Ekuma á ɓateki 1 - Ɔngana á Kɛ̌kɛ

Mɔkɔ á tekisia á ɓateki ndea Yéso, Měma á kanga ɓojeɗe

¹ Moko Tɛɔphílɔ, Suɓi á ɓuku nɛmɔ á k'ama mosá-mosá, ɗéɗundu nyɔngɔ bui nde Yéso ɗákpangi gea í na goisaga í,

² na ka ɓî age osungiaga k'ésa ndɔ Mokonga ɗantáisi na koba. Mosá á táia akɛ, ɗáɛsɔmbu ɓateki nɛkɛ, áɔ̌ɔkusaga ka ɓukpɛkpɛ á Měma á kanga ɓojeɗe.

³ Mbusa á kukuwa akɛ, yɛ sasakɛ áɔ̌sɛnɛkɛa na mphangiɔ ɗanga-ɗanga ka engekisa te, a phɔ́tɔ koenda. Ɗáɛsɛnɛkɛi k'ésa nkama gena (40), áǒngoɗeaga nyɔngɔ á koɓoamɛ ndea Mokonga.

⁴ Esa moci, ɓî ɗáoeaga kimoci na ɓɔ, áɔ̌ɔkusaga ɓe: «Ɓókotókɛmbɛ ka Yɛusalɛ́ma, ɓondeagani ndiu mɔkɔ nde Abɛ anɔɔku, nndɔ ɗénóngoɗi.

⁵ Nga, Yoáni ɗéɓatisi ɓaɓêki na iɓo, ɓenu gǎkɛ mbusa á esa ábɔa, Mokonga anoɓatisande na Měma akɛ.»

Yéso atái na koba

⁶ Cɔ, ɓî ɓateki ɗáɓádondanigi na Yéso, ɓáomúsia gea: «Mɔkɔta, ka mbenɔ nde unge ǒsikisiande Ɓaisilaɛ́li koɓoamɛ nɛɓɔ?»

⁷ Yéso áǒsikisia te: «Nna nyɔngɔ nɛnu úba á esa na matú nde Abɛ ɗáangi ka kɔkɔta nɛkɛ sasakɛ.

⁸ Ɓoɓande ndiu na ɓukpɛkpɛ mbenɔ nde Měma á kanga ɓojeɗe adidande gǔ anu. Ɓoɓande phɔtɔ ɓaɗigimisi á nyɔngɔ nɛmɔ ka Yɛusalɛ́ma, Yudɛ́a bui, Samalía na ka sungiaga á mokonda.»

⁹ Mbusa á yɔnga akɛ ɓó, Mokonga áontáisisa Yéso na koba. Ɓateki na ɓá phɔ́tɔ kɔɛnjia na koba, egugu áomɓómba, ɓákámɔnɛ ye.

¹⁰ Na ɓá phɔ́tɔ otúmia iso aɓɔ na koba, kuɓî Yéso ɗáotáia, mɔngɔ moci, ɓakpa ɓaɓɛ na ɓáɔ́li bɔngɔ ábu, ɓáɔ̌sɛnɛkɛa, cɛɗɛ!

¹¹ Ɓáǒngoɗea te: «Ɓato á ka Galiláya, nyɔngɔ sina nde ɓomamei wani, na ɓɔɔnjia na koba? Yéso, mmbé Mokonga ɗántókisi ka nkíndí anu, áontáisa na koba, ajande goto tɔ ɓíndɔ ɓɔmɔni n'aotáia na koba.»

Ɓateki ɓansɔmbu mpɛnɛ á Yúda Isikaliɔ́ta

¹² Cɔ, ɓateki ndea Yéso ɓáotóka ka mamba á Mijɛitúni ɓáoja na Yɛusalɛ́ma. Mamba ndɔ ɗátú bíbí na Yɛusalɛ́ma ɓea kilɔmɛ́tɛɛ moci. Cɔ, ɓateki ɓáodida mamba, ɓáoja na Yɛusalɛ́ma.

¹³ Ɓî ɓájú ye ka Yɛusalɛ́ma, ɓáoɗápha suɓi éndu á gǔ ɔma nde ɗáɓáodondanaga. Ɓunde ɗáɓátú wa, ɓáungee: «Pɛ́tɛɛ, Yoáni, Yakɔ́ɓɔ na Andeé. Philípɔ na Tɔmá. Batɔlɔmáyɔ na Matáyɔ. Yakɔ́ɓɔ muna Alpháyɔ, Simɔ́ni mmbé ɗáokáɓa tokisa á nji nɛɓɔ ka kɔkɔɓɛ, na Yúda muna Yakɔ́ɓɔ.»

¹⁴ Ɓɔbu, na měma moci, ɗáɓá na moíngi á dondanaga k'ɛ́mɛmi. Ɗáɓáɔmɛma kimoci na Malía amakɛ na Yéso, ɓana-amakɛ na Yéso, na ɓake ɓuangbo.

¹⁵ K'ésa ndɔ, ɓaɓêki nde ɗáɓádondanigi, ɗáɓátú ɓea ɓakpa mia moci nkama-iɓɛ (120). Mpɔ, Pɛ́tɛɛ áoma sɔsɔɓɛ aɓɔ, áǒgeae:

¹⁶ «Ɓaya, atókeni nyɔngɔ nde Měma á kanga ɓojeɗe ɗáyɔngi suɓi á Ɓuku á Mokonga átɔtɔkɛanɛ. Měma ndɔ ɗáyɔngi phɔ́ mosá suɓi á moamɛ Daúdi ka phɔa Yúda. Yúda ɗátú nsɔndɔi ndea ɓakpa ndɔ ɗáɓándungi Yéso.

¹⁷ Cɔ, Yúda ɗátú ka ɓesu, ɗájúkani phɔtɔ na ɓesu k'ékuma.

¹⁸ Yɛ, ɗátɔí oɗo ka somba í na imɔna nde ɗátɔí ka ɓojeɗe. Áogua wa n'atúmanigi, sɔphɔ akɛ áobomoka, suɓa akɛ bui áokpûkana.

¹⁹ Ɓato á ka Yɛusalɛ́ma ɓɔbu ɗáɓáúbi nyɔngɔ ndɔɔ. Kaɓondɔ, ɓáosua ina á oɗo ndɔ ka ɛyɔngi nɛɓɔ ‹Akɛɛ-dámu›. Ande gea te: ‹Oɗo á magia.›

²⁰ Nga ɓáɗundu suɓi á Jabúi ɓe: ‹Ambe endu nɛkɛ áɓɛ esimɔ, nkpa kaikɛmbɛ kau.› Ɓáɗundu phɔtɔ, ‹Ambe nkpa ɓaangbo ájigɛ n'ekuma nɛkɛ.›

²¹ Cɔ, kaɓondɔ, akeni ka ɓakpa ndɔ, ɓénsɔmbɔɛ nkpa moci, mmbé ɗátú na ɓesu mbenɔ bui nde ɗéɓeotamba na Mɔkɔta Yéso,

²² kpanga ka oɓatisɔ ndea Yoáni, na ka sungiaga ɓî Mokonga ɗántáisi Yéso na koba. Nga, akeni áɓɛ nɗigimisi á nyɔngɔ á jujúka á Yéso ka kukuwa.»

²³ Wa, ɓáǒbisa ɓakpa ɓaɓɛ. Ina á moci ande Yɔsɛ́phu mmbé ɓáɔmɔphana Balisába Yúsitɔ. Mmbé ɓa ko baɓɛ áoɓá Matiási.

²⁴ Mpɔ, ɓáɔmɛma Mokonga ɓe: «Oɓɛ Mɔkɔta, múbi-měma á ɓakpa ɓɔbu, ósophangia phɔ́, ani mmbé ɔnsɔmbu sɔsɔɓɛ á ɓakpa nde ɓá ɓaɓɛ.

²⁵ Yɛ, áɓɛ nteki nɛkɔ, phɔtɔ mpɛnɛ á Yúda mmbé age k'ɔ́ma nɛkɛ nnde ankeni.»

²⁶ Mpɔ, ɓáɔɓɛta ɓana-mɛlɔɛ ka úba ani mmbé, Mɔkɔta ansɔmbu. Ɓana-mɛlɔɛ ɓáonguia Matiási, áoɓá sɔsɔɓɛ á ɓateki ɓuangbo nkama na moci (11).