Ɓaɛbulanía 5 - Ɔngana á Kɛ̌kɛ

¹ Ngbɛga á ɓatoɓeigi-phɛ́a buakɛ Mokonga aámbé ɗánsɔmbu sɔsɔɓɛ á ɓakpa, áombisa ka bɛɗanaga ekuma nɛkɛ ka phɔa ɓɔ. Ande gea te, ntoɓeigi-phɛ́a ndɔ, aámbé aophúia ɛkɔmi ka Mokonga na toɓoa phɛ́a ɗanga-ɗanga ka nyɔngɔ á ɓojeɗe.

² Ɓî yɛ sasakɛ ana ɓɔɛlu á ka měma, aunge aɔtɔka n'ěkui ngomi ɓunde ɓáogea ɓojeɗe kángá á úba í na ka nyɔngɔ nde ɓáɓungigi.

³ Kaɓondɔ unge akeni ábɛɗanɛgɛ ekuma ndɔ ka phɔa ɓojeɗe á ɓakpa ɓunɛngbo phɔtɔ ka phɔa ínɛkɛ.

⁴ Nna na nkpa nde aɔtɔka n'abɛɗi ɓokutú ndɔ ka yɛ sasakɛ. Mokonga tɔndɔ aámbé aɔmɔphana nkpa, ɓíndɔ ɗámɔphani Alɔ́ni.

⁵ A phɔtɔ ɓó ka Kiísito. Nna yɛ sasakɛ aámbé ɗébisíí ɓokutú á ngbɛga á ɓatoɓeigi-phɛ́a. Yɛ, ɗátɔi ndiu ú ka mmbe ɗáyɔngi ka phɔakɛ gea: «Oɓɛ onde Miki-Mǒko ndeamɔ. Kesande eme nende Abakɔ.»

⁶ A phɔtɔ ɓíndɔ ɓáɗundu k'ɔ́ma nɛngbo gea: «Oɓɛ onde ntoɓeigi-phɛ́a ka saga na saga ɓea nkókó índɔ á Mɛlkisɛdɛ́ki.»

⁷ Mbenɔ nde Yéso ɗátú ka mokonda, ɗáonɗengemisaga Mokonga k'ɛ́mɛmi n'ɛsɔ akpɛ n'aogáma nga, Mokonga aámbé ɗáɔtɔka amisa akɛ ka kukuwa. Ka nyɔngɔ á édidisa akɛ unge Mokonga ɗáɔ́ki ɛmɛmi ndɔɔ.

⁸ Nanga ɓî ɗátú Muna-Mokonga, ɗágoigi édidisa ka tambaga bui.

⁹ Ka nyɔngɔ nde ɗákáúki ye ka kema, â ye tɔ oɓá cina á ɓoamia á mɛyɔ ka ɓakpa ɓɔbu ɓunde ɓáɔmɔ́ka yɛ.

¹⁰ Nga, Mokonga ɗánkumi gea ande ngbɛga á ɓatoɓeigi-phɛ́a ɓea nkókó índɔ á Mɛlkisɛdɛ́ki.

Tétémisani ɓeekea

¹¹ Cɔ, ɓena nyɔngɔ ásii á yɔnga í. A gǎkɛ akpɛ ka úbisa anu base nga, ɓo ɓáɗǒ ka ɗigimisa á kema.

¹² Ka nyɔngɔ nde ɓo ye nyɛ́nyisi mbenɔ ásii phɛɛ, atókeni ɓóɓɛ ɓagoisigi. Nanga áɓá ɓó, ɓo phɔtɔ na siki á goisaga anu nyɔngɔ abɔbɔbɔa á ɓɔphɛi ndea Mokonga. Ɓo phɔ́ goto tɔ na siki á unga, nna ndiu opha anu eea akpɛ

¹³ nga, nkpa nde aoúnga a phɔ́tɔ miki. Nna na úbapha ásii á nyɔngɔ á koɗoni.

¹⁴ Eea akpɛ a ndiu tɔ ka ɓakpa nde ɓamɔti nga, ɓáɛmbani ye na katanisa á kema ánjá na kema ájeɗe.