Ɓaɛbulanía 8 - Ɔngana á Kɛ̌kɛ

Yéso ande ngbɛga á ɓatoɓeigi-phɛ́a á ɗoni

¹ Cɔ, nyɔngɔ ángbó ka nyɔngɔ ɗanga-ɗanga nde ɓɛyɔngi aungee: Ɓena ngbɛga á ɓatoɓeigi-phɛ́a mmbé a ɓíndɔ ɓetóki ka yɔnga í. Yɛ aámbé aiki ye tɔ na koba ka njaga á mǔku á kankaanga á kɔkɔta á Mokonga Mɛna-ɓukpɛkpɛ.

² Aɔbɛɗanaga ekuma nɛkɛ suɓi á ɔma á kanga ɓojeɗe. Ɔma ndɔ ande Ɛma á ɗoni nnde Mɔkɔta aámbé acumi, nna ɓakpa.

³ Ngbɛga á ɓatoɓeigi-phɛ́a buakɛ, ɓámbisi ka phúia ɛkɔmi ka Mokonga na ka phúia phɔtɔ ɔphɛɔ. Cɔ, akeni phɔtɔ gea mmbé ɓ'asu áɓɛ na kema nde aphúiande.

⁴ Ɗátúoɓá Kiísito n'aka oɗo ámbé ɗákatú tanda ntoɓeigi-phɛ́a nga, ka ɓeana n'ɛɔphi ndea Mósa, ana ɓakpa nde ɓáophúiaga ɛkɔmi ka Mokonga.

⁵ Ɓundɔ ɓaobɛɗanaga na ɓáoɓea mphangiɔ na kaengekɔ á koɗoni ndea na koba. A tɔ ɓíndɔ Mokonga ɗánsosi Mósa gea ábɛɗanɛgɛ ka mbenɔ á phɛ̌ka á Ɛma. Ɗángoɗi ɓe: «Ɔ́bɛɗanagambɛ tɔ ɓíndɔ ɗékophi kaengekɔ í gǔ á mamba.»

⁶ Kɛ̌kɛnde gǎkɛ, ekuma ndea Yéso a gǔ índe á ɓatoɓeigi-phɛ́a ɓunɛngbo nga, yɛ ajúkanisi ɔngana nde anyɛ́nyi nndɔ á mosá nnde cina í a ka mɔkɔ ánjá phɛɛ kɔnyɛ́nya nnde á mosá.

Ɔngana á kala na nnde á kɛ̌kɛ

⁷ Eya, ɔngana á mosá ɗátú na kisɛki. Ka nyɔngɔ índɔ unge ambe áanganɛ n'índe á ko iɓɛ.

⁸ Mokonga aephekeigi ɓakpa nɛkɛ áogea ɓe: «Mɔkɔta ayɔngi ɓe: Ɔ́nani, esa nde aobika nɛɔnganande na Ɓaisilaɛ́li phɔtɔ na Ɓayúda n'ɔngana á kɛ̌kɛ.

⁹ Ɔngana ndɔ káɓɛku ɓíndɔ ɗéɔngani na ɓatataɓɔ esa nde ɗědungi ka njaga ka tokisa aɓɔ na Mísii. Mɔkɔta ayɔngi goto gea, ka nyɔngɔ nde ɗáɓákátaei ɔngana ndɔ aunge něɗeketi gǎkɛ.

¹⁰ Cɔ, ɔngana nde nɛɔnganande na Ɓaisilaɛ́li mbusa á esa ndɔ aungee: Nebisande ɛɔphi nɛmɔ suɓi á úbapha aɓɔ. Neɗunduande phɔtɔ ú ka měma aɓɔ. Neɓande Mɔkɔta nɛɓɔ, na ɓɔ ɓáɓande ɓakpa nɛmɔ.

¹¹ Nkpa sɔsɔɓɛ aɓɔ káɓɛku ye na siki á goisaga dakɛ, kaɓɛ muna-amakɛ gea te, ambe ómúbɛ Mɔkɔta nga, ɓakpa ɓɔbu ɓámúbande, kpanga ka ɓaniki na sungiaga ka ɓagbɛga.

¹² Neímande ɓojeɗe nɛɓɔ, na kékanisiɛeka ye ka kema nde ɗáɓági ájeɗe.»

¹³ Cɔ, ɓî Mokonga ayɔngi ka nyɔngɔ á ɔngana á kɛ̌kɛ, ande gea te nnde á mosá a ye tɔ á kala. Cɔ, kema a ye oɓá á kala, áɔgbɛga. Ande gea te, abíbí á kukuwa.