Ɓaɛbulanía 2 - Ɔngana á Kɛ̌kɛ

Ɓɛ́kɛɓɛnjiɛgɛmbɛ ɓoamia á ka měma nnde Muna-Mokonga abiki ně

¹ Ɓî a ɓó, akeni ɓétetemisɛ phɛɛ nyɔngɔ nde ɓɛɔ́ki ka gea, ɓékeɓúngɛgɛmbɛ.

² Ande ɗoni gea, nyɔngɔ nde ɓamalaéka ɗáɓátɔ̌migi atɔtɔkɛani, n'angɔni gǎkɛ nkpa buakɛ mmbé ɗátingíígi ú na kángá amba í, ɛgɔni ndɔ ankeni ně.

³ Cɔ, ɓeúkande tena á nyɔngɔ ndeasu akpɛ ɓo, kaɓɛ na ɓɛɓɛnjigi nyɔngɔ ángbó á ɓoamia ɓínde? Nga, nyɔngɔ ndɔ Mɔkɔta aámbé ɗákpangi tɔ̌mia í, mpɔ ɓunde ɗáɓáɔ́ki ɓáoengekisa ka ɓesu.

⁴ Mokonga â gǎkɛ oɗigimisa nyɔngɔ nde ɗáɓátɔ̌mi, ka tɔtɔkisa á mphangiɔ na ketangaɔ ɗanga-ɗanga phɔtɔ ɓî agabi Měma á kanga ɓojeɗe ɓíndɔ ɗákondi.

Yéso ɗábɛɗi nyama á kokpa ka nyɔngɔ asu

⁵ Nga nna ɓamalaéka ɓáunge Mokonga ɗéɓophi kɔkɔta á mokonda ndɔ aobika nnde ɓɛɔyɔnga ka phɔa í.

⁶ Nkpa moci aengekisi ndiu suɓi á Ɓuku á Mokonga ɓe: «Ho! Mokonga! Ɓakpa ɓánde kema sina? Ɓana-ɓakpa ɓánde ɓaani ka mɔphɛ akɔ túma ka ɓɔ?

⁷ Ka mbenɔ ábɔa, ɗóndidisi kusi á ɓamalaéka, ômopha ɓoombia na ɓokutú.

⁸ Ôbisa kema bui kusi á ecinji akɛ.» Cɔ, ɓî Mokonga ɗábisi kema bui kusi akɛ, ande gea te, nna yé na ka kema nde yɛ kábisi kusi akɛ. Eya, ka kɛ̌kɛnde, ɓékeɔnimbɛ phɔ́ ka gea Mokonga abisi kema bui kusi á kɔkɔta á ɓakpa.

⁹ Cɔ, ɓɛɔni ndiu gea, mmbé ɗáɓándidisi ka mbenɔ ábɔa kusi á ɓamalaéka ande Yéso. Ka nyɔngɔ á tambaga na kukuwa akɛ, Mokonga amophi kɛ̌kɛnde ɓoombia na ɓokutú. Kaɓondɔ unge ka nyɔngɔ á ɓonjánja-ékondi ndea Mokonga, Yéso ɗáku ka phɔa ɓakpa ɓɔbu.

¹⁰ Mokonga ɗáconji kema bui ka phɔakɛ na k'aphe nɛkɛ. Ɗági ɓó ka ɓǒtea á ɓaniki ɓásii ka ɓoombia nɛkɛ. Ka tɔtɔkisa nndɔ, ɗákeni ámɓɔngisɛgɛ Yéso ánjá phɛɛ k'aphe á tambaga akɛ ka gea te, yɛ aámbé ábómɛ aphe á ɓoamia á ka měma.

¹¹ Nga, Yéso mmbé aosokosea ɓojeɗe á ka měma á ɓakpa na ɓunde Yéso ěsokosei ɓojeɗe, ɓɔbu ɓá tɔ na nyama á kokpa. Ka nyɔngɔ índɔ unge Yéso nna okuwa na soni á ɔphana aɓɔ ɓana-ayi.

¹² Ka nyɔngɔ índɔ unge ɗángoɗi Mokonga: «Nɛtɔmiande ina akɔ ka ɓana-ayi, nekobebande ka nkíndí aɓɔ.»

¹³ Ayɔngi goto: «Nebisande měma ani ka Mokonga.» Ayɔngi goto: «Eme aámbé! Ɔ́mɔɔnani na ɓaniki nde Mokonga ɗámopi.»

¹⁴ Cɔ, ɓî ɓaniki ndɔ ɓɔbu ɓásambí magia na kesuku, yɛ Yéso â phɔtɔ okengeana na ɓɔ, ka gea te, ka nyɔngɔ á kukuwa akɛ aunge agɔɓi ɓukpɛkpɛ á Nketi mmbé ɗá na kɔkɔta gǔ á kukuwa.

¹⁵ Â phɔtɔ ǒphúia ka kɔkɔɓɛ ɓakpa nde ɗáɓá na kɔɓɔɓɔkɔ á kukuwa ka enda aɓɔ bui.

¹⁶ Nga, kábiki tanda ka enga á ɓamalaéka, abiki ndiu ka enga ɛɓɔkɔti ndea Abalaámu.

¹⁷ Ka nyɔngɔ índɔ ɗákeni kengeana na ɓana-amakɛ ka kema bubui, ka gea te, áɓɛ ngbɛga á ɓatoɓeigi-phɛ́a mosá á Mokonga ka íma ɓojeɗe ndea ɓakpa. Ntoɓeigi-phɛ́a ndɔ ande nto á ngomi n'akeni mamea asu mosá á Mokonga.

¹⁸ Ka nyɔngɔ índɔ, ɓî yɛ sasakɛ ɗátambigi na ngia ka tombaga, aunge ana ɓukpɛkpɛ á enga ɓunde ɓá suɓi á tombaga.