Ɓaɛbulanía 13 - Ɔngana á Kɛ̌kɛ

Komunamema, cina á tambea ánjá

¹ Ikani k'ékondi á komunamema ngǔngu anu.

² Ɓókoɓoseɛmbɛ sesea á ɓakɛni nga, ka gea ɓó, ɓakpa ɓuangbo ɗáɓěsesi ɓamalaéka kángá á úba.

³ Ókanisiani ɓato á mekakɔ. Ókuiani ngomi ɓíndɔ ɗóɓotú phɔtɔ oɓá kimoci na ɓɔ ka mekakɔ. Ókuiani phɔtɔ ngomi, ɓunde ɓáǒtambisaga, ɓíndɔ ɗóɓotú phɔtɔ otambaga kimoci na ɓɔ.

⁴ Ambe ɓakpa ɓɔbu ɓáɗokomisɛ eyamani. Ɓɔ́kɔjɔɔkisɛmbɛ eka nga, Mokonga atenande akpɛ nyɔngɔ á komusɔngɔ na nyɔngɔ á iɛɓɛ.

⁵ Ɓókobisɛmbɛ měma anu phɛɛ ka nyɔngɔ á imɔna. Ɓeekeani ndiu enda na nkumba nde ɓoně nga, Mokonga ɗági te: «Kékoɗeketɛeka, kékosagɛeka.»

⁶ Kaɓondɔ unge ɓɛɔtɔka na ɓɛyɔngi na nseɓeɔ gea: «Mɔkɔta aámbé ande néngi nɛmɔ Kéɓángɛku ka kema. Cɔ, ɓakpa ɓámogeande na kema sina?»

⁷ Ókanisiani ɓakɔta nɛnu á k'ama mosá-mosá ɓunde ɗáɓánoúbisi nyɔngɔ ndea Mokonga. Ianagani ka phɔa á kema nde ɗáɓátɔtɔkisi ka enda aɓɔ. Mɓeekeani Mokonga ɓea ɓɔ.

⁸ Yéso Kiísito nnaǒketia, kaɓɛ n'ande kala, kesande na mɛyɔ.

⁹ Ɓɔphɛi ɗanga-ɗanga nnde kátóki ka ɓesu kanóɓǒteɛmbɛ. Akeni gea ɓonjánja-ékondi ndea Mokonga aunge ágbagisɛgɛ měma asu, kaɓɛ ndiu nyɔngɔ á kema á koea. Ɓakpa nde ɓáoamba nyɔngɔ ndɔ, ɓáká na kema nde ɓáɔtɔa kau.

¹⁰ Cɔ, ɓena ɛtɛ-ɔ́phɛ́ɔ nɛsu na ɓatoɓeigi-phɛ́a nde ɓá gǎkɛ ɔbɛɗanaga suɓi á ɛma, ɓákáesosi ea ka phɛ́a ndɔ.

¹¹ Ka phɔa á ɓanyama ɔ́phɛ́ɔ, ngbɛga á ɓatoɓeigi-phɛ́a aobika na magia aɓɔ suɓi á ɔma á kanga ɓojeɗe phɛɛ ka nyɔngɔ á tokisa á ɓojeɗe. Kǐnda á nyama ndɔ ɓâ gǎkɛ otoɓoa ú ka ngba-nji.

¹² Ka nyɔngɔ índɔ unge Yéso ɗáku phɔtɔ ka ngba á ntanga-nji, ka gea te, ásokoseɛ měma á ɓakpa na magia akɛ sasakɛ.

¹³ Cɔ, ɓégɛ dondaneni na yɛ ka ngba-nji na ɓeekea gea ɓásɔjɔɔkisɛ ɓea yɛ

¹⁴ nga, ka mokonda nde ɓéké na nji nde aoiphia, ɓe ndiu okáɓa nji ndɔ aobika.

¹⁵ Cɔ, k'aphe ndea Yéso, ɓémophɛni Mokonga ɔphɛ́ɔ á ɗokomisa akɛ ka mbenɔ bui, ande gea te nnde aotóka k'aphenɔkɔ á ɓunde ɓáobeba ina akɛ.

¹⁶ Ɓókoɓoseɛmbɛ phɔtɔ geana á ɓonjánja na engana sɔsɔɓɛ anu, ka nyɔngɔ nde ɔphɛ́ɔ ɓíndɔ unge áɔmɓɔngɛa Mokonga.

¹⁷ Óɓángani ɓakɔta nɛnu na tɔtɔkisa á nyɔngɔ nde ɓáonóngoɗea. Ka nyɔngɔ nde ɓáɔbɛɗanaga ásii ka phɔa měma anu nga, ɓaoúba gea te, Mokonga aeɓúsiande ka nyɔngɔ í. Kaɓondɔ unge, ambe ɓábɛɗanɛgɛ na maseye kángá á bɛɗanaga na ntaɓo. Ɓáɔbɛɗanaga na ntaɓo, nndɔ kánóengɛku ka kema.

¹⁸ Mɛmani ka phɔa asu. Ɓeoúba ɗoni gea ɓékégi kema ájeɗe ka sɛka asu nga, ɓekondi ɓétambɛ ánjá k'aphe bui.

¹⁹ Nenósosi tɔ ɓenu ɓó nga, nekondi Mokonga ákoɗɛ kani aphe nékamisɛgɛ goto gǎ mɔtɛ-anu.

Ɛmɛmi

²⁰ Cɔ, Mokonga mɛna ɓujɛjɛ, ɗánjujúkisi Mɔkɔta nɛsu Yéso Kiísito sɔsɔɓɛ á ɓasí. Yéso aámbé ande nambi angbónbgó á ɓamɔgɔgɔ. Magia akɛ asɔ́tɔisi ɔngana á mɛyɔ.

²¹ Ambe Mokonga ánóphɛ ɓukpɛkpɛ á tɔtɔkisa kema bui nnde aánjá ka gea ɓóbɛɗanɛgɛ nnde akondi. Átɔtɔkisɛ phɔtɔ suɓi asu kema nde amɓɔngɛi k'aphe ndea Yéso Kiísito mmbé ana ɓoombia ka saga na saga. Áɓɛ ɓó!

Nyɔngɔ á ka sungiaga na nsesɔ

²² Ɓaya, nenóɗengemisigi ɔ́kani nyɔngɔ nde á gbagisaga měma anu nga, kénóɗundui nyɔngɔ endǎ.

²³ Úbani gea ɓankoɗi muna-amasu Timɔtɛ́ɔ. Aoɓá na káiphi ka kiɗia, nebikande na yɛ ka ɔna anu.

²⁴ Ósambeani ɓakɔta nɛnu na ɓaɓêki ɓɔbu. Ɓadasu íɓunde ɓá na Italía ɓanosambei.

²⁵ Ambe ɓonjánja-ékondi ndea Mokonga áɓɛ na ɓenu ɓɔbu.