Ɓaɛbulanía 4 - Ɔngana á Kɛ̌kɛ

Muúmbiɔ nde Mokonga ɗáɔku

¹ Mokonga ɗásɔɔku ɓesu gea, asóphande aphe á ngia ka muúmbiɔ nɛkɛ. Cɔ, ɓɛ́ɛnjiɛni ɓonjánja kaɓɛmbɛ na ka ɓesu moci mmbé aúkande aphe á ngia kau

² nga, ɗéɓeɔ́ki tɔ nyɔngɔ ánjá ɓea ɓundɔ ɗáɓátú ka nkanda. Ɓɔ ɗáɓáɔ́ki ú, kěengɛ tanda ka kema moci, ka nyɔngɔ nde ɗáɓákáɓeekeani na ɓunde ɗáɓáɔ́ki nyɔngɔ ndɔɔ.

³ Ɓesu íɓunde ɓeɓeeki ɓáunge ɓeongia ka muúmbiɔ ndɔ ɓíndɔ Mokonga ɗáyɔngi te: «Kaɓondɔ, ɗɛɔphí ka ɓɛí ndeamɔ gea: ‹Ɓákángiɛku tanda ka nji nde ɗéɛ̌ɓɔngisíí ka úmbia kau!›» Nndɔ nna gea te, muúmbiɔ nna yé ɓei. Nga, Mokonga ɗágɔɓi tɔ ekuma nɛkɛ ka mbenɔ á conjá á mokonda.

⁴ Cɔ, Ɓuku á Mokonga ayɔngi ɔma ímoci ka nyɔngɔ á esa á ko ngianjaga iɓɛ ɓe: «Mpɔ Mokonga áoúmbia k'ésa á ko ngianjaga iɓɛ, áosaga ekuma ndeakɛ bui.»

⁵ Ayɔngi goto tɔ k'ɔ́ma ndɔ ɓe: «Ɓɛ́ɔnɛni phɔ́ ámbé ɓángiande ka muúmbiɔ ndeamɔ!»

⁶ Ɓî ɓakpa nde ɗáɓáɔ́ki nyɔngɔ ánjá k'ama mosá-mosá ɗáɓákángi ka nyɔngɔ á kanga ɓeekea nɛɓɔ. Cɔ, ka ɓondɔ, ɓakpa ɓunɛngbo ɓá ye tɔ n'aphe á ngia ka muúmbiɔ ndɔɔ.

⁷ Kaɓondɔ unge Mokonga abisi goto esa moci. Esa ka yɛ ɓáɔmɔphana «Kesande.» Ɓíndɔ Mokonga ɗán'yɔngisi Daúdi mbusa á ɓasaga ɓásii nyɔngɔ nde ɗáɗundu gea: «Kesande kaɓɛ na ɓɔɔ́ki ɛsɔ á Mokonga, ɓókógbagisɛmbɛ měma anu.»

⁸ Cɔ, kaɓɛ Yɔsúa na ɗáengisi ɓakpa ndɔ ka muúmbiɔ, ámbé mbusa akɛ, Mokonga ɗákáyɔngi ye esa nɛngbo.

⁹ Ande gea te, muúmbiɔ ɓíndɔ á saɓáto ajigi tɔ ka ɓakpa ndea Mokonga.

¹⁰ Nga, nkpa a ye ongia ka muúmbiɔ ndeakɛ, aúmbi k'ékuma ndeakɛ ɓíndɔ Mokonga ɗáúmbi phɔtɔ k'ékuma índeakɛ.

¹¹ Ka nyɔngɔ índɔ unge, ambe ɓégeɛ ɓukpɛkpɛ asu bui ka ngia ka muúmbiɔ ndɔɔ. Ka ɓesu moci kagúɛmbɛ ɓea ɓunde á mosá nga, ɗáɓátú na měma akpɛ.

¹² Úbani gea, nyɔngɔ á Mokonga ana ɓukpɛkpɛ, a phɔtɔ ɔtɔka tɔtɔkisa kema ásii. Aophea phɛɛ ɓea ngɔa nde aophea nci gbɔgbɔ. Aongia na tɔngana suɓi á měma asu phɛɛ, áoga ojúa ka ɔngɔkanaga na mɛngɛ, áobisa ú base. Aotena nyɔngɔ á mɔphɛ na kanisia ndea ka měma á nkpa.

¹³ Nna na ka kema nde Mokonga ɗáconji nnde ɛ̌sɔmɛani k'íso akɛ. Kema bubui a tɔ ndúmbú mosá akɛ. Aoúba ú. Yɛ goto tɔ aámbé ɓɛtɔmiande nyɔngɔ ndeasu bubui mosá akɛ.

Yéso ande ngbɛga á ɓatoɓeigi-phɛ́a ka phɔasu

¹⁴ Cɔ, ɓî ɓena ngbɛga á ɓatoɓeigi-phɛ́a phɛɛ mmbé ɗátɔngani na koba n'ande Yéso Muna-Mokonga, ɓététemisɛni ɓeekea nde ɓɛɔtɔmiaga mosá á ɓakpa

¹⁵ nga, ngbɛga á ɓatoɓeigi-phɛ́a mmbé ɓena yɛ, yɛ aɔtɔka n'asókui ngomi ka tambaga na ɓɔɛlu nɛsu á ka měma. Cɔ, yɛ ɗángí ka tombaga ka kema bui ɓea ɓesu, kángá yɛ gea ndiu ɓojeɗe.

¹⁶ Ɓî a ɓó, ɓébikɛni mosá á kankaanga á ɓonjánja á Mokonga kángá ngǎka nga, kó unge ɓɛtɔande ngomi na ɓonjánja-ékondi, nnde asóengande ka mbenɔ nde ɓena siki í.