Ɓaɛbulanía 3 - Ɔngana á Kɛ̌kɛ

Kɔkɔta ndea Yéso anyɛ́nyi nnde á Mósa

¹ Ɓadasu ɓato á Mokonga, ɓî a ɓó, ɓe tɔ na ɓenu ka mɔphani nde Mokonga asɔɔphani. Cɔ, ntúmiani Yéso n'íso nga, yɛ aámbé Mokonga anteki, a phɔtɔ ngbɛga á ɓatoɓeigi-phɛ́a mosá á Mokonga ka ɓeekea nɛsu nde ɓɛɔtɔmiaga ú.

² Yéso ɗábɛɗanigi na koɗoni ekuma nde Mokonga ɗámbisi kau, phɔtɔ ɓíndɔ Mósa ɗábɛɗanigi sɔsɔɓɛ á ɓato á k'éndu ndea Mokonga.

³ Mphɛki-endu ana ɓokutú kɔnyɛ́nya ɓokutú éndu. Yéso akeni gǎkɛ na ɓoombia phɛɛ kɔnyɛ́nya nnde á Mósa.

⁴ Eya, endu bui, nkpa tɔndɔ aámbé aɔphɛka. Mokonga gǎkɛ aámbé aphɛ̌ki kema bui.

⁵ Cɔ, Mósa ɗátú na koɗoni ɓea mbɛɗanigi k'éndu ndea Mokonga na ka tɔ̌miaga á kema nde Mokonga ɗákeni áyɔngɛ.

⁶ Kiísito aámbé a ndiu nto á ɗoni ɓea ánge k'éndu ndea Abakɛ. Ande gea te, endu ndɔ ande ɓesu, kaɓɛ na ɓena inyamɛ na ɓeoamba nseɓeɔ nde ɓeǒbeba ně.

Muúmbiɔ ndea ɓaɓêki ka Mokonga

⁷ Ka nyɔngɔ nde a tɔ ɓíndɔ Měma á kanga ɓojeɗe ayɔngi: «Kesande kaɓɛ na ɓɔɔ́ki ɛsɔ á Mokonga,

⁸ ɓókógbagisɛmbɛ měma anu ɓea mbenɔ ndɔ ɗóɓomɓɛisi Mokonga k'ésa á tombaga ka nkanda.»

⁹ Nga, kó Mokonga ayɔngi: «Ɓatatanu ɗáɓámotombigi ka úba á kanisia á suɓi ani, nanga ɓî ɗáɓáɔni ekuma á ka njaga ani

¹⁰ ka ɓasaga nkama gena (40). Ka nyɔngɔ índɔ unge ɗɛ́ɓɛi ka phɔa ɓakpa ndɔ néogea: ‹Kanisia á ka měma aɓɔ aǒɓúngisaga esa bui. Ɗáɓáyé gǎkɛ ɓeá aphe ndeamɔ.›

¹¹ Kaɓondɔ, ɗɛɔphí ka ɓɛí ndeamɔ gea: ‹Ɓákángiɛku tanda ka nji nde ɗéɛ̌ɓɔngisíí ka úmbia kau.›»

¹² Ɓaya, ɛngɛphani! Ka ɓenu moci kaɓɛmbɛ na měma ájeɗe á kanga ɓeekea, nnde aonkatanisa na Mokonga ímbe aoenda.

¹³ Gbagisanagani ndiu ka měma esa bui, ka mbenɔ nde «Kesande» a phɔ́tɔ ɓei ɓea ɓî Ɓuku á Mokonga ayɔngi ka gea, ka ɓenu moci ɓojeɗe kanɗakɛmbɛ měma na demaga akɛ.

¹⁴ Nga, ɓe tɔ oɓá kimoci na Kiísito ámbé ɓeambi akpɛ ɓeekea nde ɗéɓekpangi ně na ka ɓî ɓegande ojúa ka sungiaga.

¹⁵ Nga, ɓáɗundu suɓi á ɓuku ɓe: «Kesande, kaɓɛ na ɓɔɔ́ki ɛsɔ á Mokonga ɓókogbagisɛmbɛ měma anu ɓea mbenɔ ndɔ ɗóɓomɓɛisi Mokonga.»

¹⁶ Cɔ, ɓaani ɓunde ɗáɓáɔ́ki ɛsɔ á Mokonga mbusa í ɓáɔmɓɛisa? A tɔ ɓunde Mósa ɗětókisi ɓɔbu ka nji á Mísii.

¹⁷ Ɓaani ɓunde Mokonga ɗéɛɓɛ̌i ka ɓasaga nkama gena (40)? Ɗéɛɓɛ̌i tɔ ɓakpa nde ɗáɓági ɓojeɗe, mǒnda aɓɔ áogua ka nkanda.

¹⁸ Ɓaani ɓunde Mokonga ɗáɔphí ka phɔaɓɔ gea ɓákángiɛku ka nji nde Mokonga ɗéɛ̌ɓɔngisíí ka úmbia kau? Nna phɔ́ tɔ ɓaɗaki kecuɛ ndɔ?

¹⁹ Ɓɛɔni gea ɗáɓákatɔki ngia ka nyɔngɔ nde ɗáɓákáɓeeki.