Ekuma á ɓateki 16 - Ɔngana á Kɛ̌kɛ

Pɔ́lɔ ansɔmbu Timɔtɛ́ɔ ka tamba

¹ Pɔ́lɔ áojua ka Dɛ́ɛbɛ mbusa á wa, áɔtɔngana na Lísta. Wa, ɗátú na ngoigi moci ina akɛ Timɔtɛ́ɔ. Amakɛ ɗátú Moyúda mɓêki. Abakɛ ɗátú gǎkɛ nɛkɛ Mogiíki.

² Ɓaɓêki á ka Lísta na Ikɔníɔ ɗáɓátú obeba tambea á Timɔtɛ́ɔ ánjá.

³ Kaɓondɔ, Pɔ́lɔ áokonda támbágá na yɛ. Áɔmbɛɗa, áongusisa ganja ka nyɔngɔ á Ɓayúda ɓunde ɗáɓátú k'ɔ́ma ndɔ bui. Nga, ɓakpa ɓɔbu á k'ɔma ndɔ ɗáɓáoúba gea, abakɛ ɗátú Mogiíki.

⁴ Cɔ, Pɔ́lɔ na ɓadakɛ ɓáotamba ka ntanga-nji ɗanga-ɗanga, na ɓáǒúbisa ɓaɓêki gea ɓáambɛ ɛɔphi nde ɓateki na ɓagbɛga á ka Yɛusalɛ́ma ɗáɓábisi.

⁵ Měma á ɓato á ka kanisa áoɓá na ɓukpɛkpɛ ka ɓeekea. Esa bui, ɓaɓêki ɓáǒyamea.

Ɓámɔphani Pɔ́lɔ na Makɛdɔnía

⁶ Pɔ́lɔ na ɓadakɛ ɓáɔnyɛ́nya ka nji bui á Phuigía na Galatía nga, Měma á kanga ɓojeɗe ɗáéimisíí tɔ̌miaga á nyɔngɔ á Mokonga ka nji á ka Asía.

⁷ Ɓájú ye bíbí á Misía, ɓáokengisia ngia ka Bitinía, Měma á Yéso â gǎkɛ ǒimisia.

⁸ Kaɓondɔ, ɓáɔɔtata Misía, ɓáodida ka ikɔ á na Tɔ́a.

⁹ Kǐpha, Pɔ́lɔ áɔɔna mphaniɔ, áɔmɔna nto á ka Makɛdɔnía n'amame. Yɛ áonɗengemisaga Pɔ́lɔ, áongea te: «Káia, óbikɛ ósoengɛ ka Makɛdɔnía.»

¹⁰ Kɛ̌kɛndɔ mbusa á mphaniɔ, ɓéokamisaga mɛ́a ka gǎ na Makɛdɔnía nga, ɗéɓeúbi ɗoni gea te, Mokonga asɔ́ɔphanima ka tɔ̌miaga Mbino-Ánjá kó.

Pɔ́lɔ angí ka Makɛdɔnía

¹¹ Cɔ, ka mɛ́a asu ka Tɔ́a, ɓéokambea ka koko ángbó, mɔngɔ ímoci ɓéojua ka kesanga á Samotiákɛ. Mama í, ɓéojua ka Nɛapɔ́li.

¹² Tóka á wa, ɓéojua ka Philípi, ntanga-nji ángbó á k'ama mosá-mosá á ka Makɛdɔnía nnde Ɓalɔ́ma ɗáɓátúmi kau. Kó, ɓéoɗa ɓ'esa ábɔa.

¹³ Esa á saɓáto, ɓéotóka ka nji ndɔ, ɓéoga ka nkpangba-iɓo moci, ɓéokanisia te, ɔma á ɛmɛmi a wa. Cɔ, ɓéoika ka oɗo, ɓéǒdonda ɓake ɓunde ɗáɓádondanigi, ɓɛ́ɔyɔngaga na ɓɔ.

¹⁴ Ka ɓake ndɔ moci, ina akɛ Lúdia nto á ka Tuatɛ́a, n'ande phɔtɔ nsombisigi ngɔ́mbɛ ánjɛ nnde ana esombi akpɛ, n'ande mɓángi-Mokonga. Mɔkɔta áokoɗa měma akɛ ka ɔ́ka bîbíbí yɔnga ndea Pɔ́lɔ.

¹⁵ Ɓî ɓámɓatisi na ɓakpa nde ɓá k'éndu nɛkɛ ɓɔbu, áɔsɔ́ɔphana mɔtɛ-akɛ áogea: «Ɓî ɓoɓeeki ɗoni gea, nemɓeeki Mɔkɔta, bikani ɓóikɛ mɔtɛ-amɔ.» Áosósosea gea ɓéɓeekeɛ.

Ɓáemaki Pɔ́lɔ na Síla ka mekakɔ

¹⁶ Esa moci, ɗéɓeoga k'ɔ́ma á ɛmɛmi, nke moci, mbɛɗanigi áosódondanisa. Yɛ ɗá na ɓansombo á ɔtɔa á nyɔngɔ suɓi akɛ. Ɓakɔta nɛkɛ ɗáɓáɔtɔa imɔna ásii ka nyɔngɔ á ekuma nɛkɛ.

¹⁷ Nke ndɔ áosóɓea n'aokogaga te: «Ɓakpa nde ɓánde ɓabɛɗanigi ndea Mokonga mmbé á na koba. Ɓáɔnɔ́phɛa aphe á ɓoamia á ka měma.»

¹⁸ Ɗáogeaga ɓó ka ɓ'esa ásii. Kaɓondɔ, Pɔ́lɔ áɔɓɛa phɛɛ, áǒpháia, áǒngoɗea ɓansombo ndɔ gea: «Nenososi k'ína á Yéso Kiísito, tókani suɓi á nke ndee.» Kɛ̌kɛndɔ tɔ, ɓansombo ndɔ ɓáontóka.

¹⁹ Ɓî ɓakɔta nɛkɛ ɓáɔni gea nseɓeɔ á ɛtɔi nɛɓɔ aɓúngi, ɓáǒdunga Pɔ́lɔ na Síla, ɓáǒɓota k'ɔ́ma ángbó á madondanɔ, ɓáǒbisa ka ntua mosá á ɓateni-nyɔngɔ.

²⁰ Ɓáǒbisa mosá á ɓakɔta Ɓalɔ́ma, ɓáogea te: «Ɓayúda nde ɓáyombokisi ntanga-nji nɛsu.

²¹ Ɓáɔphɛa asii nde ɓáimisíí ka ɓesu Ɓalɔ́ma, ɓeekea í na gea í.»

²² Usɛsɛ á ɓakpa ɓáɔ̌ɓɛɛa Pɔ́lɔ na Síla. Ɓateni nyɔngɔ ɓáǒphúisisa bɔngɔ na sosea gea ɓéɓindɛ na ngbángá.

²³ Ɓáǒɓinda phɛɛ, ɓáǒmakea ka mekakɔ. Ɓáonsosea mɓondigi-mekakɔ gea, éambɛ ánjá.

²⁴ Ɓî aɔ́ki ye ɓó, áǒbisa ka ntunguɗɔ á mekakɔ. Áokpatikisa ecinji aɓɔ suɓi á gbútuka á me.

²⁵ Ka gabekana ésa, Pɔ́lɔ na Síla ɗáɓátú ɔmɛma na émba embɔ á beba á Mokonga. Ɓadaɓɔ ɓato á mekakɔ, ɓáɔ̌ɓɔ́ka.

²⁶ Mɔngɔ moci, ɓaningina akpɛ áoɗengisa nsimbiɔ éndu á mekakɔ. Kɛ̌kɛndɔ tɔ, kǐo bui á mekakɔ áoúkukanaga. Ngoi á ngɔa bui ndea ɓato á mekakɔ, áokoɗokanaga.

²⁷ Mɓondigi-mekakɔ ajujúki ye, áɔɔna kǐo bui á mekakɔ n'aúkukanigi, mpɔ áophúia mɓɛngɛ nɛkɛ ka gea te, áemowanɛ ně nga, ɗákanisi gea, ɓato á ka mekakɔ ɓáti.

²⁸ Cɔ, Pɔ́lɔ â gǎkɛ okoga k'ɛ́sɔ akpɛ te: «Kǒmowanɛmbɛ! Ɓesu ɓáunge ɓe phɔ́tɔ wani!»

²⁹ Mɓondigi-mekakɔ ndɔ, áɔɔphanɛa ɔbɛa, áokamisaga gǎ, áongia, áogua k'écinji á Pɔ́lɔ na Síla, n'aɔɛkanaga.

³⁰ Mbusa, áǒjuanisa, â kǒúsia te: «Ɓaya, akeni négeɛ ɓo ka gea, néamɛ ka měma?»

³¹ Ɓáonsikisia te: «Mɓeekea Mɔkɔta Yéso, mpɔ oamande, oɓɛ n'ekombo nɛkɔ.»

³² Mpɔ Pɔ́lɔ na Síla ɓáɔntɔmiaga yɛ na ɓato á k'éndu nɛkɛ ɓɔbu, Mbino á Mɔkɔta.

³³ Ka mbenɔ á keiphe ndɔ tɔ, mɓondigi-mekakɔ áɔ̌bɛɗa, na gǎ á sokosa aɓɔ aphɛphɔa. Kɛ̌kɛndɔ tɔ, ɓáomɓatisa yɛ na ɓakpa nɛkɛ ɓɔbu.

³⁴ Mpɔ mɓondigi-mekakɔ áǒɗaphisa Pɔ́lɔ na Síla k'éndu nɛkɛ, áǒɓopha eea. Yɛ kimoci na ɓato á k'éndu nɛkɛ ɓáotúma na maseye phɛɛ ka nyɔngɔ nde, ɗáɓámɓeeki Mokonga.

³⁵ Ɓî esa akoɗokani ye, ɓateni-nyɔngɔ Ɓalɔ́ma ɓáǒteka ɓakɔta á ɓato émani ka ngoɗea á mɓondigi-mekakɔ te: «Ójuanisa ɓakpa ndɔ ka mekakɔ.»

³⁶ Mɓondigi-mekakɔ áoga ɔntɔmia Pɔ́lɔ mbino ndee: «Ɓateni-nyɔngɔ Ɓalɔ́ma ɓámotekisíí mbino, nénojuanisɛ. Cɔ, júanani ɓógɛ na ɓujɛjɛ!»

³⁷ Pɔ́lɔ â gǎkɛ ǒngoɗea ɓato á émani ndɔ te: «Ɓásoɓindisi ka ntanga kángá á yɔngisa nyɔngɔ nɛsu, ɓáosómakisa ka mekakɔ, na ɓende gǎkɛ Ɓalɔ́ma. Cɔ, kɛ̌kɛnde, ɓákondi ɓásojuanisɛ ka ɓɔsɔmɛa ka ɓo? Ɓɛɛndɔ. Ɓakɔta ɓáunge ɓábikɛ ɓásojuanisɛ ndiu tɔ sasaɓɔ.»

³⁸ Ɓakɔta á ɓato émani ɓáǒngoɗeaga ɓateni-nyɔngɔ ɓî Pɔ́lɔ ɛ̌tɔngi. Ɓáoɓánga ɓî ɓáɔ́ki gea, Pɔ́lɔ na Síla ɓánde Ɓalɔ́ma.

³⁹ Mpɔ, ɓáobika ka mpɛphɛ á Pɔ́lɔ na Síla, ɓáǒɗengemisaga, ɓáǒjuanisisa ka mekakɔ. Ɓáǒgea te, ɓátokɛ ka ntanga-nji ndɔɔ.

⁴⁰ Ka juana á Pɔ́lɔ na Síla ka mekakɔ, ɓáoga mɔtɛ á Lúdia. Wa, ɓáɔ̌ɓɔna ɓadaɓɔ ɓaɓêki, ɓáǒgbagisaga ka měma, mpɔ ɓáoga.