Ɓagalatía 5 - Ɔngana á Kɛ̌kɛ

Nkpa nde amɓeeki Kiísito nna ye nkɔɓɛ

¹ Kiísito asotókisi ka kɔkɔɓɛ ka gea te, ɓékéikɛmbɛ ye ka kɔkɔɓɛ. Kaɓondɔ, ókakamisani ka gea, ɓókosikianɛgɛ mɔnɔ ye goto ka kɔkɔɓɛ.

² Ɔ́mɔɔ́kani phɔ́! Eme Pɔ́lɔ nenóngoɗi gea: Aoɓá na ɓánogúsi ganja, ámbé Kiísito káɓɛku ye na kantíti ka ɓenu.

³ Nesikíí goto yɔnga gea, nkpa buakɛ, mmbé ɓángúsi ganja, aɓande otamba kusi ɛ́ɔphi bui.

⁴ Ɓenu íɓundɔ ɓookaɓa ɔnɛkana ɓato á koɗoni mosá á Mokonga ka nyɔngɔ á ɛɔphi, ɓo ye katani na Kiísito. Ɓonde ɗanga na ɓonjánja-ékondi ndea Mokonga.

⁵ Ɓesu gǎkɛ, nseɓeɔ nɛsu ande gea Mokonga aámbé asóngoɗande ɓato á koɗoni mosá akɛ ka nyɔngɔ á ɓeekea. Nndɔ ungɔ ɓeoɓondea ka ɓukpɛkpɛ á Měma á kanga ɓojeɗe nnde a suɓi asu.

⁶ Nga, ka nkpa nde aɔngani na Yéso Kiísito, gúa á ganja na ika á kanga á gua ganja, nndɔ nna na kantíti. Nnde ana kantíti a tɔ ɓeekea nde aɔɔnɛkana k'ékondi.

⁷ Tambea anu atókpangi ánjá. Ani goto anoɗakei aphe na imisia anu ɓeá á ɗoni?

⁸ Nndɔ ɓátónongoɗi ka ɓɔngaga anu, kátótóki ka Mokonga mmbé anɔɔphani.

⁹ «Cɔ, cacu ábɔa aoɓimbisa ɓonga bui» ɓíndɔ ɓáɔyɔngaga.

¹⁰ Eme, nenóseɓei suɓi á Mokonga. Neoúba gea, ɓókóɓɛku ye na kanisia nde atingani na kanisia nɛmɔ. Mmbé aonóyombokisa nanga áɓá ani, Mokonga atenande nyɔngɔ nɛkɛ akpɛ.

¹¹ Ɓaya, k'éme gǎkɛ, aoɓá n'ande ɗoni gea, nɛɔtɔmiaga kantíti á nyɔngɔ á ganja, ámbé ɓátómotambisagande ye goto ka nyɔngɔ éke? Atúoɓá n'a ɓó ámbé tɔ̌miaga á nyɔngɔ á kukuwa á Yéso ka moyangɔ, kátóɓɛku ye nyɔngɔ á kangea ɓakpa.

¹² Cɔ, ɓakpa nde ɓáobika n'oyombɔ sɔsɔɓɛ anu, ɓáétongoɛ ye tɔ sasaɓɔ!

¹³ Ɓaya, ɓenu gǎkɛ Mokonga anɔɔphani ka tokisa anu ka kɔkɔɓɛ. Nndɔ kanóɓǒteɛmbɛ mɔnɔ ka ɓá na mɔphɛ á kokpa. Énganani ndiu ka nyɔngɔ á ekondi.

¹⁴ Nga, ɛɔphi bui a tɔ suɓi ɛ́ɔphi nde moci: «Nkonda dakɔ sumbî ǒkondi sasakɔ.»

¹⁵ A gǎkɛ oɓá ɓoiki anu n'a ɓea ɓanyama á k'osaa ka kokanaga na kaɗuanaga ngǔngu anu, óambani, ámbé ɓomowanagande.

Ambe ɓétambeɛ ɓíndɔ Měma á kanga ɓojeɗe akondi

¹⁶ Nenóngoɗi gea: Ɗeketani Měma á kanga ɓojeɗe áɓɛ nsɔndɔi ka enda anu na ɓókóɓongeɛgɛ ku ye mɔphɛ á ka nyama anu.

¹⁷ Nga, nyama á nkpa ana mɔphɛ nde atingani na nnde á Měma. Měma gǎkɛ ana mɔphɛ ínɛkɛ nde atingani na nnde á nyama. Ɓɔ, ɓákáingimiani, ka gea kɔ́ɔtɔka gea kema nde otókondi gea í.

¹⁸ Aoɓá Měma n'aɔnɔsɔndɔɛa, ɛɔphi nna ye kema ka ɓenu.

¹⁹ Cɔ, mɔphɛ á nyama aoúbukana base ka: Otungɔ, ɓɔjɔɔkiɔ, mambɔ,

²⁰ ɗokomisa á ɓamokonga á mbɛa na eemba, ngíní, sani, nsengo, esúia, kuma, katanaga ka ketoto.

²¹ Ɓá na mɔphɛ ájeɗe, ɓoita, osǎ, na kema nɛngbo nde akengeani ně. Nesikíí goto ngoɗea anu ɓíndɔ netónongoɗi mosá gea: Ɓunde ɓáogea ka kema ɓínde, ɓákángiɛku ka koɓoamɛ ndea Mokonga.

²² Kema nde Měma á kanga ɓojeɗe aobikisa, ande: Ekondi, maseye, ɓujɛjɛ, měma á phiphia, osásɔ, ɓonjánja, koɗoni á ɗoni,

²³ ɓɔphɔngɔ, ɛngɛpha. Ɛɔphi nnaoimisia ka kema ndɔɔ.

²⁴ Ande gea te, ɓakpa ndea Yéso Kiísito, ɓákɔkɛigi ka moyangɔ mɔphɛ á nyama aɓɔ na kanisia ájeɗe nɛɓɔ.

²⁵ Ɓî Měma unge aosóendisa, akeni ndiu tambea asu áɓɛ ɓíndɔ Měma akondi.

²⁶ Ɓékéɓɛmbɛ na ɓemboko, kaɓɛ uɓana, kaɓɛ kuina na nsengo.