Ɓaphilípi 2 - Ɔngana á Kɛ̌kɛ

Kiísito ana ɓophómbia na měma édidisa

¹ Cɔ, ɓî ɓo kimoci na Kiísito, nndɔ anóphi ɓukpɛkpɛ ka měma. Ekondi nɛkɛ ka ɓenu, anóphiphisi měma. Ɓo kimoci na Měma á kanga ɓojeɗe. Ɓona ekondi na ngomi sɔsɔɓɛ anu.

² Ɓî a ɓó, ómotúmisani pɛ na maseye ka ɔ́kana anu, ka ɓá anu n'ekondi moci, na měma moci, na kanisia moci.

³ Ɓókogeɛ mɔnɔ kema na měma éteɓa, ɓókokaɓɛ mɔnɔ ɓoombia á jǎi-jǎi. Ɓáni ndiu na měma édidisa, nkpa na nkpa ámɔnɛ dakɛ gea, ana kantíti kɔnyɛ́nya yɛ.

⁴ Nkpa kakáɓɛ mɔnɔ nyɔngɔ á ka phɔakɛ sasakɛ. Ákaɓɛ ndiu nnde á ɓakpa ɓuangbo.

⁵ Ɓáni phɔtɔ sɔsɔɓɛ anu na mɔphɛ ɓíndɔ Kiísito Yéso ɗátú ně.

⁶ Yɛ, ɗátú tɔ na kokpa bui nde Mokonga aně kpanga ka nkpangeɔ, ɗákátú gǎkɛ na mɔphɛ á ika ně ka ɓukpɛkpɛ nɛkɛ k'ékengeanisa na Mokonga.

⁷ Yɛ sasakɛ â ndiu oɗeketa ɓoombia nde ɗátú ně, áǒbisa k'ététe á nkɔɓɛ, áokengeana na ɓakpa, ɓáɔmɔna ɓea nkpa.

⁸ Â phɔtɔ ǒdidisa sasakɛ, áɔmɔ́ka Mokonga, na ka ɓî age okuwa, kukuwa á moyangɔ.

⁹ Kaɓondɔ unge, Mokonga ɗáontáisa goto phɛɛ, áonsua ina nde anyɛ́nyi ina bubui,

¹⁰ ka gea te, ka ina á Yéso econji bui ɓágbukɛ muanku, nanga ɓáɓá na koba, nanga ɓáɓá ka mokonda, nanga ɓáɓá kusi á oɗo.

¹¹ Mpɔ, nkpa buakɛ áɔtɔmiaga base gea, Yéso Kiísito ande Mɔkɔta, ka ɓoombia ndea Abɛ Mokonga.

Bɛnyani ɓea owanga ka mokonda

¹² Cɔ, ɓadani ékondi, ɗɔ́ɓɔɔmɔ́ka na ne ka ɔlɔ anu. Kɛ̌kɛnde, atókeni ɓótútuisɛ gea ɓó ka ɓ'esa ndee nanga ɓî ne ɗanga na ɓenu. Bɛɗanagani ka nyɔngɔ á ɓoamia nenu na ɓánga na kɔɓɔɓɔkɔ.

¹³ Ande gea, Mokonga aámbé aɔbɛɗanaga ka měma anu, n'aonópha mɔphɛ na ɓukpɛkpɛ á tɔtɔkisa á moangɔ nɛkɛ nnde áɔmɓɔngɛa.

¹⁴ Ɓî a ɓó, tɔtɔkisani kema bui, kángá á ngɔngɔnaga na púa,

¹⁵ ka gea, ɓóɓɛ kángá oyeyɔ na kángá ɓojeɗe, ɓóɓɛ ɓana-Mokonga kángá kisɛki ka ɔlɔ á ɓato á odemayɔ na ɓakpa ɓájeɗe á ka mokonda ndee. Akeni ɓɔ́bɛnyɛ ka ɔlɔ aɓɔ ɓea ɓasɛɛngɔa á na koba,

¹⁶ ka tɔ̌mia aɓɔ Nyɔngɔ á endisa. Kaɓondɔ unge neɓande na éɗokomisa ka nyɔngɔ anu esa á ja á Kiísito nga, ekuma na tambaga nɛmɔ bui kátókuwɛeka jǎi.

¹⁷ Nanga ɓámomowa gǎkɛ ɓea nyama á phɛ́a ka nyɔngɔ á ekuma á ɓeekea nɛnu nnde ande ɛkɔmi ka Mokonga, nena maseye k'índɔ, nésikia ɓá na maseye kimoci na ɓenu ɓɔbu.

¹⁸ Ɓó phɔtɔ unge ɓáni na maseye kau kimoci n'eme.

Teka á Timɔtɛ́ɔ kimoci na Ɛpaphɔdítɔ

¹⁹ Cɔ, nena nseɓeɔ ka Mɔkɔta Yéso gea, nentekande Timɔtɛ́ɔ mɔtɛ-anu kɛ̌kɛnde ka gea, ámogbagisɛgɛ měma na mbino nde atókande ně mɔtɛ-anu.

²⁰ Nga, kéna nkpa ɓea yɛ, mmbé ana mɔphɛ ɓea eme, mmbé aɔɔnjia ɗoni nyɔngɔ anu.

²¹ Ɓakpa ɓunɛngbo ɓɔbu ɓá tɔ okaɓa nyɔngɔ nɛɓɔ sasaɓɔ, ɓáná gǎkɛ okaɓa nyɔngɔ ndea Yéso Kiísito.

²² Cɔ, Ɓo ye úbi gǎkɛ gea, Timɔtɛ́ɔ aɔnisi gea, a ye kakamani. Ɗábɛɗanigi kimoci n'eme ekuma á Mbino-Ánjá ɓea miki n'abakɛ.

²³ Cɔ, neseɓei gea, nentekande mɔtɛ-anu mbusa á engekisa nyɔngɔ nɛmɔ.

²⁴ Neoúba ɗoni gea, aoɓá Mɔkɔta n'akondi, eme sisani nekamisangande gǎ mɔtɛ-anu.

²⁵ Cɔ, nɛtɔ́ɔni ánjá gea nentekɛ goto Ɛpaphɔdítɔ mɔtɛ-anu. Yɛ, ande dani, aɔbɛɗanaga kimoci n'eme, na a phɔtɔ nto émani ɓea eme. Yɛ aámbé ɗóɓonteki ka enga ani na kema nde ɗéna siki í

²⁶ Cɔ, ɓî ɗáseɓei phɛɛ gǎ ɔna anu goto ɓenu ɓɔbu, ɗá gǎkɛ oiyanaga phɛɛ ka nyɔngɔ nde, ɗɔɓɔɔ́ki gea, ɗátú osamba.

²⁷ Eya, ɗátú osamba na ɗusukanaga. Mokonga â gǎkɛ onkuia ngomi, nna tɔndɔ yɛ, n'eme phɔtɔ ɓó ka gea, kéɓɛmbɛ n'oiɔ gǔ á oiɔ.

²⁸ Cɔ, ka nyɔngɔ índɔ unge neokamisaga teka akɛ goto mɔtɛ-anu. Nga, ɓo ye goto ɔmɔna yɛ, ɓoɓande na maseye na oiɔ ínɛmɔ áosia.

²⁹ Cɔ, nseseani na maseye phɛɛ ɓea muna-amasu suɓi á Mɔkɔta. Óɗokomisani ɓakpa nde ɓá ɓea yɛ,

³⁰ ka nyɔngɔ nde, ɗátú bíbí á kuwa ka nyɔngɔ á bɛɗaneaga a Kiísito. Â gǎkɛ oóloka ka kukuwa ɓî amoengi ka tɔtɔkisa ekuma k'ɔ́ma nɛnu.