2 Pɛ́tɛɛ 1 - Ɔngana á Kɛ̌kɛ

Nsesɔ

¹ Eme Simɔ́ni Pɛ́tɛɛ, mbɛɗanigi na nteki nde ɓa Yéso Kiísito, aámbé neɗundu ɓaoɓa ndee. Nenóɗundui ɓenu íɓunde ɓona ɓeekea ángbó ɓea ɓesu, ka nyɔngɔ á koɗoni ndea Mokonga na Namisi nɛsu Yéso Kiísito.

² Ambe ɓonjánja-ékondi na ɓujɛjɛ áɓikɛ ka ɓenu, ka nyɔngɔ á úba anu ánjá Mokonga, na Mɔkɔta nɛsu Yéso.

Mokonga aɛsɔmbu na ɔphana á ɓakpa nɛkɛ

³ Ka ɓukpɛkpɛ nɛkɛ, Mokonga asophi kema bui nde akeni ka enda asu. Ɗágeani ɓó ka gea, ɓéjukanɛ ka beba akɛ, na ka úbisa asu mmbé ɗásɔɔphani ka ɓá na ɓoombia na ɓonjánja nɛkɛ sasakɛ.

⁴ Ka nyɔngɔ índɔ unge, asophi mɔkɔ ánjá phɛɛ na ángbó ka gea, ɓókongiɛmbɛ ka otúkɔtúkɔ nde mɔphɛ ájeɗe á ka mokonda aobika ně na ɓójukanɛ na Mokonga sasakɛ.

⁵ Kaɓondɔ, geani ɓukpɛkpɛ ka yamea á tambea ánjá gǔ á ɓeekea nɛnu na gǔ á tambea ánjá, ɓóyameɛ úba á Mokonga

⁶ na gǔ á úba á Mokonga, ɓóyameɛ ɛngɛpha na gǔ á ɛngɛpha, ɓóyameɛ moíngí na gǔ á moíngí, ɓóyameɛ tambea ánjá mosá á Mokonga,

⁷ gǔ á tambea ánjá mosá á Mokonga, ɓóyameɛ ekondi á komunamema na gǔ ékondi á komunamema, ɓóyameɛ ekondi.

⁸ Cɔ, ɓo ye oɓá na kema ndɔ bui, n'aɓiki suɓi anu, anóphande ɓukpɛkpɛ á bɛɗaneaga ú na tútuisa úbapha anu ka Mɔkɔta nɛsu Yéso Kiísito.

⁹ A gǎkɛ oɓá nkpa na nna na kema ndɔ, ande gea, nnaɔɔnapha ánjá, a ɓea keíme-íme, aɓosei gea, ɗáɓásokosei ɓojeɗe nɛkɛ á kala.

¹⁰ Cɔ, ɓaya, geani ɓukpɛkpɛ anu phɛɛ ka bisa á měma anu ka Mokonga mmbé ɗánɔɔphani na ɗánɔsɔmbu. Ɓo ye ogea ɓó, ɓókóngiɛku tanda ka ɓojeɗe.

¹¹ Kaɓondɔ, ɓánokoɗeande phɛɛ aphe á ngia ka koɓoamɛ á mɛyɔ ndea Mɔkɔta na Namisi nɛsu Yéso Kiísito.

¹² Ka nyɔngɔ índɔ unge nekondi kanisia anu nyɔngɔ ndɔ esa bui, nanga ɓo ye oúba, na kakamana ka nyɔngɔ á ɗoni nde ɗáɓánɔtɔ̌mi.

¹³ Eya, nɛɔni ánjá nénojujúkisɛ ka kanisia anu mbenɔ nde ne phɔ́tɔ koenda.

¹⁴ Nga, neoúba gea, kukuwa ani a ye bíbí, ɓíndɔ Mɔkɔta nɛsu Yéso Kiísito ɗámophangi base.

¹⁵ Eya, negeande ɓukpɛkpɛ ani bui ka gea, mbusa á kukuwa ani, ɓókoɓoseɛmbɛ nyɔngɔ ndee.

Ɓunde ɗáɓáɔni ɓoombia á Yéso

¹⁶ Cɔ, mbenɔ nde ɗéɓenóúbisi nyɔngɔ á ja á Mɔkɔta nɛsu Yéso Kiísito na ɓukpɛkpɛ nɛkɛ, ɗéɓékébɛɗaneigi egani á jǎi-jǎi, nnde ɓakpa ɓáophusiaga. Ɗɛ́ɓɛɔni ndiu na iso asu sasasu ɓongbóngbó akɛ.

¹⁷ Nga, Abɛ Mokonga ɗámophi ɓokutú na ɓoombia, mbenɔ nde ɛsɔ á Mokonga mɛna-ɓoombia ɗáyɔngi gea: «Mmbé ande Miki nɛmɔ ékondi. Yɛ, amɔɓɔngɛi phɛɛ.»

¹⁸ Eya, ɓesu ɓáunge ɗɛ́ɓɛɔ́ki ɛsɔ ndɔ n'aotóka na koba, mbenɔ nde ɗéɓetú kimoci na Yéso gǔ á mamba ndea Mokonga.

¹⁹ Ɓeɓeeki phɔtɔ phɛɛ nyɔngɔ nde ɓaɔtu-nyɔngɔ ndea Mokonga ɗáɓátɔ̌migi. Ɓenu ɓogi phɔtɔ ánjá nga, ɓoambi nyɔngɔ nɛɓɔ. Mbino ndɔ a ɓea ɔbɛa n'aɔbɛnya ka keiphe, na ka ɓî esa agande kosa na mbenɔ nde sɛɛngɔa á kamɓimba abɛnyande ka měma anu.

²⁰ Úbani phɔ́ gea, nna na nkpa nde aɔtɔka n'ayɔngi base ka yɛ sasakɛ kantíti á nyɔngɔ nde ɓáɔtú suɓi á Ɓuku á Mokonga.

²¹ Ka nyɔngɔ nde, nna tanda na nyɔngɔ nde ɓáɔtú ka kokpa. Ɓaɔtu-nyɔngɔ ndea Mokonga ɗáɓátɔ̌migi ndiu nyɔngɔ nde ɗátóki ka Mokonga ka ɓukpɛkpɛ á Měma á kanga ɓojeɗe.