Ekuma á ɓateki 12 - Ɔngana á Kɛ̌kɛ

Ɓámmowe Yakɔ́ɓɔ, ɓáommakea Pɛ́tɛɛ ka mekakɔ

¹ Ka matú ndɔ, Moamɛ Ɛlɔ́dɛ ɗákpangi tambisaga ka ɓato á kanisa.

² Áommósa Yakɔ́ɓɔ, muna-amakɛ na Yoáni na mɓɛngɛ.

³ Ɓî aɔni gea, nyɔngɔ ndɔ aɛɓɔngɛi Ɓayúda, â phɔtɔ ondungisa Pɛ́tɛɛ. Nndɔ ɗágeani ka maseye á mokati kángá cacu.

⁴ Mbusa á dungisa akɛ, Ɛlɔ́dɛ áommakisa ka mekakɔ, áososea ketoto gena á ɓato émani. Ketoto moci n'ana ɓato émani gena-gena gea, ɓánambɛ. Ɗásui tena á nyɔngɔ nɛkɛ mosá á ɓakpa mbusa á Pasáka.

⁵ Kaɓondɔ, ɓáonamba Pɛ́tɛɛ ka mekakɔ. Ɓato á ka kanisa ɗáɓá gǎkɛ ɔmɛma Mokonga ka nyɔngɔ akɛ phɛɛ.

Malaéka ndea Mɔkɔta amphúikisi Pɛ́tɛɛ ka mekakɔ

⁶ Ɗájigi esa moci ka gea Ɛlɔ́dɛ átenɛ nyɔngɔ ndea Pɛ́tɛɛ. Kǐpha, Pɛ́tɛɛ áoɗá sɔsɔɓɛ á ɓato émani ɓaɓɛ. Ɗáɓámɓóege na ngoi iɓɛ á ngɔa. Ɓato émani ɓaɓɛ ɗáɓátú oɓondeaga mosá á kǐo á mekakɔ.

⁷ Kɛ̌kɛndɔ, malaéka nde ɓa Mɔkɔta áonkiɗianea Pɛ́tɛɛ, owanga áobɛnya suɓi éndu. Áonsuga Pɛ́tɛɛ ka mpambá, áonjujukisa, áongea: «Cɔ, má mbangɔ!» Kɛ̌kɛndɔ, ngoi á ngɔa ndɔ, áokoɗokana ka njaga á Pɛ́tɛɛ.

⁸ Mpɔ, malaéka áongoɗea Pɛ́tɛɛ: «Ɔ́ɓɔɛa angeɗe nɛkɔ na ɔ́ɔ́lɛ ɓiato nɛkɔ!» Pɛ́tɛɛ áogea ɓó. Malaéka áongoɗea: «Ɔ́la phɔtɔ bɔngɔ nɛkɔ á phiɔ, ómoɓeɛ!»

⁹ Pɛ́tɛɛ áojuana ka mekakɔ, áomɓea malaéka. Ɗákáúbi gǎkɛ gea, kema nde malaéka ɗági ɗátú á ɗoni, áoúba te aɔni mphaniɔ.

¹⁰ Ɓáɔnyɛ́nya ɔma á ɓaɓondigi-mekakɔ á k'ama mosá-mosá na ɔma á ko iɓɛ, áojua ka kǐo á ngɔa nde aɛnji nci á na ntanga-nji. Kǐo ndɔ áoúkukana sasakɛ. Ɓáojuana, ɓáɔsɛkɛɗa nci á n'aphe, mpɔ malaéka â ye tɔ onɗoa.

¹¹ Pɛ́tɛɛ aúbaphi ye, áɔyɔnga te: «Neúbi ye tɔ ɗoni gea, Mɔkɔta anteki malaéka nɛkɛ ka phúia ani ka njaga á Ɛlɔ́dɛ, na ka kanisia ájeɗe bui nde Ɓayúda ɓátú ně.»

¹² Ɓî aengekisi ye gǎkɛ nyɔngɔ ndɔ, áoga mɔtɛ á Malía, amakɛ na Yoáni, mmbɔ ɓáɔmɔphana Málikɔ. Kó, ɓakpa ɓásii ɗáɓádondanigi ka mɛma á Mokonga.

¹³ Cɔ, Pɛ́tɛɛ áogbondoaga kǐo á na ntanga. Mpɔ nke moci mbɛɗanigi, ina akɛ Lɔ́da, áɔsɛkɛɗa ka kǐo ndɔ.

¹⁴ Ɓî aengekisi gea, ande ɛsɔ á Pɛ́tɛɛ, áoɓá na maseye. Kaɓondɔ, áosikianaga mbangɔ suɓi éndu, kángá ukua kǐo. Áǒúbisa ɓadakɛ gea, Pɛ́tɛɛ ana nsɛngɛ.

¹⁵ Ɓɔ, ɓáongea Lɔ́da te: «Lɔ́da, ona ganja!» Áǒsikisia te: «Nna mbɛa ani.» Ɓáonsikisia te: «Ande ɓea oketi akɛ aungɔ.»

¹⁶ Pɛ́tɛɛ â tɔ osuia gbondoaga á kǐo. Mpɔ, ɓáomúkuia, ɓáɔmɔna, ɓáoyayama phɛɛ.

¹⁷ Pɛ́tɛɛ áǒdakanisa na njaga akɛ, áɔ̌tɔmiaga ɓî Mɔkɔta anjúanisi ka mekakɔ. Â phɔtɔ ǒgea: «Múbisani Yakɔ́ɓɔ na ɓadasu ɓaɓêki ɓunɛngbo nyɔngɔ ndee.» Mpɔ, áojuana, áoga ɔma nɛngbo.

¹⁸ Ka koɗokanaga á esa, ɓato émani ɓáoyomboka phɛɛ. Ɓáoúsianaga gǔ á kema nde ageani ka Pɛ́tɛɛ.

¹⁹ Ɛlɔ́dɛ áososea gea, ɓánkaɓɛ, ɗáɓákámɔni gǎkɛ. Áoúsiaga ɓaɓondigi, mbusa í, áososea gea ɓáemowɛ. Mpɔ, Ɛlɔ́dɛ áotóka na Yudɛ́a, áoga na Kaisalía, áoika kó ka mbenɔ ábɔa.

Mɔkɔta Ɛlɔ́dɛ aku

²⁰ Yɛ Ɛlɔ́dɛ ɗáɛ̌ɓɛi phɛɛ ɓato á ka Tílɔ na Sidɔ́na. Kaɓondɔ, ɓɔbu ɓáoɓeekeana kimoci bika mosá akɛ. Ɓâ phɔ́ oga mosá-mosá mɔtɛ á Balástɔ, mɔkɔta á ɓakpa ndea moamɛ Ɛlɔ́dɛ, ɓáɔɔ́kana na yɛ. Mpɔ, ɓáɔmɛma ɓujɛjɛ mosá á Ɛlɔ́dɛ. Ɗáɓági ɓó ka nyɔngɔ nde, eea nɛɓɔ ɗáotóka ka nji ndea moamɛ ndɔɔ.

²¹ Kesande ɗáɓáɔkɔani kau, Ɛlɔ́dɛ áɔɔ́la ngɔ́mbɛ á kɔkɔta nɛkɛ, áoika ka kankaanga á kɔkɔta, áoaba mosá aɓɔ.

²² Ɓakpa ɓâ gǎkɛ otoá nkogɔ gea: «Nna ye ɛsɔ á nkpa unge, a ye tɔ ɛsɔ á ɓamokonga á mbɛa!»

²³ Kɛ̌kɛndɔ tɔ Malaéka ndea Mɔkɔta áɔmɓɛta Ɛlɔ́dɛ na kukuwa á ɓamɔsɔ, ka nyɔngɔ á ɗokomisa akɛ ɓea Mokonga. Ɛlɔ́dɛ áokuwa.

²⁴ Nanga áɓá ɓó, Nyɔngɔ á Mokonga ɗáɔɛmba ɔma ásii phɛɛ.

²⁵ Cɔ, ɓî Baanába na Saúlɔ ɓágɔɓi ye ekuma nɛɓɔ ka Yɛusalɛ́ma, ɓáɔmbɛɗa Yoáni, mmbé ɓáɔmɔphana Málikɔ, áoja na ɓɔ.