Ɓaɛbulanía 7 - Ɔngana á Kɛ̌kɛ

Mbino á Mɛlkisɛdɛ́ki ntoɓeigi-phɛ́a

¹ Mɛlkisɛdɛ́ki nde ɗátú moamɛ á ka Salɛ́mu. Ɗátú phɔtɔ ntoɓeigi-phɛ́a ndea Mokonga, Mɛna-ɓukpɛkpɛ bui. Yɛ aámbé ɗáge ondondanisa Abalaámu mbenɔ nde Abalaámu ɗáoja k'aphe émani n'ěkíndi ɓaamɛ. Adondani ye na yɛ, Mɛlkisɛdɛ́ki áobisa njaga gǔ á Abalaámu.

² Yɛ aámbé Abalaámu ɗámophi phɔtɔ phaeka moci á nkama á nkumba bui nde ɗábɛɗi. Kantíti á ina ndɔ Mɛlkisɛdɛ́ki ande phɔ́ «Moamɛ á koɗoni». Ɗátú phɔtɔ moamɛ á ka Salɛ́mu ande gea te «Moamɛ á ɓujɛjɛ.»

³ Abakɛ n'amakɛ ɓánáoúbikana, ɓatatakɛ phɔtɔ ɓánáoúbikana. Mbino á nkpangeɔ á enda akɛ na mbino á kukuwa akɛ nnaoúbikana. Ka nyɔngɔ nde akengeani na Muna-Mokonga, yɛ aiki ye tɔ ntoɓeigi-phɛ́a mɛyɔ.

⁴ Cɔ, ɔnani phɔ́! Mɛlkisɛdɛ́ki ana ɓokutú ka nyɔngɔ nde nanga Abalaámu mmbé, ɓatatasu ɗámophi phaeka moci á nkama á nkumba nde ɗádungi ka mosunge.

⁵ A ndiu ekombo á ɓana Láwi unge ɛɔphi ndea Mósa ěsosi ka ɓɔ bɛɗa phaeka moci á nkama á nkumba á Ɓaisilaɛ́li nga, ɓɔ ɓáunge ɓánde ɓatoɓeigi-phɛ́a. Cɔ, phaeka ndɔ, atókande ka njaga á ɓana-amaɓɔ, nanga ɓɔbu ɓáɓá phɔtɔ k'ékombo ndea Abalaámu.

⁶ Cɔ, Mɛlkisɛdɛ́ki ɗáká gǎkɛ k'ékombo ndea Láwi. Yɛ â ndiu ɔbɛɗa phaeka moci á nkama á nkumba nde Abalaámu ɗátú ně. Mbusa í, áobisa njaga gǔ á Abalaámu ímbe ande mɛna-mɔkɔ ndea Mokonga.

⁷ Eya! A tɔ kángá ngǎka. Ngbɛga tɔndɔ aámbé aobisa njaga gǔ á miki.

⁸ Cɔ, ɓana Láwi ɓunde ɓáɔbɛɗa phaeka moci á nkama ɓánde ɓakpa ɓunde ɓáokuwa. Mɛlkisɛdɛ́ki gǎkɛ aámbé abɛɗi phaeka ndɔɔ. Ɓuku á Mokonga ayɔngi gea, yɛ ande mɛyɔ.

⁹ Ɓî Abalaámu aphúi ye phaeka moci á nkama, ande gea te, Láwi a ye phúi phɔtɔ, nanga ɓî ɓ'anakɛ ɓáɔtɔa phaeka moci á nkama ndɔ ka njaga á ɓana-amaɓɔ.

¹⁰ Nga, Abalaámu ɗádondani na Mɛlkisɛdɛ́ki, Láwi n'aphɔ́tɔ ka sɔphɔ á Abalaámu.

¹¹ Cɔ, ɛɔphi ndea Mósa asosi gea, ka ɓato á k'ékombo ndea Láwi tɔ unge ɓánsɔmbɔande kaɓɔ k'ékuma á ntoɓeigi-phɛ́a. Atú gǎkɛ oɓá na ɓábɛɗanigi ekuma ndɔ kángá kisɛki, ámbé ntoɓeigi-phɛ́a ɓaangbo ɓea nkókó á Mɛlkisɛdɛ́ki mmbé nna k'ékombo ndea Alɔ́ni akiɗiani ka ɓo?

¹² Nga, ekombo á ɓatoɓeigi-phɛ́a aoangana ambe ɛɔphi áanganɛ phɔtɔ.

¹³ Ande gea te, nyɔngɔ nde ɓáyɔngi ka phɔa Mɔkɔta nɛsu nga, yɛ a k'ékuna nɛngbo nde ka ɓɔ moci kábɛɗanigimbɛ mɔnɔ tanda ekuma á ntoɓeigi-phɛ́a k'ɛ́tɛ-ɔ́phɛ́ɔ.

¹⁴ Eya, Mɔkɔta nɛsu aúbikani gea aɓɔkɔtɛani k'ékuna ndea Yúda, nnde Mósa ɗákayɔngi ka kema ka phɔa í mbenɔ nde ɗáɔyɔnga nyɔngɔ á ɓatoɓeigi-phɛ́a.

Yéso ande ntoɓeigi-phɛ́a ɓea nkókó á Mɛlkisɛdɛ́ki

¹⁵ Eya! A ye tɔ base gea ntoɓeigi-phɛ́a ɓaangbo mmbé a ɓea Mɛlkisɛdɛ́ki.

¹⁶ Ekuma á ntoɓeigi-phɛ́a ínɛkɛ cina í nnaoɓea nyɔngɔ á ekuna. A ndiu ka ɓukpɛkpɛ á enda á mɛyɔ.

¹⁷ Ɓindɔ Ɓuku á Mokonga ayɔngi gea: «Onde ntoɓeigi-phɛ́a mɛyɔ ɓea nkókó á Mɛlkisɛdɛ́ki.»

¹⁸ Cɔ, ɓɛɔni gea te, Mokonga ɗáɗeketi ɛɔphi á kala nga ú ɗákátú na ɓukpɛkpɛ, phɔtɔ na kantíti

¹⁹ nga, ɛɔphi ndea Mósa ɗákáɔtɔka tɔtɔkisa ka kema. Ɓɛɔni ndiu goto gea ɓe ye gǎkɛ na nseɓeɔ ánjá phɛɛ, ka nyɔngɔ á nseɓeɔ ndɔ unge ɓeombîmisia Mokonga.

²⁰ Mokonga ɗákági nndɔ kángá ɔphá. Ɓunɛngbo ɗáɓángí k'ékuma á ntoɓeigi-phɛ́a kángá ɔphá.

²¹ Cɔ, ka phɔa Yéso, Mokonga ɗáɔphí ndiu mbenɔ nde ɗángoɗi gea: «Mɔkɔta ɗáɔphí na kásikiɛku ye kau. Onde ntoɓeigi-phɛ́a mɛyɔ.»

²² Kaɓondɔ unge Yéso a ye tɔ nkpa nde akakamisi ɔngana ánjá phɛɛ kɔnyɛ́nya nnde á mosá.

²³ Gǔ índɔ, ɓatoɓeigi-phɛ́a ɓunɛngbo ɗáɓáɓiki ka nyɔngɔ nde ɗáɓáokuwaga. Ɗáɓákátɔki ye tútuisa á ekuma.

²⁴ Yéso a ndiu oenda mɛyɔ. Ekuma nɛkɛ á ntoɓeigi-phɛ́a nna na sungiaga.

²⁵ Ka nyɔngɔ índɔ unge aɔtɔka amisa á ɓakpa ka měma na ka sungiaga ɓunde ɓáombîmisia Mokonga k'aphe ndea akɛ. Nga, Yéso aoenda mɛyɔ ka ɗengemisaga á Mokonga ka phɔa ɓɔ.

²⁶ Eya! Yéso ande ngbɛga á ɓatoɓeigi-phɛ́a mmbé akeni ɗoni ka ɓesu. Ande mɛna-ɓonjánja phɛɛ, kángá kisɛki, kángá ɓɔjɔɔkiɔ. Ɗátingani phɛɛ na ɓato á ɓojeɗe, Mokonga ɗámophi ɓokutú phɛɛ kɔnyɛ́nya kema bui á na koba.

²⁷ Yéso atingani na ɓagbɛga á ɓatoɓeigi-phɛ́a ɓunde á mosá. Yɛ nna na siki á toɓoa phɛ́a esa bui ka nyɔngɔ á ɓojeɗe nɛkɛ, mbusa í, ka nyɔngɔ á ɓojeɗe á ɓakpa ɓɔbu. Mbenɔ nde ɗábisi nyama akɛ k'ɔ́phɛ́ɔ mɔngɔ ímoci, nndɔ asungíígi tɔ ɓó.

²⁸ Ɓakpa ɓunde ɛɔphi ěbisi ɓea ɓatoɓeigi-phɛ́a, ɓána kisɛki. Cɔ, moyo á Mokonga nnde ɗáyɔngi n'aɔɔpha mbusa ɛ́ɔphi aunge aphangi ndiu base gea Muna-Mokonga ande ntoɓeigi-phɛ́a mmbé akeni ɗoni á ɗoni k'ékuma ndɔ ka saga na saga.