Ɓaɛbulanía 11 - Ɔngana á Kɛ̌kɛ

Ɓeekea á Mokonga

¹ Ɓeekea á Mokonga ande ɗigimisa kema nde ɓe ye tɔ na ɓeseɓei. Ande phɔtɔ úba á ɗoni gea, kema nde ɓékéɔɔna atɔtɔkɛanande.

² Ka mbenɔ á mosá, Mokonga ɗáeɓeeki ɓato á kala ka nyɔngɔ á ɓeekea nɛɓɔ.

³ Ka nyɔngɔ á ɓeekea aunge ɓeúbi gea te, Mokonga ɗáconji mokonda k'ɛ́sɔ akɛ nga, kema nde ɓɛɔɔna ɗátɔtɔkɛani k'índe nna ɔɔnɛkana.

⁴ Ka nyɔngɔ á ɓeekea, Abɛ́li ɗáphúi phɛ́a ánjá phɛɛ ka Mokonga kɔnyɛ́nya nnde á Kaína. Ka nyɔngɔ á ɓeekea ndɔ unge Mokonga ayɔngi gea Abɛ́li ande nto á ɗoni nga, Mokonga yɛ sasakɛ ɗáɓeeki ɛkɔmi ka Mokonga nɛkɛ. Nanga ɓî Abɛ́li aku ye, ɓeekea nɛkɛ a phɔ́tɔ n'aosóphɛa.

⁵ Ka nyɔngɔ á ɓeekea ndea Ɛnɔ́ka, Mokonga ɗántóisi na koba na káku. Ɗákáɔnɛkani ye nga, Mokonga aámbé ɗántóisi. Ɓuku á Mokonga ayɔngi gea, mosá á gǎ akɛ na yɛ, Ɛnɔ́ka ɗáogea kema nde ɗáɔmɓɔngɛa Mokonga.

⁶ Cɔ, kángá á ɓeekea nna na nkpa nde aɔtɔka n'ěkondisigi na Mokonga. Nkpa nde áombîmisia akeni áɓeekeɛ gea te, Mokonga a ɓei. A phɔtɔ ǒphenda ɓundɔ ɓáonkáɓa.

⁷ Ka nyɔngɔ á ɓeekea ndea Nɔ́a, Mokonga ɗántɔ̌migi nyɔngɔ á kema nde ɗákáɔnimbɛ, áoɓeekea nyɔngɔ nde Mokonga ayɔngi kángá á ngǎka, áɔsɛka koko ángbó ka amisa akɛ n'ékombo nɛkɛ bui. Kaɓondɔ unge ɗáteni nyɔngɔ á ɓato á ka mokonda akpɛ. Ka nyɔngɔ á ɓeekea, Mokonga áontanga nto á ɗoni.

⁸ Ka nyɔngɔ á ɓeekea, Abalaámu ɗáɓeeki mɔphani ndea Mokonga gea te, átokɛ ka nji nɛkɛ ágɛ ka nji nde Mokonga ɗámɔku gea átɔ́ɛ ú ka ɓotukɔ. Abalaámu áotóa kángá úba ɔma nde aoga.

⁹ Ka nyɔngɔ á ɓeekea, ɗáge koika ka nji á mɔkɔ ndɔ ɓea mɔkɛni. Ɗáiki ka ɛma kimoci na Isáka na Yakɔ́ɓɔ ɓunde ɗáɓátɔi tɔ mɔkɔ ndɔ moci ndea Mokonga

¹⁰ nga, Abalaámu ɗáoɓondeaga nji nde Mokonga ɗáangi na ɗácumi ngeɔ í akpɛ mbenɔ á mɔphɛkɔ í.

¹¹ Ka nyɔngɔ á ɓeekea, Sála phɔtɔ ka kophomi akɛ ɗátɔi ɓukpɛkpɛ á kumba á éme nanga ɓî ɗátú ngomba. Ɗátú ɓondɔ ka nyɔngɔ nde ɗánseɓei Mokonga, mmbé ɗámɔku gea te, aɓande ama k'ɛɓɔkɔti.

¹² Kaɓondɔ unge ka nyɔngɔ á nkpa moci, mmbé ɗáphomi ye tɔ phɛɛ, áoɓá n'ɛɓɔkɔti n'aɓiki ɓea ɓasɛɛngɔa na ɓea mbúme á ka mpɛphɛ óɓenge nnde nkpa nnaɔtɔka tanga í.

¹³ Suɓi á ɓeekea nɛɓɔ, ɓáokuwa ɓɔbu kángá tɔá á kema nde Mokonga ɗɛ́ɔku. Cɔ ɓɔ, ɗáɓáɔni gǎkɛ n'a phɔ́tɔ ɗanga, ɓáosesea ú. Mpɔ ɓáoɗigimisa gea, ɗáɓátú ɓakɛni, nji nɛsu nna ka mokonda.

¹⁴ Cɔ, ɓakpa ɓáɔyɔnga ɓó, ámbé ɓáphangisi base gea ɓáokáɓa nji nde ɓáendande kau ɓea nji nɛɓɔ á ɓɔkɔtɛana.

¹⁵ Atúoɓá na ɓákanisi nji nɛɓɔ á kala, ámbé ɗáɓátú na mbenɔ á ja aɓɔ kó.

¹⁶ Eya, ɗáɓákondi ndiu nji ánjá phɛɛ, ande gea, nji á n'ego. Kaɓondɔ unge Mokonga nnaokuwa na soni á ɔphana akɛ Mokonga nɛɓɔ. A ɓó ka nyɔngɔ nde Mokonga ɗáɓɔngisigi ka ɓɔ nji.

¹⁷ Cɔ, ka nyɔngɔ á ɓeekea, Abalaámu ɗámphúi Isáka ka phɛ́a mbenɔ nde Mokonga ɗántombigi ka ɗigimisa á ɓeekea nɛkɛ. Nanga ɓî ɗántɔi ngɔmu ndɔ ka mɔkɔ

¹⁸ Mokonga áongea: «Ka ɓeana na Isáka aunge oɓande na ɓasuko ɓásii.»

¹⁹ Nga, Abalaámu ɗáoúba te, Mokonga ana ɓukpɛkpɛ á jujúkisa á nkpa n'aku. Kaɓondɔ unge Mokonga ɗánsikisíí anakɛ. Nndɔ ande ɓea mphangiɔ á jujúka ka kukuwa.

²⁰ Ka nyɔngɔ á ɓeekea, Isáka ɗábisi njaga gǔ á Yakɔ́ɓɔ na Ɛsáu nnde atɔ̌mi nyɔngɔ nɛɓɔ nde abikaeka.

²¹ Ka nyɔngɔ á ɓeekea, Yakɔ́ɓɔ mbenɔ nde ɗátú bíbí á kukuwa, áobisa njaga gǔ á ɓana Yɔsɛ́phu gbɔgbɔ aɓɔ, áombeba Mokonga n'ětumíí ka sese á motumbɔ nɛkɛ.

²² Ka nyɔngɔ á ɓeekea, Yɔsɛ́phu ɓî ɗátú bíbí á kukuwa ɗéngoɗi Ɓaisilaɛ́li nyɔngɔ á toka aɓɔ ka Mísii. Áɔ̌ɔkusa nyɔngɔ á toisa á nkua akɛ, mbenɔ á tóka aɓɔ.

²³ Ka nyɔngɔ á ɓeekea, ɓaɓɔkɔti á Mósa ɓáɔnsɔmɛa ka ɓasonge ɓasaɔ, mbusa á ɓɔkɔtɛana akɛ nga, ɗáɓámɔni mbɛnjɛ na anjánjá. Ɗáɓákáɓángi gǎkɛ ɛɔphi ndea moamɛ.

²⁴ Ka nyɔngɔ á ɓeekea, Mósa, mbenɔ nde ɗátú nkpa angbóngbó, ɗákákondi ɓámɔphanɛ gea ande muna nseka nde ɓa moamɛ Phaláɔ.

²⁵ Ɗákondi ndiu gea, átambɛgɛ kimoci na ɓakpa ndea Mokonga. Áoyá ɓá na maseye ka mbenɔ abɔa ka ɓojeɗe.

²⁶ Ɗáúbi gea, tóndea akɛ ɓíndɔ ɗáɓántóndei Kiísito, ana ɓokambia ángbó phɛɛ kɔnyɛ́nya ɛtɔi bubui nde ɗátú ka Mísii nga, ɗáobisa mɔphɛ akɛ k'ophendɔ nde Mokonga amphendande.

²⁷ Ka nyɔngɔ á ɓeekea, Mósa ɗátóki na Mísii kángá á ɓánga esuia ndea moamɛ. Áosuia ú ɓea nkpa nde aɔmɔɔna Mokonga mmbé ɓákáɔmɔɔna n'iso.

²⁸ Ka nyɔngɔ á ɓeekea, Mósa ɗági Pasáka á k'ama mosá-mosá, áǒsosea Ɓaisilaɛ́li gea ɓásiɛ́ magia ka igǎnga éndu nɛɓɔ gea malaéka á kukuwa kěmowɛmbɛ ɓ'ánge ndea Ɓaisilaɛ́li.

²⁹ Ka nyɔngɔ á ɓeekea, Ɓaisilaɛ́li ɗáɓájabi Oɓenge á Ótana, n'aphú. Ɓî Ɓamísii ɗáɓákengi gea ɓó, Oɓenge áǒmia, ɓáotinda ɓɔbu kó!

³⁰ Ka nyɔngɔ á ɓeekea, Ɓaisilaɛ́li ɗáɓátimbi Yɛíkɔ ka ɓ'esa ngianjaga (6). K'esa á ko ngianjaga iɓɛ, ɓogaɔ ɛ́tɛ nnde ɗátimbi ú áɔngbɔɔkana.

³¹ Ka nyɔngɔ á ɓeekea, Laába nke á iɛɓɛ ɗákáku kimoci na ɓaɓiɓia ndea Mokonga nga, ɗéěsesi ánjá ɓasɔni-emani.

³² Cɔ, nɛ́yɔngɛ ye goto ɓo? Ké ye na mbenɔ á tɔ̌miaga nyɔngɔ moci-moci ndea Gidiɔ́ni, Baláka, Samusɔ́ni, Yɛphúta, Daúdi phɔtɔ Samuɛ́lɛ na ɓaɔtu-nyɔngɔ ndea Mokonga.

³³ Ka nyɔngɔ á ɓeekea unge ɗáɓátɔki nji ndea ɓaamɛ. Ɗáɓáɔbɛɗanaga ka kɔkɔta nɛɓɔ na koɗoni na tɔá á kema nde Mokonga ɗáɔku. Ɓakpa ɓuangbo ɗáɓáɗaki aphenɔkɔ á ɓasimba.

³⁴ Ɓakpa ɓuangbo ɗáɓákásiɗi mbenɔ nde ɗáɓěmaki ka nsa á káe. Ɓakpa ɓuangbo ɗáɓáóloki ka minyɔ á ngɔa. Ɓunde ɗáɓáɛli nyama aɓɔ áogbagaga. Ɓakpa ɓuangbo ɗáɓátú ɓauka ka mbenɔ á emani ka ɓeaga ekombo ndea ɓakɛni.

³⁵ Ɗátú phɔtɔ na ka ɓake nde ɗáɓěɓɔni goto ɓundɔ ɗáɓásí na ɓájujúki ka kukuwa. Ɓakpa ɓuangbo gǎkɛ ɓî ɗáɓětumigi ɓáokuwa, ɓáoyá gea ɓákěkoɗɛmbɛ. Ɗáɓákondi tɔ kukuwa, ka nyɔngɔ nde ɗáɓákondi ndiu jujúka ka kukuwa, ɓáoɓá na enda ánjá phɛɛ á mɛyɔ.

³⁶ Ɓuangbo goto ɗáɓěnɛphɛi na ɓinda aɓɔ. Ɗáɓěɓóege na ngoi á ngɔa ɓáǒmakea ka mekakɔ.

³⁷ Ɓáɔ̌ɓɛta ɓuangbo n'ɛtɛ ɓáokuwa. Ɗáɓětenigi ɓuangbo na ngɔa gbútuka iɓɛ. Ɗáɓěme ɓuangbo na píndí. Ɓuangbo ɗáɓáɔkɔɓa na ɓáɔ́li mpoko á ɓamɔgɔgɔ na nnde á ɓamɛmɛ. Ɗáɓáendi ka keuka, tambaga na gea á ɓojeɗe ka phɔaɓɔ.

³⁸ Eya, mokonda ɗákákenani na ɓakpa ɓea ɓundɔ. Ɗáɓáǒndandaɓiaga ka nkanda na mamba. Ɓáoɗa ka kubu ɛ́tɛ na kubu á oɗo.

³⁹ Ɓakpa ndɔ ɓɔbu Mokonga áǒsega ka nyɔngɔ á ɓeekea nɛɓɔ. Nanga ɓó, ɗáɓákáɔni gǎkɛ kema nde Mokonga ɗɛ́ɔku.

⁴⁰ Cɔ, Mokonga ɗáangi ka phɔasu kema ánjá phɛɛ, ɗákákóndi gea ɓátɔɛ ú kángá á ɓesu.