Ekuma á ɓateki 15 - Ɔngana á Kɛ̌kɛ

Kanisa á ka Yɛusalɛ́ma adondanigi ka nyɔngɔ á gua ganja

¹ Mbusa, ɓakpa ɓuangbo, ɓunde ɗáɓátóki na Yudɛ́a, ɓáoga ka ntanga-nji á Antiɔkía á ka Sulía. Ɓáju ye kó, ɓáokpanga goisaga á ɓadaɓɔ ɓaɓêki ɓɔbu nyɔngɔ ndee: «Aoɓá na ɓókógú ganja ɓíndɔ ɛɔphi ndea Mósa asosi, ɓókótɔkɛku na ɓoami ka měma.»

² Cɔ, Pɔ́lɔ na Baanába ɓáoyá ɓɔphɛi nɛɓɔ, ɓáopúa na ɓɔ ásii ka yɔnga. Kaɓondɔ, ɓaɓêki á ka Antiɔkía ɓáɔnsɔmbɔa Pɔ́lɔ, Baanába na ɓakpa ɓuangbo sɔsɔɓɛ aɓɔ, ka gea ɓágɛ na Yɛusalɛ́ma, mɔtɛ á ɓateki na ɓagbɛga á kanisa, ka phɔa á nyɔngɔ nde ɗáɓáopúa kau.

³ Ka Antiɔkía, kanisa áǒɓopha kema nde akeni enga aɓɔ ka tamba. Ɓáɔnyɛ́nya ka Phɔinikía na Samalía, ɓáɔ̌tɔmiaga ɓaɓêki nyɔngɔ ɓî ɓato á k'ékuna nɛngbo ɓámɓeeki Mokonga. Nyɔngɔ ndɔ áɔ̌ɓɔngɛa ɓaɓêki ɓɔbu phɛɛ.

⁴ Ɓî ɓakpa nde kanisa ɗáeteki ɓájú ye na Yɛusalɛ́ma, ɓato á ka kanisa, ɓateki ndea Yéso na ɓagbɛga ɓáǒsesea. Pɔ́lɔ na Baanába ɓáɔ̌tɔmiaga kema bui nde Mokonga ɗági ka njaga aɓɔ.

⁵ Ɓaɓêki ɓuangbo, ɓundɔ ɗáɓátú mosá k'ékombo ndea Ɓaphaisáyɔ, ɓáoma, ɓáɔyɔnga te: «Akeni ndiu ɓaɓêki á k'ékuna nɛngbo ɓunde ɓáɓeeki, ɓáguɛ ganja na sosea aɓɔ gea ɓáambɛ ɛɔphi ndea Mósa.»

⁶ Ɓateki na ɓagbɛga ɓáodondanaga ka ianaga ka nyɔngɔ ndɔɔ.

⁷ Mbusa á púa phɛɛ, Pɛ́tɛɛ áomá, áǒngoɗea te: «Ɓaya, ɓenu sasanu ɓooúba gea, Mokonga ɗámɔsɔmbu kala ka ɔlɔ anu ka gea te nɛ́tɔ̌miɛgɛ nyɔngɔ nɛkɛ k'ékuna nɛngbo gea, ɓáɔ́kɛ Mbino-Ánjá na ɓeekea í.

⁸ Mokonga mmbɔ aoúba měma á ɓakpa, aengekisi na ɓeekea ɓato á k'ékuna nengbo ka ɔphá aɓɔ Měma á kanga ɓojeɗe ɓíndɔ ɗásóphi phɔtɔ.

⁹ Kásótinganisi gǎkɛ na ɓɔ nga, asokosei měma á ɓɔ ka nyɔngɔ nde ɓáɓeeki.

¹⁰ Cɔ, kɛ̌kɛnde ɓo gǎkɛ ɔnjɔbisaga Mokonga ka ɓo nga, ɓǒsosea ɓagoigi nde ɓákumbɛ nkumba nde, nanga ɓatatasu, nanga ɓesu sisasu ɗéɓékétɔki kumba í.

¹¹ Ɓeɓeeki gǎkɛ gea, Mokonga asoamisi ka nyɔngɔ á ɓonjánja-ékondi ndea Mɔkɔta Yéso, ɓíndɔ ɗéamisi ɓato á k'ékuna nɛngbo.»

¹² Mpɔ, usɛsɛ á ɓakpa ɓɔbu ɓáodakana, phio! Ɓáɔmɔ́kanea Pɔ́lɔ na Baanába ɓî ɓáɔtɔmiaga mphaniɔ na ketangaɔ ndɔ Mokonga ɗátɔtɔkisi ka njaga aɓɔ ka ɔlɔ á ɓato á k'ékuna nɛngbo.

¹³ Ɓî ɓágɔɓi ye yɔnga, Yakɔ́ɓɔ áǒngoɗea te: «Ɓaya, ɔ́mɔɔ́kani phɔ́!

¹⁴ Simɔ́ni ɗásóngoɗi ɓî Mokonga aphangisi phɔ́ ngomi nɛkɛ ka ɓato á k'ékuna nɛngbo gea, ɛ́sɔmbɔɛ ka ɔlɔ aɓɔ, ɓábɛ ɓakpa nɛkɛ.

¹⁵ Nyɔngɔ ndɔ áotamba kimoci n'índe á ɓaɔtu-nyɔngɔ ndea Mokonga, nnde ɗáɓáɗundu suɓi á Ɓuku á Mokonga ɓe:

¹⁶ ‹Mbusa índɔ, nejaeka nɛ́ɔphɛka goto endu ndea Daúdi nnde ɗángbɔɔkani. Nɛɓɔngisiagande goto ngundu-éndu ndɔɔ.

¹⁷ Ka gea te, ɓakpa ɓunɛngbo ɓɔbu ɓánkaɓande Mɔkɔta. Eya, ɗáɛɓɔphani ɓato á k'ékuna bui, ɓunde ɗáɛɓɔphani gea te ɓábɛ ɓuamɔ. Nndɔ unge Mɔkɔta ayɔngi,

¹⁸ moangɔ nɛkɛ nnde ɗáengekisi kala.›

¹⁹ Kaɓondɔ, neteni nyɔngɔ ɓe: Nekanisi te, ɓékětambisɛgɛmbɛ ɓato á k'ékuna nɛngbo ɓunde ɓámɓeeki Mokonga.

²⁰ Ɓéɗunduiɛ ndiu ɓaoɓa ka gea, ɓáyé ɓɔjɔɔkiɔ nde a ka ya nyama nde ɗáɓáphúi ka phɛ́a. Ɓákágɛ mɔnɔ k'aphe á otungɔ. Ɓákáeɛ mɔnɔ nyama n'aku ǐti, ɓákáeɛ mɔnɔ phɔtɔ magia.

²¹ Nga, kpanga á kala, ɓáɔphɛa na tanga ɛ́ɔphi ndea Mósa suɓi éndu á madondano ɗanga-ɗanga ndea Ɓayúda ka nyɔngɔ á Mokonga k'ésa á saɓáto bui na ka ntanga-nji bui.»

Kanisa aɗundu ɓaoɓa ka ɓaɓêki á ka Antiɔkía

²² Mpɔ ɓateki, ɓagbɛga á kanisa na kanisa bui, ɓáophánga sɔmbɔa ka ɓakpa sɔsɔɓɛ aɓɔ na teka á ɓɔ ka Antiɔkía kimoci na Pɔ́lɔ na Baanába. Ɓáɔ̌sɔmbɔa Yúda mmbé ɓá phɔtɔ ɔmɔphana Balisába na Síla, ɓunde ɗáɓátú na kɔkɔta sɔsɔɓɛ á ɓadaɓɔ.

²³ Ɓáǒteka na ɓaoɓa na ɓáɗundu suɓi í ɓe: «Ɓesu ɓateki, ɓagbɛga na ɓaɓêki ɓeésesi ɓadasu ɓundɔ ɓáná Ɓayúda ɓunde ɓáiki ka Antiɔkía, Sulía na Kilikía.

²⁴ Ɓɛɔ́ki gea, ɓakpa ɓuangbo ka ɓesu ɓátóki koni kángá á moangɔ nɛsu. Ɓáonóagatisa na kɔɓisa á měma anu na nyɔngɔ nɛɓɔ.

²⁵ Kaɓondɔ, ɓéoúba ophánga na měma moci, ka sɔmbɔa á ɓakpa ndɔ ɓeóteka mɔtɛ-anu. Ɓágande kimoci na ɓadasu ékondi, Baanába na Pɔ́lɔ.

²⁶ Ɓɔ, ɗáɓábisi enda nɛɓɔ bui ka bɛɗaneaga á Mɔkɔta nɛsu Yéso Kiísito.

²⁷ Ɓenótekisíí Yúda na Síla, ɓɔ ɓánóngoɗeande base nyɔngɔ nde ɓenóɗundui.

²⁸ Nga, Měma á kanga ɓojeɗe na ɓesu sasasu, ɓephángi gea ɓékénókúmbisɛku nkumba áɗoko, tɔndɔ ɛɔphi nde ana kantíti n'ande ɓe:

²⁹ Ɓókoeɛ mɔnɔ eea nde ɓáphúi ka phɛ́a á ɓamokonga á mbɛa, ɓókoeɛ phɔtɔ magia, na nyama n'aku ǐti. Ɓókógɛ mɔnɔ gǎkɛ k'aphe á otungɔ. Ɓǒɓangisa na nndɔ, ámbé ɓogi ánjá. Ɓenosesi!»

³⁰ Mpɔ Pɔ́lɔ na ɓadakɛ ɓáɔɔkɔa ka nji ndɔ, ɓáoga ka Antiɔkía. Kó, ɓáǒdondanisa ɓaɓêki ɓɔbu, ɓáǒɓopha ɓaoɓa ndɔɔ.

³¹ Mbusa á ɓɔ tanga á ɓaoɓa ndɔ n'ɛsɔ akpɛ, ɓáoɓá na maseye nga, ɓɔphɛi kau ɗéɓophi ɓukpɛkpɛ á ka měma.

³² Yúda na Síla ɓundɔ ɓaɔtu-nyɔngɔ ndea Mokonga, ɓáɔ̌phɛa phɛɛ, ɓáǒgbagisa na opha aɓɔ ɓukpɛkpɛ.

³³ Ɓáoika kó k'ésa ábɔa, mpɔ, ɓaɓêki ɓɔbu ɓáɔ̌ɔkɔa gea ɓájɛ na ɓujɛjɛ mɔtɛ á ɓundɔ ɗáɓěteki. [

³⁴ Síla â gǎkɛ ophánga nɛkɛ jiga ka Antiɔkía.]

³⁵ Cɔ, Pɔ́lɔ na Baanába na ɓagoisigi ɓuangbo ɓásii, ɓâ gǎkɛ ojiga ka Antiɔkía, ka goisaga na phɛá á Mbino-Ánjá ndea Mɔkɔta.

Pɔ́lɔ na Baanába ɓákatanigi

³⁶ Mbusa á ɓ'esa ábɔa, Pɔ́lɔ áongoɗea Baanába te: «Ɓéjɛ phɔ́ ka ɛnjɛa ɓadasu ɓaɓêki ka ntanga-nji moci-moci nde ɗɛ́ɓɛtɔ̌migi nyɔngɔ ndea Mɔkɔta, ka ɛnjɛa ámbé enda aɓɔ a ɓo.»

³⁷ Cɔ, Baanába ɗákondi gǎ na Yoáni mmbé ɓáɔmɔphana Málikɔ.

³⁸ Pɔ́lɔ ɗáɔni gea kákeni bɛɗa akɛ ɓágɛ na yɛ nga, Málikɔ ɗáeɗeketi ka Pamphilía, kángá á tútuisa ekuma kimoci na ɓɔ.

³⁹ Ɓáopúa phɛɛ ngǔngu aɓɔ na ka ɓî ɗáɓákatanigi. Baanába áɔmbɛɗa Málikɔ, ɓáokambea ka koko ángbó, ɓáoga na Kipúɔ.

⁴⁰ Pɔ́lɔ â gǎkɛ ɔnsɔmbɔa nɛkɛ Síla. Mpɔ, ɓaɓêki ɓáɔmɛma Mokonga ka phɔa á ɓɔ gea, ɓágɛ na ɓonjánja-ékondi ndea Mɔkɔta.

⁴¹ Ɓáɔtɔmba Sulía na Kilikía na ɓáogbagisaga měma á ɓato á kanisa.