3 Yoáni 1 - Ɔngana á Kɛ̌kɛ

Nsesɔ

¹ Eme Ngbɛga á kanisa aámbé neɗundu ɓaoɓa nde Ka Gáyɔ, mmbé nenkondi ɗoni.

² Cɔ, dani ékondi, nenasiki á gea, nyɔngɔ á ka nyama akɔ bui átambɛ ánjá ɓíndɔ a ka měma akɔ.

Yoáni aombeba Gáyɔ

³ Netúmima na maseye phɛɛ mbenɔ nde ɓana-amasu, ɓájúma, ɓáɔmɔtɔmiaga gea, ona ɗoni suɓi akɔ, na o phɔtɔ oenda ka ɓeana na ɗoni.

⁴ Kema nde amopi maseye phɛɛ, ande ɔ́ka ani gea, ɓaniki amɔ ɓáotambea ka ɓeana na ɗoni.

⁵ Dani ékondi, ɔɔbɛɗanaga na měma mo ka phɔa á ɓana-ayi na ka phɔa á ɓakɛni.

⁶ Ɓɔ, ɓáɗigimisi nyɔngɔ ékondi nɛkɔ mosá á kanisa. Cɔ, óenga ɓɔ ka tamba nɛɓɔ ɓíndɔ amɓɔngɛi Mokonga.

⁷ Nga, cina á tamba nɛɓɔ, ande bɛɗanaga k'ína á Kiísito, ɗáɓáotamba kángá á mɛma ka kema mɔtɛ á ɓunde ɓáná ɓaɓêki.

⁸ Cɔ, akeni ɓesu ɓéengɛ ɓadasu ndɔ ka gea, ɓéjúkanɛ na ɓɔ k'ékuma á tɔ̌mia á ɗoni.

Mbino á Diɔtɛɛ́phɛ na Dɛmɛtiíɔ

⁹ Netóɗundu ɓaoɓa ábɔa ka kanisa. Cɔ, Diɔtɛɛ́phɛ mmbé aokonda maga mosá, ayé gǎkɛ nyɔngɔ á suɓi á ɓaoɓa ndɔɔ.

¹⁰ Kaɓondɔ, mbenɔ nde nejúande, nɛnɔtɔmiagande base kema nde aogea, nga yɛ, aɔyɔnga nyɔngɔ ájeɗe n'índe á mbɛa ka phɔa asu. Nna tɔndɔ nndɔ, yɛ nna ǒsesea ɓadasu. A phɔtɔ ǒimisia ɓunde ɓákondi sesea á ɓadasu na ɓeaga aɓɔ suɓi á kanisa.

¹¹ Dani ékondi, kóɓeɛ mɔnɔ tambea ájeɗe, ɓeá ndiu tambea ánjá. Nkpa nde aogea ánjá, ande ɓa Mokonga, mmbé gǎkɛ aogea ájeɗe, nna tanda oúba nyɔngɔ á Mokonga.

¹² Ɓakpa ɓɔbu ɓáoɗigimisa gea, Dɛmɛtiíɔ ande nkpa anjánjá, nndɔ ande ɗoni. Ɓesu phɔtɔ ɓeoɗigimisa nyɔngɔ ka phɔa akɛ, na oɓɛ ooúba gea ɗigimisa á nyɔngɔ nɛsu ande ɗoni.

Mɔkɔ

¹³ Nena nyɔngɔ ásii ka ngoɗea akɔ, kékondi gǎkɛ ɗundua í suɓi á ɓaoɓa ndee.

¹⁴ Neseɓei ɔna akɔ kɛ̌kɛnde na ɓɛyɔngagande kimoci.

¹⁵ Ambe ɓujɛjɛ áɓɛ n'oɓɛ. Ɓadasu ɓáosambei. Ósambea phɔtɔ ɓadasu kó moci-moci.