Ɓaɛbulanía 6 - Ɔngana á Kɛ̌kɛ

¹ Cɔ, ɓî a ɓó, ɓéɗeketɛni goisaga mɔ̌ á nyɔngɔ nde ɗáɓekpangi goisaga í ka nyɔngɔ á Kiísito. Ɓétútuisɛni ye tɔ goisaga k'ététe á ɓakpa nde ɓámɔti. Ɓékécumɛku ye goto goisaga á mɔ̌ á nyɔngɔ ndee: Á kětia tambea ájeɗe na ɓeekea á Mokonga,

² ɓɔphɛi ka nyɔngɔ á oɓatisɔ, ka nyɔngɔ á bisia á njaga, ka nyɔngɔ á jujúka ka kukuwa, ɓakpa nde ɗáɓáku na nyɔngɔ á tena nyɔngɔ á ka sungiaga.

³ Nndɔ ungɔ ɓegeande aoɓá Mokonga n'asósosi.

⁴ Nga, ɓakpa nde ɓáɗeketi tambea nɛɓɔ á kɛ̌kɛ goto ka tambea nɛɓɔ á kala na ɓátú ye suɓi á owanga ndea Mokonga, na ɓáɗíí ye ka keɓu á na koba na tɔá á Měma á kanga ɓojeɗe,

⁵ ɓâ phɔtɔ oɗíía nyɔngɔ ánjá ndea Mokonga na ɔ́ka ɓukpɛkpɛ á matú nde abikande,

⁶ ɓakpa ndɔ ɓákátɔkɛku ye goto ɓákětiɛ tambea aɓɔ mɔngɔ á ko iɓɛ nga, ɓánkɔkɛigi goto Muna-Mokonga gǔ á moyangɔ na ophá á ɓakpa ɓunɛngbo aphe á bóma akɛ.

⁷ Cɔ, mbenɔ nde oɗo aondisa iɓo á mbua nde aɔɔkaga gǔ í na tɛisa á mbó ɗanga-ɗanga ka enga á ɓakpa nde ɓágubi, Mokonga abisi njaga akɛ gǔ á oɗo ndɔɔ.

⁸ A gǎkɛ oɓá oɗo ndɔ n'aɔtɛisa mbó ájeɗe n'índe á ngenge-ngenge, oɗo ndɔ nna na kantíti, Mokonga a bíbí á sɛmɛaga í. Sungiaga á í a tɔ toɓoa í.

⁹ Cɔ, ɓaya, nanga ɓɛ́yɔnga ɓó, ɓeengekisi ka měma asu gea, aphe á ɓoamia á ka měma nndɔ ɓo kau ande aphe ánjá.

¹⁰ Mokonga nna na měma akpɛ. Káɓoseɛku ekuma nɛnu na ekondi nɛnu ka phɔakɛ nga, ɗóɓobɛɗanigi na ɓî ɓo phɔ́tɔ ɔ̌bɛɗaneaga ɓaɓêki ɓunɛngbo.

¹¹ Cɔ, mɔphɛ asu ande gea te, nkpa buakɛ sɔsɔɓɛ anu átetemisɛ ekuma na ka sungiaga ka gea te, nseɓeɔ nɛnu atɔtɔkɛanɛ.

¹² Ɓî a ɓó, ɓókoɓɛmbɛ ɓakusi. Ɓeani ndiu nyɔngɔ á ɓakpa nde ɓátétemisi ɓeekea nga, ɓundɔ ɓáunge ɓátɔande ɓotukɔ á mɔkɔ nde Mokonga ɗáɔku.

Mokonga nnaoketia mɔkɔ nɛkɛ

¹³ Cɔ, mbenɔ nde Mokonga ɗábisi mɔkɔ ka Abalaámu, ɗáɔphí tɔ ka ina akɛ sasakɛ nga, Mokonga ɗákátú na nkpa angbóngbó kɔnyɛ́nya yɛ ka ɔphá k'ína akɛ.

¹⁴ Mokonga áɔyɔnga ɓe: «Eya, ka bisia njaga, nekobisiande njaga. K'ɛɓɔkɔti, neɓikisande ɛɓɔkɔti nɛkɔ.»

¹⁵ Ɓî Abalaámu ɗábisi měma akɛ ka mɔkɔ ndɔ kángá ɛla, mɔkɔ nde Mokonga ɗáɔku ka phɔakɛ áɔtɔtɔkɛana ka yɛ.

¹⁶ Mbenɔ nde ɓakpa ɓáɔɔpha, ɓáɔɔpha k'ína á nkpa nde aangbóngbó. Ɔphá aunge a gǎkɛ ojúsa nyɔngɔ bui nde ɓakpa ɓáopúa ně ka sungiaga.

¹⁷ Mokonga ɗáyami ɔphá gǔ á mɔkɔ ka úbisa ɓakpa nde ɓátɔande ɓotukɔ á mɔkɔ gea, Mokonga káketiɛeka tanda moangɔ nde abisi ka phɔa nkpa.

¹⁸ Cɔ, Mokonga aɔɔkɔa na ɔphá, ande gea te nyɔngɔ iɓɛ ndɔ a tɔ ɗoni, kátinganɛku. Nga, Mokonga kátɔkɛku n'asódemi. Ka nyɔngɔ índɔ unge ɓena ɓukpɛkpɛ á ka měma. Cɔ, ɓesu íɓunde ɓetí, ɓedungi ye tɔ nseɓeɔ nde a mosá asu.

¹⁹ Nseɓeɔ ndɔ ande nkigisiɔ á měma asu. Ú, ěsimɓî phɛɛ, áongia suɓi éndu ndea Mokonga, áɔtɔngana ngɔ́mbɛ nde aɗaki kǐo á ɔma á Mokonga.

²⁰ Wandɔ unge Yéso ɗángí mosá asu ka phɔa asu nga, a ye ngbɛga á ɓatoɓeigi-phɛ́a á kanga sungiaga ɓea nkókó índɔ á Mɛlkisɛdɛ́ki.