Ɓakɔlɔsái 3 - Ɔngana á Kɛ̌kɛ

¹ Ɓî ɗóɓojujúki ka kukuwa kimoci na Kiísito, káɓáni kema á na koba, ka kankaanga á koɓoamɛ nde Kiísito aiki kau ka njaga á mǔku á Mokonga.

² Bisani měma anu ka kema nde ana koba, kaɓɛmbɛ k'índe á ka mokonda.

³ Nga, ɓo ye ku, na enda anu aɛsɔmɛani ka Kiísito suɓi á Mokonga.

⁴ Cɔ, ɓî Kiísito ande enda anu á ɗoni, ka sɛnɛka akɛ, ɓɔsɛnɛkaeka na yɛ ka ɓoombia nɛkɛ.

Enda á kɛ̌kɛ na nnde á kala

⁵ Kaɓondɔ, kusani mɔphɛ ájeɗe á ka mokonda ka měma anu ɓea: iɛɓɛ, ɓɔjɔɔkiɔ, phɛngɛmana ka kema, mɔphɛ á kema ájeɗe-jeɗe, kuma, nnde ande etéte á beba á ɓamokonga á mbɛa.

⁶ Ka nyɔngɔ índɔ unge, esúia ndea Mokonga aɓande ka ɓunde ɓánáɔmɔ́ka yɛ.

⁷ Ɓondɔ unge ɗóɓotúotambea kala mbenɔ nde ɓojeɗe ɗábisi enda anu ka kɔkɔɓɛ.

⁸ Kɛ̌kɛnde ye gǎkɛ, sagani nndɔ bui kaɓɛ: ɓɛí, oyombɔ, kokae. Mbóma, kaɓɛ ɛphɔ́ti, kajúanɛmbɛ k'aphenɔkɔ anu.

⁹ Ɓókodemanɛgɛmbɛ. Nga, ɓo ye ɗeketi tambea anu na ɓoiki anu á kala.

¹⁰ Ɓo ye tɔ econji á kɛ̌kɛ ɓunde Mokonga Nconji nɛsu aogaiaga esa bui ka gea ɓónengekisɛ ánjá.

¹¹ Kaɓondɔ, ɓesu ɓɔbu ɓe ye tɔ kimoci kaɓɛ: Ɓayúda na ɓunde ɓáná Ɓayúda, ɓagu-ganja na ɓawó, ɓakɛni, ɓasɔngɔɗa, ɓakɔɓɛ na ɓunde ɓáká ɓakɔɓɛ. Kiísito aámbé ande bui ka ɓakpa ɓɔbu.

¹² Ɓî Mokonga ɗánɔsɔmbu na konda anu, ɓonde ɓakpa nɛkɛ ɗoni. Ɔ́lani ka měma anu: ngomi, ɓonjánja, měma édidisa, ɓɔphɔngɔ na měma á phiphia.

¹³ Phiphianani, aoɓá ka ɓenu n'ana nyɔngɔ á kitɔngi ka dakɛ, áímɛ ú ɓíndɔ Mɔkɔta ɗáími ɓojeɗe nɛnu.

¹⁴ Gǔ índɔ bui, ɓáni n'ekondani nga, ekondani aunge aɔɔnganisa ánjá.

¹⁵ Ambe ɓujɛjɛ ndea Kiísito áɓɛ na kɔkɔta ka měma anu. Nga, ka nyɔngɔ í unge Mokonga ɗánɔɔphani ka gea, ɓóɓɛ nyama á nkpa moci. Nsegani esa bui.

¹⁶ Ambe Mbino-Ánjá ndea Kiísito n'ɛtɔi í, áikɛ suɓi anu. Goisanagani na phɛana ka kɔɓɔɔngɛ. Mbebáni Mokonga na sega akɛ na měma mo ka embɔ ɗanga-ɗanga nnde atóki ka Měma.

¹⁷ Kema bui nde ɓoogea na yɔnga í, geani tɔ ú k'ína á Mɔkɔta Yéso, na sega á Abɛ Mokonga ka yɛ.

Ɓɔphɛi ka nyɔngɔ á enda suɓi ékombo

¹⁸ Cɔ, ɓake, ɔ́ɓɔ́kani ɓamunyanu ɓíndɔ akeni ka Mɔkɔta.

¹⁹ Ɓǒko, ókondani ɓake anu, ɓókǒɓɛisɛmbɛ mɔnɔ.

²⁰ Ɓaniki, ɔ́ɓɔ́kani ɓaɓɔkɔti anu ka kema bubui. Nga, nndɔ unge amɓɔngɛi Mɔkɔta.

²¹ Ɓabɛ, ɓókǒɓɛisɛmbɛ ɓaniki ka gea měma aɓɔ kadɔndɔɓɔkɛmbɛ.

²² Ɓenu ɓakɔɓɛ, ɔ́ɓɔ́kani ɓakɔta nɛnu á ka mokonda ka kema bui. Ɓókoɓɛmbɛ tɔ kɔ̌bɛɗaneaga ámbé ɓánoɓóndigi ka nyɔngɔ á ékondisaga na ɓɔ. Geani ndiu na měma mo, ka nyɔngɔ nde, ɓoomɓánga Mɔkɔta.

²³ Kema bui nde ɓoogea, geani ú na měma mo, ɓíndɔ ɓáogea ka phɔa Mɔkɔta, nna ka ɓakpa.

²⁴ Úbáni gea, Mɔkɔta anɔkɔmande na ɓotukɔ nde aebisíí ɓakpa nɛkɛ. Kiísito aámbé ande Mɔkɔta á ɗoni mmbé ɓɔɔmbɛɗaneaga.

²⁵ Mmbé a gǎkɛ ogea ájeɗe, ɓámphendande ájeɗe nga, Mokonga nna n'oɓayɔ.