Ekuma á ɓateki 17 - Ɔngana á Kɛ̌kɛ

Pɔ́lɔ na Síla ɓáge na Tɛsalɔníka

¹ Pɔ́lɔ na Síla ɓáɔnyɛ́nya k'aphe á ntanga-nji Amphipɔ́li na Apɔlɔnía, ɓáojua ka Tɛsalɔníka, ɔma nde endu á madondanɔ ndea Ɓayúda ka nyɔngɔ á Mokonga ɗátú.

² Ɓî Pɔ́lɔ ɗáɛmbani na ngiaga kau, áongia k'éndu ndɔɔ. Kó, áoaba na Ɓayúda ka saɓáto isaɔ ka phɔa nyɔngɔ nde a suɓi á Ɓuku á Mokonga.

³ Áokoɗa ɓuku ndɔ, áɔtɔmiaga na phangia aɓɔ gea, ɗákeni Kiísito átambɛgɛ na kuwa, mpɔ áojujuka ka kukuwa. Áǒgea te: «Yéso, mmbé nɛɔnɔ́tɔmiaga nyɔngɔ akɛ, yɛ aámbé ande Kiísito.»

⁴ Ká Ɓayúda ɓáoɓeekea, ɓáǒɗakatea Pɔ́lɔ na Síla. Ɓagiíki ɓásii, ɓaɓángi-Mokonga na ɓake á koomba, ɓâ phɔtɔ oɓeekea.

⁵ Ɓayúda ɓâ ndiu oɓá na nsengo, ɓáodondanisa usɛsɛ á ɓakpa jǎi-jǎi ɓundɔ ɗáɓědondi k'ɔ́ma ɗanga-ɗanga, ɓáoyombokisa ntanga-nji. Ɓáokiɗia k'éndu ndea Yasɔ́ni, ɓáǒkaɓa Pɔ́lɔ na Síla ka gǎ na ɓɔ mosá á madondanɔ.

⁶ Ɓî ɓákáɛɓɔni gǎkɛ, ɓáǒɓotaga Yasɔ́ni na ɓadakɛ ɓaɓêki ɓuangbo mosá á ɓakɔta á ntanga-nji na ɓáokoga te: «Ɓakpa nde ɗáɓáyombokisi mokonda bui, kɛ̌kɛnde ɓákiɗi wani,

⁷ Yasɔ́ni aesesi gǎkɛ mɔtɛ-akɛ. Ɓagáa ndɔ ɓɔbu ɓákáoɓea ɛɔphi ndea Moamɛ á Ɓalɔ́ma nga, ɓági te moamɛ ɓaangbo aɓei, ina akɛ Yéso.»

⁸ Nyɔngɔ ndɔ áɔ̌ɓɛisa usɛsɛ á ɓakpa na ɓakɔta á ntanga-nji.

⁹ Ɓakɔta á ntanga-nji ɓáǒphendisa Yasɔ́ni na ɓadakɛ ɓaɓêki imɔna, mpɔ, ɓáǒɗeketa ɓágɛ.

Pɔ́lɔ na Síla ɓákiɗi ka Bɛlɔ́ya

¹⁰ Ka ipha á esa, mɔngɔ ímoci ɓadaɓɔ ɓaɓêki ɓáoga ɔ̌ɔkɔa Pɔ́lɔ na Síla, ka gǎ á ɓɔ na Bɛlɔ́ya. Ka kiɗia á ɓɔ, ɓáongia suɓi éndu á madondanɔ ndea Ɓayúda ka nyɔngɔ á Mokonga.

¹¹ Bayúda á ka Bɛlɔ́ya, ɗáɓátú na měma ánjá kɔ̌nyɛ́nya Ɓayúda á ka Tɛsalɔníka. Ɗáɓáokonda phɛɛ ɔ́ka á nyɔngɔ á Mokonga. Esa bui, ɗáɓáokáɓa koɗoni suɓi á Ɓuku á Mokonga ka engekisa ɓɔphɛi ndea Pɔ́lɔ.

¹² Ɓayúda ɓásii sɔsɔɓɛ á ɓɔ ɓáoɓeekea. Ka Ɓagiíki, ɓake á koomba ɗáɓáɓeeki na ɓǒko ɓásii phɔtɔ.

¹³ Cɔ, ɓî Ɓayúda á ka Tɛsalɔníka ɓáɔ́ki gǎkɛ gea, Pɔ́lɔ a phɔtɔ ɔphɛa nyɔngɔ á Mokonga ka Bɛlɔ́ya, ɓáɔ̌gɛndɛa kó ka yombokisa na ɗengisa á ɓakpa.

¹⁴ Kɛ̌kɛndɔ, ɓadaɓɔ ɓaɓêki ɓáongesa Pɔ́lɔ nci á n'oɓenge. Síla na Timɔtɛ́ɔ, ɓâ gǎkɛ ojiga na Bɛlɔ́ya.

¹⁵ Ɓundɔ ɗáɓántambisi Pɔ́lɔ, ɓáonjúsa ka Atɛ́nɛ. Ka ja á ɓɔ, Pɔ́lɔ áǒngoɗea gea, ambe Síla na Timɔtɛ́ɔ ɓákamisɛgɛ gǎ donda akɛ.

Pɔ́lɔ akiɗi ka Atɛ́nɛ

¹⁶ Ɓî Pɔ́lɔ ɗátú ǒɓondea Timɔtɛ́ɔ na Síla ka Atɛ́nɛ, měma akɛ áoújukana ka ɔna á ɓî ntanga-nji ndɔ atúmi na iii á ɓamokonga á mbɛa.

¹⁷ Cɔ, suɓi éndu á madondanɔ ndea Ɓayúda ka nyɔngɔ á Mokonga, áoaba na Ɓayúda na ɓaɓángi-Mokonga ɓunde ɓáná Ɓayúda. Ɗá phɔtɔ ogea ɓó na ɓakpa nde ɗáǒdonda ka mosomba esa bui.

¹⁸ Ka ɓato á ubapha á ka nkíndí ndea Ɓaipikulíɔ na Ɓasitɔíkɔ, ɓáokpanga púa na Pɔ́lɔ. Ɓunɛngbo ɓáɔyɔnga gea: «Nto á eongo nde akondi yɔnga á kema sina?» Ɓuangbo goto: «A ɓea nkpa n'aɔtɔmiaga nyɔngɔ á ɓamokonga á mbɛa ɓunde ɓékéǒɓúba.» Ɗáɓáyɔngi ɓó nga, ɗáɓáɔmɔ́ka Pɔ́lɔ n'aɔtɔmiaga Mbino-Ánjá ndea Yéso na nyɔngɔ á jujúka á ɓasí ka kukuwa.

¹⁹ Mpɔ, ɓáondunga Pɔ́lɔ, ɓáonga ně mosá á ntua á tena nyɔngɔ nde ɗáɓáɔɔphana: Alɛɔpágɔ. Wa, ɓáongoɗea te: «Ɓe phɔ́ ɔtɔka na ɓeúbi kantíti á ɓɔphɛi á kɛ̌kɛ nnde ɔɔsɔphɛa?

²⁰ Nga, ɓɛɔkɔɔ́ka n'ɔyɔngaga nyɔngɔ nde ɓɛ́kɛ́ɔ́kimbɛ mɔnɔ. Ɓetókondi gǎkɛ ɓéúbɛ kantíti í.»

²¹ (Nga, ɓato á ka Atɛ́nɛ ɓɔbu na ɓakɛni nde ɗáɓáiki kó, ɗáɓáikíí tɔ tɔ̌miaga kaɓɛ n'ande ka ɔ́ka á mbino ɗanga-ɗanga á kɛ̌kɛ.)

²² Cɔ, Pɔ́lɔ áomama mosá á nkíndí á ɓakpa ka Alɛɔpágɔ, áogea te: «Ɓaya, ɓato á ka Atɛ́nɛ, nɛɔni gea ɓobisi měma anu phɛɛ ka ɓamokonga á mbɛa.

²³ Nga, ɓî ɗéotámbaga ka ntanga-nji nɛnu, ɗɛ́ɔɔnjia bîbíbí ɔma á esomba nɛnu. Ɗɛ́ɔni ɛtɛ-ɔ́phɛ́ɔ nde ɓáɗundu kau ɓe: ‹A ka phɔa mokonga á mbɛa mmbé nnaoúbikana.› Cɔ, mɔkɔta ndɔ ɓoonɗokomisa kángá úba akɛ, aámbé nɛɔnɔ́tɔmiaga mbino akɛ kɛ̌kɛnde.

²⁴ Yɛ ande Mokonga, mmbé aconji mokonda na kema bubui nde a kau. Ande Mɔkɔta á na koba na oɗo. Nnaoika suɓi éndu nde nkpa aphɛ̌ki na njaga.

²⁵ Nna gǎkɛ njaga á kokpa aunge aɔmbɛɗaneaga, ɓea ɓíndɔ atúoɓá n'ana siki á kema nga, yɛ aámbé aǒɓopha ɓakpa ɓɔbu enda, ɛphɛu na kema bui.

²⁶ Ɗáconji ekuna bui á ka mokonda kpangea á ka nkpa moci, ka gea, ɓáikɛ k'ɔ́ma bui ka mokonda. Ɗábisi matú ɗanga-ɗanga na bisa á muwɔ á ɔma á ɓoiki nɛɓɔ.

²⁷ Mokonga ɗági ɓondɔ ka gea, ɓakpa ɓánkaɓɛgɛ na kengá ɔna akɛ, yɛ nna ɗanga ka nkpa na nkpa ka ɓesu.

²⁸ Nga: ‹Ka nyɔngɔ akɛ unge, ɓeoenda, ɓeotamba, ɓeɓei.› A ɓíndɔ ɓatɔmigi-mɛní nɛnu, ɓági: ‹Ɓende ɓ'anakɛ.›

²⁹ Cɔ, ɓî ɓende ɓana-Mokonga, kákeni ɓékanisiɛ te, Mokonga akengeani na iii nde ɓakpa ɓákanisíí na ɓɔngisiaga í na láté, ngɔa n'ɛtɛ ka ɓá ɓamokonga á mbɛa.

³⁰ Mokonga nna ye gǎkɛ oɓea nyɔngɔ nde ɓakpa ɗáɓági na ɓákáomúba. Kɛ̌kɛnde aeɓɔphani ye tɔ ɓakpa ɓɔbu á k'ɔma bui ka kětia á tambea aɓɔ.

³¹ Mokonga a ye bisi esa nde atenaeka nyɔngɔ á ɓato á ka mokonda bui ka koɗoni, na ka njaga á nkpa nde ansɔmbu. Ɗánengekisi nkpa kayɛ mosá á ɓakpa ɓɔbu ka jujúkisa akɛ ka kukuwa.»

³² Ɓî ɓato á ka Atɛ́nɛ ɓáɔ́ki ye nyɔngɔ á jujúka á ɓasí ka kukuwa, ɓuangbo ɓáɔntɛbɛa, ɓuangbo ɓâ gǎkɛ ogea te: «Ɓɛɔ́kande goto n'ɔɔyɔnga nyɔngɔ ndɔ esa nɛngbo.»

³³ Ka ɓondo unge, Pɔ́lɔ áokatana na ɓɔ.

³⁴ Nanga ɓó, ɓakpa ɓuangbo ɓáoɓeekea, ɓáojúkana na yɛ. Sɔsɔɓɛ aɓɔ, ɗátú Diɔnisíɔ, ka ɓato á ka ntua Alɛɔpágɔ na nke Damáli na ɓakpa ɓunɛngbo phɔtɔ.