Ɓaphilípi 3 - Ɔngana á Kɛ̌kɛ

Ɓá na ɓoiki á koɗoni mosá á Mokonga

¹ Cɔ, ɓaya, ɓáni na maseye ka nyɔngɔ á ɔngana anu na Mɔkɔta. Nna kema k'éme aoɓá na nesikíígi kema nde ɗéneɗundu mosá nga, nndɔ akeni ka ɓenu.

² Óambani na ɓato-ájeɗe, ɓambwa ndee ɓunde ɓáotetemisa nyɔngɔ á gua ganja á epe-epe.

³ Ɓesu ndiu ɓáunge ɓende ɓagu-ganja á ɗoni nga, ɓeonɗokomisa Mokonga ka Měma akɛ. Ɓeǒbeɓa ka nyɔngɔ á Kiísito Yéso. Nseɓeɔ nɛsu nna ka ɓesu sisasu.

⁴ Eme gǎkɛ, netú nto á bisa kanisia ani ka kema ɓíndɔ. A gǎkɛ oɓá nkpa ɓaangbo n'aogea te, aobisa mɔphɛ akɛ ka nyɔngɔ á nyama, eme aámbé nena mɔphɛ k'índɔ phɛɛ.

⁵ Eme ɗégú ganja k'ésa á ko ngianjaga isaɔ (8) mbusa á ɓɔkɔtɛana ani. Nende Moisilaɛ́li áɔɓɔkɔtɛana, ka ketoto ndea Bɛnjamína, Muɛbulanía á ɗoni. Ɗéneoamba ɛɔphi ndea Mósa ɓea Mophaisáyɔ á ɗoni á ɗoni.

⁶ Ɗétú na nténdé á tambisaga á kanisa phɛɛ. Ɗékétú na oyeyɔ ka nyɔngɔ á amba ɛɔphi ndea Mósa.

⁷ Kema bui nde ɗétú nto á bisa měma ani kau, nndɔ a ye tɔ k'éme nyɛ́nyisa á mbenɔ jǎi ka nyɔngɔ á Kiísito.

⁸ Kema bui k'éme a ye tɔ nyɛ́nyisa á mbenɔ jǎi ka nyɔngɔ á úba Yéso Kiísito phɛɛ Mɔkɔta nɛmɔ. Ka nyɔngɔ akɛ, ɗéneɓeeki ɓungisa kema nɛmɔ bui, â ye tɔ oɓá kángá kantíti ka gea te, nɛ́ntɔɛ Kiísito

⁹ na ɔngana na yɛ ánjá. Kéokaɓa ɓá á nto á koɗoni ka nyɔngɔ á amba ɛɔphi. A ndiu tɔ ka nyɔngɔ á ɓeekea Kiísito, koɗoni nde atóki ka Mokonga nnde aotókana ka ɓeekea.

¹⁰ Kema nde nekondi, a tɔ úba á Kiísito na ɓukpɛkpɛ á jujúka akɛ ka kukuwa, tambaga kimoci na yɛ, kuwa ɓea yɛ.

¹¹ Mpɔ, néoseɓea jujúka sɔsɔɓɛ á ɓasí.

Gǎ mbangɔ na kiɗia ka nsungɔ

¹² Kéǒbeba gea te, ne ye jú ka sungiaga na ɓá kángá kisɛki. Ne ndiu otútuisa gǎ mbangɔ ka káɓa ɛkɔmi nga, Yéso Kiísito ɗágɔɓi ye n'amɔtɔki.

¹³ Ɓaya, kéokanisia gea, ne ye tɔki kema ndɔɔ. Ne tɔ ogea kema moci: Neɓosei kema nde a mbusa ani, néosuia kaɓa á nnde a mosá.

¹⁴ Cɔ, neoga mbangɔ na ka ɓî nejúande na nsungɔ ka gea, nɛ́tɔɛ ɛkɔmi nde Mokonga asɔɔphanei na koba k'aphe ndea Kiísito Yéso.

¹⁵ Ɓesu íɓundɔ ɓe ye mɔti ka měma, ɓégeɛ tɔ ɓó. Aoɓá ka ɓenu n'ana kanisia nɛngbo ngángá, Mokonga anophangiande base.

¹⁶ Nanga áɓá ɓóni, akeni ɓétútuisɛ tamba k'aphe nde ɗéɓeɓǐ na ka kɛ̌kɛnde.

¹⁷ Cɔ, ɓaya, ɓeani tambea ani. Bisani iso anu ka ɓakpa nde tambea aɓɔ akengeani na nnde ɓɔɔna mɔtɛ-asu.

¹⁸ Ne ye nongoɗi nyɔngɔ nde mɔngɔ ásii. Kɛ̌kɛnde, nesikíí goto ú na neogáma: Ɓakpa ɓásii ka tambea aɓɔ ájeɗe, ɓánde ɓaɓiɓia á moyangɔ ndea Kiísito.

¹⁹ Sungiaga aɓɔ ande ɓúngaga. Nga, Mokonga nɛɓɔ ande sɔphɔ aɓɔ. Ɓáǒbeba na kema nde atókeni kusa aɓɔ na soni. Ɓábisi tɔ měma aɓɔ ka kema á ka mokonda ndee.

²⁰ Ɓesu gǎkɛ, ɓende ɓato á na koba. Ɓe ka ɓondeaga kiɗia á Namisi nɛsu, Mɔkɔta Yéso Kiísito, mmbé atókande na koba.

²¹ Yɛ, aketiande nyama asu á ɔlɔmana na á kukuwa, áobisa ú ɓea nɛkɛ á ɓoombia. Atɔtɔkisande nndɔ ka ɓeana na ɓukpɛkpɛ nde ɗátɔtɔkisi ka bisa kema bui kusi akɛ.