Ɓaɛbulanía 1 - Ɔngana á Kɛ̌kɛ

Mokonga ɗáyɔngi k'aphe ndea Miki ndeakɛ

¹ Ka mbenɔ á kala, Mokonga ɗáyɔngi na ɓatatasu mɔngɔ ásii na k'ététe ɗanga-ɗanga, k'aphe á ɓaɔtu-nyɔngɔ nɛkɛ.

² Cɔ, ka ɓ'esa nde á sungiaga, ɗáyɔngi gǎkɛ na ɓesu k'aphe ndea Miki-Mǒko ndeakɛ. Miki ndɔ aámbé yɛ ɗámbisi mɛna-ɓotukɔ á kema bubui, na k'aphe á Miki ndɔ unge Mokonga ɗáconji mokonda bui.

³ Ɓonjánja á ɓoombia á Mokonga áophenuaga n'atóki ka yɛ. Miki ndɔ ankengi tɔ Mokonga ka kema bubui. Yɛ, asúki mokonda na ɓukpɛkpɛ á nyɔngɔ ndeakɛ. Mbusa á yɛ sokosea ɓojeɗe á ka měma á ɓakpa, â ye tɔ koika na koba ka njaga á mǔku á Mokonga Mɛna-ɓukpɛkpɛ bui.

Kɔkɔta á Muna-Mokonga anyɛ́nyi nnde á ɓamalaéka

⁴ Cɔ, kɔkɔta ndea Miki ndɔ anyɛ́nyi nnde á ɓamalaéka, ɓíndɔ Mokonga ɗámophi ina á ɓoombia kɔnyɛ́nya ina nde ɓamalaéka ɓá ně.

⁵ Nga, nna na ka ɓamalaéka nde Mokonga angoɗimbɛ mɔnɔ gea: «Oɓɛ onde Miki-Mǒko ndeamɔ. Kesande eme nende Abakɔ.» Goto kángoɗimbɛ mɔnɔ tanda ka ɓamalaéka: «Neɓande ka yɛ, Abakɛ na aɓande k'éme, Miki-Mǒko.»

⁶ Ɓî Mokonga ɗámbikisi Miki nɛkɛ ánge ka mokonda, â ndiu ɔyɔnga gea: «Ɓamalaéka ndea Mokonga ɓɔbu ɓágbukɛ muanku mosá akɛ.»

⁷ Ka phɔa ɓamalaéka, Mokonga ayɔngi ɓe: «Něbisi ɓamalaéka ndeamɔ ɓea maphopho, néǒbisa ɓabɛɗanigi nɛmɔ ɓea ɛɛmbɛ á nsa.»

⁸ Ka phɔa Miki ndeakɛ, Mokonga áɔyɔnga ndiu gea: «Oo! Mokonga! Kankaanga á koɓoamɛ ndeakɔ aɓande ka saga na saga. Ɔbɛɗanagande na motumbɔ á koɓoamɛ ndeakɔ ka koɗoni.

⁹ Nga, okondi ɓonjánja, ôkangea ɓojeɗe. Ka nyɔngɔ índɔ unge Mokonga, Mokonga ndeakɔ aɔsɔmbu, áokosia gamba á jaí ka mɔ̌. Ɗákoɗokomisi ndiu ka sɔmbɔa akɔ ka nkíndí á ɓadakɔ.»

¹⁰ Mokonga ɗáyɔngi phɔtɔ: «Ka nkpangeɔ, Mɔkɔta oɓɛ aámbé ɗóconji oɗo, ego ande ekuma á ka njaga akɔ.

¹¹ Mokonda na koba káɓɛku ye. Bubui anyɔɔkanagande ɓea ngɔ́mbɛ. Cɔ, oɓɛ, oikande mɛyɔ.

¹² Oikitagande ú ɓea ngɔ́mbɛ, â phɔtɔ koangana. Oɓɛ kóoketiɛku, ɓasaga nɛkɔ ɓákásungiɛgɛeka.»

¹³ Mokonga kángoɗimbɛ mɔnɔ tanda ka ɓamalaéka ndeakɛ: «Ika ka njaga ani á mǔku, na ka ɓî něbisande ɓaɓiɓia ndeakɔ kusi á ecinji akɔ.»

¹⁴ Cɔ, ɓamalaéka ɓánde ɓaani? Ɓɔbu ɓá tɔ ɔmbɛɗaneaga Mokonga. Yɛ aǒteka ka enga ɓakpa nde ɓátɔande ɓoamia á ka měma.