Ekuma á ɓateki 14 - Ɔngana á Kɛ̌kɛ

Pɔ́lɔ na Baanába ɓáɔphɛa Mbino-Ánjá ka Ikɔníɔ

¹ Nyɔngɔ nde ɗáogeana ka Ikɔníɔ, aunge ɗá phɔtɔ ogeana ka Antiɔkía. Pɔ́lɔ na Baanába ɓáongia k'éndu á madondanɔ ndea Ɓayúda ka nyɔngɔ á Mokonga. Ɓâ phɔtɔ ɔphɛa na ka ɓî ɓakpa ɓásii, Ɓayúda na ɓunde ɓáná Ɓayúda ɗáɓámɓeeki Yéso.

² Ɓayúda íɓunde ɗáɓáyé ɓeekea á Yéso, ɓâ gǎkɛ ɔ̌sɔia ɓunde ɓáná Ɓayúda ɓékangeɛ ɓunde ɓámɓeeki Yéso.

³ Pɔ́lɔ na Baanába, ɓâ gǎkɛ oika kó esa ásii. Ɓáosuia tɔ̌miaga á nyɔngɔ á Mɔkɔta kángá á ngǎka na seɓea akɛ. Mɔkɔta â koopha ɓukpɛkpɛ á tɔtɔkisa ketangaɔ na mphangiɔ ásii. Nndɔ unge aengekisi ɓɔphɛi á ɓonjánja-ékondi nɛkɛ gea ande ɗoni.

⁴ Ɓato á ka nji ndɔ ɓâ gǎkɛ okatanaga. Ɓunɛngbo ɓáoɓá nkɛkɛɔ á Ɓayúda, ɓunɛngbo nkɛkɛɔ á ɓateki.

⁵ Ɓayúda na ɓunde ɓáná Ɓayúda, na ɓakɔta nɛɓɔ, ɓâ gǎkɛ osuia tambisaga Pɔ́lɔ na Baanába, na mowa aɓɔ ka ɓɛtaga aɓɔ n'ɛtɛ.

⁶ Ɓî Pɔ́lɔ na Baanába ɓáɔ́ki maca ndɔ, ɓáotea ɓáoga ka ntanga-nji á ka Lísta na Dɛ́ɛbɛ, nji ndea Likaɔnía, na nji á ka mpɛ́phɛ í.

⁷ Kó, ɓáotútuisa phɛá á Mbino-Ánjá ndea Mɔkɔta Yéso.

Pɔ́lɔ na Baanába ɓáɔbɛɗanaga ka Lísta

⁸ Nɗɔti moci ɗátú ka Lísta n'ande ketǔmbe. Yɛ ɗáiki ka oɗo kángá á tamba kpanga á ɓɔkɔtɛna akɛ.

⁹ Cɔ, áɔmɔ́ka Pɔ́lɔ n'aɔyɔnga. Wa, Pɔ́lɔ áontúmia nɗɔti n'íso, áoúba gea, ana ɓeekea nde aɔtɔka amisa akɛ.

¹⁰ Kaɓondɔ, Pɔ́lɔ áongoɗea n'ɛsɔ akpɛ gea: «Ómesia» Nto á kiɗɔti ndɔ áǒmesia phǒi! Áɔɓɛkaga, áotamba.

¹¹ Cɔ, ɓî usɛsɛ á ɓakpa ɓáɔni ye ɓó, ɓáokoga ka ɛyɔngi á ɓato á ka Kilikaɔnía, gea: «Ɓamokonga á mbɛa ɓábɛɗi iii á kokpa, ɓáokia mɔtɛ-asu!»

¹² Ɓáɔmɔphana Baanába: «Jɛ́u.» Ɓâ gǎkɛ ɔmɔphana Pɔ́lɔ: «Ɛɛ́mɛ», ka nyɔngɔ nde Pɔ́lɔ aámbé ɗátú ɔyɔnga.

¹³ Mpɔ, ntoɓeigi-phɛ́a éndu á esomba ndea Jɛ́u áombika na mǔku á ngɔmbɛ n'antɔndi na maya ka kǐo nde ɗátú ka ngba-nji. Áobika kimoci na usɛsɛ á ɓakpa ndɔɔ. Nga ɓɔ, ɓáokonda phɛ́a á nyama ndɔ ka phɔa á Pɔ́lɔ na Baanába.

¹⁴ Ɓî ɓateki, Baanába na Pɔ́lɔ ɓáɔ́ki nndɔ, ɓáonyuaga ngɔ́mbɛ nɛɓɔ, ɓáokamisaga ngia ka usɛsɛ á ɓakpa na ɓáokoga gea:

¹⁵ «Ɓadani, ɓogi ɓondɔ ka ɓo? Ɓe phɔtɔ ɓakpa ɓea ɓenu, ɓekengeani tɔ na ɓenu ka kema bui. Ɓeonóphɛa Mbino-Ánjá ka gea, ɓóɗeketɛ ɗokomisa á kema á jǎi-jǎi, ɓókětiɛ ka Mokonga mmbɔ mɛyɔ, mmbɔ aconji koba, mokonda, oɓenge na kema bubui nde a kau.

¹⁶ Ka matú nde ɗányɛ́nyi, Mokonga ɗáɗeketi ekuna bui ɓáɓeɛ aphe nde ɓákondi.

¹⁷ Ɗáɗeketi gǎkɛ mphangiɔ á ɓonjánja nɛkɛ. Nga, anóphi mbua ka toka na koba, ɗúngú ka matú í, áonókútisa, áotúmisa měma anu na maseye.»

¹⁸ Nanga áɓá ɓó, ɗátú akpɛ ka imisia á mɔphɛ á ɓakpa gea ɓákáeɓophɛ mɔnɔ phɛ́a.

¹⁹ Mbusa, Ɓayúda á ka Antiɔkía na Ikɔníɔ, ɓáɔsɔia usɛsɛ á ɓakpa gea ɓágamanɛ na ɓɔ, ɓámmowɛ Pɔ́lɔ ka ɓɛtaga akɛ n'ɛtɛ. Ɓáonga ně ka ngba á ntanga-nji, ɓáokanisia te aku.

²⁰ Ɓagoigi ɓâ gǎkɛ ontimba Pɔ́lɔ. Yɛ áokoɗa iso. Mpɔ, áoja na nji. Mama í, ɓáoga na Baanába ka ntanga-nji á ka Dɛ́ɛbɛ.

Pɔ́lɔ na Baanába ɓásikianigi na Antiɔkía

²¹ Pɔ́lɔ na Baanába ɓájú ye ka ntanga-nji á Dɛ́ɛbɛ, ɓáɔphɛa Mbino-Ánjá ndea Mɔkɔta Yéso, ɓakpa ɓásii ɓáoɓá ɓagoigi. Mbusa, ɓáosikianaga na Lísta, Ikɔníɔ, Antiɔkía á ka Pisidía.

²² Ɓî ɗáɓáotamba ka nji ndɔ bui, ɓáogbagisaga měma á ɓagoigi gea, ɓáendɛ ka ɓeekea nɛɓɔ. Ɓáǒgea te: «Akeni ɓásotambisɛgɛ phɛɛ mosá á ngia asu ka koɓoamɛ ndea Mokonga.»

²³ Suɓi á kanisa moci-moci á ka nji ndɔ, Pɔ́lɔ na Baanába ɓáɔ̌sɔmbɔa ɓagbɛga á kanisa. Mbusa í, ɓáɔmɛma na ika kángá á eaga ka nyɔngɔ á mɛma á Mokonga. Mpɔ ɓáǒbisa ka njaga Mɔkɔta mmbé ɓámɓeeki éambɛ.

²⁴ Mbusa, ɓáotenisia ka ntanga-nji á ka Pisidía, ɓáojua ka nji á Pamphilía.

²⁵ Mbusa, ɓáɔphɛa nyɔngɔ á Mokonga ka Pɛ́ɛga. Mpɔ, ɓáɔtɔnganaga na Atalía.

²⁶ Wandɔ, ɓáokambea ka koko ángbó, ɓáoga na Antiɔkía á ka Sulía, nji ndɔ unge ɗáɓěbisi ka njaga á Mokonga mɛna-ekondi ka gea, ɓátɔtɔkisɛ ekuma nɛɓɔ ndɔ ɗáɓágɔɓi.

²⁷ Ɓájú ye na Antiɔkía, ɓáǒdondanisa ɓato á kanisa, ɓáǒngoɗea kema bui nde Mokonga ɗági kimoci na ɓɔ, na ɓî Mokonga aekoɗei phɔtɔ ɓakpa nde ɓáná Ɓayúda aphe á ɓeekea á Mokonga.

²⁸ Ɓáoika na ɓaɓêki wa k'ésa ásii.