2 Pɛ́tɛɛ 2 - Ɔngana á Kɛ̌kɛ

Sungiaga á ɓagoisigi á mbɛa

¹ Kala, ɓaɔtu-nyɔngɔ á mbɛa ɗáɓásɛnɛki ka ɔlɔ á Ɓaisilaɛ́li. A phɔtɔ ɓó unge ɓagoisigi á mbɛa ɓásɛnɛkande ka ɔlɔ anu. Ɓagoisigi á mbɛa ndɔ, ɓángisande ka ɓɔsɔmɛa ɓɔphɛi ájeɗe nde aoɓúngisaga na ka ɓî ɓán'yande Mɔkɔta nde ɗáetókisi ka kɔkɔɓɛ á ɓojeɗe. Kaɓondɔ, ɓáɓoteande otúkɔtúkɔ ka phɔaɓɔ kángá iphia.

² Ɓakpa ɓásii ɓáeɓeande ka tambea nɛɓɔ ájeɗe, na ka nyɔngɔ aɓɔ unge, ɓakpa ɓábómande aphe á ɗoni.

³ Ka nyɔngɔ á mɔphɛ ájeɗe á tɔá á imɔna, ɓagoisigi á mbɛa ndɔ ɓátɔande ka imɔna á ka njaga anu ka demaga anu. Ka ɓɔ, ɗáɓáteni ye gǎkɛ nyɔngɔ nɛɓɔ kala, n'otúkɔtukɔ nɛɓɔ káiphiɛku.

⁴ Cɔ, Mokonga ɗákáekui ɓamalaéka nde ɗáɓági ɓojeɗe ngomi. Ɗáeɓóege ndiu na ngoi á ngɔa na makea aɓɔ ka kaiphiɔ, ɔma nde ɓáoɓondeaga tena á nyɔngɔ nɛɓɔ.

⁵ Mokonga ɗákákui mokonda á kala ngomi, ɗábikisi ndiu túma á iɓo phɛɛ gǔ á mokonda nde ɗátúmi na ɓato á ɓojeɗe. Ɗánamisi tɔndɔ Nɔ́a, mmbé ɗáɔtɔmia mbino á koɗoni, na amisa phɔtɔ ɓakpa ɓunɛngbo ngianjaga iɓɛ (7).

⁶ Mokonga ɗáteni phɔtɔ akpɛ nyɔngɔ á ntanga-nji á ka Sɔdɔ́ma na Gɔmɔ́la, áoɛkɛkisaga ú na nsa, áoɓá ebǔ. Nndɔ áoɓá mphangiɔ ka ɓunde ɓánáomɓánga Mokonga.

⁷ Mokonga ɗánamisi gǎkɛ Lɔ́ti, nto á koɗoni mmbé ɗáotambaga ka měma phɛɛ ka nyɔngɔ á tambea ájeɗe ndea ɓato á ka ntanga-nji ndɔɔ.

⁸ Nga, nto á koɗoni ndɔ ɗáiki ka ɔlɔ aɓɔ, ɗáɔɔ́ka na ɔna á esa bui tambea nɛɓɔ ájeɗe nnde ɗáotambisaga měma á koɗoni nɛkɛ.

⁹ Cɔ, Mɔkɔta aoúba amisa suɓi á tombaga, ɓakpa nde ɓáomɓánga. A phɔtɔ oúba bisa á ɓato á ɓojeɗe ka mpɛphɛ ka tambisaga aɓɔ k'ésa á tena nyɔngɔ.

¹⁰ Eya, aetambisagande phɛɛ ɓunde ɓáoyá kɔkɔta ndea Mokonga na ɓá ndiu oɓea mɔphɛ á ɓɔjɔɔkiɔ á kokpa. Cɔ, ɓagoisigi á mbɛa ndɔ ɓánde ɓato á kankiki phɛɛ na ɓemboko, ɓánáoɓánga bóma á ɓato á ɓoombia á na koba.

¹¹ Nanga ɓamalaéka íɓunde ɓáɛnyɛ́nyi ɓato á na koba ka ɓukpɛkpɛ n'okuu, ɓáná ɔ̌tɔnga na phɔ́ta aɓɔ mosá á Mɔkɔta.

¹² Ɓagoisigi á mbɛa ndɔ, ɓáúkí gǎkɛ úbapha ɓea ɓanyama, ɓunde ɓáɓɔkɔtɛani tɔ ka ta ka mɛ̌kɔ na mowa aɓɔ. Ɓakpa ndɔ ɓáobóma kema nde ɓánáoúba na ɓákuwande ɓea ɓanyama.

¹³ Ophendɔ nɛɓɔ aɓande tambaga ka nyɔngɔ á ɓojeɗe nde ɗáɓági. Ɓána maseye ka tɔtɔkisa base mɔphɛ nɛɓɔ ájeɗe somani. Mbenɔ nde ɓooɓá na ɓɔ ka jaí, ɓáoɓá na maseye ka dema anu, kiɗia aɓɔ ka ɔlɔ anu ande kema á soni na kema á jɔɔkisa á měma.

¹⁴ Ɓána iso-iso phɛɛ, ɓáká tanda kɔɛla na gea á ɓojeɗe. Ɓáǒdema ɓakpa nde ɓákákákámani ka ɓeekea. Měma aɓɔ atúmi na mɔphɛ ájeɗe á tɔá kema bubui. Mokonga aɛsɛmɛigi.

¹⁵ Mbusa á ɗeketa aɓɔ aphe á ɗoni, ɗáɓáɓúngigi, ɓáoɓea aphe ndea Baláma muna Bɛɔ́li. Yɛ, ɗákondi tɔá á imɔna k'aphe ájeɗe,

¹⁶ â gǎkɛ kɔɔ́ka oyeyɔ ka nyɔngɔ á ɓojeɗe nɛkɛ. Mponda mmbé ande kauma, ɗáyɔngi ɓea nkpa, áonimisia mɔtu-nyɔngɔ ndea Mokonga ndɔ áɗeketɛ aphe ndɔ á kobóbó.

¹⁷ Ɓagoisigi á mbɛa ndɔ, ɓá ɓea ntogɔ n'aphú, phɔtɔ ɓea egugu nde sumbu aɔkɔɓisa. Mokonga ɗáebisíí ɔma á ɓuiki, ka kindi ángbó phɛɛ.

¹⁸ Ɓáǒɗokoa na nyɔngɔ á ɓemboko na á jǎi-jǎi. Ka mɔphɛ nɛɓɔ á iɛɓɛ, ɓáǒɓotea ɓunde ɓátóɗeketani na ɓakpa nde ɓáoenda k'ódemayɔ.

¹⁹ Ɓáɔ̌ɔkɔa ɓakpa ndɔ gea ɓátókande ka kɔkɔɓɛ, nanga ɓɔ sasaɓɔ ɓánde ɓakɔɓɛ á ɓojeɗe nga, nkpa buakɛ ande nkɔɓɛ á kema nde akondi suɓi á měma akɛ phɛɛ.

²⁰ Cɔ, ɓakpa nde ɓá ye múbi Yéso Kiísito Mɔkɔta na Namisi nɛsu, ɗáɓáɗeketi ɓojeɗe á ka mokonda. Ɓá ye gǎkɛ kosikia goto ka kɔkɔɓɛ í, ɓojeɗe nɛɓɔ á kɛ̌kɛ anyɛ́nyande nnde á kala.

²¹ Atú ye phɔ́ oɓá ánjá ka ɓɔ, ámbé ɗáɓákáúbi aphe á ɗoni. Cɔ, ɗáɓáúbi ye, ɓâ gǎkɛ oɗeketa ɛɔphi ánjá nnde ɗáɓěgoisigi.

²² Ande gea te, tambea aɓɔ aphangi base mɛní ndee: «Mbwa asikíí ea á ɓɔɔki akɛ» na «Ngɛa nde ěsokosi, asikíí goto éúphá n'esau.»