Ɓakɔlɔsái 2 - Ɔngana á Kɛ̌kɛ

¹ Nekondi gǎkɛ ɓóúbɛ ɓî nɛɔbɛɗanaga akpɛ ka phɔanu, ka phɔa ɓaɓêki á ka Laɔdikía na ka phɔa ɓakpa ɓɔbu ɓunde ɓákámɔɔnimbɛ mɔnɔ.

² Neokonda gbagisaga á měma aɓɔ na ɓukpɛkpɛ, ɓájukanɛ k'ékondani, ɓáúbɛ oengekisa kema ka ɓeana na úbapha ánjá. Mpɔ, ɓáúbande nyɔngɔ á ɓɔsɔmɛa ndea Mokonga, ande gea Kiísito tɔndɔ.

³ Nga, yɛ, ande cina á ɛtɔi bui á úbapha na kɔɓɔɔngɛ.

⁴ Nɛyɔngi nndɔ ka gea, nkpa kanódemɛgɛmbɛ nanga ánɔɓɔngaga.

⁵ Nga, nanga néɓá ɗanga na ɓenu ka nyama, ɓe tɔ kimoci ka měma. Nena maseye ka ɔna ɓî moangɔ nɛnu bui aotamba ánjá mɔtɛ-anu na ɓosui ɓeekea á Kiísito.

Kiísito ande cina á enda

⁶ Cɔ, ɓî ɓomɓeeki Mɔkɔta Yéso Kiísito, júkanani na yɛ ka enda anu.

⁷ Édokoɗeani ka yɛ na ɓótetemisɛ enda anu ka yɛ. Ká kámisani ɓeekea akɛ ɓíndɔ ɗáɓánógoisigi. Ɓáni phɔtɔ na ɓosegi ásii ka Mokonga.

⁸ Óambani ka gea, nkpa kanótombɛgɛmbɛ ka ɓɔngaga anu na nyɔngɔ á mbɛa á kanga kantíti á kɔɓɔɔngɛ, nnde aotóka ka ɓato á ka mokonda. Nndɔ aotóka ka asii á ɓakpa na měma ájeɗe á ka mokonda. Nndɔ nna gǎkɛ ka Kiísito.

⁹ Nga, kema bubui nde a suɓi á Mokonga, aɔnɛkani ka nyama á Kiísito na aiki tɔ bui suɓi akɛ.

¹⁰ Ɓî ɓɔɔngani na yɛ, ɓɔtɔi ebigɔ nɛkɛ bui. Yɛ, a gǔ á kɔkɔta bui na ɓukpɛkpɛ bui.

¹¹ Ka ɔngana anu na yɛ, aunge ɓo ye tɔ ɓagu-ganja. Ganja kau nna gǎkɛ nkpa aámbé ateni ú, atóki ndiu ka Kiísito. Nndɔ unge aosókóɗaga ka kokpa asu á ɓojeɗe.

¹² Ɓî ɗáɓánóɓatisi, ɗáɓánóúmbi kimoci na Kiísito, ɓô phɔtɔ ojujuka ka kukuwa kimoci na yɛ. Nga, ɗóɓoɓeeki ɓukpɛkpɛ ndea Mokonga nnde ɗánjujúkisi Kiísito ně sɔsɔɓɛ á ɓasí.

¹³ Cɔ, ɗóɓoku kala ka měma ka nyɔngɔ á ɓojeɗe nenu na ka nyɔngɔ nde ɗóɓókótú Ɓayúda, na ka nyɔngɔ á kowó nɛnu. Kɛ̌kɛnde gǎkɛ, Mokonga áonójujukisa ka kukuwa kimoci na Kiísito, áoíma ɓojeɗe nɛsu bui.

¹⁴ Ɗéɓetú ɓea ɓunde ɗáɓátú na nyɔngɔ á phenda í, ka nyɔngɔ nde ɗéɓékétú oamba ɛɔphi. Mokonga â gǎkɛ omowa ɛɔphi ndɔ ɗáosógusa, áɔkɔkɛaga ú ka moyangɔ.

¹⁵ Gǔ á moyangɔ ndɔ, Mokonga aoɓá gǔ á ɓukpɛkpɛ na kɔkɔta bui á měma á ɓamamei nji. Áǒkiɗianisa mosá á ɓakpa ɓɔbu, áɔ̌kɔɓisa ka mɔɔmba na ɓáoɓenganaga ɓea ɓato á mekakɔ ka ɔnisa gea Anakɛ akíndi.

¹⁶ Kaɓondɔ, nkpa katenɛmbɛ nyɔngɔ nɛnu ka nyɔngɔ á kema nde ɓooea, nnde ɓoonoa, ka nyɔngɔ á jaí, ɓaeka á songe na esa á saɓáto.

¹⁷ Nyɔngɔ ndɔ bui, a tɔ iii á kema nde abikaeka. Nnde ande ɗoni á ɗoni ande Kiísito.

¹⁸ Ɓókǒɗeketeɛmbɛ ka gea, nkpa buakɛ átenɛ nyɔngɔ nɛnu akpɛ, mmbé aǒdemisaga gea ana měma édidisa na beba á ɓamalaéka. Ɓábisi phɔtɔ měma aɓɔ ka kema nde ɓáɔɔna ka mphaniɔ. Kanisia aɓɔ a tɔ á kokpa, nndɔ aǒɓopha ɓemboko.

¹⁹ Cɔ, ɓakpa nde ɓákájúkani na Kiísito na Kiísito aámbé a ɓea mɔ̌, nnde aoendisa nyama bui na aodondanisaga nsisa bui ka gea nyama á mɔtɛ ɓíndɔ Mokonga akondi.

Enda na kuwa kimoci na Kiísito

²⁰ Ɓî ɓoku ye tɔ kimoci na Kiísito na ɓáonókóɗa ka toka ka ɓukpɛkpɛ á měma ájeɗe nnde aɛmbi ka mokonda. Ka nyɔngɔ éke nde ɓooamba ɛɔphi á ka mokonda na enda anu nna ye á ɓato á ka mokonda? Ɛɔphi ndɔ a ɓea:

²¹ «Kɔbɛɗɛmbɛ kínde, kokengeɛmbɛ kínde, kodungɛmbɛ kínde.»

²² Ɛɔphi ndɔ bui a tɔ ka kema nde nna ye na kantíti mbusa á bɛɗaneaga í. Ɓakpa tɔndɔ ɓáunge ɓáobisa ɛɔphi ndɔ na goisaga í.

²³ Eya, ɛɔphi ndɔ aɔɔnɛkana ɓea kema á kɔɓɔɔngɛ nga, ana nyɔngɔ ésomba nde ɛmɛnɛi, měma édidisa, moangɔ akpɛ á tambisaga nyama. Nanga áɓá ɓó, ɛɔphi kau nna gǎkɛ na kantíti. Nna ɔtɔka n'aimisíí mɔphɛ á ka nyama asu.