Ɓaɛbulanía 9 - Ɔngana á Kɛ̌kɛ

Moangɔ ɔ́phɛ́ɔ á ɔngana á kala

¹ Cɔ, ɔngana á mosá ɗátú phɔtɔ na moangɔ ɗanga-ɗanga á beba á Mokonga na ɔma á kanga ɓojeɗe nnde a ka mokonda.

² Kaɓondɔ unge ɗáɓácumi endu nde ɗáɓáphɛ̌ki na Ɛma. Ɔma á k'ama mosá-mosá éndu ndɔ ɗáɓáɔɔphana ɔma á kanga ɓojeɗe. Suɓi á ɔma ndɔ unge ɗáɓábisi ɔbɛa, mɛja na mokati ɔ́phɛ́ɔ ka Mokonga.

³ Ɔma á ko iɓɛ ɗáɓáɔɔphana ɔma á kanga ɓojeɗe phɛɛ. Bɔngɔ agbae unge ɗákatisani ɔma ndɔ a iɓɛ.

⁴ Suɓi á ɔma á ko iɓɛ ndɔ unge ɗátú na miki á mɛja nnde ɓákombei na láté ka toɓoa ngaɛ́ ɔ́phɛ́ɔ. Ɗátú phɔtɔ na sanduku á ɔngana nde ɗáɓákombei na láté ɔma bui. Suɓi á sanduku ndɔ ɗátú na mbeka nde ɓáɓɔngisigi na láté n'ana mána suɓi í. Ɗátú phɔtɔ na motumbɔ ndea Alɔ́ni nnde ɗáphúi maya. Ɗátú na ɓ'ɛtɛ nde Mokonga ɗáɗundu ɛɔphi ndeakɛ kau.

⁵ Gǔ á sanduku, ɗátú na iii á Ɓakɛlúbi ka phangia gea Mokonga mɛna-ɓoombia a wa. Ɓakɛlúbi ɓundɔ iimbiɔ á kepupe aɓɔ ɗáogbukumia mɓɔmbiɔ á ɔma nde ɗáɓáoɗuka magia ka íma ɓojeɗe á ɓakpa. Cɔ, kɛ̌kɛnde ɓékétɔmiɛku nyɔngɔ kau bîbíbí.

⁶ Mbenɔ nde kema ndɔ bui ɗádondanigi ye, ɓatoɓeigi-phɛ́a ɓáongiaga esa bui k'ɔ́ma á k'ama mosá-mosá ka bɛɗanaga ekuma nɛɓɔ.

⁷ Cɔ, ngbɛga á ɓatoɓeigi-phɛ́a tɔ aámbé a ndiu ongia suɓi á ɔma á ko iɓɛ mɔngɔ ímoci ka saga moci. Yɛ, nnaobika mosá á Mokonga kángá magia á nyama k'ɔ́phɛ́ɔ á ka phɔakɛ sasakɛ, phɔtɔ ka phɔa á ɓojeɗe nde ɓakpa ɓági kángá úba í.

⁸ Ɓondɔ unge Měma á kanga ɓojeɗe aphangi gea: Aphe á ngia k'ɔ́ma á kanga ɓojeɗe phɛɛ kaúkúkanimbɛ mbenɔ nde moangɔ á mosá a phɔ́tɔ ɓei.

⁹ Nndɔ ande ɓea mɛní ka matú ndee. Ande gea te: Ɛkɔmi ka Mokonga, ɔphɛ́ɔ á ɓanyama nnaɔtɔka n'atɔtɔkisi ɓonjánja suɓi á měma á nkpa nde aoɓea moangɔ ndɔɔ.

¹⁰ Nndɔ bui atɔndɔ ka nyɔngɔ á kema á koea, kema á onoa na moangɔ ɗanga-ɗanga á sokosea á ɓojeɗe á nkpa. Kantíti índɔ ɗásungíígi ka mbenɔ nde Mokonga ɗáɓɔngisigi moangɔ á kɛ̌kɛ.

Kiísito abisi enda akɛ ɓea nyama á phɛ́a

¹¹ Cɔ, Kiísito aámbé akiɗi ka gea áɓɛ ngbɛga á ɓatoɓeigi-phɛ́a á kema ánjá nde aobika. Angí suɓi á ɛma ángbó nde ande á ɓonjánja phɛɛ kɔnyɛ́nya nndɔ á mosá. Ɛma ndɔ, nna ɓakpa ɓáunge ɓáɓɔngisigi na njaga aɓɔ. Ande gea te, nna kema á ka mokonda nnde ɓáconji.

¹² Nna gǎkɛ ka nyɔngɔ á magia á ɓǔku á mɛmɛ na magia á ɓamponjo á ɓǔku á ngɔmbɛ, ɗábisi ndiu magia akɛ sasakɛ ka phɛ́a, mpɔ â tɔ ongia mɔngɔ ímoci tɔndɔ k'ɔ́ma á kanga ɓojeɗe phɛɛ, áosókoɗaga ka ɓojeɗe nɛsu ɗoni, ɓéoɓá na ɓoamia á mɛyɔ.

¹³ Ɓíndɔ asii asosi, ɓáokpanjiaga magia á mɛmɛ na magia á ngɔmbɛ na ebǔ á mponjo á ngɔmbɛ nkei mmbé ɓántoɓu gǔ á ɓakpa nde ɓági ɓojeɗe. Mpɔ ɓojeɗe á ka nyama aɓɔ áotóka.

¹⁴ Cɔ, kaɓɛ nndɔ bui n'ande ɗoni, ande gea te magia á Kiísito ana ɓukpɛkpɛ phɛɛ kɔnyɛ́nya nndɔ bui. Nga, ka Měma á mɛyɔ, Kiísito ɗábisi enda akɛ sasakɛ ka Mokonga ɓea nyama á phɛ́a nde nna na kiɗɔti. Magia akɛ aunge aosokosea úbapha asu ka toka k'aphe nde aosóɓotea ka kukuwa, ka gea ɓémbɛɗaneɛgɛ Mokonga mmbé aoenda.

Magia á Kiísito aunge aengekisi ɔngana á kɛ̌kɛ

¹⁵ Ka nyɔngɔ índɔ unge Kiísito ande mɔɔnganisi á ɔngana á kɛ̌kɛ. Ɗákú ka tokisa á ɓakpa ka ɓojeɗe nde ɗáɓáogea ú ka mbenɔ á ɔngana á kala. Kaɓondɔ, ɓunde Mokonga ɛ̌ɓɔphani ɓáɔtɔka na ɓatɔi nkumba nde ɗɛ́ɔku nnde káujukanɛeka.

¹⁶ Nga, ɔma nde ɓaoɓa á gabisana á nkumba a ɓei, aánjá ɓoengekisɛ gea nkpa nde aɗundu ɓaoɓa ndɔ aye n'aku.

¹⁷ Eya, ɓaoɓa á gabisana á nkumba a tɔ na kantíti ámbé mɛna í aku. A gǎkɛ oɓá na kákumbɛ, ɓaoɓa ndɔ káɓimbɛ na kantíti.

¹⁸ Kaɓondɔ unge nanga ɔngana á kala ɗákákpangimbɛ kángá á ɗǔkana á magia.

¹⁹ Eya! Mósa ɗátɔ̌mi mosá á ɓakpa ɓɔbu moangɔ ɗanga-ɗanga ɓíndɔ ɛɔphi asosi, mpɔ áɔbɛɗa magia á mponjo á ngɔmbɛ na magia á mǔku á mɛmɛ, â phɔtɔ ɔbɛɗa iɓo. Áɔbɛɗa gbútu-gbútu á me nde ɓáɔɔphana isɔpɔ, áoɓóaga na ngoi ánjɛ, áocaɗisaga ú ka ɓuku nde ɗáɗundu ɛɔphi suɓi í. Â phɔtɔ ǒcaɗisiaga ɓakpa.

²⁰ Wa, n'aɔyɔnga ɓe: «Nnde ande magia nde aengekisi ɔngana nde Mokonga ɗábisi sɔsɔɓɛ akɛ na ɓenu ka gea te ɓóambɛ ú.»

²¹ Ɗági phɔtɔ ɓó gǔ á ɛma na gǔ á nkumba bui nde ɗáɔbɛɗanaga ně k'ékuma á Mokonga.

²² Cɔ, ande ɓea ɓíndɔ ɛɔphi asosi gea ɓojeɗe bubui a tɔ otóka ka ɗǔkana á magia. Aoɓá magia na káɗǔkanimbɛ, ande gea ɓojeɗe kaímikimbɛ.

Kiísito ande ɔphɛ́ɔ ka íma á ɓojeɗe

²³ Cɔ, kaɓɛ moangɔ ndɔ unge aotókisa ɓojeɗe á kema nde atɔndɔ iii índɔ á na koba, akeni gǎkɛ koɗoni á kema á na koba áɓɛ na phɛ́a nde aánjá phɛɛ kɔnyɛ́nya ndɔɔ.

²⁴ Cɔ, Kiísito ɗákángí ɔma á kanga ɓojeɗe nde ɓakpa ɓáphɛ̌ki na njaga aɓɔ. Nndɔ a tɔ iii á ɔma á kanga ɓojeɗe ndea ɗoni. Angí ndiu ɗoni na koba, ɔma nde yɛ, kɛ̌kɛnde a ye mame mosá á Mokonga ka phɔasu.

²⁵ Nga, ngbɛga á ɓatoɓeigi-phɛ́a ndea Ɓayúda aoga k'ɔ́ma á kanga ɓojeɗe phɛɛ mɔngɔ ímoci ka saga bui, áongia na magia á nyama. Cɔ, Kiísito kangí gǎkɛ na koba ka gea ábisɛ enda akɛ k'ɔ́phɛ́ɔ mɔngɔ ásii

²⁶ nga, atúoɓá n'aɓó, ámbé ɗátambigi mongɔ ásii kpanga á conjá á mokonda. Cɔ, kɛ̌kɛnde ka mbenɔ á sungiaga, Kiísito aɔnɛkani tɔ mɔngɔ ímoci ka gea áímɛ ɓojeɗe ka ɓî yɛ sasakɛ aku ɓea nyama á phɛ́a.

²⁷ Ɓî nkpa buakɛ a tɔ okuwa mongɔ ímoci, mbusa á kukuwa Mokonga áotena nyɔngɔ nɛkɛ,

²⁸ a tɔ ɓíndɔ Kiísito ɗábisi tɔ nyama akɛ mɔngɔ ímoci ka íma á ɓojeɗe á ɓakpa ɓásii. Asɛnɛkaeka goto mɔngɔ á ko iɓɛ. Sɛnɛka ndɔ, káɓɛku ye ka íma á ɓojeɗe, aɓande ndiu ka amisa á ɓunde ɓáomɓondeaga.