Ɓagalatía 6 - Ɔngana á Kɛ̌kɛ

Akeni nkpa na nkpa ákumbɛ ɓoɗoko á dakɛ

¹ Ɓaya, aoɓá nkpa n'angí ka ɓojeɗe, akeni ɓenu íɓundɔ ɓona Měma á kanga ɓojeɗe ɓɔ́mphɛɛ́ na ɓǒtea akɛ k'aphe ánjá. Geani tɔ ka phɔakɛ ɓó na ɓɔphɔngɔ. Óambani ka gea, ɓókóngiɛmbɛ mɔnɔ sisanu ka tombaga.

² Ɓî a ɓó, ambe nkpa na nkpa ákumbɛ ɓoɗoko á dakɛ. K'aphe ndɔ unge, ɓoɓeande ɛɔphi ndea Kiísito.

³ Mmbé aǒɗokomisa na nna na kantíti, aǒdema sisakɛ.

⁴ Akeni ndiu nkpa na nkpa áambɛ tambea akɛ sasakɛ. Aoɓá n'aóbeba áebebɛ ka yɛ sisakɛ. Kaékengeanisɛmbɛ ndiu na ɓakpa ɓunɛngbo.

⁵ Nga, akeni nkpa na nkpa ákumbɛ nkumba nɛkɛ sasakɛ.

⁶ Nkpa nde ɓáongoisaga nyɔngɔ á Mokonga ambe ángabeɛ ngoisigi nɛkɛ k'ɛ́tɔi nɛkɛ bui.

⁷ Ɓókǒdemisɛgɛmbɛ sisanu, nga nkpa nnaɔtɔka n'annɛphɛigi Mokonga nga, nnde ookona aunge o tɔ oɗungua.

⁸ Aoɓá nkpa n'akonanigi ka ɓeana na mɔphɛ ájeɗe nɛkɛ, aɗunguande kukuwa. A gǎkɛ okonanaga ka ɓeana na Měma á Mokonga, aɗunguande enda á mɛyɔ.

⁹ Ɓégeɛni kema ánjá kángá ɛla. Nga, aoɓá na ɓékéɛli, ɓeɗunguande ka mbenɔ ndɔ aobika.

¹⁰ Cɔ, aoɓá na ɓena mbenɔ átɔtɔkisa kema ánjá, ɓétɔtɔkisɛni ú ka phɔa ɓakpa ɓɔbu. Ɓegeɛni ánjá phɛɛ ka phɔa ɓunde ɓá ka ekombo á ɓaɓêki.

Mɔkɔ á ka sungiaga

¹¹ Cɔ, ɔnani ɓî neonoɗunduia ángbôngbóngbo na njaga ani sasani.

¹² Ɓakpa ɓunde ɓáokáɓa gúsisa anu ganja k'akpɛ, ɓánde ɓakpa ɓunde ɓáokonda ébeba ka nyɔngɔ á kokpa. Ɓáogea ɓó ka ɓánga tambaga ka moyangɔ ndea Kiísito.

¹³ Ɓagu-ganja ndɔ, ɓɔ ɓáná koamba ɛɔphi, ɓá ndiu okonda gea, ɓóguɛ ganja ka gea ɓáeɗokomisɛ ka nyɔngɔ á epe á ka nyama anu.

¹⁴ K'eme gǎkɛ, kéebebeku ka kema nɛngbo na nna tɔndɔ ka nyɔngɔ á moyangɔ ndea Mɔkɔta nɛsu Yéso Kiísito. Ka nyɔngɔ índɔ unge mokonda aku ka nyɔngɔ ani n'eme néokuwa ka nyɔngɔ í.

¹⁵ Gúa á ganja na ika á kanga á gua ganja, nna na ka kema. Kema nde ana kantíti ande ɓá econji á kɛ̌kɛ.

¹⁶ Cɔ, ka ɓakpa ɓɔbu ɓunde ɓáoɓea ɛɔphi ndɔ, ɓujɛjɛ, na ɓonjánja ndea Mokonga áɓɛ gǔ anu, áɓɛ phɔtɔ gǔ á ɓakpa ndea Mokonga ɓɔbu.

¹⁷ Kpanga á kɛ̌kɛnde, nkpa kamotambisɛgɛmbɛ ye goto. Nga, epe-epe nde neně ka nyama ani, ande ka nyɔngɔ á Yéso.

¹⁸ Cɔ, ɓaya, ambe ɓonjánja-ékondi ndea Mɔkɔta nɛsu Yéso Kiísito áɓɛ na ɓenu ɓɔbu. Áɓɛ ɓó!