Ɓagalatía 1 - Ɔngana á Kɛ̌kɛ

Nsesɔ

¹ Ka ɓaɓêki á ka Galatía sambani! Eme Pɔ́lɔ aámbé neɗundu ɓaoɓa ndee. Nende nteki, nna ka mɔphɛ á ɓakpa na nna nkpa aámbé amoɓǒtei. Yéso Kiísito na Abakɛ Mokonga mmbé ɗánjujúkisi ka ɔlɔ á ɓasí aámbé amoteki.

² Cɔ, ne kimoci na ɓadasu ɓɔbu ɓunde ɓá wani ka ɗundua á ɓaoɓa nde ka kanisa ɗanga-ɗanga á ka nji á Galatía.

³ Abasu Mokonga, na Mɔkɔta Yéso Kiísito, ánophɛ ɓujɛjɛ na ɓonjánja-ékondi nɛkɛ.

⁴ Kiísito yɛ sisakɛ aámbé ɗábiki osókuia ka amisa asu ka ɓojeɗe ka gea, ásophúiɛ ka ɓojeɗe á ka mokonda nde á kɛ̌kɛ ɓíndɔ Abasu Mokonga ɗákondi.

⁵ Mokonga áɓɛ na ɓoombia ka saga na saga áɓɛ ɓó!

Mbino Ánjá a tɔ mo

⁶ Cɔ, neyayami phɛɛ nga, ɓokamisigi ɗeketa á Mokonga n'ande yɛ aámbé ɗánɔɔphani ka nyɔngɔ á ɓonjánja-ékondi ndea Kiísito. Ɓôketia ka ɓeá mbino-ánjá nɛngbo.

⁷ Eya, nna na Mbino-Ánjá nɛngbo, a ndiu tɔ na ɓakpa nde ɓáonoyombokisa na kaɓa á gaía Mbino-Ánjá ndea Kiísito.

⁸ Cɔ, kaɓɛ ɓesu sisasu, nanga áɓá malaéka n'atóki na koba, ánɔtɔmiaga Mbino-Ánjá nde atingani gǎkɛ na nnde ɗɛ́ɓɛnɔtɔ̌migi, ambe Mokonga ánsɛmɛɛgɛ.

⁹ A tɔ ɓíndɔ ɗɛ́ɓɛyɔngi mosá, aunge nesikíí kɛ̌kɛnde gea: Aoɓá nkpa n'aɔnɔtɔmiaga Mbino-Ánjá nde atingani n'índe ɗɛ́ɓɛnɔtɔ̌migi, ambe Mokonga ánsɛmɛɛgɛ nkpa ndɔɔ!

¹⁰ Cɔ, ka yɔnga ani kɛ̌kɛnde ɓó, ande gea te neokáɓa gea, ɓakpa ɓámoɓeekeɛ? Ɓɛɛndɔ! Ne ndiu okáɓa gea Mokonga ámbé ámoɓeekeɛ. Ande gea te, neokáɓa ékondisaga na ɓakpa? Atú oɓá na neokáɓa ékondisaga na ɓakpa, ámbé kétóɓɛku mbɛɗanigi ndea Kiísito.

Aphe nde ambisi Pɔ́lɔ ka ɓá nteki

¹¹ Ɓaya, nenóngoɗi gea, Mbino-Ánjá nde nɛɔtɔmiaga, kátóki ka ɓakpa.

¹² Nga, nna nkpa aámbé ɗámopi na goisaga ani ú. Yéso Kiísito ndiu aámbé amogoisigi ú.

¹³ Nga, ɗɔ́ɓɔɔ́ki na ɓáonóngoɗea ka nyɔngɔ á tambea ani ɓî ɗé phɔ́tɔ k'ésomba ndea Ɓayúda. Ɗɔ́ɓɔɔna ɓî ɗétúotambisaga kanisa ndea Mokonga phɛɛ na káɓa túkatúka í.

¹⁴ Eya, ɗégoigi nyɔngɔ ésomba ndea Ɓayúda kɔ̌nyɛ́nya ɓamoenga ani. Ɗétú na moíngí phɛɛ kɔ̌nyɛ́nya ɓɔ ka unia asii ndea ɓatatasu.

¹⁵ Mokonga, mmbé ɗámɔsɔmbu gǎkɛ mosá á ɓɔkɔtɛana ani, aámbé ɗámɔɔphani ka nyɔngɔ á ɓonjánja-ékondi nɛkɛ.

¹⁶ Áomophangia Anakɛ ka gea te, nɛ́tɔmiɛgɛ Mbino-Ánjá nɛkɛ ka ɓunde ɓáná Ɓayúda. Ɗɛ́kɛ́mɛmi gǎkɛ ɓɔphɛi ka nkpa,

¹⁷ ɗéké tái nci á Yɛusalɛ́ma ka gǎ ɔna ɓunde ɗáɓátú ɓateki mosá ani. Kɛ̌kɛndɔ, nê ndiu oga na Alabía, mpɔ, néosikianaga na Damasíki.

¹⁸ Mbusa á ɓasaga ɓasaɔ, ɗége na Yɛusalɛ́ma k'aphe á úbana na Pɛ́tɛɛ na ika na yɛ ka ɓ'esa nkama na ɓɔku (15).

¹⁹ Ɗékémɔni tanda ka ɓateki ɓaangbo. Ɗɛ́mɔni tɔ Yakɔ́ɓɔ, muna-amakɛ na Mɔkɔta.

²⁰ Cɔ, nenóngoɗi ɗoni mosá á Mokonga gea, kema nde nenóɗundui nna mbɛa.

²¹ Mbusa í, néoga nci á kenombe á ka Sulía na Kilikía.

²² Ɓato á kanisa ɗanga-ɗanga ndea Yéso ka Yudɛ́a, ɗáɓákáoengekisa keongi ani.

²³ Ɗáɓáɔ̌ɔ́ka ɓakpa na ɓáɔyɔnga gea: «Nkpa nde ɗáosótambisaga mosá, kɛ̌kɛnde a ye tɔ ɔtɔmiaga Mbino-Ánjá á ɓeekea, nndɔ ɗáokaɓa túkatúka í.»

²⁴ Mpɔ, ɓaɓêki ndɔ ɓáombeba Mokonga ka phɔani.