Ɓaɛbulanía 12 - Ɔngana á Kɛ̌kɛ

Mokonga ande Abasu

¹ Cɔ, ɓesu phɔtɔ, usɛsɛ á ɓaɗigimisi ndɔ asotimbi ka ɛnjia asu ka njoko á mbangɔ. Kaɓondɔ ɓémakɛni ɗanga nnde aosóɗokomisa na ɓojeɗe nde ɓékéoiphia na tá kau. Ɓéɓɛni na moíngí ka mbagɔ kau.

² Ɓéntúmiɛni tɔ Yéso n'íso. Yɛ aámbé ande mbomi-aphe na ntɔtɔkisi á ɓeekea nɛsu. Cɔ, ka nyɔngɔ á maseye nde Mokonga ɗámbisíí, aunge ɗáɓeeki kukuwa ka moyangɔ kángá á bisa mɔphɛ akɛ ka soni. Kɛ̌kɛnde, aiki ka njaga á mǔku á kankaanga á kɔkɔta ndea Mokonga.

³ Eya, nkanisiani Yéso. Nanga ɓî ɓato á ɓojeɗe ɗáɓánkangei phɛɛ, ɗáphiphíí. Geani tɔ ɓó ka gea te, měma anu kaɛlɛmbɛ na ɗeketa á nseɓeɔ.

⁴ Nga, emani nde ɓojeɗe aonómanisa, ka ɓenu moci káphiphíímbɛ ú, na ka ɓî ageokuwa kau.

⁵ Ande gea te, ɓoɓosei ɓɔphɛi nde Mokonga ɗánɔphɛí ɓea ɓ'anakɛ? «Miki nɛmɔ, kɔɓɛnjiɛgɛmbɛ phekeaga ndea Mɔkɔta, kophúiɛmbɛ nseɓeɔ ka yɛ mbenɔ nde aokophekeaga

⁶ nga, Mɔkɔta aɔnsɛ́ka mmbé ankondi, aomɓinda miki buakɛ mmbé amɓeeki.»

⁷ Cɔ, phiphiani tambaga nde Mokonga aonotambisaga ně. Aonogea ɓó nga, ɓonde ɓ'anakɛ. Cɔ, miki sina mmbé abakɛ kánsɛ́kimbɛ mɔnɔ?

⁸ Eya, kaɓɛ Mokonga na káɔnɔ́sɛ́ka ɓea aba-miki buakɛ mmbé aonsɛ́ka anakɛ, ande gea ɓókó ɓaniki nde Mokonga ɛ̌ɓɔkɔti, ɓo ndiu ɓaniki áǒbika ně.

⁹ Goto ɓena ɓabasu íɓunde ɓásɔɓɔkɔti, ɓunde ɓáosogoisaga, ɓɛ́ɔɓɔ́ka. Cɔ, akeni ɓɛmɔ́kɛ phɛɛ Abasu á ka měma ka gea te, ɓéɓɛ na enda á mɛyɔ.

¹⁰ Ɓ'abasu ɓáɔsɔ́sɛ́ka ka ɓ'esa ɓábɔa ɓíndɔ ɛ̌ɓɔngɛi. Kisɛki ndea Mokonga a ndiu gǎkɛ ka ɓokambia nɛsu ka gea te, ɓéɓɛ ɓato á ɓonjánja ɓea yɛ.

¹¹ Mbenɔ nde ɓáɔsɔ́sɛ́ka áoɓá ka ɓesu cina á ɓɛí, kaɓɛ cina á maseye. Mbusa í gǎkɛ, ɓundɔ ɓáegoisigi k'índɔ ɓáoɓá na ɓujɛjɛ na koɗoni ka enda aɓɔ.

Suiani enda nde amɓɔngɛi Mokonga

¹² Kaɓondɔ unge, kákámisani njaga anu nnde aɛli na nanoani muanku anu nnde aɔsɔkasɔka.

¹³ Bisani ecinji anu k'aphe n'ěcumi dɛ! Ka gea te, ɓato á kiɗɔti ɓákaguɛmbɛ, ecinji aɓɔ áamɛ ndiu.

¹⁴ Káɓáni enda ka ɓujɛjɛ na ɓakpa ɓɔbu. Ɓókaɓɛ phɔtɔ sokosea á ɓojeɗe á ka měma anu. Kángá á ɓó, nna na nkpa nde amɔnande Mɔkɔta.

¹⁵ Ɛ́ngɛphani gea, ka ɓenu kaeúkisɛmbɛ ɓonjánja-ékondi ndea Mokonga. Ka ɓenu kaɓɛmbɛ phɔtɔ ɓea mǐgi ájiá nde áɔtɛa, áoyombokisa na ndandisa á ɓojia ndɔ ka ɓakpa ɓásii.

¹⁶ Ka ɓenu kaɓɛmbɛ nto á iɛɓɛ na ɓɛnjiaga á kema á ɓonjánja ndea Mokonga ɓea Ɛsáu, mmbé ɗásombisi ɓokutú á ɓɔkɔtɛana akɛ mosá ka nyɔngɔ á eea.

¹⁷ Cɔ, ɓooúba gea te, mbusa í, ɗákondi tɔá á ɓotukɔ ka abakɛ bisia akɛ njaga, abakɛ áoyá. Ɗákátú ye n'aphe á anganisa á moangɔ ndɔ nanga ɓî ɗáokáɓa ú n'aogáma.

¹⁸ Ɓenu ɓókóbîmisi kema nde ɓɔɔtɔka dunga í na njaga ɓíndɔ mbenɔ nde Ɓaisilaɛ́li ɗáɓákiɗi ka mamba á Sinái. Mamba ndɔ ɗáǒtoɓoaga na nsa, kaiphiɔ ángbó áogbukumia, maphopho áouma gǔ í phɛɛ,

¹⁹ Ɓaisilaɛ́li ɗáɓáɔ́ki nduu á mbengu n'eongo á yɔnga. Ɓáonɗengemisaga gea, Mokonga kěngoɗeɛ ye ka nyɔngɔ ɓíndɔ.

²⁰ Mokonga ɗéngoɗi phɔtɔ Ɓaisilaɛ́li te: «Nkpa buakɛ nanga áɓá nyama mmbé aɗɛtɛande mamba ndee, ɓámɓɛtande n'ɛtɛ áokuwa.» Mbenɔ nde ɗáɓáɔ́ki ɓo, nna na nkpa nde ɗáphiphíí ye.

²¹ Eya, ɓî ɗáɓáɔni kema á ɓangisa ndɔ, Mósa áɔyɔnga te: «Hoo! Neoɓánga phɛɛ, nyama ani aɔɛkana.»

²² Cɔ, ɓenu, ɓobîmisi ndiu mamba nde ɓáɔɔphana Sayúni, nji ndea Mokonga mmbé aoenda. Ina á nji ndɔ ande Yɛusalɛ́ma nnde á na koba. Ɓamalaéka ɓásii phɛɛ ɓáogua jaí kó.

²³ Ɓobîmisi phɔtɔ ɔma nde ɓ'ánge ndea Mokonga ɓádondanigi ka maseye, ɓunde ina aɓɔ ɓáɗundu na koba. Ɓombîmisi Mokonga mmbé aotenaga nyɔngɔ á ɓakpa ɓɔbu. Ɓobîmisi phɔtɔ měma á ɓato á ɗoni ɓunde ɗáɓásí, ɓáojujuka, ɓáojúa ka sungiaga á aphe nɛɓɔ mosá á Mokonga.

²⁴ Ɓombîmisi Yéso, mmbé ande mɔɔnganisi á ɔngana á kɛ̌kɛ. Yɛ aámbé asokosei měma asu na magia akɛ nga, ɗǔkana á magia ndɔ aosóphangia kema ánjá kɔnyɛ́nya magia á Abɛ́li.

²⁵ Ɛ́ngɛphani ka gea, ɓókoyɛmbɛ ɔ́ka á nyɔngɔ á nkpa nde aɔyɔnga na ɓenu nga, ɓakpa nde ɗáɓán'yé Mósa mbenɔ nde ɗáɔ̌phɛa ka mokonda, ɗáɓákátɔki tea á esúia ndea Mokonga. Ɓesu phɔtɔ ɓɛ́kɛ́ɔtɔka na ɓetí, aoɓá na ɓen'yé Mokonga mbenɔ nde aɔsɔ́phɛa n'ana koba.

²⁶ Ka mbenɔ á kala, ɗáɗengisi mokonda n'ɛsɔ akɛ akpɛ. Cɔ, kɛ̌kɛnde gǎkɛ, aɔku gea te: «Nna tɔndɔ mokonda unge neɗengisande goto. Neɗengisande phɔtɔ koba.»

²⁷ Ɓî agi: «Neɗengisande goto», ande gea te, Mokonga aɗengisande kema nde ɗáconji, kema ndɔ káɓɛku ye. Kema nde nnaɔtɔka n'aɗengi aunge ajigande.

²⁸ Cɔ, ɓénsikisiɛ Mokonga ɓosegi, ka nyɔngɔ nde, asóphi koɓoamɛ akpɛ, nnde nnaɔtɔka n'aɗengi. Kaɓondɔ, ɓémbɛɗaneɛgɛ ɓíndɔ amɓɔngɛi, ɓɛmɔ́kɛ, ɓémɓangɛ.

²⁹ Eya, Mokonga nɛsu ande nsa nde aɔɛkɛkisaga.