2 Pɛ́tɛɛ 3 - Ɔngana á Kɛ̌kɛ

Mɔkɔ á ja á Mɔkɔta

¹ Cɔ, ɓadani ékondi, nnde a ye ɓaoɓa á ko iɓɛ nnde nenóɗundui. Ka ɓaoɓa iɓɛ ndɔ bubui, ɗékondi kanisia anu na jujúkisa á úbapha anu ka gea ɓóɓɛ na kanisia ánjá.

² Kanisiani nyɔngɔ nde ɓaɔtu-nyɔngɔ ndea Mokonga ɗáɓánógoisigi ka phɔa Mɔkɔta na Namisi.

³ Úbani phɔtɔ gea, ka ɓ'esa á sungiaga, ɓakpa nde ɓáendande ka ɓeá á mɔphɛ nɛɓɔ sasaɓɔ ɓábikande. Ɓɔ, ɓánɔtɛbɛagande,

⁴ na yɔnga te: «Mɔkɔta ɗáɔku gea, ajande. Cɔ, yɛ awani? Ka nyɔngɔ nde kpangá á ɓî ɓatatasu ɗáɓáku kala, kema bui a phɔ́tɔ ɓíndɔ ɗátú ka conjá á mokonda!»

⁵ Cɔ, ka yɔnga aɓɔ ɓó, ɓáokonda ɓosea gea, Mokonga, ɗáconji mokonda na koba kala ka moyo akɛ. Mokonga ɗáconji mokonda na iɓo, áɔɓɔngisiaga ú na iɓo.

⁶ A phɔtɔ na iɓo unge mokonda á kala ɗáújukani na túma á iɓo phɛɛ.

⁷ Moyo á Mokonga abisi phɔtɔ mokonda na koba á kɛ̌kɛnde, ka túkatúka í na nsa k'ésa á tena á nyɔngɔ. Esa ndɔ unge ɓakpa ɓɔbu, ɓunde ɓákáomɓánga Mokonga ɓáɓúngagande.

⁸ Ɓenu gǎkɛ ɓadani ékondi, ana kema moci nnde kákeni ɓóɓoseɛ nyɔngɔ ndee: K'íso á Mɔkɔta, esa moci a ɓea saga ɛlɛphu moci (1.000). Saga ɛlɛphu moci (1.000), a ɓea esa moci.

⁹ Cɔ, Mɔkɔta nnaoiphia ka tɔtɔkisa á mɔkɔ nɛkɛ ɓíndɔ ɓakpa ɓuangbo ɓáokanisia. Yɛ, a gǎkɛ onóphiphia nga, kákondi gea, ka ɓenu moci áɓungɛgɛ. Akondi ndiu gea, ɓakpa ɓɔbu ɓákětiɛ tambea nɛɓɔ ájeɗe.

¹⁰ Esa ndea Mɔkɔta abikande ɓea nkukuɓa. K'ésa ndɔ, koba anyɛ́nyande na nduu á ɓangisa, ɓasɛɛngɔa ɓáenyanyɔande. Mokonga agogande mokonda na kema bubui nde ɓakpa ɓáconji.

¹¹ Cɔ, ɓî kema bubui agogokanande ɓó, akeni tambea anu áɓɛ ɓo? Akeni tambea anu áɓɛ ɓíndɔ Mokonga akondi na tamba mosá akɛ kángá kisɛki,

¹² ɓî ɓooɓondea gea esa ndea Mokonga ákamisɛgɛ júa. Esa ndɔ, koba aújukanande na nsa, ɓasɛɛngɔa á na koba ɓáenyanyoande k'ɛɛmbɛ á nsa.

¹³ Ɓe gǎkɛ oɓondea koba na mokonda á kɛ̌kɛ, ɓíndɔ Mokonga ɗáɔku, ɔmande koɗoni aɓande.

¹⁴ Kaɓondɔ unge ɓadani ékondi, ka ɓondeaga esa ndɔ, suiani ɓá na tambea ánjá, kángá kisɛki mosá á Mokonga na ɓóɓɛ na ɓujɛjɛ mosá akɛ.

¹⁵ Úbani ánjá gea, phiphia ndea Mɔkɔta nɛsu, aunge ande ɓoamia nɛnu á ka měma. Nndɔ unge Pɔ́lɔ, dasu ékondi, ɗánóɗundui phɔtɔ na kɔɓɔɔngɛ nde Mokonga ɗámophi.

¹⁶ Ɗáɗundu tɔ ɓó suɓi á ɓaoɓa nɛkɛ bubui ɔma nde ɗáyɔngi nyɔngɔ ndɔɔ. Suɓi á ɓaoɓa ndɔ, a gǎkɛ na ɔma ákpɛkpɛ ka engekisa í. Kaɓondɔ, ɓabóbó na ɓunde měma aɓɔ kámɔti, ɓáoketia kantíti á nyɔngɔ ndɔ, ɓíndɔ ɓáogea k'ɔ́ma nɛngbo suɓi á Ɓuku á Mokonga. Ka gea aɓɔ ɓó, ɓáǒtúkatúka sasaɓɔ.

¹⁷ Cɔ, ɓenu ɓadani ékondi, nɛnɔ́nyɔtɛi ye gǎkɛ nyɔngɔ ndɔɔ. Kaɓondɔ, ɛ́ngɛphani, ɓókǒdemisɛmbɛ ye ka nyɔngɔ á odemayɔ ndea ɓagoisigi á mbɛa. K'aphe ndɔ unge ɓǒdoɗeande ka měma.

¹⁸ Cɔ, mɔtani ka ɓonjánja-ékondi na úbapha ndea Mɔkɔta na Namisi nɛsu Yéso Kiísito. Yɛ, áɓɛ na ɓoombia, kɛ̌kɛnde na ka saga na saga. Áɓɛ ɓó.