Ɓaɛbulanía 10 - Ɔngana á Kɛ̌kɛ

¹ Ɛɔphi ndea Mósa a tɔ na iimbiɔ á kema ánjánja nde aobika. Nna gǎkɛ ophangia koɗoni á kema kau. Nanga ɓakpa ɓáphúia ɔphɛ́ɔ ndɔ ka saga bui, nna tanda ɔtɔka n'aími ɓojeɗe á ɓakpa nde ɓáobika mosá á Mokonga.

² Atúoɓá n'aɔtɔka, ámbé ɓakpa nde ɓáoɓea moangɔ ndɔ, Mokonga aoíma ɓojeɗe nɛɓɔ mɔngɔ ímoci tɔndɔ. Ámbé ɓáká ye kɔɔyɔka ɓato á ɓojeɗe na ɓákátú ye ophúia k'ététe ɔ́phɛ́ɔ.

³ Cɔ, ka ɔphɛ́ɔ ndɔ, ɓakpa ɓá ndiu okanisia ɓojeɗe nɛɓɔ ka saga bui.

⁴ Nnde ande ka nyɔngɔ nde magia á mǔku á ngɔmbɛ na mǔku á mɛmɛ nnaɔtɔka n'atókisi ɓojeɗe.

⁵ Kaɓondɔ unge, mbenɔ á ngia á Yéso ka mokonda ɗáyɔngi gea: «Ɗókókóndi ɔphɛ́ɔ na ɛkɔmi ka Mokonga, ô ndiu oconja nyama á kokpa ka phɔani.

⁶ Ɔphɛ́ɔ na ɛkɔmi ka Mokonga á íma á ɓojeɗe káɔɓɔngɛi.

⁷ Ɗéyɔngi ɓe: ‹Cɔ, eme yɛ, nebiki ɔtɔtɔkisa kema nde oɓɛ Mokonga okondi nga, ɓondɔ unge ɓáɗundu ka phɔani suɓi á ɓuku nɛkɔ.›»

⁸ Kiísito ɗáyɔngi phɔ́ ɓe: «Oɓɛ ɗókókóndi ɔphɛ́ɔ, ɛkɔmi ka Mokonga, ɓanyama á toɓoa gǔ ɛ́tɛ-ɔ́phɛ́ɔ na ɛkɔmi ka Mokonga á íma á ɓojeɗe, nndɔ ɗákáɔɓɔngɛi.» Nanga ɔphɛ́ɔ ndɔ bui, ɛɔphi ndea Mósa tɔ unge asosi.

⁹ Mpɔ Kiísito â goto otútuisa yɔnga ɓe: «Cɔ, eme yɛ, nebiki ɔtɔtɔkisa kema nde okondi.» Wa, Mokonga áophúia moangɔ á kala ka bisa nnde á kɛ̌kɛ.

¹⁰ Cɔ, Yéso atɔtɔkisi kema nde Mokonga ɗákondi. Áobisa nyama akɛ sasakɛ tɔ mɔngɔ ímoci ka phɛ́a. Ka nyɔngɔ índɔ unge ɓojeɗe á ka měma asu aímiki.

¹¹ Ande ɗoni gea, ntoɓeigi-phɛ́a buakɛ aomamaga esa bui ka bɛɗanaga ekuma nɛkɛ. A phɔtɔ ophúiaga nkókó á ɔphɛ́ɔ nde nna tanda ɔtɔka íma á ɓojeɗe.

¹² Kiísito ɗábisi ndiu nyama akɛ sasakɛ k'ɔ́phɛ́ɔ mɔngɔ ímoci tɔndɔ ka íma á ɓojeɗe. Mbusa á í, áoika ka njaga á mǔku á Mokonga ka saga na saga.

¹³ Wa unge aoɓondea gea te, Mokonga áebisɛ ɓaɓiɓia nɛkɛ kusi á ecinji akɛ.

¹⁴ Ka ɛkɔmi ndɔ tɔ moci ka Mokonga, aunge Mokonga aími ɓojeɗe k'ésa bui ka ɓunde ětangi ɓato á ɓonjánja.

¹⁵ Měma á kanga ɓojeɗe phɔtɔ asóɗigimisíí ɓî ayɔngi phɔ́:

¹⁶ «Mɔkɔta ayɔngi ɓe: Nnde ande ɔngana nde nɛɔngani na ɓɔ mbusa á ɓ'esa ndɔɔ. Nebisande ɛɔphi nɛmɔ ka měma aɓɔ na ɗundua í ka úbapha aɓɔ.»

¹⁷ Goto: «Kékanisiɛku ɓojeɗe nɛɓɔ na tambea aɓɔ ájeɗe.»

¹⁸ Cɔ, kaɓɛ ɓojeɗe n'aímiki, ɛkɔmi ka Mokonga á íma ɓojeɗe nna ye na kantíti.

Magia á Yéso ande aphe á bîmisia á Mokonga

¹⁹ Cɔ, ɓaya! Ka nyɔngɔ á magia á Yéso unge ɓéké na ká ngǎka ka ngia k'ɔ́ma á kanga ɓojeɗe phɛɛ.

²⁰ Yɛ asókoɗei aphe á kɛ̌kɛ á ɓoamia ka nyɛ́nyɛa bɔngɔ agbae éndu á Mokonga. Bɔngɔ ndɔ ande nyama akɛ sasakɛ.

²¹ Cɔ, ɓena ngbɛga á ɓatoɓeigi-phɛ́a mmbé ěmamei ɓato á Mokonga.

²² Kaɓondɔ, ɓémbǐmisiɛni Mokonga na měma á koɗoni nnde atúmi na ɓeekea, phɔtɔ na nyama nde ɓesokosi ú na iɓo nde aánjá.

²³ Ɓéambɛni akpɛ nseɓeɔ nɛsu nnde ɓɛɔtɔmiaga mosá á ɓakpa nga, Mokonga nnaotinganisa mɔkɔ nɛkɛ.

²⁴ Ɓéenganɛni ka gea te, nkpa na nkpa átɔtɔkisɛ ekondi na ekuma ánjá ka dakɛ.

²⁵ Ɓékéɗeketɛmbɛ dondanaga kimoci ɓíndɔ ɓakpa ɓuangbo ɓáɛmbani na ɗeketa í. Ɓégbagisanɛgɛni goto phɛɛ nga, ɓɔɔni gea esa á ja á Mɔkɔta a ye tɔ bíbí.

²⁶ Cɔ, aoɓá na ɓeɓeeki sɛkisiaga á ɓojeɗe mbusa á úba base koɗoni, nna ye na phɛ́a nde a ɓei ka íma á ɓojeɗe.

²⁷ Kema nde ajigi gǎkɛ a tɔ ɓondeaga á tena nyɔngɔ akpɛ nnde aoɓángisa, phɔtɔ na nsa ángbó nde ɛ̌ɛkɛkisagande ɓaɓiɓia ndea Mokonga.

²⁸ Ɓakpa ɓaɓɛ kaɓɛ ɓasaɔ aoɓá na ɓámamei nyɔngɔ á nkpa buakɛ mmbé ɗátingíígi ɛɔphi ndea Mósa, ɓáomowa nkpa ndɔ kángá ngomi.

²⁹ Cɔ, ɓookanisia ɓo? Nkpa nde aɔmɓɛnjiaga Muna-Mokonga, kákeni ɓántambisɛgɛ akpɛ phɛɛ? Nga, yɛ nnaɔɔna kantíti á magia á ɔngana nde aími ɓojeɗe nɛkɛ, abómi phɔtɔ Měma mmbé asóúbisi ɓonjánja-ékondi ndea Mokonga.

³⁰ Nga, ɓéomúba mmbé ɗáyɔngi: «Eme aámbé negisiande, eme aámbé nephendande.» Â goto ɔyɔnga gea: «Mɔkɔta atenande nyɔngɔ ndea ɓakpa nɛkɛ.»

³¹ Cɔ, ande ngomi phɛɛ ka nkpa nde agúande ka njaga Mokonga mmbé aoenda.

³² Kanisiani phɔ́ kema nde ɗátɔtɔkɛani ka ɓenu mbenɔ nde ɗóɓotɔi owanga ndea Mokonga. Mbusa índɔ ábɔa ɓôtambaga akpɛ phɛɛ, ɓô gǎkɛ ophiphia ú.

³³ Ɓakpa ɓunɛngbo sɔsɔɓɛ anu ɗáɓákpangi phɔ́ bóma aɓɔ na tambisaga aɓɔ mosá á ɓakpa ɓunɛngbo sɔsɔɓɛ anu ɓóǒgama ɓunde ɗáɓáotambaga.

³⁴ Nga, ɗóɓǒkui ngomi ɓunde ɗáɓátú ka mekakɔ. Ɓô phɔtɔ oɓeekea na maseye utá á nkumba nɛnu ka nyɔngɔ nde ɗóɓooúba gea ɓona ɛtɔi ánjá phɛɛ nnde nnaoújukana.

³⁵ Ɓókoɗeketɛmbɛ nseɓeɔ nɛnu nga, ka nyɔngɔ índɔ unge ɓɔtɔande ophendɔ ángbó.

³⁶ Cɔ, akeni ɓóɓɛ na moíngí mpɔ ɓɔ́tɔtɔkisɛ kema nde Mokonga akondi ka ɓondɔ unge ɓɔtɔande kema nde ɗánɔɔku.

³⁷ Ɓáɗundu suɓi á Ɓuku á Mokonga ɓe: «Ajigi mbenɔ ábɔa phɛɛ ka gea mmbé aobika, abika tɔ, káiphiɛku.

³⁸ Nkpa nde ande nto á ɗoni mosá ani, aendande ka nyɔngɔ á ɓeekea. A gǎkɛ oɓá n'ěcoe, měma ani káɓɛku na maseye ka yɛ.»

³⁹ Ɓéké ɓakpa nde ɓeǒcoa ka ɓeekea na gǎ ɓungaga. Ɓe ndiu ɓakpa nde ɓemɓeeki Mokonga ka gea te, ásoamisɛ ka měma.