓa ɓotea á ɓakpa k'aphe á beba á Mokonga, k'aphe nde atingani n'ɛɔphi.»

¹⁴ Pɔ́lɔ ɗáogea áyɔngɛ, ɓî Galíɔ ɗáǒngoɗea Ɓayúda te: «Aoɓá n'ande nto á ɓojeɗe na nto á kaísɔ, ámbé nɛnɔɔ́kande.

¹⁵ Cɔ, ɓî ɓoopúa ka phɔa nyɔngɔ, ina na ɛɔphi nɛnu sasanu, nndɔ a tɔ ɔnɔɛnjia ɓenu. Kékondi gǎkɛ ɓá nteni-nyɔngɔ ndɔɔ.»

¹⁶ Mpɔ, áǒɓeaga ka ntua á tena á nyɔngɔ.

¹⁷ Wa, ɓakpa ɓɔbu ɓáondunga Sɔsitɛ́ni, moamɛ éndu á madondanɔ ndea Ɓayúda ka nyɔngɔ á Mokonga, ɓáɔmɓɛtaga mosá á ntua á tena nyɔngɔ. Galíɔ kageɛ gǎkɛ ka kema.

Pɔ́lɔ aosikianaga na Antiɔkía

¹⁸ Mbusa índɔ, Pɔ́lɔ â goto koika na Kɔlítɔ k'ésa ásii. Mpɔ, áɔɔkɔwana na ɓaɓêki, áokambea ka koko ángbó, áoga na Sulía kimoci na Piisíla na Akíla. Mosá á mɛɛa á Pɔ́lɔ ka Kɛnkulɛ́a, ɓáonkangaɗua ka mɔ̌, ka nyɔngɔ nde ɗánu esomba.

¹⁹ Mbenɔ nde ɓákiɗi ka Ɛphɛ́sɔ, Pɔ́lɔ áǒɗeketa Piisíla na Akíla wa, áongia k'éndu á madondanɔ ndea Ɓayúda ka nyɔngɔ á Mokonga, áoaba na ɓɔ.

²⁰ Ɓayúda ɓáonɗengemisaga gea te, áikɛ goto na ɓɔ k'ésa ásii, Pɔ́lɔ â gǎkɛ oyá.

²¹ Â ndiu ɔɔkɔwana na ɓɔ áǒgea te: «Aoɓá Mokonga n'akondi, ámbé nejande goto mɔtɛ-anu.» Mpɔ áokambea ka koko ángbó ka toka akɛ na Ɛphɛ́sɔ,

²² áoga okia na Kaisalía. Kó, áoga na Yɛusalɛ́ma k'aphe á sesea á ɓaɓêki ndea ka kanisa. Mbusa í, áoga na Antiɔkía.

²³ Mbusa á ika kó k'ésa ábɔa, áoga. Áɔtɔmba nji moci-moci á Galatía na Phuigía n'aógbagisaga ɓagoigi ɓɔbu ka měma.

Pɔ́lɔ aɔbɛɗanaga ka Ɛphɛ́sɔ na Kɔlítɔ

²⁴ Ka matú ndɔ, Moyúda moci inakɛ Apɔ́lɔ, mmbé ntanga-nji nɛkɛ á ɓɔkɔtɛana ande Alɛsanduía, áojua ka Ɛphɛ́sɔ. Ɗátú nto á kaátó na úba Ɓuku á Mokonga phɛɛ.

²⁵ Yɛ, ɗáɓángoisigi aphe á Mɔkɔta. Měma akɛ áǒtoɓoa, áɔtɔmiaga na goisaga ɗoni phɛɛ nyɔngɔ ndea Yéso. Â tɔndɔ oúba nyɔngɔ á oɓatisɔ ndea Yoáni.

²⁶ Áokpanga phɛá k'éndu á madondanɔ ndea Ɓayúda ka nyɔngɔ á Mokonga kángá ɓanga. Piisíla na Akíla, ɓî ɓámɔ́ki, ɓáonga ně mɔtɛ-aɓɔ, ɓáɔntɔmiaga base phɛɛ aphe á Mokonga.

²⁷ Mbenɔ nde Apɔ́lɔ ɗáokonda gǎ na Akáya. Ɓaɓêki á ka Ɛphɛ́sɔ ɓáomopha ɓukpɛkpɛ, ɓáoɗundua ɓaoɓa gea te, ɓaɓêki á ka Akáya ɓánseseɛ ánjá. Ajú ye kó, áǒenga phɛɛ ɓunde ɓá ye ɓaɓêki ka ɓonjánja-ékondi ndea Mokonga.

²⁸ Nga, ɗétɔki Ɓayúda akpɛ ka nyɔngɔ á suɓi á Ɓuku á Mokonga nde ɗáoúbisa base ka nkíndí á ɓakpa gea, Yéso ande Kiísito.