Ɓakɔlɔsái 4 - Ɔngana á Kɛ̌kɛ

¹ Cɔ, ɓenu íɓunde ɓona ɓakɔɓɛ, ógeeani ɓakɔɓɛ nɛnu ánjá na koɗoni. Úbáni gea, ɓenu phɔtɔ, ɓona Mɔkɔta nɛnu na koba.

Ɓɔphɛi ɗanga-ɗanga

² Suiani ɛmɛmi, ɛ́ngɛphani k'ɛ́mɛmi kau, ɓáni phɔtɔ na měma á ɓosegi ka Mokonga.

³ Mɛmani phɔtɔ ka phɔasu ka gea, Mokonga ákoɗɛ kasu aphe á phɛá nyɔngɔ á Mokonga na tɔ̌miaga á nyɔngɔ á ɓɔsɔmɛa ndea Kiísito nnde ne ka mekakɔ ka nyɔngɔ í.

⁴ Kaɓondɔ, mɛmani ka gea, nɛ́tɔ̌miɛgɛ base, nyɔngɔ nɛkɛ ɓíndɔ akeni.

⁵ Mbenɔ bui nde ɓoodondana na ɓakpa íɓunde ɓáná ɓaɓêki, ɛ́ɓɔnisani ɓɔ tambea nde akeni.

⁶ Ambe yɔnga nɛnu áɓɛ ánjá esa bui na ɛ́ɓɔngɛɛ ɓakpa na ambe ɓóɓɛoúba sikisia á yɔnga ka nkpa na nkpa ɓíndɔ akeni.

Mɔkɔ á ka sungiaga

⁷ Tikíkɔ mmbé ande dasu ékondi na mbɛɗanigi anjánjá k'ékuma ndea Mɔkɔta, yɛ aámbé anóngoɗeagande mbino ani bui.

⁸ Nenteki mɔtɛ-anu ka gea te, ɓóengekisɛ ɓoiki asu ka gea měma anu áphɔngɛ.

⁹ Yɛ, ɓáge na Ɔnɛsímɔ. Ɔnɛsímɔ ande dasu ékondi, na muna-amasu anjánjá. Yɛ, ande ɓ'anu. Ɓɔ, ɓánóngoɗeagande nyɔngɔ bui nde aɔnyɛ́nya wani.

¹⁰ Aisitákɔ mmbé a ka mekakɔ kimoci n'eme anósesi. Málikɔ, ayakɛ na Baanába anósesi phɔtɔ. Ɗénegɔɓi na nɛnɔɔkusigi ka nyɔngɔ á Málikɔ gea, aoɓá n'ajú mɔtɛ-anu, nseseani.

¹¹ Yéso, mmbé ɓáɔmɔphana Yúsitɔ, anósesi phɔtɔ. Ko ɓasaɔ aɓɔ tɔndɔ ɓáunge nɛɔbɛɗanaga na ɓɔ sɔsɔɓɛ á Ɓayúda ka nyɔngɔ á koɓoamɛ ndea Mokonga. Kaɓondɔ, ɓámogbagisigi měma.

¹² Epáphaa mmbé a phɔtɔ ɓ'anu, anósesi. Ande mbɛɗanigi nde ɓa Kiísito Yéso. Yɛ, aopúa na mɛma á Mokonga na moíngí ka nyɔngɔ anu gea te, ɓókakamanɛ na mɔtaga ka měma, ɓósuiɛ gea kema bubui ka mɔphɛ ndea Mokonga.

¹³ Nende nɗigimisi nɛkɛ k'ékuma akpɛ bui nde aɔ̌bɛɗaneaga ɓato á ka Laɔdikía na Iɛlapɔ́li.

¹⁴ Dasu ékondi Lóka, mmbɔ nsaku, na Dɛ́ma, ɓánosesi.

¹⁵ Óseseani ɓadasu á ka Laɔdikía, Níipha phɔtɔ na kanisa nde aodondanaga mɔtɛ-akɛ.

¹⁶ Ɓo ye ɔgɔɓɛa tanga a ɓaoɓa nde, geani ɓukpɛkpɛ anu ka gea ɓátangɛ ú ka kanisa á ka Laɔdikía. Ambe ɓótangɛ phɔtɔ ɓaoɓa nde ɓánótekisiande kó.

¹⁷ Ngoɗeani Aakípɔ gea: «Ɔ́ɛngɛphambɛ n'ekuma nde Mɔkɔta akophi, tɔtɔkisa ú ánjá.»

¹⁸ Eme Pɔ́lɔ aámbé neɗundu na njaga ani nsesɔ nde ka ɓenu: Ɓókoɓoseɛmbɛ gea, ne ka mekakɔ. Cɔ, ɓonjánja-ékondi ndea Mokonga áɓɛ na ɓenu.