Ɓaphilípi 1 - Ɔngana á Kɛ̌kɛ

Nsesɔ

¹ Ka ɓaɓêki ɓɔbu ɓunde ɓá suɓi á Kiísito Yéso ka ntanga-nji á ka Philípi, ka ɓaámbi-kanisa na ɓaámbi-nkumba á kanisa, sambani! Eme Pɔ́lɔ na Timɔtɛ́ɔ, ɓabɛɗanigi ndea Yéso Kiísito, ɓesu ɓáunge ɓeɗundu ɓaoɓa ndee.

² Abasu Mokonga, na Mɔkɔta Yéso Kiísito, ánóphɛ ɓonjánja-ékondi na ɓujɛjɛ.

Ɛmɛmi ndea Pɔ́lɔ ka Ɓaphilípi

³ Neonsega Mokonga nɛmɔ ka mbenɔ bui nde neonókanisia,

⁴ ne phɔtɔ ɔmɛma mbenɔ bui na maseye ka phɔanu ɓenu ɓɔbu,

⁵ ka nyɔngɔ nde ɓomoengi ka ɛmbisa á Mbino-Ánjá kpanga á esa á ko ímoci, na ka kɛ̌kɛnde.

⁶ Kema nde neɓeeki ɗoni ande gea, Mokonga aámbé akpangi ekuma ánjá ndɔ ka měma anu, atútuisande na gɔɓɛa í esa nde Kiísito Yéso ajaeka.

⁷ Eya, aánjá k'éme nékanisiɛ ɓó ka phɔanu ɓenu ɓɔbu nga, nenókondi phɛɛ. Ekondi ndɔ ande ka nyɔngɔ nde, ɓo tɔ na ka ɓonjánja-ékondi nde Mokonga ɗámopi, nanga néɓá kɛ̌kɛnde ka mekakɔ, nanga néɓá ka unia á Mbino-Ánjá na ɓukpɛkpɛ.

⁸ Mokonga ande nɗigimisi nɛmɔ, nenókondi phɛɛ n'ekondi ndea Kiísito Yéso.

⁹ Cɔ, ɛmɛmi nɛmɔ ka Mokonga a ɓe: Ekondani nɛnu áɓikɛ phɛɛ, ɓóúbaphɛ na ɓá na kɔɓɔɔngɛ phɛɛ

¹⁰ mpɔ, ɓóoengekisa kema nde ana kantíti, ɓóoɓá phɔtɔ ɓakpa nde ɓá na tambea ánjá, kángá oyeyɔ esa nde Kiísito ajaeka.

¹¹ Enda anu átúmɛ na tambea á koɗoni nnde Yéso Kiísito anophi ka nyɔngɔ á ɓoombia na obebɔ á Mokonga.

Pɔ́lɔ aotútuisa Mbino-Ánjá ndea Kiísito

¹² Ɓaya, nekondi ɓóúbɛ gea, kema nde ɗámogi, ɗágeani gǎkɛ ɓó ka tútuisa á Mbino-Ánjá.

¹³ Nga, ɓaɓondigi ɓɔbu éndu ndea moamɛ angbóngbó na ɓakpa ɓunɛngbo ɓɔbu, ɓáoúba base gea, ne ka mekakɔ ka nyɔngɔ á bɛɗaneaga á Kiísito.

¹⁴ Ɓî a ɓó, ɓadani ɓakiísito ɓásii ɓá ye tɔ na nténdé á ɓeekea á Mɔkɔta, phɔtɔ na éyamea ka tɔ̌miaga á nyɔngɔ á Mokonga kángá á kɔɓɔɓɔkɔ.

¹⁵ Cɔ, ɓakpa ɓunɛngbo ɓáɔtɔmiaga nyɔngɔ á Kiísito na měma á nsengo na měma éteɓa. Ɓakpa ɓunɛngbo ɓâ gǎkɛ ɔtɔmiaga na mɔphɛ ánjá.

¹⁶ Ɓɔ, ɓáɔbɛɗanaga n'ekondi nga, ɓaoúba gea ne ka mekakɔ ka nyɔngɔ á unia á Mbino-Ánjá.

¹⁷ Ɓakpa ɓunɛngbo gǎkɛ, ɓáɔtɔmiaga nyɔngɔ á Kiísito na měma éteɓa, kángá á tɔ̌miaga í na měma ánjá. Ɓɔ, ɓáokansia te, ɓáyameande goto tambaga nɛmɔ ka mekakɔ.

¹⁸ Cɔ, nndɔ nna na nyɔngɔ. Nanga ɓáɓá na maibe-maibe, nanga ɓáɓá na mɔphɛ ánjá, ɓá tɔ ɔtɔmiaga nyɔngɔ á Kiísito. Kaɓondɔ, ne tɔ na maseye, nésikia ɓá na maseye.

¹⁹ Nga, neoúba ɗoni gea, ka nyɔngɔ ɛ́mɛmi nɛnu na ɓî Měma á Yéso Kiísito aomoenga aunge sungiaga á tambaga ani, ande ɓoamia nɛmɔ.

²⁰ A tɔ ɓíndɔ ne ka ɓondeaga na seɓea gea, kékuwɛku tanda na soni. Ne ndiu otétemisa gea, néphangiɛ ɓophombia á Kiísito ka tambea ani bui, kaɓɛ kɛ̌kɛnde, kaɓɛ esa bui, kaɓɛ ka enda ani, kaɓɛ ka kukuwa ani.

²¹ Cɔ, k'éme, enda a tɔ ka nyɔngɔ á Kiísito. Kukuwa ande ɛkɔmi.

²² A gǎkɛ oɓá na ne phɔ́tɔ oenda, na nɛɔtɔka tɔtɔkisa á ekuma ánjá, cɔ, kéoúba kau sina nde nɛɔsɔmbɔa.

²³ Ande gea te, mɔphɛ iɓɛ ɗanga-ɗanga aomoɓotea: Nenasiki á gǎ ika kimoci na Kiísito, nndɔ ungɔ nekondi phɛɛ.

²⁴ Ka nyɔngɔ anu unge atókeni néendɛ goto ánjá phɛɛ.

²⁵ Ɓî neengekisi ye nndɔ, néoúba gea, neendande, néoika na ɓenu ɓɔbu. Mpɔ, ɓóoga mosá ka ɓeekea na ɓá na maseye.

²⁶ Ɓî nejúande goto mɔtɛ-anu, ɓǒbebande phɛɛ ka nyɔngɔ ani ka jukana anu na Kiísito.

Tambea nde a kimoci na Mbino-Ánjá

²⁷ Ɓî a ɓó, tambeani tɔ ɓíndɔ akeni ka Mbino-Ánjá ndea Kiísito. Geani tɔ ɓó, ka gea te, nanga nébika k'aphe á ɔnjia anu, nanga kébiki, nɛɔ́kande nyɔngɔ anu gea, ɓomame akpɛ suɓi á ɓeekea na měma mo, na manisa kimoci na měma moci ka ɓeekea nde aesukíí ka Mbino-Ánjá.

²⁸ Ɓókǒɓangɛmbɛ tanda ɓaɓiɓia nɛnu. Ka ɓɔ, nndɔ ande mphangiɔ á ɓungaga aɓɔ, na ka ɓenu, nndɔ ande mphangiɔ á ɓoamia nɛnu ka měma, nnde Mokonga atɔtɔkisi.

²⁹ Nga, Mokonga ɗánophi ɓonjánja-ékondi nɛkɛ gea ɓɔ́mbɛɗaneɛgɛ Kiísito, nna tɔndɔ ka ɓeekea akɛ a phɔtɔ ka tambaga ka phɔakɛ.

³⁰ Cɔ, kɛ̌kɛnde gǎkɛ ɓogamani n'eme k'émani. A tɔ emani ndɔ ɗɔ́ɓɔmɔɔni kau mosá, ɓo phɔ́tɔ ɔɔ́ka ndu í k'éme ɓî ne phɔ́tɔ otútuisa.