Ekuma á ɓateki 13 - Ɔngana á Kɛ̌kɛ

Ɓáɛsɔmbu Pɔ́lɔ na Baanába ka bɛɗanaga

¹ Ka kanisa ndea ka Antiɔkía ɗátú na ɓaɔtu-nyɔngɔ ndea Mokonga na ɓagoisigi. Ina á ɓɔ aungee: Baanába, Simɔ́ni (mmbé ɗáɓátú ɔmɔphana nto á koínda), Lukíɔ (nto á ka Kuɛ́nɛ), Saúlɔ na Manaɛ́ni (mmbé ɓámɔtɛani na Moamɛ Ɛlɔ́dɛ.)

² Esa moci, ɓî ɗáɓáombeba Mɔkɔta, na ika kángá á eaga ka nyɔngɔ á mɛma á Mokonga, Měma á kanga ɓojeɗe áǒngoɗea te: «Óbisani Baanába na Saúlɔ ka mpɛphɛ. Nga, nɛ̌ɓɔphani k'ékuma.»

³ Cɔ, mbusa á tútuisa ɛmɛmi na ika kángá á eaga ka nyɔngɔ á mɛma á Mokonga, ɓáobisa njaga gǔ á ɓɔ mpɔ, ɓáǒɗeketa ɓágɛ.

Baanába na Saúlɔ ɓáɔbɛɗanaga na Kipúɔ

⁴ Měma á kanga ɓojeɗe aéteki ye Baanába na Saúlɔ, ɓáoga na Sɛlɛukía. Kó, ɓáokambea ka koko ángbó, ɓáokáia ka kesanga ángbó ndea ka Kipúɔ.

⁵ Ɓî ɓákiɗi ka Salámi, ɓáɔtɔmia nyɔngɔ á Mokonga k'éndu á madondanɔ ndea Ɓayúda ka nyɔngɔ á Mokonga. Yoáni-Málikɔ ɗátú kimoci na ɓɔ ka enga aɓɔ k'ékuma.

⁶ Ɓáokáia ka kesanga ndɔ bui, ɓáojua ka Páphɔ. Wa, ɓáondonda Moyúda moci, n'ande nkúme na mɔtu-nyɔngɔ á mbɛa, ina akɛ Bála-Yéso.

⁷ Ɗátú kimoci na moamɛ Sɛɛgíɔ Pɔ́lɔ. Moamɛ ndɔ ɗátú nto á úbapha. Yɛ, áɔ̌ɓɔphana Baanába na Saúlɔ nga, ɗáokáɓa phɛɛ ɔ́ka á nyɔngɔ á Mokonga.

⁸ Nkúme nde (ina akɛ ka Kigiíki Ɛlɛ́ma), â gǎkɛ opúa na Baanába na Saúlɔ. Áokáɓa imisia á moamɛ gea te, kaɓeekeɛmbɛ nyɔngɔ á Mokonga.

⁹ Wandɔ, Saúlɔ, (mmbé ɓáɔmɔphana Pɔ́lɔ), áotúma na Měma á kanga ɓojeɗe, áontúmia Ɛlɛ́ma n'íso,

¹⁰ Áongea te: «Oɓɛ otúmi n'etéte bui á maibe n'odemayɔ, muna-nketi, mɓiɓia á etéte bui á koɗoni, kóɗeketɛeka túkatúka á moangɔ ndea Mɔkɔta?

¹¹ Ɔ́ka phɔ́! Kɛ̌kɛnde Mɔkɔta aokambande na kema. Oɓande keíme-íme, kángá á ɔna á owanga á maní ka mbenɔ ábɔa.» Kɛ̌kɛndɔ, iso akɛ áoínda biii! Áoɓá suɓi á kaiphiɔ. Áotamba n'aoɓaɓataga ka kaɓa mmbé aɔnsɔndɔɛa mosá.

¹² Cɔ, ɓî moamɛ aɔni ye nyɔngɔ ndɔ, áomɓeekea Mɔkɔta Yéso, ka nyɔngɔ nde ɗáyayami phɛɛ na ɓɔphɛi ndɔ.

Pɔ́lɔ na Baanába ɓáɔtɔmia Nyɔngɔ á Mokonga ka Pisidía

¹³ Mbusa, Pɔ́lɔ na ɓadakɛ ɓáotóka na Páphɔ, ɓáokambea ka koko ángbó, ɓáojaba ka Pɛ́ɛga nnde á ka ntanga-nji á ka Pamphilía. Wa, Yoáni-Malíkɔ áokatana na ɓɔ, áoja na Yɛusalɛ́ma.

¹⁴ Ɓámɛi ye ka Pɛ́ɛga, ɓáoga na Antiɔkía nde á ka ntanga-nji á ka Pisidía. Aɓí ye esa á saɓáto, ɓáongia k'éndu á madondanɔ ndea Ɓayúda ka nyɔngɔ á Mokonga, ɓáoika ka oɗo.

¹⁵ Mbusa á tanga suɓi á ɓuku ɛ́ɔphi ndea Mósa, na suɓi á ɓuku ndea ɓaɔtu-nyɔngɔ ndea Mokonga, ɓaamɛ éndu á madondanɔ ndea Ɓayúda ka nyɔngɔ á Mokonga ɓáonteka nkpa ka ngoɗea Pɔ́lɔ na Baanába te: «Ɓaya, aoɓá na ɓona nyɔngɔ ka kpagisaga á měma á ɓakpa, yɔngani.»

¹⁶ Pɔ́lɔ áoma, áomesa njaga akɛ áǒgea: «Ɓaisilaɛ́li ɓaya, na ɓaɓángi-Mokonga, ɔ́kani phɔ́!

¹⁷ Mokonga ndea Ɓaisilaɛ́li, ɗɛ́sɔmbu ɓatatasu. Ɓáoɓika ka ɓukpɛkpɛ ndea Mokonga ka matú ndɔ ɗáɓáiki ka Mísii ɓea ɓakɛni. Ɗáetoisi gǎkɛ kó ka ɓukpɛkpɛ nɛkɛ.

¹⁸ Áokinia tambea á ɓɔ ka nkanda ka ɓasaga ɓea nkama gena (40).

¹⁹ Ɗátindikisi ekuna ngianjaga iɓɛ (7) ka Kanána, áǒɓopha Ɓaisilaɛ́li nji ndɔ áɓɛ ɓotukɔ nɛɓɔ.

²⁰ Kema ndɔ bui ɗágeani ka ɓasaga ɓea mia gena na nkama ɓɔku (450). Mbusa í, áǒɓopha ɓateni-nyɔngɔ ka matú á Samuɛ́limɔtu-nyɔngɔ ndea Mokonga.

²¹ Mbusa índɔ, ɓáɔmɛma Mokonga éɓophɛ mɔkɔta. Mokonga áǒɓopha Saúlɔ muna Kísi, nto á k'ékuna ndea Bɛnjamína. Saúlɔ ɗámamei nji ka ɓasaga nkama gena (40).

²² Mbusa í, Mokonga áontókisa Saúlɔ, áomamisa ká ɓɔ Daúdi ka kɔkɔta. Â phɔtɔ ɔyɔnga ka phɔa akɛ ɓe: ‹Nɛnsɔmbu Daúdi, muna Yɛ́sɛ, mmbé amɔɓɔngɛi ka měma. Yɛ, atɔtɔkisande mɔphɛ nɛmɔ bui.›

²³ Cɔ, k'ɛɓɔkɔti ndea Daúdi, Mokonga aeɓophi Ɓaisilaɛ́li Namisi ɓíndɔ ɗámɔku, ina akɛ Yéso.

²⁴ Mosá á bika á Yéso, Yoáni-Mɓatisi ɗáɛphɛí Ɓaisilaɛ́li ɓɔbu gea, ɓákětiɛ tambea á ɓɔ, na ɓáeɓatisɛ.

²⁵ Ɓî Yoáni ɗá ye bíbí á gɔɓa á ekuma nɛkɛ, áɔyɔnga te: ‹Ɓookanisia gea nende ani? Ké gǎkɛ nkpa nde ɓoomɓondeaga. Yɛ, a ndiu obika mbusa ani. Kékenani na koɗa á ngoi á ɓiato nɛkɛ.›

²⁶ Ɓaya, ɓasuko á Abalaámu na ɓaɓángi-Mokonga. Ɓesu ɓáunge Mokonga ɗásotekisíí nyɔngɔ á ɓoamia á ka měma ndee.

²⁷ Cɔ, ɓato á ka Yɛusalɛ́ma na ɓakɔta nɛɓɔ, ɗáɓákámúbi Yéso. Ɗáɓákáúbi phɔtɔ nyɔngɔ ndea ɓaɔtu-nyɔngɔ ndea Mokonga, nnde ɗáɓáotanga esa á saɓáto bui. Ka tena nyɔngɔ á kukuwa á Yéso aunge ɗáɓátɔtɔkisi ɓoabi ndea ɓaɔtu-nyɔngɔ ndea Mokonga.

²⁸ Nanga ɗáɓákáɔni cina á nyɔngɔ nde akeni Yéso ákuiɛ ú, ɗáɓámɛmi Pilátɔ gea, ánkusɛ Yéso.

²⁹ Ɓî ɓátɔtɔkisi ye kema bubui nde ɓaɔtu-nyɔngɔ ndea Mokonga ɗáɓáɗundu ka phɔa akɛ, ɓáokisa mǒnda akɛ gǔ á moyangɔ, ɓáoúmba ú.

³⁰ Mokonga â gǎkɛ onjujukisa ka kukuwa.

³¹ Mbusa, Yéso áɔ̌sɛnɛkɛa k'ésa ásii, ɓunde ɗáɓátóki na yɛ na Galiláya ka gǎ na Yɛusalɛ́ma. Kɛ̌kɛnde, ɓɔ ɓáunge ɓánde ɓaɗigimisi akɛ mosá á ɓakpa.

³² Ɓesu gǎkɛ, ɓɛɔnɔ́tɔmiaga Mbino-Ánjá ndɔ Mokonga ɗɛ́ɔku ɓatatasu.

³³ Mokonga atɔtɔkisi mɔkɔ ndɔ ka ɓesu ɓasuko aɓɔ, ka jujúkisa á Yéso ka kukuwa ɓíndɔ ɗáɓáɗundu ka Jabúi ɓe: ‹Oɓɛ onde miki nɛmɔ. Kesande nende Abakɔ.›

³⁴ Ka phɔa jujúkisa á Yéso ka kukuwa, ka gea nyama akɛ kaphoɛmbɛ, Mokonga ɗáyɔngi ɓe: ‹Nɛnɔtɔtɔkisiande mɛyɔ mɔkɔ á ɓonjánja nnde ɗɛ́mɔku Daúdi.›

³⁵ Ka nyɔngɔ índɔ unge ayɔngi phɔtɔ ka ɓuku nɛngbo gea: ‹Oɓɛ Mokonga, kónsagɛku nto á kanga ɓojeɗe nɛkɔ, áphoɛ suɓi á bóta.›

³⁶ Nga, mbusa á Daúdi gɔɓa á bɛɗanaga ɓíndɔ mɔphɛ ndea Mokonga ɗákondi ka enda akɛ, áokuwa. Ɓáomúmba ka ngbangbata ndea ɓatatakɛ, mǒnda akɛ áophoa.

³⁷ Cɔ, mmbé Mokonga ɗánjujúkisi gǎkɛ ka kukuwa, nyama akɛ ɗákáphoe.

^38-39 Cɔ, ɓaya, úbani gea, ɓánóngoɗi nyɔngɔ á íma á ɓojeɗe. Ka nyɔngɔ á Yéso unge, mmbé amɓeeki, ana ɓukpɛkpɛ á ɓá nto á koɗoni mosá á Mokonga ka kema bui. Ɛɔphi ndea Mósa nna gǎkɛ ɔtɔka amisa anu ka kema ndɔ bui.

⁴⁰ Kaɓondɔ, ɛ́ngɛphani na nyɔngɔ ndea ɓaɔtu-nyɔngɔ ndea Mokonga gea katɔtɔkɛanɛmbɛ ka ɓenu. Ɗáɓáɗundu te:

⁴¹ ‹Ɔ́nani phɔ́, ɓato á ɛkɛɛkɛɛ nde ca! Yayamani, ɓóɓungɛgɛ. Nga, nɛtɔtɔkisande ekuma ángbó ka matú nɛnu. Nanga ɓánɔtɔmiaga ɗoni, ɓókóɓeekeɛku.›»

⁴² Ka juana á Pɔ́lɔ na Baanába k'éndu á madondanɔ ndea Ɓayúda ka nyɔngɔ á Mokonga, ɓakpa ɓáǒɗengemisaga gea, ɓábikɛ goto esa á saɓáto ndea mbusa, ka tɔ̌miaga goto tɔ nyɔngɔ ndɔɔ.

⁴³ Ka phanjekanaga á ɓakpa, Ɓayúda ɓásii na ɓato á k'ékuna nɛngbo ɓunde ɗáɓáɓeeki esomba ndea Ɓayúda, ɓáomɓea Pɔ́lɔ na Baanába. Ɓɔ, ɓáɔyɔngaga na ɓɔ, ɓáǒgbagisaga měma gea, ɓáikɛ ka ɓonjánja-ékondi ndea Mokonga.

⁴⁴ Esa á saɓáto ndea mbusa, ɓakpa á ka nji ɓásii phɛɛ ɓáodondanaga ka ɔ́ka á nyɔngɔ á Mɔkɔta.

⁴⁵ Ɓî Ɓayúda ɗáɓáɔni usɛsɛ á ɓakpa ndɔ, ɓáotúma na nsengo, ɓáongana ɓɔphɛi ndea Pɔ́lɔ na bóma akɛ.

⁴⁶ Pɔ́lɔ na Baanába, ɓâ gǎkɛ ǒsikisia nyɔngɔ na nténdé ɓe: «Ɓenu ɓáunge ɓátókeni phɔ́ ɓánɔphɛɛ Nyɔngɔ á Mokonga mosá! Cɔ, ɓî ɓoyé, na ɔna gea te, ɓókókeni ɓá na enda á mɛyɔ, ɓegande k'ékuna nɛngbo.

⁴⁷ Nga, Mokonga asososi suɓi á Ɓuku nɛkɛ ɓe: ‹Ɗéomesi ɓea ɔbɛa k'ékuna bui, ka gea, ɓakpa ɓáɓɛ na ɓoamia ka mokonda bui.›»

⁴⁸ Ɓî ɓundɔ ɓáná Ɓayúda ɓáɔ́ki tɔ nyɔngɔ ndɔ, ɓáoɓá na maseye phɛɛ. Ɓáobeba nyɔngɔ á Mɔkɔta Yéso, na ɓakpa ɓɔbu ɓunde Mokonga ɗáɛsɔmbu ka ɓá na enda á mɛyɔ, ɓáoɓeekea.

⁴⁹ Nyɔngɔ á Mɔkɔta áondanda ka nji ndɔ bui.

⁵⁰ Ɓayúda ɓâ ndiu ǒyombokisa ɓakɔta á nji, na ɓake á koomba ɓundɔ ɗáɓáombeba Mokonga. Ɓɔ, ɓáokpanga tambisaga á Pɔ́lɔ na Baanába, ɓáǒɓeaga ka nji nɛɓɔ.

⁵¹ Pɔ́lɔ na Baanába, ɓáocicia mpusu á oɗo bui nde a k'écinji aɓɔ, mpɔ ɓáoga na Ikɔníɔ.

⁵² Cɔ, ɓagoigi á ka Antiɔkía ɓáotúma na maseye, phɔtɔ na Měma á kanga ɓojeɗe.