Ɓagalatía 3 - Ɔngana á Kɛ̌kɛ

Ɛɔphi na ɓeekea

¹ Ɓagalatía ɓabóbó nde ca! Ani mmbé anɔɔgi mɔnɔ? Nyɔngɔ á kukuwa á Yéso ka moyangɔ ɗáɓátɔ̌migi ú base mosá anu.

² Cɔ, ómongoɗeani phɔ́, ɗɔ́ɓɔtɔi Měma á Mokonga ka nyɔngɔ nde ɗóɓoambi ɛɔphi na nna tɔ ka nyɔngɔ á ɔ́ka Mbino-Ánjá ndea Mokonga na ɓeekea í?

³ Ekende ɓobóbóki ně ɓende! Ɓenu ɗóɓokpangi na Měma á Mokonga, ɓokondi gǎkɛ gɔɓɛa ka ɓukpɛkpɛ nɛnu sasanu ka nyɔngɔ éke?

⁴ Ande gea te nyɔngɔ bui nde ɗátɔtɔkɛani ka phɔanu aku tɔ jǎi? Eya, ɗákáku jǎi.

⁵ Ɓî Mokonga anophi Měma akɛ, â phɔtɔ ɔtɔtɔkisa ketangaɔ sɔsɔɓɛ anu. Cɔ, aogea ɓondɔ ka nyɔngɔ nde ɓooamba ɛɔphi kaɓɛ ka nyɔngɔ nde ɓɔɔ́ka Mbino-Ánjá ndea Mokonga na ɓeekea í?

⁶ A tɔ ɓíndɔ ɗáɓáyɔngi ka phɔa á Abalaámu gea: «Ɗámɓeeki Mokonga, ka ɓondɔ, Mokonga áonseɓea ɓea nto á koɗoni ka nyɔngɔ á ɓeekea nɛkɛ.»

⁷ Cɔ, úbani gea, ɓakpa nde ɓámɓeeki Mokonga, ɓánde ekombo ndea Abalaámu ɗoni.

⁸ Ɓuku á Mokonga ɗáangi mosá gea, Mokonga aebisande ɓunde ɓáná Ɓayúda ka ɓá ɓato á koɗoni ka nyɔngɔ á ɓeekea nɛɓɔ. Kaɓondɔ unge, Ɓuku á Mokonga ɗátɔ̌migi ka Abalaámu Mbino Ánjá ndee: «Mokonga abisande njaga k'ékuna bubui ka nyɔngɔ akɔ.»

⁹ Cɔ, Abalaámu ɗámɓeeki Mokonga, Mokonga áombisia njaga. Kaɓondɔ unge ɓakpa ɓɔbu ɓunde ɗáɓámɓeeki Mokonga, Mokonga aebisíí phɔtɔ njaga ɓea yɛ.

¹⁰ Cɔ, Mokonga aɛ́sɛmɛagande ɓakpa nde ɓábisi mɔphɛ aɓɔ ka nyɔngɔ á ɛɔphi. Nga, Ɓuku á Mokonga agi: «Ɓánsɛmɛagande nkpa buakɛ mmbé nnaoamba na nnaɔtɔtɔkisa esa bui kema bubui nde a suɓi á ɓuku ɛ́ɔphi.»

¹¹ Ande base gea, Mokonga nnaomɓeekea nkpa gea, ande nto á koɗoni ka nyɔngɔ á amba ɛɔphi. Nga, ɓáɗundu suɓi á Ɓuku á Mokonga gea: «Ɓato á koɗoni ɓáendande ka nyɔngɔ á ɓeekea.»

¹² Ɛɔphi nna gǎkɛ oingimiana na ɓeekea. Ɓuku á Mokonga agi ndiu: «Nkpa nde aoamba ɛɔphi, aendande.»

¹³ Kiísito ɗásóphúi ka sɛmɛaga nde ɛɔphi ɗátú ně ka phɔasu, â ye tɔ okumba ú k'ɔ́ma nɛsu. Nga, Ɓuku á Mokonga ayɔngi ɓe: «Nkpa nde ɓáonkpata gǔ á me, aámbé Mokonga aɔnsɛmɛaga.»

¹⁴ Kiísito ɗági ɓó ka gea, ɓî Mokonga ɗámbisíí Abalaámu njaga, áɓɛ phɔtɔ ka ɓakpa nde ɓáná Ɓayúda k'aphe ndea Yéso. Kaɓondɔ unge ɓesu ɓɔbu, ɓɛtɔi Měma nde Mokonga ɗásɔɔku ka nyɔngɔ á ɓeekea.

Mɔkɔ n'ɛɔphi

¹⁵ Ɓaya, neokengisia ɔnisa anu kema moci ka enda asu á esa bui. Aoɓá nkpa n'aɓɔngisigi ánjá mɔkɔ á mosá á kuwa, nna na nkpa nde aɔtɔka n'aɓúni mɔkɔ ndɔ kaɓɛ yamea ka kema gǔ í.

¹⁶ Cɔ, Mokonga ɗámɔku Abalaámu n'ɛɓɔkɔti nɛkɛ. Ɓuku á Mokonga ɗákáyɔngi: «K'ɛ́ɓɔkɔti nɛkɛ bui» ɓea ɓakpa ɓásii. Ɗáyɔngi ndiu: «K'ɛ́ɓɔkɔti nɛkɔ» ande gea te nkpa moci n'ande Kiísito.

¹⁷ Nnde neogea nɛ́yɔngɛ ande gea: Mokonga ɗábisi ɔngana nɛkɛ na Abalaámu kángá anganisa í. Ɛɔphi nde ɗákiɗiani mbusa á ɓasaga mia gena na nkama isaɔ (430), nnaɔtɔka n'aɓúni mɔkɔ ndɔɔ. Nna phɔtɔ ɔtɔka íma í.

¹⁸ Cɔ, aoɓá na ɓá tɔ ɔtɔa ɓotukɔ ndea Mokonga ka nyɔngɔ á amba ɛɔphi, ande gea te nna ye pɛ ka nyɔngɔ á mɔkɔ ndea Mokonga! Cɔ, na ka ɓeana na mɔkɔ ndea Mokonga ka Abalaámu aunge ɗámophi ɓonjánja-ékondi nɛkɛ.

¹⁹ Cɔ, ɛɔphi a gǎkɛ na kantíti sina? Ɗáɓáyamei ɛɔphi ka úbisa gea, ɓakpa ɗáɓáɓúni ɛɔphi ndea Mokonga, na ka ɓî ɛɓɔkɔti ndea Abalaámu ajúaeka mmbɔ mɔkɔ ɗátú ka phɔakɛ. Ɓamalaéka ɓáunge ɗáɓábiki n'ɛ́ɔphi ndɔ ɓáobisa ka njaga á mɔɔnganisi.

²⁰ Aoɓá nyɔngɔ n'a tɔ ka phɔa nkpa moci, nna na siki á mɔɔnganisi. Cɔ, Mokonga a tɔ sisakɛ.

Kantíti ɛ́ɔphi

²¹ Ande gea te, ɛɔphi atinganigi na mɔkɔ ndea Mokonga? Tanda phɔ́. Atú oɓá ɛɔphi n'ana ɓukpɛkpɛ á amisa á ɓakpa ka měma, na ɓakpa ɗáɓátɔi ú, ámbé ɛɔphi ɗáebisi ɓakpa, ɓato á koɗoni mosá á Mokonga.

²² Ɓuku á Mokonga ayɔngi gǎkɛ gea, mokonda bui a kusi á ɓukpɛkpɛ á ɓojeɗe. Kaɓondɔ, ɓakpa nde ɓánde ɓaɓêki, ambe ɓáɓɛ na ɓotukɔ nde Mokonga ɗáɛɓɔku ka nyɔngɔ á ɓeekea Yéso Kiísito.

²³ Nga, mosá á jua mbenɔ á ɓeekea, ɛɔphi ɗásóɓóege na ka ɓî ɗákeni ɓeekea ákiɗianɛ base.

²⁴ Ɛɔphi ɗáosóamba na ka ɓî Kiísito ɗábiki ka ɓá ɓato á koɗoni mosá á Mokonga ka nyɔngɔ á ɓeekea.

²⁵ Ɓî mbenɔ á ɓeekea ajú ye, nna ye ɛɔphi unge aosóamba.

²⁶ Cɔ, ɓenu ɓɔbu, ka nyɔngɔ á ɓeekea a Yéso Kiísito, ɓo ye tɔ ɓana-Mokonga.

²⁷ Kaɓondɔ, ɓenu ɓɔbu ɓunde ɗóɓojúkani na Kiísito k'óɓatisɔ, tambea anu akengeani ye tɔ na yɛ.

²⁸ Oɓayɔ nna ye sɔsɔɓɛ á Ɓayúda na ɓunde ɓáná Ɓayúda, ɓakɔɓɛ na ɓunde ɓáná ɓakɔɓɛ, ɓǒko na ɓake. Ɓenu ɓɔbu ɓonde moci suɓi á Yéso Kiísito.

²⁹ Aoɓá na ɓonde ɓakpa ndea Kiísito, ɓo ye tɔ ɓato á k'ekombo ndea Abalaámu. Ɓonde ɓamɛna-ɓotukɔ ɓíndɔ Mokonga ɗáɔku.