Ɓagalatía 4 - Ɔngana á Kɛ̌kɛ

¹ Cɔ, negie: Aoɓá mɛna-ɓotukɔ n'aphɔ́tɔ miki, kátingani na nkɔɓɛ, nanga áɓá mɛna-nkumba ndɔ bubui.

² Miki ndɔ aɓande kɔ̌ɓɔ́ka ɓakpa nde ɓáɔmmɔtisa na amba ánjá kema nɛkɛ bui na ka ɓî esande abakɛ ɗábisi akpeengeanande.

³ Ɓesu phɔtɔ, ɗéɓetú mosá ɓea ɓaniki. Ɗéɓetú ɓakɔɓɛ á ɓansombo á ka mokonda.

⁴ Cɔ, ɓî mbenɔ ndɔ ɗáɓábisi ɗájú ye, Mokonga áonteka Anakɛ mmbé nke ɗámɓɔkɔti, áoɓá kusi ɛ́ɔphi ndea Ɓayúda

⁵ ka gea te, ékoɗɛgɛ ɓakpa nde ɓá kusi ɛ́ɔphi, na bisa asu ɓana Mokonga.

⁶ Ka engekisa gea ɓonde ɓ'anakɛ, Mokonga ɗásotekisíí Měma á Anakɛ suɓi á měma asu. Měma kau aokoga: «Aba!»

⁷ Kaɓondɔ, kó ye nkɔɓɛ, o ye tɔ gǎkɛ miki. Ɓî onde miki á k'éndu nde ɓa Mokonga, akophande ɓotukɔ nde ɗábisi ka ɓ'anakɛ.

Měma á Pɔ́lɔ aágatani ka phɔa á Ɓagalatía

⁸ Cɔ, ɓî ɗóɓókótúomúba Mokonga mosá, ɗóɓotú ɓakɔɓɛ á ɓamokonga á mbɛa. Ɓamokonga ndɔ ɓáná á ɗoni.

⁹ Kɛ̌kɛnde unge ɓomúbi Mokonga, ande gea te, Kɛ̌kɛnde unge Mokonga anóúbi. Cɔ, eke nde ɓoogea ɓójiiɛ ɓansombo na kema nde nna na ɓukpɛkpɛ kaɓɛ na kantíti, na kaɓa á ɓá goto ɓakɔɓɛ?

¹⁰ Nga, ɓo phɔ́tɔ koamba ɓ'esa, ɓasonge, matú ɗanga-ɗanga, na ɓasaga.

¹¹ Kaɓondɔ, neotambaga ka měma ka nyɔngɔ anu. Neoɓánga gea, ekuma nde bui nɛbɛɗanigi ka phɔanu kakuwɛ mɔnɔ jǎi.

¹² Ɓadani, nenóɗengemisigi! Ɓáni ɓea eme nga, eme ne tɔ ɓea ɓenu. Ɓókómogi na ka kema ájeɗe.

¹³ Ɓookanisia ka nyɔngɔ sina nde ɗénɔtɔ̌migi Mbinɔ-Ánjá k'ama mosá-mosá. Ɗátú ka nyɔngɔ nde ɗétúosamba.

¹⁴ Nanga ɓî esambɔ ndɔ ɗáújúkisi nyama ani mosá á ɓakpa, ɗóɓókómɔɓɛnjigi na yágani. Ɓô ndiu omosesea n'osasɔ ɓea malaéka ndea Mokonga, ɓea Yéso Kiísito phɔtɔ.

¹⁵ Ɗóɓotúmi na maseye phɛɛ! Cɔ, eke ye goto? Nenogie, ɗátúoɓá n'atɔtɔkɛani, ámbé ɗóɓóphúigi mbuk'íso anu, ɓóomopa.

¹⁶ Cɔ, ande gea te ne ye tɔ mɓiɓia anu ka nyɔngɔ á ngoɗea anu ɗoni?

¹⁷ Ɓakpa ndɔ ɓáɔnɔɓɔngaga, na mɔphɛ aɓɔ nna ánjá ka ɓenu. Mɔphɛ aɓɔ a ndiu gea, ɓánokatanisɛ n'eme ka gea te, ɓóbisɛ mɔphɛ anu ka nyɔngɔ nɛɓɔ.

¹⁸ Aánjá ka bisa mɔphɛ anu na áɓɛ ndiu ka kema ánjá ka mbenɔ bui nanga ké sɔsɔɓɛ anu.

¹⁹ Cɔ, ɓaniki amɔ, ne goto otambaga ka nyɔngɔ anu ɓea nke n'aka ɓoaé. Na ka ɓî aúbikanande base gea, Kiísito a suɓi anu.

²⁰ Netókondi néɓɛ sɔsɔɓɛ anu kɛ̌kɛnde ka tɔ̌mia anu nyɔngɔ k'etéte nengbo nga, měma ani aagatani ka nyɔngɔ anu.

Agaí na Salái

²¹ Ómongoɗeani phɔ́, ɓenu íɓunde ɓookonda ɓá kusi ɛ́ɔphi ndea Ɓayúda! Ɓɔ́kɔ́ɔɔ́ka kema nde ɛɔphi ayɔngi?

²² Nga, ɓáɗundu gea, Abalaámu ɗátú na ɓaniki ɓǒko ɓaɓɛ. Moci ɗátú muna-nke ímbe nkɔɓɛ, ɓaangbo, áoɓá gǎkɛ ɓa nke ímbe ɗákátú nkɔɓɛ.

²³ Muna-nke ndɔ nkɔɓɛ ɗáonjokani ɓea ɓakpa ɓɔbu. Muna-nke ímbe ɗákátú nkɔɓɛ, ɗáonjokani gǎkɛ ka nyɔngɔ á tɔtɔkisa á mɔkɔ ndea Mokonga.

²⁴ Nndɔ ande mɛní. Ɓake ndɔ ɓánde mphangiɔ á ɔngana iɓɛ. Agái ande mphangiɔ á ɔngana nde á ka mamba á Sinái á ka Alabía. Ɓana-nke ndɔ, ɗáɓáɓɔkɔtɛani ka kɔkɔɓɛ.

²⁵ Ina ndɔ: «Agái», ande ina á mamba «Sinái» á ka Alabía. Agái ande phɔtɔ mphangiɔ á Yɛusalɛ́ma á ka matú ndee, nnde a ka kɔkɔɓɛ kimoci na ɓaniki nɛkɛ ɓɔbu.

²⁶ Cɔ, Yɛusalɛ́ma á na koba, nna gǎkɛ ka kɔkɔɓɛ, yɛ aámbé ande amasu.

²⁷ Nga, Ɓuku á Mokonga agi te: «Nke-ngomba nde ca! Ɓá na maseye! Kóga na maseye, ɓî kóoúba nɛkɔ kokae á ɓoaé! Nga, nke nde ɓányé, aɓande na ɓaniki ɓásii phɛɛ, kɔnyɛ́nya nke nde munyakɛ ankondi.»

²⁸ Cɔ, ɓana-ayi, ɓenu ɓonde ɓaniki ɓunde ɓáɓɔkɔtɛani ka ɓeana na mɔkɔ á Mokonga ɓea Isáka.

²⁹ Ka matú ndɔ, mmbé ɗáonjokani ɓea ɓakpa ɓɔbu, ɗáontambisaga miki ndɔ ɗáɓɔkɔtɛani ka nyɔngɔ á Měma á Mokonga. A phɔ́tɔ ɓó ka ɓésa ndee.

³⁰ Cɔ, Ɓuku á Mokonga agi ɓe: «Mɓeaga nkɔɓɛ na anakɛ nga, muna nkɔɓɛ nnaɔtɔka n'akatisani ɓotukɔ á kobɛ kimoci na muna-nke nde nna nkɔɓɛ.»

³¹ Cɔ, ɓaya, ɓéké ɓana-nkɔɓɛ, ɓe ndiu ɓana-nke ímbe ɗákátú nkɔɓɛ.