Ekuma á ɓateki 11 - Ɔngana á Kɛ̌kɛ

Pɛ́tɛɛ aɔtɔmiaga nyɔngɔ ka kanisa á ka Yɛusalɛ́ma

¹ Cɔ, ɓateki na ɓaɓêki ɓundɔ ɗáɓátú ka Yudɛ́a, ɗáɓáɔ́ki gea te, ɓato á k'ékuna nɛngbo ɓáɓeeki nyɔngɔ á Mokonga.

² Ɓî Pɛ́tɛɛ asikianigi ye na Yɛusalɛ́ma, ɓaɓêki ɓundɔ Ɓayúda ɓáopúa na yɛ,

³ ɓáogea: «Moko! Ongí suɓi éndu ndea ɓawó na eaga na ɓɔ?»

⁴ Mpɔ, Pɛ́tɛɛ áokpanga tɔ̌miaga aɓɔ nyɔngɔ bui moci-moci, áǒgea te:

⁵ «Mbenɔ nde ɗétú ɔmɛma Mokonga ka ntanga-nji á ka Yɔ́pa, nɛ́ɔɔna mphaniɔ. Nɛ́ɔɔna kema ɓea bɔngɔ na ágbae n'atóki na koba, n'aodida mosá ani na ɓáɓóege ɛɔkɔ í bui gena na ngoi.

⁶ Nɛ́ɔɛnjia suɓi í bîbíbí, nɛ́ɔɔna ɓanyama á ka oɗo á ecinji gena, ɓanyama á k'osaa, na ɓunde ɓáotamba n'égogo na ɓambǔ á ka mpɛna.

⁷ Nɛ́ɔɔ́ka phɔtɔ ɛsɔ n'amogi te: ‹Pɛ́tɛɛ, má, ómowa ɓanyama ndɔ, óeɛ.›

⁸ Néonsikisia te: ‹Ɓɛɛndɔ Mɔkɔta! Nga, ɓî nɛ́ɓɔkɔtɛanɛ, kéimbɛ mɔnɔ tanda eea á otáɔ na nnde aɔjɔɔkisa.›

⁹ Nê goto ɔɔ́ka ɛsɔ n'atóki na koba gea: ‹Kema nde Mokonga asokosei, oɓɛ kogeɛmbɛ ajɔɔkani.›

¹⁰ Mphaniɔ ndɔ áosikǐiaga mɔngɔ isaɔ. Mpɔ, kema ndɔ bui â goto otáia na koba.

¹¹ Ka mbenɔ ndɔ tɔ, nɛɔ̌ɓɔna ɓakpa ɓasaɔ ɓunde ɗáɓěteki mɔtɛ-amɔ ka toka na Kaisalía na ɓámamege k'íso á mpume éndu nde ɗéɓetú kau.

¹² Měma á kanga ɓojeɗe áomongoɗea gea, négɛ tɔ na ɓɔ kángá á ngǎka. Ɓadani ɓaɓêki ngianjaga (6) ɓunde nebiki na ɓɔ, ɓɔ ɓáunge ɗáɓáge omoɗeketa. Mpɔ ɓéokiɗia ka Kaisalía na ngia ɓesu ɓɔbu mɔtɛ á Kɔɔnɛlíɔ.

¹³ Yɛ, áɔsɔ́tɔmiaga ɓî ɗámɔni malaéka n'amamege k'éndu nɛkɛ áongoɗea te: ‹Óteka ɓakpa na Yɔ́pa, ɓágamɓoɛ Simɔ́ni, mmbɔ ɓáɔmɔphana Pɛ́tɛɛ.

¹⁴ Yɛ aámbé akongoɗeagande nyɔngɔ nde akoamisande ka měma, na ɓato á k'éndu nɛkɔ ɓɔbu.›

¹⁵ Mbenɔ nde nekpangi gǎkɛ yɔnga, Měma á kanga ɓojeɗe áodida gǔ aɓɔ ɓíndɔ ɗákpangi dida gǔ asu.

¹⁶ Wa, ɗénekanisi nyɔngɔ á Mɔkɔta Yéso nnde ɗági te: ‹Yoáni ɗátúoɓatisa na iɓo. Ɓenu gǎkɛ, Mokonga anoɓatisande na Měma akɛ.›

¹⁷ Cɔ, Mokonga ɗéɓophi Měma á kanga ɓojeɗe ɓíndɔ ɗásóphi mbenɔ nde ɗéɓemɓeeki Mɔkɔta Yéso Kiísito. Nende gǎkɛ ani, ka pua na Mokonga?»

¹⁸ Ɓî ɓáɔ́ki ye nyɔngɔ ndɔ, ɓɔbu ɓáɔphɔnga. Ɓáombeba Mokonga, ɓáogea: «Ande ɗoni, Mokonga aeɓophi ɓato á k'ékuna nɛngbo ɓukpɛkpɛ á kětia á tambea aɓɔ mosá akɛ, ka ɓá na enda á kɛ̌kɛ.»

Kanisa á ka Antiɔkía akpangi

¹⁹ Mbusa á mowa á Sɛtɛphánɔ, ɓaɓêki ɗáɓáphanjekani ka nyɔngɔ á tambaga. Ɓɔ ɓáoga na Phɔinikía, ɓuangbo na Kipúɔ, ɓuangbo na Antiɔkía. Kó, ɗáɓá tɔ ɔphɛa nyɔngɔ á Mokonga ka Ɓayúda.

²⁰ Ka ɓaɓêki ndɔ, ɗáɓátú ɓato á ka Kipúɔ na ɓato á ka Kuɛ́nɛ. Ɗáɓáoga ndiu na Antiɔkía ka tɔ̌mia á Mbino-Ánjá ndea Mɔkɔta Yéso ka ɓunde ɓáná Ɓayúda.

²¹ Mɔkɔta áǒɓopha ɓukpɛkpɛ. Kaɓondɔ, ɓakpa ɓásii ɓáoɓeekea nyɔngɔ á Mɔkɔta na kětia á tambea aɓɔ ájeɗe.

²² Ɓî ɓato á ka kanisa á ka Yɛusalɛ́ma ɗáɓáɔ́ki nyɔngɔ ndɔ, ɓáonteka Baanába ágɛ na Antiɔkía.

²³ Ajú ye kó, áɔɔna ɓî Mokonga ɗégǐí ɓakpa nɛkɛ ɓonjánja, áoɓá na maseye. Áǒgbagisaga ɓaɓêki ɓɔbu ka měma ka gea ɓámbɛɗaneɛgɛ Mɔkɔta na měma mo.

²⁴ Baanába ɗátú nkpa anjánjá, mmbé atúmi na Měma á kanga ɓojeɗe phɔtɔ na ɓeekea. Kaɓondɔ, ɓakpa ɓásii ɓáǒyamea ka ɓeekea Mɔkɔta Yéso.

²⁵ Mpɔ Baanába áoga na Táasɔ k'aphe á kaɓaga á Saúlɔ.

²⁶ Andondi ye, áonga ně na Antiɔkía. Kó ɓáodondana na ɓato á ka kanisa, ɓáoika na ɓɔ ka saga moci. Ɓáǒgoisaga ɓakpa ɓásii nyɔngɔ á ka měma. Ka Antiɔkía unge ɓákpangi ɔphana á ɓagoigi ɓakiísito.

²⁷ Cɔ, ka matú ndɔ, ɓaɔtu-nyɔngɔ ndea Mokonga ɓáotóka na Yɛusalɛ́ma, ɓáoga na Antiɔkía.

²⁸ Ka ɓɔ moci ina akɛ Agábɔ, áɔɔ́tɔa nyɔngɔ ka ɓukpɛkpɛ á Měma á kanga ɓojeɗe gea, monganya aguande ka mokonda bui. Monganya ndɔ ɗágú gǎkɛ ka matú á moamɛ ndea Lɔ́ma, ina akɛ Kɔɔdíɔ.

²⁹ Cɔ, ɓagoigi á ka Antiɔkía ɓáosuia gea, ɓáphúiɛ imɔna ɓíndɔ nkpa na nkpa atɔande, ɓátekɛ ka enga á ɓadaɓɔ ɓaɓêki á na Yudɛ́a.

³⁰ Ɓagbɛga ɓáogea ɓó. Baanába na Saúlɔ ɓáotanga imɔna ndɔ ka ɓagbɛga á kanisa á ka Yudɛ́a.