Ɓaphilípi 4 - Ɔngana á Kɛ̌kɛ

¹ Ɓadani ékondi, ne goto na siki á ɔna anu phɛɛ. Nena maseye ka phɔanu na ka nyɔngɔ anu unge néǒbeba. Ɓadani ékondi, ɓî a ɓó, mamani akpɛ ɓî ɓo kimoci na Mɔkɔta.

Ɓɔphɛi ɗanga-ɗanga

² Cɔ, ɓenu Eɔdía na Sitíkɛ, nenóɗengemisigi: Ɔnganani sɔsɔɓɛ anu suɓi á Mɔkɔta.

³ Eya, dani á ɗoni, nɛɔmɛmi, óenga ɓake ndɔɔ. Nga, ɓátambigi kimoci n'eme k'ékuma á Mbino-Ánjá ndea Kiísito. Ɗáɓátú phɔtɔ na Kɛɛmá, na ɓadani ɓabɛɗanigi ɓuangbo. Mokonga aɗundu gǎkɛ ina aɓɔ suɓi á ɓuku á enda á mɛyɔ.

⁴ Cɔ, ɓáni na maseye mbenɔ bui, ka nyɔngɔ á ɔngana anu na Mɔkɔta. Nesikíí goto: Ɓáni na maseye.

⁵ Akeni ɓakpa ɓɔbu ɓáúbɛ ɓɔphɔngɔ anu. Nga, Mɔkɔta asóobika.

⁶ Ɓókóiyanɛgɛmbɛ ka kema. Ngoɗeani ndiu Mokonga, kema nde ɓonasiki í k'ɛ́mɛmi nɛnu. Nsegani phɔtɔ suɓi ɛ́mɛmi na ɗengemisaga akɛ.

⁷ Mpɔ, Mokonga áonóamba, áobisa ɓujɛjɛ ka měma anu, ɓujɛjɛ ndɔ n'anyɛ́nyi úbapha bui, aámbande měma anu ka nyɔngɔ nde, ɓɔɔngani na Kiísito Yéso.

⁸ Cɔ, ɓaya, ka sungiaga: akeni ɓóbisɛ kanisia anu ka kema bui ánjá, nnde akeni ɗokomisa í, á koɗoni, kángá ɓɔjɔɔkiɔ, nnde akeni ɓeekea í, nnde akeni beba í, na nnde á ɓɔngá.

⁹ Tɔtɔkisani kema nde ɗénóphi na goisaga anu, nnde ɗɔɓɔɔ́ki na nɛɔyɔnga na nnde ɗɔ́ɓɔɔni na neogea. Mpɔ, Mokonga, mɛna-ɓujɛjɛ, aɓande kimoci na ɓenu.

Pɔ́lɔ aesegi ɓato á ka Philípi

¹⁰ Nena maseye phɛɛ, nnde atóki ka Mɔkɔta. Nga, ɓomokanisi goto. Eya, ɗóɓoomokanisia mosá. Ɗóɓotú na mɔphɛ ndɔ, ɓókoɓɛ gǎkɛ na mbenɔ ánjá ka ɔnisa ú.

¹¹ Kɛ́yɔngi ɓó ka gea, nena siki á kema. Nga, nanga ɓî negoigi ɓuiki bubui, nena ɓujɛjɛ kau.

¹² Neoúba enda suɓi á ɓuyɛnɛ, néoúba phɔtɔ enda suɓi á ɛtɔi. Ɗénegoigi esa bui na ɔma bui ɓá n'ekuta na ɓá na nja, ɓuiki á ɛtɔi na ɓuiki á ɓuyɛnɛ.

¹³ Nɛtɔki tɔ bui nga Kiísito aámbé amogbagisigi.

¹⁴ Nanga áɓá ɓó, ɓomogǐí phɔtɔ ánjá, ka nyɔngɔ nde, ɓomoengi ka tambaga.

¹⁵ Ɓenu Ɓaphilípi, ɓooúba ánjá gea, ɓî ɗénetóki ka Makɛdɔnía ka matú nde ɗáɓákpangi tɔ̌miaga á Mbino-Ánjá, kanisa nɛnu tɔ unge ɗámoengi, ɓenu sisanu tɔ ɓáunge ɗóɓotú kimoci n'eme ka ɓokambia na ka kekusa.

¹⁶ Eya, ɓî ɗétú na Tɛsalɔníka, ɗóɓomoengi mɔngɔ ásii, na kema nde ɗétú na siki í.

¹⁷ Nna gea te, neokáɓa ɛkɔmi. Ne ndiu tɔ okáɓa ɓikisa á ɓokambia nɛnu.

¹⁸ Nga, ɓokambia nɛnu amɔgɔɓi, â phɔtɔ ɔmɔnyɛ́nyɛa. Ɓî Ɛpaphɔdítɔ amopi nkɛɓɛa nɛnu, ne ye tɔ na kema bui. Nga, ɓokambia nɛnu ande ɓea nyama á phɛa, nnde ana su ánjá. Kaɓondɔ, Mokonga áoɓeekea ka nyɔngɔ nde, amɓɔngɛi.

¹⁹ Mokonga nɛmɔ anóphande kema bui nde ɓonasiki í, ka ɓeana na ɓoombia á ɛtɔi nɛkɛ k'aphe ndea Kiísito Yéso.

²⁰ Cɔ, Abɛ Mokonga, áɓɛ na ɓoombia ka saga na saga. Áɓɛ ɓó.

Mɔkɔ á ka sungiaga

²¹ Óseseani ɓakpa ɓɔbu ɓunde ɓáɔngani na Yéso Kiísito. Ɓadani nde ne kimoci na ɓɔ, ɓánósesi.

²² Ɓakiísito ɓɔbu ɓánósesi phɔtɔ. Ɓunde á k'ékombo ndea moamɛ angbóngbó Kaisáa, ɓánósesi phɛɛ.

²³ Cɔ, ɓonjánja-ékondi ndea Mɔkɔta Yéso Kiísito, áɓɛ ka měma anu.