Ɓagalatía 2 - Ɔngana á Kɛ̌kɛ

Pɔ́lɔ na ɓateki ɓuangbo

¹ Cɔ, mbusa á ɓasaga nkama na gena (14), néoja na Yɛusalɛ́ma kimoci na Baanába, nê phɔtɔ onga na Títɔ.

² Ɗége ko nga, Mokonga aámbé ɗámɔɔphani. Suɓi á madondanɔ ka mpɛphɛ na ɓakɔta á kanisa aunge ɗéněgoisigi Mbino-Ánjá nde nɛɔtɔmiaga sɔsɔɓɛ á ɓunde ɓáná Ɓayúda. Nga, ɗékéokonda gea, ekuma nɛmɔ á kala n'índe á kɛ̌kɛ áɓɛ kángá kantíti.

³ Títɔ mmbé ɗéɓetú na yɛ, nanga ɓî ɗátú Mogiíki nna gǎkɛ na nkpa nde ɗáonsosea gea, águɛ ganja,

⁴ nanga ɓî ɓana-ayi ɓájeɗe ɓáunge ɗáɓáonsosea. Ɓɔ, ɗáɓáengisi sɔsɔɓɛ asu ka ɓɔsɔmɛa ka bika sɔna ɓî ɓeoenda ánjá ka ɔngana asu na Kiísito. Ɗáɓátú na mɔphɛ á bisa asu ɓea ɓakɔɓɛ nɛɓɔ.

⁵ Ɗéɓékéɓeeki gǎkɛ tanda ka nyɔngɔ nɛɓɔ moci, ka nyɔngɔ á ambea anu koɗoni á Mbino.

⁶ Ɓakɔta á kanisa ɗáɓákáyamei gǎkɛ ka kema ka ɓɔphɛi nɛmɔ. Nanga ɓáɓá ɓakɔta, nndɔ nna kema k'éme nga, Mokonga nna n'oɓayɔ. Ɓakɔta ndɔ, ɗáɓákámososi gǎkɛ moangɔ á kɛ̌kɛ.

⁷ Ɗáɓáɔni ndiu gea, Mokonga amopi ekuma á tɔ̌miaga Mbino-Ánjá ka ɓakpa nde ɓáná Ɓayúda, ɓíndɔ ɗámophi Pɛ́tɛɛ ekuma á tɔ̌miaga á Mbino-Ánjá ka Ɓayúda.

⁸ Mokonga ɗámbisi Pɛ́tɛɛ áɓɛ nteki ka Ɓayúda, ɓíndɔ amobisi ka ɓakpa nde ɓáná Ɓayúda.

⁹ Mpɔ, Yakɔ́ɓɔ, Pɛ́tɛɛ na Yoáni, ɓî ɗáɓáeseɓei ɓea nsukiɔ á kanisa, ɓáoengekisa ebigɔ nde Mokonga amopi. Ɓáosopha njaga eme na Baanába ka ɔnisa ɔngana. Ɓɛ́ɔɔ́kana na ɓɔ ka gea, ɓesu ɓégɛ bɛɗanɛgɛ mɔtɛ á ɓakpa nde ɓáná Ɓayúda, ɓɔ gǎkɛ ɓágɛ bɛɗanɛgɛ mɔtɛ á Ɓayúda.

¹⁰ Ɗáɓásɔ́mɛmi tɔ gea, ɓéekanisiɛ ɓato á ɓuyɛnɛ ndea kanisa nɛɓɔ ka Yɛusalɛ́ma na ɗétɔtɔkisi ú na měma mo.

Pɔ́lɔ aomphekeaga Pɛ́tɛɛ ka Antiɔkía

¹¹ Mbenɔ nde Pɛ́tɛɛ ɗákiɗi gǎkɛ ka Antiɔkía, néonkeea mosá á ɓakpa ɓɔbu nga, ɗági ájeɗe.

¹² Cɔ, mosá á jua ka ɓakpa nde Yakɔ́ɓɔ ɗáeteki, Pɛ́tɛɛ ɗáoeaga kimoci na ɓakpa nde ɓáná Ɓayúda. Mbenɔ nde ɓakpa ndɔ ɓákiɗi, mpɔ â gǎkɛ oɗoa eaga na katana na ɓɔ, nga, ɗáǒɓánga ɓakiísito ɓundɔ ɗáɓáounia esomba á gua ganja.

¹³ Ɓadakɛ ɓaɓêki Ɓayúda ɓuangbo á ka Antiɔkía, ɓâ phɔtɔ omɓea yɛ Pɛ́tɛɛ ka kema nde ɗáogeaga, Baanába â phɔtɔ ǒɓea ka tambea á maibe ndɔɔ.

¹⁴ Ɓî nɛɔni ye gea tambea aɓɔ atingani na ɗoni á Mbino-Ánjá, néonkeea gǎkɛ Pɛ́tɛɛ mosá á ɓakpa ɓɔbu: «Oɓɛ, onde Moyúda! O gǎkɛ otambea ɓea nkpa na nna Moyúda. Cɔ, ka nyɔngɔ éke nde ǒsosea ɓakpa nde ɓáná Ɓayúda gea, ɓátambeɛ ɓea Ɓayúda?»

Ɓakpa ɓɔbu ɓáamande ka měma ka nyɔngɔ á ɓeekea

¹⁵ Ɓesu, ɓende Ɓayúda áɔɓɔkɔtɛana, ɓéké ɓato á k'ekuna nɛngbo ɓunde ɓánde ɓato á ɓojeɗe.

¹⁶ Ɓeoúba gea, nna ka nyɔngɔ á amba ɛɔphi unge aombisa nkpa nto á koɗoni mosá á Mokonga. A ndiu tɔ ka nyɔngɔ á ɓeekea Yéso Kiísito. Ɓesu phɔtɔ, ɗéɓemɓeeki Kiísito Yéso ka gea te, ɓéúbukanɛ gea ɓende ɓato á koɗoni. Ɗéɓeúbukani gea ɓende ɓato á koɗoni ka ɓeekea Kiísito, nna ka nyɔngɔ á amba ɛɔphi. Nga, nna na nkpa nde aɓande nto á koɗoni mosá á Mokonga ka nyɔngɔ á amba ɛɔphi.

¹⁷ Aoɓá ɓesu na ɓeokáɓa úbukana gea ɓende ɓato á koɗoni ka nyɔngɔ á Kiísito na ɓende gǎkɛ ɓato á ɓojeɗe, nndɔ ana kantíti sina? Ande gea te, Kiísito aámbé aǒɓotea ɓakpa k'aphe á ɓojeɗe? Nna ɓó!

¹⁸ Nga, aoɓá na nesikíí ɛɔphi nde ɗéɗeketi, ande gea te, eme sisani neɓúni ɛɔphi.

¹⁹ Cɔ, ka nyɔngɔ ɛ́ɔphi unge neku. Ɛɔphi ndɔ unge amokusisi ka gea te, enda ani áɓɛ ka Mokonga. Ɗéku kimoci na Kiísito ka moyangɔ.

²⁰ Kaɓondɔ, nna ye eme aámbé neoenda. Kiísito ndiu aámbé a ye tɔ oenda suɓi ani. Kɛ̌kɛnde, suɓi á enda ani á kɛ̌kɛ, nemɓeeki Muna-Mokonga mmbé ɗámokondi áomokuia.

²¹ Kéɗoɛku ɓonjánja-ékondi ndea Mokonga. Nga, aoɓá ɛɔphi unge aombisa nkpa nto á koɗoni mosá á Mokonga, ámbé Kiísito ɗáku tɔ nɛkɛ jǎi.