Ekuma á ɓateki 10 - Ɔngana á Kɛ̌kɛ

Ɓámɔphani Pɛ́tɛɛ mɔtɛ á Kɔɔnɛlíɔ

¹ Ka Kaisalía, ɗátú na mǒko moci ina akɛ Kɔɔnɛlíɔ. Ɗátú gǎkɛ mɔkɔta á ekombo á ɓato émani. Ina á ekombo ndɔ ɗátú: «Ekombo Italía.»

² Yɛ na ɓato á k'éndu nɛkɛ ɓɔbu ɗáɓátú omɓánga Mokonga na beba akɛ. Ɗá phɔtɔ ogaba imɔna nɛkɛ ka ɓaúki na mɛma á Mokonga kángá ɗeketa.

³ Cɔ, esa moci ka yɛga á maní ka akpaala, áɔmɔna malaéka ndea Mokonga base n'angi mɔtɛ-akɛ ka mphaniɔ. Malaéka ndɔ áɔmɔphana: «Kɔɔnɛlíɔ!»

⁴ Kɔɔnɛlíɔ áontúmia n'iso, n'ana kɔɓɔɓɔkɔ. Áomúsia: «Mɔkɔta, ama ɓo?» Malaéka áonsikisia te: «Mokonga aɔ́ki ɛmɛmi nɛkɔ na ɓeekea á kema nde ǒgabei ɓaúki. Kaɓondɔ, aokokanisia.

⁵ Cɔ, óteka ɓakpa kɛ̌kɛnde na Yɔ́pa, ɓágamɔphanɛ k'akɔ Simɔ́ni mmbɔ ɓáɔmɔphana Pɛ́tɛɛ.

⁶ Aiki mɔtɛ á Simɔ́ni, mɓɔngisigi kema á mpokɔ, mmbɔ endu nɛkɛ a ka mpɛphɛ á oɓenge.»

⁷ Ɓî Malaéka nde ɗáɔyɔngaga na yɛ age, Kɔɔnɛlíɔ áɔ̌ɓɔphana ka ɓabɛɗanigi nɛkɛ ɓaɓɛ na nto émani moci, ka ɓunde ɗáɓáɔbɛɗanaga bíbí akɛ phɛɛ n'aomɓánga Mokonga.

⁸ Cɔ, Kɔɔnɛlíɔ áɔ̌tɔmiaga nyɔngɔ bui nde ɗágeani. Mpɔ, áǒteka na Yɔ́pa.

⁹ Mama í, ɓî ɓakpa nde Kɔɔnɛlíɔ ɗáéteki ɗáɓábîmisi ntanga-nji á Yɔ́pa, Pɛ́tɛɛ ɗáoɗapha gǔ éndu k'aphe á mɛma á Mokonga, ɗátú ɓea kantende.

¹⁰ N'a phɔ́tɔ ɔmɛma, nja áɔmbɛɗa, áoɓá na siki á eaga. Mbenɔ nde ɗáɓáɔɔmba kakɛ eea, áɔɔna mphaniɔ.

¹¹ Aɔɔna koba n'akoɗokani. Kema moci ɓea ngɔ́mbɛ n'ǎgbae áodida ka oɗo, na ɓáɓóege ɛɔkɔ í bui gena na ngoi.

¹² Suɓi í ɗátú n'etéte bui á ɓanyama á ecinji gena na ɓunde ɓáotamba n'égogo ka oɗo na ɓambǔ á ka mpɛna.

¹³ Mpɔ, áɔɔ́ka ɛsɔ n'angi ɓe: «Cɔ, Pɛ́tɛɛ, má, ómowɛ, óeɛ.»

¹⁴ Pɛ́tɛɛ áonsikisia te: «Ɓɛɛndɔ Mɔkɔta. Nga, ɓî nɛ́ɓɔkɔtɛanɛ, kéimbɛ mɔnɔ tanda eea á otáɔ n'índe áɔjɔɔkana.»

¹⁵ Â goto ɔɔ́ka ɛsɔ ndɔ ɓe: «Kema nde Mokonga asokosei, kogeɛmbɛ mɔnɔ ajɔɔkani.»

¹⁶ Mphaniɔ ndɔ áosikǐiaga mɔngɔ isaɔ. Kɛ̌kɛndɔ, kema ndɔ áotáia na koba.

¹⁷ Mbusa, áoianaga ka měma akɛ kantíti á mphaniɔ nde ɗáɔni. N'a phɔ́tɔ oianaga, ɓakpa ndɔ Kɔɔnɛlíɔ ɗáéteki k'aphe á ɔphana á Simɔ́ni, ɓáoúsianaga ɔma sina nde endu ndea Simɔ́ni ɗátú ɓei. Ɓájú ye k'éndu kau, ɓáomamaga k'íso á mpume,

¹⁸ ɓáɔɔphana na úsia te: «Endu nde Simɔ́ni mmbɔ ɓáɔmɔphana Pɛ́tɛɛ aɔikaga kau aunge?»

¹⁹ Pɛ́tɛɛ n'a phɔ́tɔ oianaga ka phɔa mphaniɔ ndɔ, Měma á kanga ɓojeɗe áongea te: «Ɓakpa ɓasaɔ ɓá wani ɓunde ɓáokokaɓa.

²⁰ Cɔ, má, dida, gǎ tɔ na ɓɔ kángá á ngǎka. Nga, eme aámbé něteki.»

²¹ Mpɔ, Pɛ́tɛɛ áodida, áojua mosá á ɓakpa ndɔ, áǒgea: «Eme yɛ, mmbé ɓoonkaɓa. Eke nde ɓobikií?»

²² Ɓáonsikisia te: «Moamɛ á ɓato émani Kɔɔnɛlíɔ aámbé asóteki. Ande nto á koɗoni na mmbé áomɓanga Mokonga. Ɓayúda ɓɔbu, ɓá phɔtɔ ombeba phɛɛ. Malaéka ndea Mokonga angoɗi gea, ákɔɔphanɛ mɔtɛ-akɛ, ka ɔ́ka nyɔngɔ nde ongoɗeande.»

²³ Kaɓondɔ, Pɛ́tɛɛ áǒsesea, ɓáoɗa kó. Mama í, ɓáodunga aphe, Pɛ́tɛɛ áoga na ɓɔ. Ka ɓaɓêki a ka Yɔ́pa, ɓâ phɔtɔ oga na ɓɔ.

²⁴ Mama í, ɓáojua ka Kaisalía, ɓáoga mɔtɛ á Kɔɔnɛlíɔ. Yɛ ɗátú ǒɓondeaga kimoci n'ekombo nɛkɛ, na ɓadakɛ á ka měma ɓundɔ ɗɛ́ɓɔphani.

²⁵ Ɓî Kɔɔnɛlíɔ ɗámɔni Pɛ́tɛɛ na ɓáobika mosá éndu, áojuana k'aphe á sesea akɛ. Áogbúka muanku, éndóndó akɛ áogbondoa oɗo mosá á Pɛ́tɛɛ ka nyɔngɔ á ɗokomisa akɛ.

²⁶ Cɔ, Pɛ́tɛɛ áommesia, áongea: «Kɔɔnɛlíɔ, má! Ne phɔtɔ nkpa ɓea oɓɛ.»

²⁷ Mpɔ, ɓáongia k'éndu na ɓá tɔ ɔyɔngaga. Wa, Pɛ́tɛɛ áǒdonda ɓakpa ɓásii na ɓákingimiani.

²⁸ Aǒngoɗea te: «Ɓooúba gea, ɛɔphi á esomba nɛsu Ɓayúda, aimisí ɛmbana na nto á k'ékuna nɛngbo phɔtɔ na ngia k'éndu nɛkɛ. Mokonga ɗámophangi gǎkɛ gea, kákeni nɛmɔnɛ ka nkpa ɓea nto á ɓɔjɔɔkiɔ na ótaɔ.

²⁹ Ka nyɔngɔ índɔ unge, kétú na ngǎka ka bika mbenɔ nde ɗɔ́ɓɔmɔɔphani. Nekondi phɔ́, néengekisɛ nyɔngɔ sina nde ɗɔ́ɓɔmɔɔphanei.»

³⁰ Kɔɔnɛlíɔ áonsikisia te: «Anyɛ́nyi esa isaɔ, ɓea mbenɔ nde, ka yɛga á maní, ɗétú ɔmɛma Mokonga mɔtɛ-amɔ. Mɔngɔ moci, nkpa áɔmɔsɛnɛkɛa n'aɔ́li bɔngɔ n'aophenuaga.

³¹ Áomongoɗea te: ‹Mokonga aɔ́ki ɛmɛmi nɛkɔ, aokokanisia ka nyɔngɔ á kema nde ǒgabei ɓaúki.

³² Cɔ, óteka ɓakpa na Yɔ́pa, ɓágamɓoɛ Simɔ́ni mmbɔ ɓáɔmɔphana Pɛ́tɛɛ. Aiki mɔtɛ á Simɔ́ni, mɓɔngisigi kema á mpokɔ, mmbɔ endu nɛkɛ a ka mpɛphɛ á oɓenge.›

³³ Mongɔ moci, ɗěteki ɓakpa ka ɔphana akɔ. Cɔ, ogi ánjá ka kiɗia. Kɛ̌kɛnde, ɓesu ɓɔbu ɓe ye tɔ mosá á Mokonga ka ɔ́ka á nyɔngɔ bui nde Mɔkɔta aoteki ně ka ngoɗea asu.»

Ɓoabi ndea Pɛ́tɛɛ mɔtɛ á Kɔɔnɛlíɔ

³⁴ Mpɔ, Pɛ́tɛɛ áɔyɔnga ɓe: «Neúbi ye tɔ ɗoni gea, Mokonga nna omɓaya ka nkpa,

³⁵ ɓato á ekuna bui, ɓunde ɓáomɓánga Mokonga na tɔtɔkisa á koɗoni, ɓɔ ɓáunge ɓámɓɔngɛi Mokonga.

³⁶ Cɔ, Mokonga ɗátekisi moyo akɛ ka Ɓaisilaɛ́li. Yéso Kiísito aámbé abiki na moyo ndɔ, n'ande Mbino-Ánjá á ɓujɛjɛ. Yɛ aámbé ande Mɔkɔta á ɓakpa ɓɔbu.

³⁷ Ɓo ye tɔ oúba nyɔngɔ nde ɗákiɗiani ka Yudɛ́a bui, nnde ɗákpangi ka ntanga-nji á Galiláya mbusa á ɓɔphɛi ndea Yoáni ka phɔa oɓatisɔ.

³⁸ Ɓo phɔtɔ oúba ɓî Mokonga ɗátúmisi ɓukpɛkpɛ á Měma akɛ ka Yéso ɓa Najalɛ́ti. Ɓo phɔtɔ oúba ɓî Yéso ɗátambi ásii ka nji bui n'aogea ánjá, na aǒamisa ɓakpa ka měma, ɓunde ɗáɓátú ka kɔkɔɓɛ á Nketi. Nga, Mokonga ɗátú kimoci na yɛ.

³⁹ Cɔ, ɓende ɓaɗigimisi á kema nde Yéso ɗági ka Yɛusalɛ́ma na ka nji bui ndea Ɓayúda. Ɗáɓámmowe gǎkɛ, ɓáɔnkɔkɛa ka moyangɔ.

⁴⁰ Mokonga â gǎkɛ onjujúkisa yɛ ka kukuwa, esa á ko isaɔ. Áomopha ɓukpɛkpɛ á ɔnɛkana base,

⁴¹ nna ka ɓakpa ɓɔbu, tɔndɔ ɓesu íɓunde Mokonga ɗásɔsɔmbu mosá gea, ɓébɛ ɓaɗigimisi nɛkɛ. Ɓesu ɓaɗigimisi ndɔ, ɗéɓeigi, ɓéonoa kimoci na yɛ mbusa á jujúka akɛ ka kukuwa.

⁴² Ɗásososi tɔ̌mia á Mbino-Ánjá ka ɓakpa na engekisa gea, ande mmbɔ aámbé Mokonga amamisi ka tena á nyɔngɔ ndea ɓakpa nde ɓaoenda na ɓunde ɓasí.

⁴³ Ɓaɔtu-nyɔngɔ ndea Mokonga ɓɔbu ɗáɓán'yɔngɛi gea, nkpa buakɛ, mmbé aomɓeekea, Mokonga áímande ɓojeɗe nɛkɛ ka ɓukpɛkpɛ á ina á Yéso.»

Měma á kanga ɓojeɗe adidí gǔ á ɓakpa nde ɓáná Ɓayúda

⁴⁴ Pɛ́tɛɛ n'a phɔ́tɔ ɔyɔnga, Měma á kanga ɓojeɗe áodida gǔ á ɓakpa ɓɔbu ɓunde ɗáɓáɔɔ́ka nyɔngɔ nɛkɛ.

⁴⁵ Ɓaɓêki ɓunde ɓánde Ɓayúda ɓundɔ ɗáɓábiki na Pɛ́tɛɛ, ɓáotangaaga ka ɓî Měma á kanga ɓojeɗe nnde Mokonga ɗátekisi, ɗáɛmbi phɔtɔ ka ɓakpa nde ɓáná Ɓayúda.

⁴⁶ Nga, ɗáɓɛ̌ɓɔ́ki na ɓáombeba Mokonga ka ɛyɔngi nɛngbo. Mpɔ, Pɛ́tɛɛ áogea,

⁴⁷ «Ani mmbé aɔtɔka n'aimisíí ye éɓatisa á ɓakpa nde ka iɓo, ɓî ɗáɓá ye tɔ na Měma á kanga ɓojeɗe ɓea ɓesu?»

⁴⁸ Kaɓondɔ, áǒsosea gea ɓéɓatisɛ k'ína á Yéso Kiísito. Mbusa á ɓatisa aɓɔ, ɓáonɗengemisaga Pɛ́tɛɛ gea, áikɛ phɔ́ na ɓɔ ka ɓ'esa ɓábɔa.